Te Onimaki n Ongeaba
“Te Onimaki n Ongeaba” bon te bwaai ae kakoauaki. E bebete te titiraki: Bwa ti kakoaua Tamara are i Karawa? Ti kakoauaiia ara burabeti?
N te aonaaba ae ti maeka iai, bwaai aki tiku n tainako n aroia. N tabetai ao tiaki konaa n ataai mwaakan katikara ni kariiriaki. Aron kaotiia a konaa ni kairiira nakon ae a aki riai.
Tabeua te ririki n nako ao iai bwaai ae a tia n riki nakoiu n aron kaotin kariiri aika a aki riai n te aro are a karekea te nanokawaki. Ai tarin kainnabau ao a na utu a roko iroura mai Utaa. E raoi te bong n tain te kabuebue ni mataniwiin te aba ae Orekan ao ti nako n akawa ni marawana. E kamaiu, ao ti rang ni kukurei ni konara taaman, ni iai bukina ae riai ao ngke I a tanrikaki ao I a noora te nao ae buburana 2.5 te miita ni kani bwaaro nako aora. E reke au tai n takaarua n anga te kauring imwaain are e a bwaaro te nao nako aon ara booti. E aki baraaki te booti, ma Kaeri are ai tarira e bwaaka i taari. Ti bane ni bainii bwaai ni kamaiu ma te kanganga teutana ni kairan ana kooti te booti, are e a koronuuka n taari, n nako n te tabo are e beibeti iai, ni katikiia ma ni katokaa.
Ti batiboaki n te nao ae aranaki bwa te nao ae roko n aki anga te tai. E aki riiriki n tainako, ao akea te anga ni katokan rikina. Imwiin anne ao ti kuneiia irarikin mataniwiin Orekan-Uaotington, niiman aomata aika kabuanibwai ni bwabwa n te bong anne n teniwaa booti aika kakaokoro. A bane n riki man te nao are aki anga te tai, n akea raoi bukina n roko nako nanon marawa. N te tai naba anne ao ti nakonako i aon mwakoron te bike are oti, i aon taari ae boraoi man raoi man anga te kanikina ae akea te kanganga. Ma tiaki aron taran marawa ngkoa bwa e a bitaki nakon te kanganga.
Ni karaoan mwanangara rinanon kawain te maiu, ti na bon riai n reitinako n taratara raoi ao n tarai bwaai ake aki riai are tiaki naba aroia ngkoa. Ngkana tiaki taratara raoi, ao te nao are aki anga te tai inanon te maiu e na konaa naba ni kamamate n aron are a riki i marawa.
Teuana ana mwaan ni kamwamwane te riaboro are te tia kaaitara bon te kariaiira bwa ti na kakoaua man te aki titiraki nakon kakawakin koauan te ongeaba nakon ana tua te Atua are te ongeaba ae tiaki atai. Ana kouru bwa E na karikiira bwa ti na kakoaua are ti na irii oin kawaiin ara aonaaba ao ara mwkauri aika tiarobeke. Aio are E karaoiia man kakoauakiira bwa ti “aki atatai” ni iriia burabeti ao n ongeaba nakon tua man aki iango ibukiira. E reireiniira bwa tiaki te wanawana karaoakin te bwai teuana ibukina bwa ti tuangaaki bwa ti na karaoia mairoun te burabeti ae maiu ke irouiia burabeti ake a taetae nakoiira man koroboki aika tabu.
Ongeabara n aki kan titiraki nakon Ana tua te Uea bon tiaki te ongeaba ae akea ara atatai iai. Te Beretitenti ae Boite K Baeka n te maungatabu n Eberi 1983 e reireiniira iai taekan aei. “Aomata Aika Itiaki Ni Boong Aika Kaitira aika aki ongeaba ibukina bwa a kairoroaki nakon te ongeaba. A ongeaba ibukina bwa atai koaua n tamnei ao man tia ni karaoi aia babaire, bwa te kamatataaki nakoiia n tatabemaniia nako n ongeaba nakon oin aia waaki, n ongeaba nakon a na tua te Atua… . Ti aki ongeaba ibukina bwa ti aki atatai, ti ongeaba ibukina bwa ti nooraba” (“Agency and Control,” Ensign, Mei 1983, 66).
Ti na konaa n arana aei bwa “te onimaki n ongeaba.” Man ana onimaki, Aberaam ao e ongeaba ni katauraoa Itaaka bwa te karea; man ana onimaki; Nibwaai e ongeaba ni karekei bwatua koora; man ana onimaki, te tei ae uarereke e ongeaba ni kiba nako man te rieta ae raoiroi nako nanon bain tamana aika korakora. “Te Onimaki n ongeaba” bon te bwai ae kakoauaki. E bebete te titiraki: Bwa ti kakoaua Tamara are i Karawa? Ti kakoauaia ara burabeti?
Teuana mai buakon ana mwakuri ni kabwakabwaka te riaboro bon te kariaia bwa ti na kakoaua bwa te wanawana ao ataan aron bwain te aonnaba bon kawain te rabakau are ti riai ni iria. Te burabeti ae Nibwaai are tarin Iakobo, e ataa ana babaire te riaboro ao e kauringira bwa ti na aki reketaati iai.
“O te babaire ae buakaka ae kangare! O matebuakaia, ma mamaraiaia, ma nanobabaia aomata! Ngkana a karekea te rabakau a taku bwa e a reke te ataibwai irouia, ao a aki kan kakauongo n Ana taeka n reirei te Atua, bwa a katinanikui, bwa angkoa a bon ataia, ma ngaia, e nanobaba aia ataibwai ao a aki kabwaia iai. Ao a na mauna nako.” (2 Nibwaai 9:28)
E aki taekinna Iakobo ae ti riai n aki ataibwai. E teimatoa n tuangiira bwa e raoiroi karekean te rabakau ngkana a ongeaba n ana taeka n reirei te Atua.
Tabeman a kakoaua are a na rineia bwa ana tua ra te Atua are a na irii. N taai nako ao a kanikinaai tuua bwa kanga bwaai aika uarereke ake a kona ni mwanuokin ao n aki kaoti bwa a kakamaku nakon te maiu ke bwaai aika rang ni kakawaki. N aron karaoan ara tataro, karinean te Tabati, warekan koroboki aika tabu, ao e waaki nako kanoan te riiti n aron aei.
Tamara are i Karawa E maroro n te aro ae e rangi n itiaki ma natina. N reiakinan te euangkerio, ao akea ataakin karongoan te Abotoro ae Bauron ngke e taetae (tara 1 I-Korinto 14:8). Akea te titiraki ni kaineti ma nanon te taeka are taekinaki ke te namakin man ana kairiiri te Tamnei. Tiaki katukaki n arora n tii ngaiira. Iai iroura koroboki aika tabu, burabeti, ara karo aika tangiraki ao ara mataniwii.
E aera n tabetai ti tibanako mani kawai aika eti. E aera bwa ti kariaiira bwa ti na kairaki man ana kariiri te riaboro? Katokan ana kariiri moan te bebete n aron kaekaana, ma n tabetai e a kanganga aron karaoana. Te Beretitenti ae Aerote B Rii n te maungatabu n Okitobwa 1970 e taekina iai te Uea, te riaboro, ao aron katokan mwaakan ana kabwakabwaka te riaboro.
“Iai taabo aika ti riai n nako matan te Uea iai rinanon te ekaretia aio ao te aonaaba inanon koron bukin boong… . E na rikirake mwaakan Tatan; ti nooria n tainako… . Ti na konaa ni mano ngkai ngaiira kaain te ekaretia aei man karaoan nanon te Uea are tuangiia kaain te ekaretia n te bong anne ngke e kateaki te ekaretia. Ti na riai n reiakina te ongeaba nakon a na taeka ao a na tua te Uea are E na angaa rinanoiia a na burabeti… . E na iai bwaai tabeua are a karaoa te taotaonaki n nano ao te onimaki.” (In Conference Report, Okitobwa 1970, 152).
Te Beretitenti ae Rii e karaoa te kauring ngke e reitinako n taekina are ti na konaa n aki tangira n tainako te bwai are e roko man ana kariaia te Ekaretia, bwa mwiina ao a na kauntaba ma oin ara kantaninga ke ni urui tabeua maiura ni iraorao. E ngae n anne, ngkana ti kakauongo ao ni karaoi bwaai aikai ae kanga a roko ma ni wiin te Uea, ao ti na bon aki kekeweaki ao bon ara bwai kakabwaia aika kakannato.
E uotira ni kaokira nakon te ongeaba. Ao e na bon teimatoa n aron anne. Iteran naba te babaire ibukin te kukurei are akea tokina. Akea ataakin reirei ae a na rangi n tiribure nakon maiuraoira n te maiu aei ao are imwiina. Koroboki ni kabane aika tabu a reiakina te ongeaba, ao bon akea abotoro ke burabeti aika a tia ni maiu n aki reiakina kakawakin koauan te ongeaba.
N tabetai ao e bon riai te ongeaba e ngae ngke tiaki oota ibukin karaoakin te tua. E karika te onimaki te ongeaba. E taku, te Burabeti are Iotebwa Timiti, n reiakinan te ongeaba bwa tera are tangiria te Atua ae eti, ao tao ti na bon aki ataa bukina ni karokoa riki rimwii(tara Teachings of the Prophet Joseph Smith, sel. Joseph Fielding Smith [1976], 256).
I rang ni kakaitau bwa iai ara kunnikai ni kamaiu n te bong ni kabuebue inanon marawa. I rang ni kaitau bwa ti konaa n totokoa te kanganga are roko nakoiia tabeman man te nao are aki anga te tai. Bon au tataro bwa ti na teimatoa ni kunnikainii kunnikaira ni kamaiu ibukin te ongeaba n te aro are ti na totokoi kanganga are a na konaa n roko ngkana ti kekeweaki ao ni irii ana kariiri te riaboro.
I kakoaua nakoimi bwa E maiu Tamara are i Karawa, ao bwa E tangiriira ao man aki ataakin ara aki ongeaba nakon Ana tua ao ti konaa ni manga maeka riki ma Ngaia ao Natina are Iesu Kristo are ara Tia Kamaiu ao ara Tia Kaboomwii, n aran Iesu Kristo, amen.