Kakorakoran Mweengara ao ara Utu
Teniua koaua aika a na buokiira ni kakorakorai mweengara ao ara utu bwa kawakinaia, te anga nano, ao te tataro.
Ngke ti mataku n te tai are e a kaan bane iai te kaboo n takakaro ni 2002 are kakaraoaki ni katoa aua te namakaina n te ririki, akea ara konaa ma ti ti uringiia n tatabeman nako ake a reke irouiia te tokanikai ao e a reke te koora irouia. A nang ni mwaiti taan takakaro ake a tia ni katauraoiia inanon ririki aika bati ake a roko ni iira te kaboo anne, ma te kantaninga bwa ana tokanikai. Ma ngkai aine aika rikirake n te Ekaretia, ao kam katauraoi naba nakon te kaboo ni karekean aia metera Aine ngkai te Tamnei e oota raoi inanomi.
Aia burokuraem Aine aika te Roro n Rikirake e konaa ni katauraoa te kataneiai ae nakoraoi ni buokii ngkami n tatabemanii ngkami bwa kam na roko n ami kouru, ao aia kibu Aine n te Roro n Rikirake e bon kauringii ngkami bwa tiaki ti ngaiira inanon te kaboo. Bwa ti mena n ana tiim te Uea ao E na bon mena ikekei n tainako ni buokiira bwa e na reke iroura te metera te koora.
Ngkai ngaiira natin te Atua aika aine, ao tao e na iai mai buakomi aika taan takakaro, ma ngkami ni kabane kam a tia ni kakabwaiaki ma ami tarena aika mwaiti ao bwaai n tituaraoi. Teuana te bwai n tituaraoi ae moan te korakora nanona bon ami konaa ni kakorakora ni “karikirakea [ami] utu ao mweengami,” aio te kiibu n taeka ae boou are karinaki nakon aia kibu Aine n te Roro n Rikirake. Kam kinai taeka aikai? Teuana bukinara are ti anganaki ngkai ataeinnaine ngaiira ao aine n te abanuea bon te tangiriia ao te kakorakoraiia ara utu.
Au tataro n te tairiki aei bwa te Tamnei e na oota raoi inanomi, n te aro are e na iai te korakora n nano ni kakorakoraiia ami utu ngkai ao ni katauraoiia bwa ami utu nakon tai aika ana roko. Koroboki aika tabu a kaonaki ni kawai n reiakiniira bwa ti na kanga ni kakorakoraiia ara utu. Akea riki te tia reirei ae kakannato nakon te Tia Kamaiu. Ngkana kam reiakinii A na reirei ao ni irii A na katoto, ao kam konaa ni karika maiuia ara utu bwa a na raoiroi riki. Tia maroro ibukin tenua kakawakin koaua ake ana buokiira ni kakorakora ara utu ao mweengara:
-
Kaikawakiia Raoi Ataei
-
Te Karea
-
Te Tataro
KAIKAWAKIIA RAOI ATAEI
Antai ae naaki kukurei n takakaro ma tetei ae uarereke ke n taua tetei inanoni baiana ae e a tiba tia ni bungiaki? Ngkai ngaiira aine ao ti bungiaki bwa bon rikiara te tangira ao te kaikawaiaarake tabeman. Kaikawakiia raoi ataei e nanonaki bwa te boutoka imarenara n tatabemaniira nako, ni kaungaiira n tatabemaniira nako, ni karikirakeii ara tangira n tatabemaniira nako. Ti karaoa aio inanon ara utu?
Te Tia Kamaiu E reireniira aron kaikawakiia raoi ataei. Mwaitin te tai ao E taku, “Mwaitira te tai are I boboti iai ngkami n ai aron te moa aine are e bobotia natina iaan baina, ni karikirakei ngkami” (3Nibwaai 10:4).
Ngkana kam bobotaki ni kabane n ami utu, ao kam na konaa ni karaoa ae bati ni kaooa te tamnei ni katiteuanaaki. N ningai te kabanea n tai are ko rabwata iai tinam am karo ao ni karabwaiia ibukin te bwai are a tia ni karaoia? Kaaro boni ngaiia are a karaoa kaikawakiia raoi ataei, ao a tangira naba karikirakeaia.
Ngkai aine ngaiira, ao ti konaa ni kaikawairakeiia raoi ao ni kamanoia ara ataei aika uarereke n te tangira ao te akoi. N te tai ae aki maan ao I matakuakina te tina ae kairake n taetae nakon natina ae uoua a na ririki. Ngke e tang tetei anne ao tinana e aki konaa n ataa te bwai ae tangiria, ngaia are e a taku te tina, “Tai tang. Taetae. Tuangai tera ae ko tabeianga iai.” E nang ni kaota tabeakinan tetei ae uoua a na ririki aei ngaia are e a toki tangina ao “e a taetae.” Te kairake n tina aei e reiakinna bwa e kanga aron kaikawakiarake raoi ataei.
Ngke Tamara are i Karawa E kaota te Tia Kamaiu nakon te aonnaba, E kamatata raoi aron A na kaikawairake ni kabongana te bwaana ae marara. E taku te taetae ma ni koroboki aika tabu, “A ongo te bwaana ae kanga e roko mai karawa; … ao tiaki te bwaana ae matoatoa, ke tao te bwaana ae nene; … ma ni bon arona ao bon te bwaana ae e uarereke ma e bon namakinaki irouia ao a riingaki nanoia iai” (3 Nibwaai 11:3).
Ni mweengara, ao ti konaa n riki bwa bwaai ni katoto n aron ara taetae nakoiia kaain ara utu. Ti na riai n aki kabongana te taetae ae nene, ma ti na taetae n ae marara nakoiia naake ti tangiriia. Aio aron A na taetae Tamara are i Karawa nakoiia natina.
TE KAREA
Te kauoua ni kakawaki ni koaua bon te karea. Ngkai aine n te Roro n Rikirake ngkami ao kam reiakinii ngkami te anga karea ni katoa bong. A nang ni kukurei nanora ma bwai aika a raoiroi ake kam karaoi:
-
Kam tabekiniia ataei aika uarereke ngkana tinami a tangiria ni karaoi aia mwakuri. Kam ibuobuoki ni karaoakin te katairiki ao ni kaweneia ataei ni nneia ni matu.
-
Kam tiku ni mweengami n te wikente n aki nako ni kaei tenaa ni botaki ni kakukurei ibukina bwa kam aki kan noori tamnei aika buakaka ma n aki riai.
-
Ngaa ngkami ake kam moan tai ni uti ni katoa ingabong n te aua ni 5 ni kaea te tieminari imwaiin ae kam nakon ami reirei.
Moan te kakatonga te Tia Kamaiu roumi. Bwa E ataa te bwai ae kam kataia ni karaoia. E oota raoi nnae moan te kanganga iroumi bwa kam na karaoa te anga karea. Te Tia Kamaiu E reireiniira bwa ti na riai n anga karea. E anga maiuna bwa te karea ibukiia aomata ni kabaneiia.
Imwiin are E a mangauti, ao te moan bwai are E reiakiniia I-Nibwaite bon Arona ngke E riki bwa te karea. E taku: “I a tia ni moi n te mangko ae mao are E anganai te Tama… . I a tia ni karawawataki iai n A na kantaninga te Tama ibukin bwaai ni kabane imwaiin karikaia” (3 Nibwaai 11:11). E a tia ni karaoa are tangiria Tamara are i Karawa bwa E na karaoia.
E tangirira Tamara are i Karawa bwa ti na karaoa ara utu bwa e na raoiroi. Ngkana koa riki bwa te buu ngkoe ao te tina ao e konaa n tiana aron reken ami mwakuri, are e na konaa ni iai mwiina ae kakukurei. Ngkai te tina ae i kairake, ao I uringa au anene n takakaro nakoiia natiu aine aika uarereke inanon aia tai n taenti inanon ara ruu. Taeka akanne a na tara ni baba, ma a boni kabwarabwaraa aron are I namakinna:
Ngkana I a ikawai, I kan riki bwa te tina ae iai au utu:
Temanna ae uarereke, uoman ae uarereke, ao teniman natiu aika uarereke.
Teuana mai buakon mwakuri are I konaa ni karekea, Nna bon aki konaa n rinea riki teuana.
Iai au utu… .
Ao Nna tangiriia n tainako
ma n anganiia bitiketi ao miriki ao katibu aika babobo,
N rabwatiia ni kaota ae I tangiriia ngkana iai bwaai aika kairua n riki,
ao ni warekii karaki ao n anenei anene aika tikiraoi.
(Tienin Buraeti, “I Kan Riki bwa Te Tina Ngai,” n Anene aika tangiraki [1987], 10–13)
I taku bwa kam oota n te bwaai ae i nanonna. N riki bwa te tina ao bon te kakabwaia ae korakora, ao tiaki te karea.
TE TATARO
Te Katenua, te Tia Kamaiu E reireiniira n tataro.
Ngkana kam buokiia ni kakorakoraiia ami utu, te tataro e na riai n ti tebo teia, ao e na riki bwa anuan maiumi ni katoa bong. Te tataro e na kamanoko man kauntaeka, n anganiko te rau, ao ni buokiia ami utu n nang n tangiriia riki n tatabemaniia nako.
Ngke te Tia Kamaiu E nako ni kawariia I-Nibwaite, ao bon tabeua A na boong n reireiakiniia bwaninin te euangkerio. N te tai anne ao e bati riki ana tai, ae E katurutrua iai riki iaon te tataro. Kam ataia ae n te mwakoro 17 nakon 20 n te Katenua n Nibwaai, ao te tataro e taekinaki 44 te tai? Mwaitin te tai ao E anganiia aomata te tua bwa a na tataro. E bon katorobubua iaontano ao E tataro ibukiia. E reireiniia aroia n tataro. E kakabwaiaia ataei aika uarereke n tataro nakon te Tama ibukiia. E anganiia te tua bwa a na tataro inanoia n tai nako.
Tao n tain te Botaki n Reitaki ao kam na konaa ni uotii koroboki aika tabu, ao ni wareki mwakoro akana aua akanne ni kabaibati, ao n rainiia aan te taeka ae tataro ngkana e taekinaki—tibwauan karaki ao koaua man mwaakan te tataro. I berita nakoimi bwa kam na bon namakina Tamnein te Uea ao ni karikirakea korakoran ami koaua ibukin te tataro.
A tia n taekinna ara burabeti bwa akea tabeaiangaia irouia te roro n rikirake ake a tataro uoua te tai n te bongina. Ngkai, akea tabeaiangaia iroura, ao ngaiira ti na bon aki naba tabeaianga ibukira, ti ngkana ti bon kakaonimaki n tataro uoua te tai n te bongina.
Ongora man a na karaki ae kamimi tinan te Burabeti ae Iotebwa Timiti n te tairiki are e nako iai n anai bwatua koora. E a korea ae kangai: “[N te tairiki anne] I aki matu ni karokoa ae e a bakanako te tai … Tao n te aua te bwimauoua ao e a roko Iotebwa ao man titirakinai bwa iai au ati ae roka ae iai kingiina… . Moan te tounakoai ngkai bon akea teuana irou … Ma Iotebwa… . e taku, ‘Tai tabe iai, I konaa riki ni karaoa ae raoiroi… . ngkana akea—karaua nanom—bwa a nako raoi bwaai ni kabane.’”
E aki maan imwiin nakoia Iotebwa ao Emwaa, ni katikitika te aoti ma te uaekon. Ngkai kakauongo nakon te bwai are taekinna tinana: “I kabanea au tai n te bong anne n tataro ni bubuti nakon te Atua, ibukin ingaingan au iango are I a bon aki konaa ni matu iai.” A na taetae te tina, ae natin te Atua te aine ae raoiroi, e karaua nanon te Burabeti ao e kamanoi bwatua koora. Inanon ririki aika bati, ao a na tataro n tainako e buoka ni kakorakora mweengana ao a na utu (tara Lucy Mack Smith, History of Joseph Smith, ed Preston Nibley [1979], 102).
Kam na kanga ni kabongana te tataro bwa e na kakorakoraiia ami utu? Ibukina bwa moan te tangiri ngkami Tamami are i Karawa, bwa E tangirii ngkami bwa kam na taetae nakoiina. Bwa tera ami kanganga are a na reke iroumi, kam konaa n tataro ibukin bwaai ni kabane:
-
Kam konaa n tataro ibukin te ibuobuoki ni kawakinii ana tua te utu, n aron are te roroko iaon te tai nakon te mweenga.
-
Kam konaa n tataro bwa ami utu e na iai nanoia ni kan uaia reiakinii koroboki aika tabu.
-
Kam konaa n tataro bwa e na reke te maroro ae raoiroi imarenami ma tinami ao tamami.
-
Kam na kona n tataro bwa kam na nanorinano nakoiia tarimi ao mwaneni, ni buokiia ni katoki aia kanganga.
Tataro ibukin kangakanga ake kam tabeaianga iai! Tai bwarannano. Tamami are i Karawa E na bon konaa ni kaekai ami tataro. Ara tataro a na bon bane ni kaekaki n A na tai te Uea ngkana ti tauraoi naba ngaiira.
N te tairiki aei ao I a tia n taekini tenua kakawakin koaua ake a na buoki ngkami ao ni kakorakoraiia ami utu ao mweengami:
-
Kaikawakiiarake ataei
-
Te Karea
-
Te Tataro
E a tia ni kaota te kawai nakoiira, te Tia Kamaiu, ae ara Tia Kaboiira ao raora, Ngkana kam kataneiai ngkami A na anga reirei, kam na bon aki konaa ni karekea te metera ae te tirewa ke te koora, ma ni karekean ami metera ngkai Aine ngkami a na konaa n angani ngkami kaniwanga aika kakannato ao ni kawakina te Tamnei ae Raoiroi ae ai aron te ai ae ura nako aomi n tatabemanii ngkami. Ngkana kam reiakinna ao ni karikiraea tangiran koroboki aika tabu, ao I tataro bwa kam na kunei anga aika iai riki nanoia ni kakorakoraiia ami utu ao mweengami. N aran Iesu Kristo, amen.