Ti Nakonako n te Onimaki
Ti roko n te tabo ae e aki ataaki, ma te onimaki e kaota te kawai. Ngkana ti karikirakea te onimaki anne, ao ti na bon aki nakonako i nanon te roo.
Man te tabo ae ti taetae mai iai, ni moan ingabongin Tabatin n te namwakaina ae Eberi ae moan te tikiraoi. Aroka aika taian tiuribi a rangi n rietaata mai iaontano ao a na raure ueeia n te tai ae waetata aika a rangi n titikiraoi. N te winta are ti nanokokoraki iai e roko tain te tiburing. Ti ataia bwa e na bon roko. Te aro aio ai bon ti te arona naba ma aron ara onimaki, are e boboto i aon baika a tia n nooraki n ririki ake i mwaaina.
Ao ngaia are bon bwaai aika a kaeineti ma te tamnei ao te aomata. Ngkai a tabe nakonako te mwaane ao te aine iaon kawain te maiu aei ao e na roko i aoia tain te roo ibukin te nanououa, ibukin te bwarannano, ao ibukin te nakokawaki. Man aaro aikai, tabeman a kona n noori baika a na riki nakon taai aika i mwaaia man ootan te onimaki, ma a bati ake a bobukitau i nanon te roo ao a mwaiti ake a mwarua nako.
Au weewete nakoimi n te ingaabong aei bon ana weewete te onimaki, te onimaki anne are bon te “aki nanokokoraki nakon bwaai ake a kaantaningaaki, are bon kakoauaan baika aki nonoraki.” (Ebera 11:1), n aron are e kamatataaki iroun Bwauro.
I nanon waakinan te rairaki, te tia ukeuke n te Ekaretia e ongora teutana. E na wareware teutana. E aki, e aki kona, e taua i nanona baike a kamiimi nakoina ni kabane. Ma ngkana e nanona raoi ana ukeuke, ngkana e kukurei nanona ni katorobubua n tataro ibukina, e ringaki nanona iroun te tamnei, n te aro ae moan te bebete. E kaotia nakoina te kawai ae eeti. E noora ae uarereke man te bwai are e tuai man nonoria mai i mwaaina. Ao n te onimaki, e kinaaki ke e aki, e waakin rangata tabeua riki. Imwiina teuana riki te kawai are e kona n nooria raoi are e kaukauki imwaaina.
N taai aika a bwakanao ao I mwakuri n teuana kaain ara turein are e uruaki kawaina riaan taian maunga nakon taian maunga are mai maeao. Ni mwaitin te tai ao I toka n taian turein. Bon te tai are e kamanenaaki iai te intin are buti man te buane. Bon ti tebo ma maan aika a kakamaku i aon te kawai aika biiti aika a rangi korakora ma ni butimwaaka ao ni kakamaaku. I aki toki ni mimi iai bwa a kangaa taani karaoa te intin n ninikoria ni mwananga inanon te bong. I mwiina ao I a tibwa ataia bwa tiaki te mwananga ae abwabwaki, ma ngaia bon reitan taian mwananga aiaka uarereke. Iai tauran te turein ae uramwaaka ao e kaotaa te kawai ae nakon te raroa ae 400 ke 500 te iaati. Ti te intinia ae noora te raroa anne, ao anne e bon rangi n tau, ibukina bwa e teimatoa ni kakaota mwaain kawaina ni kabanea te bong anne ni karokoa karangainan te bong ae boou.
E a tia te Uea n taekina aron te aeka ni waaki aikai. E taku, “Bwa are e aki kona n rikirake bon tiaki mai iroun te Atua, ao bon te roo.
“Te oota bon ana bwai te Atua, ao are e karekea te oota, ao e na waaki nako inanon te Atua, e na karekea te oota ae mwaiti riki, ao te oota anne e na rikirake ootana n oota riki ni karokoa te bong ae kororaoi.” (D&C 50:23–24).
Ao mangaia are bon raora n ara mwanga are akea tokina. Ti anaa te rangata teuana n teuana te tai. Ni karaoan aei ti roko nakon te tabo ae e aki ataaki, ma te onimaki e kaotaa te kawai. Ngkana ti kona ni karikirakea te onimaki anne, ao ti na bon aki kona n nakonako i nanon te rotongitong.
N na kaongoraeko taekan te aomata temanna. N na aki taekina arana bwa rimwi ao e rawawata nanona iai. Buuna e namakinna bwa iai te bwai ae bua man maiuiia. E taetaenikawai ma temanna ana koraki n te bong teuana ae kaain te Ekaretia. Ana koraki arei e iangoia bwa e na weteia mitinare. E karaoia. Ma buuna e taetae n iowawa nakoia ao e tuangiia bwa a na aki manga roko.
A waaki nako namwakaina. N te bong teuana ao temanna te mitinare, ni kunean mwiin te kakawari aei, e iangoia ngaia ma toana bwa a na kataia riki. Bon te unimwaane ae rangi anaanau mai Karebonia are uouota te matangare n taainako iaon moamoana.
A karebwerebwere n te mataroa, e kaeka te mwaane ma n taku, A kona n rin inanon tabeua te miniti? A titiraki ma n taku. E kariaia.
E taku te mitinare, i mwaain moanakin ara waaki, “N na rangi ni kukurei ngkana ko rabakau n tataro.” E kaeka te mwaane ma n taku Ana Tataro te Uea. E taku te Mitinare, “E raoiroi anne, ma kariaia bwa N na tuangko aron te tataro i bon ibukim.” E waakinako ma ni kabwarabwara bwa ti kona ti katorobubua ma te nanorinano i matan Atuan Karawa. E karaoa anne te mwaane. Te mitinare e waaki nako ma n taku, “Ti taetae nakon te Atua kaanga Tamara are i Karawa. I mwiina ao e kaaitaua ibukin Ana kakabwaia, ibukin marurungira, raoraora, ao karara. I mwiina ao ti bubutiia ibukin Ana kakabwaia. E kaoti baika ti kaantaningai inanora ma n tangiri. Ti bubutiia ibukiia naake a kainnano. Ti karaoi ni kabane n aran Natina are e Tatangiria, ae te Uea ae Iesu Kristo, ma ni kabanea n te taeka ae ‘amen.’”
Bon te namakin ae kakukurei nakon te mwaane. E a tia ni karekea ootana teuana ao rabakauna n kabonganaan te onimaki. E a tauraoi ni kataa teuana riki te rangata.
Te rain i aon te rain, a reireinna mitinare ma te taotaonaki n nano. E kaeka ngke e tabe n rikirake ana onimaki nakon te ootana teuana man ana ataatai. A roko nakoina raoraona man ana mwaana ma ni katobibia ni kakoaua raoi ao ni kaekai ana titiraki nako. Mwaane a teneti mangaia, ao ngaia ma kaain ana utu a kaoki nakon mweengaia ni katairiki ma ngaiia.
E bwabetitoaki, ao anne te rangata ae moan te korakora n te onimaki. E titirakinna te beretitenti n ana mwaanga bwa e kukurei n riki bwa te Mataniwi n te Tikauti ibukiia aman ataeinimwaane. Anne e kairaki iai nakona mwiokoaki riki tabeua, ao ootan te onimaki e kakorakoraaki iai i nanon maiuna ni katoaa reken ana tai ae boou ao baika e noori.
E a tia ni waaki nako anne. N te bong aei e tei bwa kaang te beretitenti ae tangiraki ae konabwai, te mataniwi ibukin te wanawana ao te atatai, ao iaon baikai ni kabane, bon te mwaane ae iai te onimaki ae korakora irouna.
Te kangaanga are e kaaitaraia kaain te Ekaretia n tatabemaniia nako bon karekean te rangata riki are imwiina, are bon kariaiakan te mwiokoaki are e na weteaki nako iai, e ngae ngke e namakina te aki tau nako iai, ao ma ni karaoia n te onimaki ma te kaantaninga ae bwanin bwa te Uea e na kaotaa te kawai imwaaina.
Kariaia bwa N na karakina karakinan te aine temanna i aon Tiao Booro, Buratiiro. E mwakuri ngke nanakon te reirei ibukin karekean maiuia kaain ana utu. I kan kamanei oin ana taeka ngke e karakina te karaki aei. E taku:
“Te reirei ae rietata are I reirei iai iai tuana bwa e katabuia ataein te reirei ake a iai aia tarau ibukin karaoan te ukeuke. Ibukin te aro aei, ao ngke I karekea boou ao I kaokoroa moa te mwane ibukin te kabwianibwai ao anga bwai nako, ao nikirana e anga ibukin boon ana kabanemwane ibukin te reirei.
“I uringa te tai ngke I kaaitara ma kangangan kawakinan te mwaane. Bon te Kaabong te bong anne ngke I karea iai boou. Ngke I bairea te katau mwane ibukin te namwakaina, ao I nooria bwa e aki tau ibukin kabwakaan au kabwianibwai ao boon au reirei. I riai n rinea teuana mai buakoia. Te ukeuke are kakaraoaki n te namwakaina e na moanaki n te wiiki are imwiina, ao ngkana I aki karaoia ao N na bon kabuaa au reirei n te ririki anne. I rootaki n te nanokawaki ae korakora… . E maraki nanou. Iai au babaire ae kammaraki ae mena i mwaaiu, ao I aki ataia bwa tera ae N na baireia iai. I karaua n iangoia raoi i marenan reinerine aika uoua bwa N na kabwaka au kabwianibwai ke N na kaaitara te kangaanga ibukin karekean au bwi ae riai ibukin kariaiakau n te reirei.
“Te namakin aio e kabonganaa ni kabane nikiran korakorau ao e tiku irou ni karokoa te Kaonobong. I mwiina ao I uringnga bwa ngke I bwabetitoaki ao I a tia ni kariaia bwa N na maiuakina tuan te kabwianibwai. I a tia ni katoka iaou te boraraoi are N na kakaraoia n taainako, tiaki ma mitinare, ma Tamau are i Karawa. N te tai anne, nanokawakiu e moanna n bua, ma ni karekea n nen te kukurei ae iai te rau iai karaoa te babaire… .
“Te tairiki anne ngke I tataro, I bubutia te Uea bwa e na kabwara au bure ibukin au aki kona n iango raoi. N te Tabati, i mwaain waakinan te taromauri n toa, I kawara bitiobi, ao ma te kukurei ae korakora I kabwaka au kabwianibwai ao au angabwai nako. Anne te bong ae okoro arona. I namakina te kukurei ao te rau inanou ao inanon Tamau are i Karawa.
“N te bong are imwiina I mena n au aobiti, I kataia n iangoa te kawai bwa N na kanga ni karaoa au ukeuke are e nang moanaki n te Katenibong. I mwiina a roko iango riki tabeua, I namakina nakoraoin au iango. N te tai are I mwakuri iai n ana aobiti te rooia; au mataniwi bon te aomata ae rangi ni tua matoa ae I a tibwa kaaitibo ma ngaia.
“E toki au mwakuri ngkana e roko au tia kamwakuri ma n anganai te kabanea ni kaetieti ibukin te bong anne. Ngke e tia ni karaoia, ao e anaa ana buribukeiti ao e kaboo nakoiu… . N te tai ae waetata, e tei, ma n taraai ao e taku, ‘E uara am reirei?’ I miimi iai, ao I aki kona ni kakoauaa bwa tera te bwai are I ongo. Te bwai are I kona ni karaoia bon ti te kaeka ma bwanaau ae ruru, ‘A nakoraoi bwaai ni kabane!’ E taraai ma ni iangororoko ao e manga kaboo riki nakoiu… .
“N te tai ae waetata e rin te tia koroboki inanon te ruu, ma n taku bwa bon te aomata ngai ae e rangi n tekeraoi! Ngke I titirakinna bwa bukin tera, e ti kaekaai ma n taku: ‘E a tia te tia kamwakuri ni taku bwa man te bong aei ao te kambwana e na kabwaka boon reireiu ae bwanin ma au boki. I mwaain ae ko nako, kawarai moa n au taibora ao tuangai boon am reirei bwa I aonga n anganiko te tieke nakon te ingaabong.’
“I mwiin kitanakiu irouna, I tang ao i namakina te nanorinano, I katorobubua n te tabo are i mena iai ao I karabwa Ana mwakuri n tituaraoi. I … taku nakon Tamau are i Karawa n ana kakabwaia ma I tii kainnanoa ti kabwakaan au bwakamwane n teuana te namwakaina, ao te kabwianibwai are I kabwaka n te Tabati e rangi n uarereke ngkana I kabotaua ma te mwaiti are I a tia ni karekea! I nanon te tataro anne te taeka are koreaki n ana boki Maraki e roko iangoana n au iango: ‘Kam na kataai ngkai n aei, bon ana taeka Iehova Tabwaota, bwa tao N na kauki mataroan nako karawa nakoi imi, ma n nurakina kakabwaiami, ni karokoa aki reken nnena.’ (Maraki 3:10). Ma ni karokoa te tai aei ao I tuai man namakina aron kamimiin te berita are koreaki inanon koroboki aika tabu ao bwa te tua aei bon te bwai ni kakoaua ibukin ana tangira te Atua, are Tamara are i Karawa, are e anganiia natina i aon te aonnaba”
Te onimaki bon te ia are anganira te korakora nakon te mwakuri aei. N te taabo ike e tei iai te Ekaretia aei ni katobibia te aonnaba, e teretere raoi. E aki tiatianaki nakon te aba teuana ke te botanaomata teuana ke taetae teuana ke te aomata temanna. E kuneaki n taabo nako. Ngaira bon aomata aika iai aia onimaki. Ti nakonako n te onimaki. Ti waaki rake iaon mwanangara are akea tokina, teuana te rangata n teuana te tai.
E kakawaki ana berita te Uea nakoia ake a kakaonimaki n taabo nako. E a tia n taekinna ngke e taku:
“Ngai, ae te Uea, I nanoanga ao I akoi nakoia te koraki ake a maakai, ao I kukurei ni karineia te koraki ake toro irou inanon te raoiroi ao te koaua ni karokoa te toki.
“Moan te korakora kanuangaia ao a na neboaki n aki toki.
“Ao N na kaoti nakoia bwaai aika a kamiimi, eng, bwaai ni kabane ake a karabaaki n ueau mangkoa ao ibukiia rooro aika a na roko rimwi… .
“Eng, ma e ngae n anne ma a na ataai baika a kamiimi aika akea tokiia, …
“Ao wanawanaia ana korakora, ao aia atatai e na roota karawa, ao i mwaaiia wanawanaia aika wanawana a bua, ao aia atatai naake a babaire raoi a na akea.
“Bwa Tamneiu e na anganiia te kona n oota, ao man mwaakau N na kaotia bwa a na atai au kaantaninga aika rabal—eng, ai una ma bwaai ake a tuai n nooraki ni maata, ke n ongoraeakinaki n taninga, ke ake a tuai n rin inanoia aomata” (tara D&C 76:5–10).
E kanga te aomata temanna n titiraki riki ibukin ae mwaiti riki? Boni moan te mimitong te mwakuri aei are ti a katabeaki iai. Bon moan te kamiimi ake kawain nako Teuare Moan te Mwaaka ngkana ti nakonako i matan n te onimaki.
Ana onimaki te tia ukeuke bon ti te arona ma mwakoron te kai ae mawaawa, are e karenakoaki nako nanon te ai ae ura. E kaabueaki n uran te ai, e mau ao e moanna ni bue. Ma ngkana e anaaki, ao e aki kona n teimatoa ni kaura i bon irouna. E mate tamwakarona. Ma ngkana e katukaki inanon te ai, e na karaurau n bue ma n ootamwaaka. Rimwi n te tai ae waetata ao e riki bwa raon te ai ae e ura ao e na kaurai kaai ake tabeua, ake a mawawa.
Ao ai ngaia are e waaki nako tariu ao mwaaneu, te makuri ae korakora aei ibukin te onimaki, ma n tabekiia rake aomata ni katobibia te aonaaba ae rababa aei ni karikirakea ataakin kawain te Uea ao te kukurei ae korakora riki ni irakin a katooto.
E na waaki nako te Atua ae Tamara are Akea Tokina, ni matangare nakon Ueana, ao n anganna te tekeraoi ngkai, ngaira aika natina, ti na nakonako ianon te onimaki are bon au tataro ma te nanorinano n aran te Uea ae Iesu Kristo, amen.