Te Kawai ae Ti aranna bwa Te Maiu
Ma ngkana ko teimatoa i aon te kawai ae eti, te kaniwanga n tokin te mwananga e na bon nakoraoi i nanon kakatanoatakina are ko maiuakinna i aon kawaim.
Tari, I kukurei ni mena ma ngkami n te tairiki aei. I rangi ni kan taetae naba nakoia riki kairake n ataeinimwaane n te Nakoanibonga ae te Aaron. I tangiri ngkami ma ni kawakini ngkami.
N te boki ae boou ae Ibukin Kakorakoraia Kairake, te Moan Beretitentii e taku nakoimi: “Ataeinimwane aika tangiraki… . iai onimakinami ae matoatoa iroura. Ngkami bon taan rinerine aika tamnei ake kam roko n te bong aei ike a rangi ni korakora iai katabetabe ma mwioko, ao ai uaana naba ma taian kariiri. Kam a tibwa moana kawaimi rinanon te maiu aio. Tamami are i Karawa e tangirii maiumi bwa e na rangi ni kakukurei ao e na kairi ngkami ni kaoki ngkami Nakoina. Taian babaire nikabane ake kam karaoi n te tai aei a na bon bairea bwa tera are i mwin maiumi aei ao rinanon are akea tokina.” ([pamplet, 2001]), 2).
Au kantaninga bwa ni kawai tabeua aika uarereke n te tairiki aei ao kam na reireiaki man arou ngke I kaniia 70 te ririki ni mwananga inanon te kawai ae ti aranna bwa te maiu. Ami karo ke tibumi a bae n tia ni kaman karakina aei nakoimi: “N riirikirakemi ni kara, baitin riki te tai n tataonnako.” Ai aron ae teuana te miniti ao ai 12 naba ami ririki n aron ae kam a roko iai ngkai, ao te miniti are i mwina ao kam a kaania 70 ma te maiu are e aki manena iroumi are e mena i mwaimi!
E rangi ni kangaanga bwa ti na kakoaua bwa 13 te ririki n nako n au kabanea n taetae n aia bowi kaain te nakoa ni ibonga ni kabuta. N te tai naba anne ao I tuangiia taari rongorongon te mwananga are I karaoia n te bwatika ma natiu mwaane ao ni kaotinakoa man rinanoan te maiu anne aron kakaawakin te kakatauraoi raoi i bukin te mwananga n te maiu aei.
N te bong aei ao I kan tuangi ngkami rongorongon mwamwananga ake tabeua ake I a tia n rinanoi ao n tibwauaa te reirei are I a tia ni reireiaki mai iai.
Tabeman, tabeman are koraki man ara utu a iangoia bwa e kakukurei te bwatika mai Boetiman, Montana, nako Tiaketon Ore, Ioming, i Amerika. Te 225 ni maire ni mwamwananga aei e anganiira tenibong, ao ti a kona n rinanon te tia are e tibwaaki nakon teniua i marenaia aaba aika a totoa. Ti iangoia bwa te mwananga rinanon maunga are e nakoraoi ma te rao n te bong anne bon te tai ae rangi n tamaroa rinanoana bwa e na buokira ni butimwaea ana kariki bwai te Atua.
I mwin te babaire raoi ao te katauraoi, uoman mai buakoia natiu mwaane ao natiu ae tii te aine ao ngai ti a bane ni mwananga nako n ara moan bong ni bwatika nikarokoa ae e taira ni kaean ara tabo n tei i Biiki Tikaai, Montana. E rangi n tamaroa te ingabong arei, ao ti rangi ni kariia te mwananga bwa e na kakukurei. Ma e ngae n anne, ao ngke ti a mwananga nako, ao naang ake a roro a bobotaki ni karekea te karau, are e a bwaka ni rangi ni korakora n te aro are e a kamwaitoroira ao ni kamwaimwakiira n te aro are ti a rangi ni mariri. Ao ngke ti a motika kawaira teuana mai buakon mwanangara ao n roko n ara tabo are ti uaiakinna, I kauringaki bwa te maiu e kona n riki bwa ai aron te bong arei. Ti rangi n tetekeraoi, ti a kaman katauraoiira i bukin aekakin nako kanoan te bong bwa e raoi ke e aki; ngke arona bwa ti aki karaoia, ao e na rangi ni kangaanga bwa ti na roko ni kawaira ni mwanangara n te moan bong arei. Ni katoa mwaneka ni taian mwamwananga n te maiu aei, ti riai ni kawenei raoi ara kantaninga ao nanora aika matoatoa, ma ti riai ni bwaina te tautauraoi n taai nako ni kaitarai bwaai ake a kaaitaraira ke kangaanga ni itera tabeua.
N aron te katoto teuana, ngkana ko aki toki ni kakabongana te taetae ae buakaka, n teimatoan kabonganaana i roum, ao kangaangan aron bitakina ke katokan kabonganaana i roum. E na raoiroi riki ngkana ko rinea te kawai ae kaokoro, te kawai are e kairiiri nakon te itiaki n te nano ao taeka ma mwakuri bwa ko aonga ni kaakakukureiko n ana iraorao te Tamnei are Raoiroi. Iangoa arom te kangaanga are i nanon taian te mwakuri ni mitinare ao karekean taetae nikawai aika buakaka n am iango ngke ko a kainnanoia bwa ko na karekea te Tamnei are Raoiroi i roum bwa raom ae na teimatoa n tiku i roum. Ngkana ko kabongana te taetae ae buakaka ao ai bon te kangaanga nakoim, ngkai bon taina ni bitaki.
N te bong teuana ao uoua mai buakon mwamwanangara, ao ti kaineta Iaeroutitoun Maeao. Bwaai nikabane a bon tiku n aroia—taian bwatika a buti raoi, waera a motirawa raoi, ngkai ti nang keiakina ara kauoua n tabo are ti uaiakinna. Bon te tai anne naba are I a nooria bwa ti aki rangi n taratara raoi ngke a bane n eti bwaai nikabane n te maiu aio, iai naba te kariiri bwa ti na mwaninga Tamara are i Karawa man kareerekei rakan raoiroiira i bukin te mwaneka ae e kakukurei. Tai karaoa te kairua anne.
Ana reirei te burabeti ae Iotebwa Timiti, “Te kukurei bon te bwai ao te kanikina i bukin maiura aio; ao e na bon toki naba, ngkana ti ririmwiin te kawai are e kairiira nako iai; ao te kawai aei e rangi n tamaroa, e etiruru, kakaonimaki, mimitong, ao e kawakin ana tua nikabane te Atua”(Teaching of the Prophet Joseph Smith, sel. Joseph Fielding Smith [1976], 255–56).
Ana boki Moomon e bon katauraoaki raoi ma tauan mwiia naake a kakabwaiaki i roun te Uea ao imwiina a kamoamoaiia n aia accomplishments. Nikarokoa ngkai n aia kainikatonga ao a kitana kawai ae eti ao a kabuai bwaai nikabane ake iai i rouiia ao a bwaka man te koaua. Iangoia raoi bwa kam na aki riki n aroia I-Nibwaite are ngkekeil; uringa n taai nako koauan te kakabwaia are ko anganaki.
N te bon teuana ao teniua man ara tai ni mwamwananga, I reiakinna bwa e ngae ngke iai tabeakinan te inimaki i roura ni maiurad, aroarora e na bairea bwa ti na kanga ni kaitarai. N te bong naba arei ao ti toua tia are tibwaua teniua taaabo ake a totoa, abakina bon te katautau nako iai bon 4,800 te wae nakon 8,300 te wae. Tamwarakean te maunga ae katati e kabuta te bwatika are e tangira te aroaro ae eti bwa e na karekea rietana ae e eti. Ao titabo naba ma te maiu. Man katean kouru aika manena ao kateimatoan maiuakinana i roum, ko na bon reiakina te anua ni maiu ae raoiroi man tokanikai i aoia. Eng, bon iai taai are ko na tamwarakea iai te maunga ae katati are e na bairea konabwaim n aron ae I a tia ni kona ni karekea, ma I aki kanakoa mai rou, ibukina bwa I bon kabaeaki n au kantaninga.
Mwane aika kam kairake n te Nakoanibonga ae te Aaron, I bubuti ngkami bwa kam na katea ami kouru ibukimii, n aron ae e na riai ni bane te Timinari, mwakuri ni mitinare ae rine, karekean te beeba man reirei ake a ririeta, ao ai te kororaoi i bukin te mare n te tembora. N ami roro ao aikai a taraa n ae a riki bwa kouru aika a totoa kaei, ma ngkana ko moana tamwarakem ma ngkai ao ko na rangi n tauraoi raoi i mwain ae ko tokanikai i aoia.
Uoua te ririki n nako ao te Unimwane ae Ritite G. Tikaote man te Kooram n Aabotoro ake Tengaun ma Uoman ao ngai ti a tia ni karekea te tai ni mwananga n te waa nakon te tabo ae Kuetiko i Ontaario, Kanata, ni bebeibeti man te nei teuana nakon teuana. Ao ngke ti a roko ni iteran kawaira i nanon teuana te nei ae rangi n totoa riki, ao e a karina naba n roko te buaka ae korakora, ao te ran ngkoa are e rau e a un ao man buaka, ao ni kamwaieiea waara nako moa ao buuki.
E a reke ara iango ae ti na karaoia. Ti na kataia ni karokoira n ara tabo are ti uaiakinna, ke ti na kainetad te kabanea ni kaan n aba ao n tataninga iai tokin te buaka? Te kaeka e a reke naba ma ikai, ma te tai arei e a aki bebete karaoan te babaire. Man waakinana nako, ti na bon roko n ara tabo are ti bairea ngkoa. Man taotaonan mwanangara, ao ti na bon rimwi n roko ao ti na bon oaki n te roo. Ao ngke ti tabe ni karaurau ni iangoia bwa tera ae ti na iria, ti anganaki te namakin bwa ti na kaineta te kabanea ni kaan n aba n te tai ae waekoa. Ao ngke ti karaoia, ao e tabe n roroko i roura te buaka- are- korakora arei. Ngke ti tia n rineia bwa ti na waakina nako waara, ti a tia ngkai ni uoti maiura nakon te kabuanibwai.
Ikai ni maiura aio ti weteaki bwa ti na karaoi babaire aika a kangaanga, bwa ti na tokanikai bwa ti aonga ni kona ni karekea te kabanea ni rootaki are e na uotira nakon maiura n tamnei n te tai ae na roko. I kaungai ngkami bwa kam na ururingnga ni kakororaoi ngkami bwa kam na bubutia te Tamnei bwa e na buoki ngkami ni rinea ae eti n taai nako.
N Ana boki Moomon, Nibwaai e tuangira: “Ao ngkami ake inanon te kawai ae e eti ao e irariki are e kairi ngkami nakon te maiu are akea tokina; eng, kam tia n rin i nanon te mataroal kam a tia ni karaoa are e kantaningai ngkami nakon ana tua te Tama ao te Nati; ao kam a tia ni karekea te Tamnei are Raoiroi.” (2 Nibwaai. 31:18).
Ao ngke a tia ara utu ni katiaa te mwananga are te 225-ni maire, ti reiakinna bwa aekakira aron kangaangan bwaai ake a kona n riki i aon te kawai ae ti aranna bwa te maiu,
a bon tataninga kakukurei aika korakora i bukiia te koraki ake a kawakin tuua ao man korakai ni uaa te toki.
Mwane aika kairake n te Nakoanibonga ae te Aaron, iai te mwiokoaki i roumi bwa kam na teimatoa ni kaeti ngkami i aon tiami are akea tokina. Eng, mwamwananga n te maiu aio e kona ni karekei etiia aika bati ao bwakaia naba. Eng, bon iai naba te bong are ko na taku bwa e na rangi ni kangaanga. Ma ngkana ko teimatoa i aon te kawai ae eti, te kaniwanga n tokin te mwananga e na bon nakoraoi i nanon kakatanoatakina are ko maiuakinna i aon kawaim.
Ni manga kaokana, man te boki are Ibukin Kakorakoraia Kairake, te Moan Beretitentii e korea ae, “E riai bwa kam na kawakini ami iango ma rabwatami bwa a na itiaki man buure n te aonnaba bwa kam aonga ni karaoi mwakuri aika bubura ake a wene i mwaaimi. Ti tataro bwa kam na kororaoi ni uouoti mwiokoami ni katean abanuean te Atua ao ni katauraoa te aonnaba i mwain Kauaokin te Tia Kamaiu” (iteraniba 3).
Raou aika kairake, taiaoka n ata kakaawakin te iango raoi man iriirakin aia marooro ni ibuobuoki ara burabeti, ao te kakukurei e na riki bwa ami bwai inanon te mwananga n te maiu aio.
Man akai ake I rangi ni kakoauai n aran Iesu Kristo, amen.