Namakina ana Tangira te Uea
Ngkana I kona karaoa te bwai teuana ibukiia aine ni kabane n te Ekaretia aei, are a na namakinna are bon tangiran te Uea i nanon maiuia.
Tariu ao mwaaneu, iai te taeka n rabakau teuana ae kangai: “Butimwaea tekeraoim are e na karakaa riki arom are ko tataneiai iai ngkana ko kotangiria.” Ao I koaua raoi bwa N na bon rikirake. I kan anga ara taeka ni kaaitau nakoia Titita Timoote, Titita Tiiu, ao Titita Tientin ibukin te mwakuri ni ibuobuoki ae korakora are a tia n anga nakoira ni kabane ngaira aika kaain te Ekaretia. I kan anga au karabwarabwa nakoia au Kauntira, aika Keiti, ao Anne, ibukin kukurein nanoia ni beku ao ni ibuobuoki. Bon ainen te onimaki.
I rangi ni kukurei ni kaaitai n te bong aei ibukin tinau ao tamau, ibukin aia reirei ake a tia n anganai, ibukin aia tangira, ibukin reireinau ni mwakuri. I a ataia bwa N na kanga ni mwakuri. I kukurei ni kaaitau ibukin kaainabau. Tiim bon te rao ngaia ae moan te raoiroi. I tangiria, ao I kaaitaua ibukin ana boutoka. Bon te mwaane ae iai i rouna te atataiaomata ao te kokoaua. I kukurei ni kaaitau ibukiia natiu mwaane ao ibukiia buuia, ake a tia ni buokiia n riki bwa mwaane aika raoroi riki. I kukurei ni kaaitau ibukiia tibu. N te tairiki teuana ao ti buti nako n te kaa nakon ana auti natira te mwaane temanna ibukin rinerine nakoiu anne. Iai natiia ae niniraki n te kunikai i aon te kainiwene. I taku nakon Aangi, “I a tia ni weteaki bwa N na riki bwa te beretitenti n te Botaki n Aine.” Ao e taku Bureti, “Ngkoe? Te beretitenti n te Botaki n Aine ibukin te Ekaretia ae bwanin?” A na rangi ni mimi natim iai? E taekina aron te bwai are I a tia n namakinna ibukin wiiki tabeua aika a tia n nako.
Ngkoananoa ngke ti roko ni mweengau, e reke au reta mai i roun natira ae Tawita ao buuna ae Tinebwa, i aon Berotiam. E taku Tawita, “Tinau I ataia bwa ko kona ni karaoia. Ko aki kona n uringnga, bwa ko a tia ni kakabongana te koroboki ae tabu are katotokaa iaon te aitibwaoki are taku taekana, ‘Bwa ibukiu ao kaain au auti, ti na toro iroun te Uea’ (Iotua.24:15).” E taku, “I a tia n rin ao n otinako ma n te aitibwaoki i nanon te tai ae bati, ao I ataia bwa ngkoe ao Tamau kam nanona te bwai anne.” I rangi ni kukurei ma ni kaaitau ibukiia natira.
I kukurei ni kaaitauiia ainen te Ekaretia ake a tia ni buokai, ake a tia n tangirai, ake a tia n reireinai, ake a tia ni kakoauaai. I kukurei ni kaaitauia mitinare n Aia Tabo Mitinare i Ronton i Engiran, ibukin kawakinan aia borarao. I kukurei ni kaaitauiia Aomata aika Itiaki i aon Buritan ake a tia n tatangirai ao ni buokai i aon mwakoron te aba anne.
Ngkai, tariu ao mwaaneu, I aki ataia bwa tera bukina ngkai I weteaki, ma I ataia bwa I a tia ni weteaki. I angani ngkami au tangira, au ibuobuoki, ao I bubuti ngkami bwa kam na tataon nanomi ngkai I tabe n reireinai.
I kaoiia aine aika a ikawai aika kairake nakon te Ekaretia, n te tabo ike a mena iai, bwa a na katoka mataia nakon te Botaki n Aine ao n ataia bwa a kainnanoaki ikekei, bwa ti tangiri ngkami, bwa ngkana ti uaia ni bootaki ma ngkami ao ti na kona ni karekea te tai ae moan te kakannato.
N ai aron are e koroia Uoreti Titekina ibukiia kaain te Moomon, “Aia aine moan te kangaanga aron baireaia.”1 Ao aikai ngaiia n te bong aei! I ataia bwa e tangiriira te Uea. Ngkana I kona karaoa te bwai teuana ibukiia aine ni kabane n te Ekaretia aei, are a na namakinna are bon tangiran te Uea i nanon maiuia ni katoabong. I a tia n namakina ana tangira te Uea i nanon maiu, ao I rangi ni kaaitau i bukin te bwai anne.
I kakoaua au Tia Kamaiu ae Iesu Kristo. I ataia bwa e bon maiu. I a tia n namakina Ana tangira; I a tia namakina Ana kabwarabure. I iangoa te mitinare ae te titita ngke e nangi mwananga nakon ana mwakuri ni mitinare. E taku n ana kabanea ni koua, “I roko nakon te mwakuri ni mitinare bwa I kan kaotia nakon Tamara are i Karawa bwa e na ataia bwa I tangiria, ao ma ni kaboa mwina nakoina,” ao e taku, “I a kabatia riki Ana tarau nakon are I a tia ni kakaraoia i mwaain rokou.”
I anga au koaua ibukin mwaakan ana burabeti te Atua, ae Koten B. Ingkiri, ao I kaaitau ibukina ao ibukin ana tangira ao ibukiia burabeti ni kabane ake a tia n aki nanououa irou. I kakoai baikai ni kabane n aran Iesu Kristo, amen.