O vai o Iesu Mesia ?
I to’na farereiraa i te Tino Ahuru ma Piti Aposetolo i Kaisarea Philipi ra, ua ani Iesu, « o vai râ Vau nei i ta outou na parauraa? » Ua pahono atura o Petero, te Aposetolo Faatere, « o te Mesia Oe, te Tamaiti a te Atua ora » (Mataio 16:15-16). I muri mai ua faaite o Petero e « ua haapa‘o-atea-hia o Iesu hou te tumu o teie nei ao » (1 Petero 1:20). « I te Metua atoa hoi Oia i te haamataraa, e o te Matahiapo Oia » (PH&PF 93:21).
I te taime te opuaraa a te Metua – te rave‘a no te faaora e no te oaoa (a hi‘o Alama 34:9) – a hohorahia’i (a hi‘o Alama 42:5,8), ua titauhia te hoê taata ia aufau no te horo‘a i te ora e te aroha i te feia atoa o tei farii i te opuaraa (a hi‘o Alama 34:16; 39:18; 42:15). Ua ani te Metua, « o vai ta‘u e tono ? » Ua ma‘iti te taata tei parauhia o Iesu i te pahono na roto i ta’na iho ma‘itiraa e to’na iho hinaaro, « Teie au, a tono ia‘u » (Aberahama 3:27). « E te Metua, ia haapa‘ohia to oe hinaaro e no oe te hanahana e a muri noa’tu » (Mose 4:2).
Ei faaineineraa, ua hamanihia te fenua : « E na roto i te Tamaiti, oia hoi, i ta‘u Fanau Tahi, i hamani ai au i [te fenua] » ua parau maira te Metua (Mose 1:33; a hi‘o atoa Ephesia 3:9; Helamana 14:12; Mose 2:1).
Te mau i‘oa tumu o Iesu Mesia
Ua matauhia Oia o Iehova e te mau peropheta no te Faufaa Tahito (a hi‘o Aberahama 1:16; Exodo 6:3). Ua faaitehia i te mau peropheta To’na taeraa mai : « Inaha, te Arenio a te Atua, oia ïa, te Tamaiti a te Metua mure ore ra ! » (1 Nephi 11:21; a hi‘o atoa Ioane 1:14). Ua parauhia To’na metua vahine ia « mairi i te i‘oa ia Iesu…e parauhia Oia i te Tamaiti na te Teitei » (Luka 1:31-32).
Te faaite mai nei te mau i‘oa tumu e te mau i‘oa pii e rave rahi i Ta’na misioni e ohipa hanahana. Ua haapii Oia iho : « O Vau te maramarama e te ora o te ao nei. O Vau te Alepha e te Omega, te matamehai e te faahopea » (3 Nephi 9:18). « O Vau nei to outou arai i te Metua » (PH&PF 29:5; a hi‘o atoa PH&PF 110:14) « O vau te tia‘i mamoe maitai » (Ioane 10:11). « O te Mesia Vau, te Arii o Ziona, te Mato o te ra‘i » (Mose 7:53). O Vau te pane ora; o te haere mai Ia‘u nei, e ore roa ïa e poia [aore râ] e poihâ » (Ioane 6:35). « O Vau te vine mau, e o tau Metua te faaapu » (Ioane 15:1). « Tei Ia‘u te ti‘a-faahou-raa e te ora » (Ioane 11:25). « O Vau… te feti‘a po‘ipo‘i anaana ra » (Apokalupo 22:16). « Iesu Mesia, to outou ra Faaora, te Vai Nei Au Rahi » (PH&PF 29:1).
O Oia te Arai (a hi‘o 1 Timoteo 2:5), te Faaora (a hi‘o Luka 2:11), te Taraehara (a hi‘o PH&PF 18:47), te Upoo no te Ekalesia (a hi‘o Ephesia 5:23), te Tihi Rahi (a hi‘o Ephesia 2:20). I te mahana hopea, « e haava te Atua… i te taata nei na roto ia Iesu Mesia mai te au i te evanelia » (Roma 2:16; a hi‘o atoa Moromona 3:20).
« I aroha mai te Atua i to te ao, e ua tae roa i te horo‘a mai i ta’na Tamaiti fanau tahi » (Ioane 3:16); « Na roto i te Mesia Mo‘a e tae mai ai te ora; ua î hoi oia i te aroha e te parau mau » (2 Nephi 2:6).
Ua ani-pinepine-hia te peropheta Iosepha Semita, « Eaha te mau ture tumu no ta outou haapa‘oraa? »
« Te mau ture tumu no ta matou nei haapa‘oraa o te iteraa ïa a te mau Aposetolo e te mau Peropheta no ni‘a ia Iesu Mesia, ua pohe Oia, ua tanuhia Oia, e ua ti‘afaahou mai i te toru o te mahana, e ua reva’tu i te ra‘i; e te tahi ê atu mau mea no ni‘a i ta matou haapa‘oraa e mau tuhaa ana‘e ïa no te reira ».1
Te haehaa o Iesu Mesia
I te taime a tape‘ahia’i Oia hou To’na faasatauro-raa-hia, ua haere mai te Fatu na Getesemane mai. I te taime no te hooraa, ua tairi Petero i ta’na ‘o‘e i ni‘a ia Malako, te hoê tavini no te tahu‘a rahi. Ua parau Iesu:
« A oomo i to ‘o‘e i te vehî…
« Aita oe i mana‘o e, e ti‘a noa ia‘u ia tau i tau Metua i teie nei, e na’na e horo‘a mai i te melahi e ia ahuru noa’tu te legeona e ia piti ti‘ahapa e ia rahi atu â? » (Mataio 26:52-53).
I roto i te taatoaraa o te vahavaharaa, te hamani-ino-raa, te tairiraa, e te mauiui hopea no te faasatauroraa, ua faaea noa te Fatu ma te muhu ore e te auraro – maori râ, oia hoi, no te hoê taime o te mauiui rahi o tei faaite mai i te hohonuraa mau o te haapiiraa keresetiano. Ua tae mai taua taime ra i te haavâraa. Ma te mata‘u i taua taime ra, ua parau atu o Pilato i te Fatu : « Eita oe e parau mai ia‘u ? Aita oe i ite e tei ia‘u te faasatauro ia oe, e tei ia‘u hoi te tuu ia oe? » (Ioane 19:10).
E nehenehe noa ta te hoê taata e mana‘ona‘o i te hanahana hau a parau ai te Fatu : « Aita roa o oe mana ia rave mai ia‘u ahiri aore i horo‘ahia mai to oe mana no ni‘a maira » (Ioane 19:11). Te mea i tupu i muri mai e ere ïa no te mea e mana to Pilato i te faahepo i te reira no te mea râ te vai nei te hinaaro o te Fatu i te farii i te reira.
Ua parau te Fatu, « O Vau e horo‘a i to‘u ora, e a rave faahou atu ai.
« Aore roa e taata e riro ai ia haru, na‘u iho râ e horo‘a noa’tu. E ti‘a ia‘u ia horo‘a, e e ti‘a hoi ia‘u ia rave faahou » (Ioane 10:17-18).
Te Taraehara a Iesu Mesia
Na mua‘e e i muri mai i te faasatauroraa, e rave rahi mau taata tei horo‘a na roto i to ratou iho hinaaro i to ratou mau oraraa na roto i te mau ohipa itoito. Aita râ te hoê i faaruru i te mea ta te Mesia i faaoroma‘i. Tei ni‘a Ia’na te hopoi‘a no te taatoaraa o te hara a te taata, te hape a te taata atoa. E i vai na te Taraehara i roto i te tahi ti‘araa fifi. Na roto i To’na iho hinaaro i te rave, ua nehenehe i te aroha e te parau-ti‘a ia faahauhia, i te ture mure ore ia paturuhia, e i taua arairaa ra ia faatupuhia oi ore te taata tahuti nei e nehenehe e faaorahia.
Na roto i ta’na iho ma‘itiraa, ua farii Oia i te utua no te taata atoa no te taatoaraa o te ohipa ino e te peu faufau, no te hamani-ino-raa, te viivii, te tai‘ata, e te ohipa pi‘o; no te faatîtîraa; no te mau taparahiraa taata e te haamauiuiraa e te ri‘ari‘a – no te mau mea atoa i vai na e te mau mea atoa o te tupu mai i ni‘a i teie fenua. Na roto i te ma‘itiraa i te reira, ua faaruru Oia i te puai ri‘ari‘a o te diabolo, tei ore i tape‘ahia i roto i te tino aore râ i tuuhia i roto i te mauiui taata. O tera ïa o Getesemane !
Nahea te Taraehara i te faatupu-raa-hia, aita tatou i ite. Aore roa e taata i ite a fariu ê atu ai e a tapuni atu ai te ino i roto i te haamâ i mua i te Maramarama o taua taata mâ ra. Eita roa te mau ino atoa e nehenehe e tinai i taua Maramarama ra. I te taime a ravehia’i te mea i ti‘a i te ravehia, ua aufauhia te tarahu. Ua faarue te pohe e o hade i ta raua titauraa i ni‘a i te mau taata atoa o te tatarahapa. Ua faati‘amâhia te taata. No reira e nehenehe i te mau varua atoa o te ora mai e ma‘iti i te fariu atu i taua Maramarama ra e ia faaorahia.
Na roto i teie nei tusia faito ore, « na roto i [teie] Taraehara a te Mesia, e ti‘a ai i te taata atoa ia faaorahia, na roto i te haapa‘oraa i te mau ture e te mau oro‘a o te Evanelia » (Te mau Hiro‘a Faaroo 1:3).
« Te Taraehara » i roto i te papa‘iraa mo‘a
Te ta‘o Peretane taraehara e toru ïa na ta‘o : te auraa o te ta-rae-hara o te faariroraa ïa ei hoê; hoê e te Atua; ia faafaite, ia faahau, ia aufau.
Ua ite anei outou e hoê noa taime to te ta‘o taraehara ite-raa-hia i roto i te Faufaa Tahito Peretane ? Hoê noa iho taime ! E faahiti au mai roto mai i te rata a Paulo i to te Roma:
« Ua pohe te Mesia no tatou.
«… I faafaitehia hoi tatou i te Atua i to tatou vai-enemi-raa ra i te pohe o ta’na Tamaiti, e rahi atu ïa to tatou ora i te faiteraa nei, i to’na ra oraraa.
« E ere hoi te reira ana‘e ra, te oaoa nei râ tatou i te Atua, i to tatou Fatu ia Iesu Mesia, no’na i noaa’i ia tatou taua faiteraa nei » (Roma 5:8, 10-11 : apitihia’tu te haapapûraa).
Hoê noa iho taime to te ta‘o taraehara i itehia’i i roto i te Faufaa Apî Peretane. Taraehara, i roto i te mau ta‘o atoa ! E ere te reira te hoê ta‘o ite-ore-hia, no te mea ua faaohipa-rahi-hia te reira i roto i te Faufaa Tahito ei tu‘atiraa i te ture a Mose, hoê ana‘e ihora taime i roto i te Faufaa Apî. E mea faahiahia te reira i to‘u hi‘oraa.
Hoê ana‘e tatararaa ta‘u i ite. No te reira e hi‘o ïa tatou i roto i te Buka a Moromona. Ua faaite o Nephi e i te hoê taime ua vai i roto i te Bibilia « te parau papû no te evanelia a te Fatu, ta te mau aposetolo e tino ahuru ma piti i faaite maira » e « tae maira [te mau parau] mai te ati Iuda i te Etene na te rima o te mau aposetolo tino ahuru ma piti a te Arenio; ua hi‘o atura oe i te niu o te hoê ekalesia rahi e te faufau; e ua hau to’na faufau i to te mau ekalesia atoa; inaha hoi, ua iriti ê atu ratou i te mau vahi papû e te faufaa rahi e rave rahi no roto mai i te evanelia a te Arenio; e ua iriti ê atura hoi ratou i te mau faufaa e rave rahi a te Fatu ra » (1 Nephi 13:24, 26).
Ua faaite mai o Iakobo te huru o te ekalesia rahi e te faufau na roto i teie nei mau parau : « No reira, o te tama‘i ia Ziona, te ati Iuda, e te Etene atoa hoi, te tîtî, e te tiamâ, te tane e te vahine atoa hoi, e pohe ïa ratou; no te mea, o to te vahine faaturi o te ao nei ïa ratou; no te mea, e ere oia i to ô nei ia‘u nei, no ô mai ïa, te na reira maira to tatou Atua » (2 Nephi 10:16).
Ua na ô atoa mai o Nephi, « e no te mau mea papû e te faufaa hoi e rave rahi tei iriti-ê-hia no roto i taua buka ra,… i turori ai te taata e rave rahi, oia ïa, ua noaa te mana rahi ia Satani i ni‘a ia ratou » (1 Nephi 13:29). Ua tohu oia i muri iho e e faaho‘ihia mai te mau mea faufaa (a hi‘o 1 Nephi 13:34-35).
E ua faaho‘ihia mai te reira. I roto i te Buka a Moromona, e itehia e 39 taime te ta‘o tarae i roto i te mau huru papa‘iraa atoa. E faahiti noa vau i te hoê noa irava mai roto mai ia Alama : « E teie nei, aore te rave‘a aroha i tupu, maori râ na roto i te hoê taraehara; e no reira na te Atua iho e tarae mai i te mau hara a to te ao nei, ia tupu te rave‘a aroha, ia faati‘ahia tei titauhia e te parau-ti‘a ra, ia vai â te Atua ei Atua maitai, ei Atua parau-ti‘a, e ei Atua aroha hoi » (Alama 42:15; ua apitihia’tu te haapapûraa).
Hoê ana‘e taime i roto i te Faufaa Apî e 39 râ taime i roto i te Buka a Moromona. Eaha atu ai ïa e iteraa maitai a‘e e ua riro mau te Buka a Moromona te tahi faahou ite no Iesu Mesia ?
E ere te reira ana‘e. E itehia te mau ta‘o tarae, ua tarae, e taraehara i roto i te Parau Haapiiraa e te Parau Fafau e pae taime e e piti taime i roto i te Poe Tao‘a Rahi. E maha ahuru ma hitu faahororaa faufaa rahi roa. E ere te reira ana‘e ! Te vai ra e rave rahi hanere irava ê atu o te tauturu i te tatara-maite-raa i te parau no te Taraehara.
Ti‘amâraa
Ua aufauhia te hoo no te Taraehara e te Fatu ma te faahepo-ore-hia, no te mea ua riro te ti‘amâraa ei ture faufaa rahi roa. Mai te au i te opuaraa, e ti‘a i te ti‘amâraa ia faaturahia. I na-reira-hia na mai te haamataraa, mai ô mai â i te O i Edene ra.
« Ua parau maira te Fatu ia Enoha : A hi‘o i to mau taea‘e o ta‘u ïa i hamani i to‘u iho nei rima, e ua horo‘a vau ia ratou to ratou ite, i te mahana i hamani ai au ia ratou; e i roto i te O i Edene, i horo‘a’tu ai au i te taata to’na ti‘amâraa » (Mose 7:32).
Noa’tu eaha tei tupu i roto i te O i Edene, i roto i te taime a tamata-puai-hia’i oia, ua ma‘iti o Adamu. I muri a‘e i to te Fatu faaueraa ia Adamu e ia Eva ia fanau faarahi e ia faaî i te fenua nei e to’na faaueraa ia raua eiaha ia amu i te raau no te ite i te maitai e te ino, ua na ô a‘era Oia, « Area râ, tei ia oe iho te ma‘iti, ua horo’ahia’tu te reira ia oe; tera râ, a haamana‘o e, ua rahui au i te reira, e i te mahana e amu ai oe i te reira, e pohe ïa oe » (Mose 3:17).
Ua rahi roa te mau mea faufaa rahi i mua’tu ia tonohia atu te taata i roto i te oraraa tahuti na roto i te faaheporaa. E ofati ïa te reira i te ture iho no te opuaraa. Ua faanaho te opuaraa e e farii te tamarii varua tata‘itahi a te Atua i te hoê tino tahuti nei e e tamatahia ratou. Ua ite Adamu e ia na-reira-hia ihoa e ua ma‘iti oia. « Ua hi‘a Adamu ia vai te mau taata, e te vai nei te mau taata ia noaa to ratou oaoa » (2 Nephi 2:25).
Ua haere o Adamu e Eva no te faarahi e no te faaî i te fenua nei mai tei faauehia ia raua. E mea faufaa rahi roa no te opuaraa, te hamaniraa o to raua tino ia au i te hoho‘a o te Atua, ei hamaniraa taa ê. E mea faufaa rahi to ratou hi‘araa i muri mai mai te mea e ti‘a ia vai mai te huru tahuti e ia tupu te opuaraa.
Te titauraa no te Taraehara
Ua faaite mai o Nephi te mea e tupu i to tatou mau tino e to tatou mau varua mai te mea aita e « taraehara faito ore » i ravehia. Te na ô ra oia, « e riro to tatou mau varua mai [te diabolo] ra te huru » (A hi‘o 2 Nephi 9:7-10).
E mea varavara vau i te faaohipa i te ta‘o rahi roa. E mea varavara te reira i te tano. E faaohipa vau i te reira i teie nei – e piti taime:
No te hi‘araa, i riro ai te Taraehara e mea faufaa rahi roa ia tupu te ti‘a-faahou-raa e no te haavî i te pohe tahuti.
E mea faufaa rahi roa te Taraehara no te taata no te tamâ ia ratou iho i te hara e no te upooti‘a i te piti o te pohe, te pohe varua, o te hoê hoi taa-ê-raa i to tatou Metua i te Ao ra, no te mea te parau mai nei te mau papa‘iraa mo‘a ia tatou e va‘u taime e aore roa e mea viivii e ti‘a e tomo atu i mua i te aro o te Atua (a hi‘o 1 Nephi 10:21; 15:34; Alama 7:21; 11:37; 40:26; Helamana 8:25; 3 Nephi 27:19; Mose 6:57).
Na taua mau parau ra, « tei ia oe iho te ma‘iti, ua horo‘ahia’tu te reira ia oe » (Mose 3:17), i tuu atu ia Adamu e Eva e to raua ra huaai i mua i te mau ati no te oraraa tahuti nei. I roto i te oraraa tahuti nei e ti‘amâraa to te mau taata ia ma‘iti, e faatupu mai te ma‘itiraa i te hopearaa. Ua faahaere te ma‘itiraa a Adamu i te ture no te parau-ti‘a, o tei titau e te utu‘a no te haapa‘o-ore-raa o te pohe ïa.
Ua faaite papû mai râ taua mau parau tei faahitihia i te haavâraa; « Aita roa o oe mana ia rave mai ia‘u ahiri aore i horo‘ahia mai to oe mana no ni‘a maira » (Ioane 19:11), e e mea faufaa rahi atoa te aroha. Ua tonohia mai te hoê taraehara no te aufau i te tarahu e no te faati‘amâ i te taata. O tera te opuaraa.
Ua mana‘o o Korianotona te tamaiti a Alama e e ere i te mea ti‘a ia pee te mau utua i te hara, e ia vai mai te faautu‘araa. I roto i te hoê haapiiraa hohonu, ua haapii Alama i te rave‘a no te faaora i ta’na tamaiti e ia tatou atoa. Ua paraparau Alama no ni‘a i te Taraehara e ua na ô oia, « e teie nei, aore te tatarahapa e tae i te taata ra, maori râ te vai ra te hoê utua » (Alama 42:16).
Mai te mea ua riro te utua ei hoo ta te tatarahapa e titau, e ere ïa i te mea rahi. E paruru te mau hopearaa, e tae noa’tu te mau hopearaa mauiui, ia tatou. E nehenehe ta te hoê mea ohie roa e haapii mai ia tatou no ni‘a i te reira mai te hoê ta‘i mauiui a te hoê tamarii ia tape‘a ana‘e to’na manimani rima i te auahi. Maori te mauiui, e amâ paha ïa te tamarii.
Te mau haamaitairaa no te Tatarahaparaa
Te faaite hua nei au e eita vau e ite i te hau, i te oaoa e te oraraa papû, i roto i te hoê ao aita e tatarahaparaa. Aita vau i ite i te mea e ti‘a ia‘u ia rave ahiri aita ta‘u e rave‘a no te tumâ i ta‘u mau hape. E mea hau atu ïa te mauiui ta‘u e nehenehe ia faaoroma‘i. E ere paha mai te reira te huru ia outou, eita râ mai te reira ia‘u nei.
Ua ravehia te Taraehara. E horo‘a te reira e a muri noa’tu te faaoreraa i te hara e te pohe mai te mea e tatarahapa tatou. Ua riro te tatarahaparaa ei e‘a e matara ai te mau mea atoa. Ua riro te tatarahaparaa ei taviri no te iriti i te fare tape‘araa na roto mai. Tei roto i to tatou nei mau rima taua taviri ra, e tei ia tatou ra te ti‘amâraa no te faaohipa i te reira.
Auê ïa te faufaa rahi o te ti‘amâraa; auê ïa te maitai o te ti‘amâraa.
Te faahuru ê nei o Lucifero i ta tatou ma‘itiraa na roto i te mau rave‘a maramarama, ma te haavareraa ia tatou no ni‘a i te parau no te tatarahaparaa e te mau hopearaa. Te faahema nei oia e ta’na mau melahi ia tatou ia riro ei mau taata parau-ti‘a ore, e te ino. Aita râ e nehenehe ia’na – eita e nehenehe ia’na e a muri noa’tu, e na roto i to’na mana atoa – ia haamou roa ia tatou, mai te mea aita tatou iho i faati‘a. Ahiri ua horo‘ahia mai te ti‘amâraa i te taata ma te Taraehara ore, ua riro ïa te reira ei tao‘a o te faatupu i to tatou pohe.
Hamanihia ia au i To’na iho hoho‘a
Ua haapiihia tatou i roto i te Genese, i roto ia Mose, i roto ia Aberahama, i roto i te Buka a Moromona, e i roto i te oro‘a hiero, e ua hamanihia te tino tahuti o te taata nei ia au i te hoho‘a o te Atua i roto i te hoê hamaniraa taa ê i te tahi atu mau hamaniraa. Ahiri ua tupu te hamaniraa na roto i te tahi ê atu rave‘a, aita ïa e hi‘araa.
Ahiri te taata i riro noa ei animala, e turu ïa te feruriraa i te ti‘amâraa ma te hopoi‘a ore.
Ua ite maitai au e i rotopu i te mau aivanaa te vai nei taua mau taata ra o te fariu nei i te mau animala e te mau ofa‘i no te imi i te tumu o te taata nei. Eita ratou e hi‘o i roto ia ratou iho no te imi i te varua i reira. Te haapiipii nei ratou ia ratou iho i te faito i te mau mea na roto i te taime, te mau tauasini e te mau milioni, e te parau nei ratou e teie nei mau animala tei parauhia e taata ua haere paatoa mai ïa na roto i te fana‘o noa. Ua ti‘amâ ratou ia na reira, no te mea no ratou te ti‘amâraa.
No tatou atoa râ te ti‘amâraa. Te hi‘o nei tatou i te mea faahiahia a‘e, e te ite nei tatou i ni‘a e i roto i te ao nei i te ohipa i hamanihia e te Atua e te faito nei tatou i te mau mea na roto i te mau tau, te mau taime roa, na roto i te mau tau tuuraa evanelia, na roto i te mau tau mure ore. Te mau mea e rave rahi ta tatou e ore e ite, te farii nei ïa tatou na roto i te faaroo.
Teie râ te mea ta tatou i ite ! Ua faanahonahohia te mau mea atoa « hou teie nei ao i hamanihia’i » (PH&PF 38:1; a hi‘o atoa PH&PF 49:17; 76:13, 39; 93:7; Aberahama 3:22-25). Aita te mau mea tei tupu mai te poieteraa e tae noa’tu i te mau oro‘a hopea i haamauhia i ni‘a i te fana‘o; ua haamauhia râ ratou i ni‘a i te ma‘itiraa ! Ua faanahonahohia mai te reira te huru.
Ua ite tatou i te reira ! Teie parau mau ohie ! Ahani aita e poieteraa e e hi‘araa, aita ïa e tumu no te hoê Taraeharaa, no te hoê Faaora no te arai no tatou. Aita ïa e faufaa no te Mesia ia vai mai.
Te mau tapa‘o no te Taraehara
Ua haamaniihia te toto o te Faaora i Getesemane e i Golagota. E rave rahi tenetere na mua’tu ua faaite mai te Pata ei tapa‘o e ei hoho‘a no te mau mea o te tae mai. Ua riro te reira ei oro‘a e ti‘a ia haapa‘ohia e a muri noa’tu (a hi‘o Exodo 12).
I te taime a haamanahia’i te ati pohe i ni‘a ia Aiphiti, ua faauehia te utuafare tata‘itahi no te ati Iseraela ia rave i te hoê arenio – tei fanau-matamua-hia, e oni, ma te tapa‘o ore. E tupa‘ihia teie nei arenio no te Pata ma te ofati-ore-raa i te mau ivi, e faaohipahia te toto no te tapa‘o i te opani o te fare. Ua fafau te Fatu e eita te melahi no te pohe e haere na roto i te mau fare tapa‘ohia e no te taparahi i te mau taata i roto. Ua faaorahia ratou e te toto o te arenio.
I muri a‘e i te faasatauroraa o te Fatu, aita te ture no te tusia e titau faahou i te haamaniiraa toto. No te mea ua ravehia te reira, mai ta Paulo i haapii atu i te mau Hebera, « hoê taime no te taatoaraa… ta’na tusia hoê ei taraehara faufaa mure ore » (Hebera 10:10, 12). Mai te reira taime mai â, te tusia o te hoê ïa aau tatarahapa e te varua mărû – te tatarahapa.
E e faahaamana‘ohia te Pata e a muri noa’tu mai te oro‘a, i reira tatou e faaapî ai i ta tatou fafauraa no te bapetizoraa e e amu ai ei haamana‘oraa i te tino o te Arenio a te Atua e i To’na ra toto, tei haamaniihia no tatou.
Eita e maerehia e ua ite-faahou-hia teie nei tapa‘o i roto i te Parau Paari. Taa ê noa’tu i te fafauraa e e farii ïa te feia mo‘a haapa‘o, i roto i teie nei u‘i, i te ea e te mau tao‘a rahi no te ite o teie ïa : « E te horo‘a’tu nei au, o te Fatu, i te hoê fafauraa ia ratou ra, e fariu ê atu te melahi o te pohe ia ratou ra, mai te mau tamarii o Iseraela ra, e e ore roa hoi e taparahi ia ratou ra » (PH&PF 89:21).
Eita e nehenehe ia‘u ia parau atu ma te oto ore i to‘u mau mana‘o no ni‘a i te Taraehara. E haaputapû te reira i te mana‘o hohonu roa‘e no te mauruuru e te titauraa. Te imi nei to‘u varua Ia’na o tei faatupu i te reira – teie Mesia, to tatou Faaora, e ite hoi au no’na. Te faaite papû nei au no ni‘a Ia’na. O Oia to tatou Fatu, to tatou Faaora, to tatou Arai i te Metua. Ua hoo Oia ia tatou i To’na ra toto.
Te titau nei au ma te haehaa i te Taraehara o te Mesia. Aita vau e ite i te haamâ ia tuturi i raro no te haamoriraa i to tatou Metua e i Ta’na ra Tamaiti. No te mea e ti‘amâraa to‘u, e ua ma‘iti au ia na reira.