Taua karieta ami tooti
Karikirakea te bwain tangira mai karawa anne are mena i nanomi. Tai karooa otan te tamnei are ko roko ma ngaia mai Karawa. E kainnanoa raoiroim te Uea ma am kakamwakuri i aon te aonnaba aio.
Aio te toti are e uota tauran te kabo n te takakaro ni iteran kawaina mai Kuriki nako kawan Taoro Reiki ni Beberuare ae nako. Bon kanikinaean te tamaroa ao te ungannano. E kauraki n te moan tai i Kuriki ni moan tein te takakaro aio n te tai ae rangi ni bwakanako.
Aio aia toti Aine aika Kairake. Aio kanikinaean ana taura te euangkerio are e roko mairoun Tamara are i Karawa. Te taura aio bon iai moana i Karawa i mwain ae ko bungiaki. Ikekei ko reireinaki te baire ibukin kanakomaiara nakon aon te aba bwa ti na kautaki man te mate ao ti na kona n tokanikai i aon te baire are moan te korakora ibukin te kakukurei, ibukina bwa ko kariaia te baire aio, iai iroum te karineaki bwa ko na kona n uouota te toti aio!
E reireinira te Tia Kamaiu bwa ti na “kaurai ami taura i mataia aomata, bwa a na nora raoiroin am mwakuri, ao e na kakamimitonga Tamam are e mena i karawa.”1 Te ota are e roko mai karawa are ko uouotia inanom e bon kanakoaki mairoun te Atua ibukina bwa ngkoe Natina. Iteran te taura are e karaoiko bwa ko na moan baan te raoiroi bon te kakabwaia ngkai te aine ngkoe. Ai tikiraoira aron atakin ae ngkoe te aine, aron rikim n aine bon te entaumente mairoun te Atua. Ara burabeti ni bong aika kaitira a anga reirei bwa “rikira ni mwaane ao n aine bon anuara n tatabemaniira aika iai bukiia n te maiu n tamnei, te maiu n rabwata, ao n te maiu are akea tokina.”2 Bon te kakabwaia ae tabu te bungiaki ma te konabwai n riki bwa te nati te aine i roun te Atua. Aine mairoun te Atua, aika kam kairake ao kam a kara, aika kam onrake n te tamnei ao kam tatabeakini nanoia ao kainnanoia tabemwang, akoi man aki kakai un. Kam bwaina te akoi, ni kateimatoan anuami. Aio bon rikiami. Tai bwaina kakauarerekean te bwai n tangira are e kam anganaki mairoun te Atua. Karikirakea te bwain tangira mai karawa anne are mena i nanomi. Tai karooa otan te tamnei are ko roko ma ngaia mai Karawa. E kainnanoa raoiroim te Uea ma am kakamwakuri i aon te aonnaba aio.
Ao n te tairiki aio ao I tangiria ni kan taetae nakoimi te nano nakon te nano ibukin te kan riki n raoiroi ao ana itera ae raoiroi te riki n raoiroi. Bon taekan tauan te toti anne ni karietaki.
Te aonnaba aio e kataia n tuangko bwa karaoan te raoiroi e a bon aki bwai n taai aikai ke e a bwakanako taiia bwa a maan ao e a karawata aron uruakakin tuua ao e a kakerikaaka arom. Tai kariaia te aekaki ni iango anne. Inanon mamatakum n te tamnei ke ni wareware n taian beeba n kaongora, ko na namakina ae a na taekiniko aomata bwa ko karakaraka ngke ko bon, ataia bwa tera etin kawaim ae kona toua n te maiu aei.
Ko riai n ataia bwa ngai te tina i rouia nati mwaane aika itiman. I ataia mwaane Bon te kabanea ni kakukurei maiuia n ara auti! I rangi ni karekea reireiakiu ae bati mairouia ao mai ruoia raoraoia naba, nikauoua mwaane ao aine. I kona n taekin tabeua rongorongoia ae raba. Tao I kona n tibwaua teuana, ao au kantaninga bwa N na aki reke n te kanganga. A ririba kamamaeaia mwaane. I uringa te mwaane temanna ae te kairake n te tai teuana ae I ataia bwa tain ana taenti te reirei ae rietata. E kaira te aine nakon ara auti imwain te taenti bwa ti na rawetamnei. Ngke a roko iroura ao e rinnanko teuaei inanon te umwa ni kuuka ngke I kakaea iai te kai n rawe tamnei ao e taku, “Tataninga nikarokoa te tai are ko nora iai ana kunikai raou aei. E bon rangi ni botonaine!” Te mwane aio e bon tuai man taekini taeka aikai mai mwaina ngaia are I aki kakoaua bwa tera ae kataia n tuangai.
Ngke I a bon noria raoi bwa e a ota; e bon rangi n tamaroa. Te kunnikai are e bwainna e bon rangi n tikiraoi. I ataia bwa ngaia ma tinana a kaman kabanea aia tai n taratara te kunnikai ae aekakin arei. Ngke a kunea te kunnikai aei, ao a ataia bwa e na bon tamaroa ngkana a manga katokai bwai aika a na taraaraoi riki iai n te aro are e na roko n are a kantaningaia.
Korakoraia nikabane a bon anganaki kaniwangaia iai bwa bon rangi ni kakoauaki bwa e rangi ni botonaine n tairiki aio, ma tiaki ti te kunnikai ae kakiakia taran neiei. Bon man nimamaneina e ngae ngke e ataia ae e botonaine. I kauringaki n te koroboki ae tabu, “E riai n aki toki tamaroam ni katikiraoa am iango, ao e na kamatoatoa riki nanom n ataakina; ao imwina am aki nano kokoraki e na rikirake matoana.”3 E reke maia te nano matoa aei nakon te aine aei? I ataia bwa te aine aei e kona n taraia aomata tabeman ibukina bwa e aki raraoma bwa aekakira taraana. E a kaman katauraoa aron oneana n te wiiki are i mwaina. Te mwaane are raon neiei e namakina te mwengaraoi ao te tan ma te kukurei ma neierei ibukina bwa e aki kanano kokoraki kunikaina. E bon rangi n rianako tamaroana n arona ni kabane n te aro are e a karika neiei bwa e na aki nano kokoraki ao man kukurei. Ao anne e nang katika te mata. E aki mama teuaei i roun neiei; ma e rangi ni kakatonga irouna.
Te aekaki n mwaane ae kairake are e kona n riki bwa te tia kaota te banna n te euangkerio ae moan te tamaroa bon te aomata ae e rangi n raka arona n taai nako, tiaki n ti man tein kunikaina, ma arona nikabane, are bon aron teina ni katoa bong. E rangi ni bati mai i roumi ae aron naba arei ao I karinei ngkami n tairiki aio. Kam a tia ni katamaroa kawaimi inanon maiumi. E raka riki nakon ae aron tein kunikaimi. E raonaki n ae e aki ke i aan onoua mwaitin bwaai are I kona ni iangoi: (1) Aroarom e na raoiroi n te aro ae e na kamaiu te memena ma ngkoe. (2) Am taetae e na aki bure ma e na kakukurei ao e na kakaongora. (3) Ko na rangi ni kakatiki raoiko n taaram ma oneakim n te aro are ko na ititiaki n te aro are ko na katika te mata. (4) Ko na kaineta am iango i aon karikirakean am taarena ao karekean am kouru n tai nako, n aki kamwakamwakako ke n taitai ao n kakabwaka n rabwatam man bwainakin kunnikai ake a rangi ni kororo, ke ni ki, ke te kunikai are e oti iai te buto. (5) Kaekaean takakaro ma te nano ni koaua ma tai kabwabwara nanom n te aro are ko na kai un. (6) Ko na aki tabeakina aron oneaia bwa aekakira ke tera aroaroia; bon iai ngkoe aron tararaoin am kunikai. Ni kauarerekeana, ko na aki kataia ni katotonga tein te aonnaba ibukina bwa ko ata aron katei aika rakanako aikai. Ko ataiko bwa antai ngkoe ao e na karokoko raoi n ae raoiroi. Ko ataia bwa ngkoe bon oin natin Tamara are i Karawa. Ko ataia bwa E kinako ao E tangiriko. Ko tangiria ni kan Kakukureia ao man karinea Ana tangira ibukim. Ko ataia bwa ngkana ko karaoi mwakuri aika ko taraki ni burababa iai, E a manga buokiko naba ngkana ko tanrikaki Nakoina.
Ko karaoia n aron ae ko a tia ni kakamatenanoa Ibukin Kakorakoraia Kairake! Tiaki anne te kabanea n tamaroa n rao? N tabetai ao I tangiria ni kan aranna bwa “buokakin temanna ibukin te kakukurei” ibukina bwa maekanan katei aika raka aikai a kona n riki bwa am kawai ae na rangi n tamaroa ibukin katikan nanoia aomata aika a raoiroi nakoim ao kateimatoam i aon te kawai ae e eti. Ngkana ko maeuakina tamaroan ana kairiri te Ekaretia ni katoa bong, ko taua ni karietata te toti.
Nei Reeti bon temanna te katoto ae N na taekina rongorongona. Bon temanna ataein te reirei n te numera ma Nei Rintie are ngaia are e ata teuana te rongorongo ibukin Nei Reeti are e kakaongora, ngkai e karakinnaed. Rintie e kaotia bwa e bon aki kinaki iroun Nei Reeti, ma e teimatoa n angangan neiei raun nanona. E maiuakina te maiu nakon oin ana koaua ma aron korakorana ao e aki toki ni angangania tabemwang raun nanoia. Ni wiiki aika bati ao Rintie e tataratara aron Nei Reeti. Ao imwina n te bong teuana, Nei Reeti e aki roko n te reirei. Ao n te bong are i mwina, ao are i mwina naba. E ataia ngkanne Rintie bwa raoraona are Nei Reeti e a rangi n taonaki n te aoraki ngkai e riki bwa karaoraomaeakina bwa e irekereke ma kaburorona.
E okira ana auti Rintie ao e a tekateka naba n tang i aon ana taibora. Bon tiaki aekakin aio ngkai bon ngaia ma Nei Reeti a aki rangi ni bati ni iraorao, ma e tuanga tinana Rintie bwa a na riai ni kaman buokia. E bubuti nakoia ana utu bwa a na bane n karaoa aia tataro ma aia aki mamatam ibukin Nei Reeti. Bon te kamimi nakon te tina n ongo mai roun temanna ibuakoia natina, ibukina bwa te aki mamatam ao te tataro a bon tuai man taetaekinanki ni mwengaia i nanon ririki aika a bati. Ngke a maroro Rintie ao tinana ma kaain te utu nikabane n tain te katairiki te tairiki naba anne, ao bon iai te totoko irouia, ma e bubutia nikabane Rintie ao a bane ni kariaia ao a karaoa aia aki mamatam ao a tataro ibukin Nei Reeti, te aomata ae aki kina mwantana. Te kabanea n tamaroa aron te waaki ae riki aio. E aki rangi ni maan i mwain ae e a manga kaoti ni marurung ao ni kukurei Nei Reeti n arona ngkoa. Ma i aon aikai ni kabane, e a tia n riki te mwakuri aio bwa te bwai ae e na ururingaki aron namakinanan te tamnei ni mwengan Rintie. Ibukin anne, ao tabeua bwai aika a rangi ni bitaki aika a kaoti ni mwengaia ao nakon aia utu. A kakaraoa ngkai aia tataro n utu n te tairiki nikabane, te bwai ae aki ririki n ririki aika a tia n nako.
Raoiroin Nei Reeti e ota nako, ao e rootia aomata. Reeti, ngke ko mena ikai n te tairiki aei ao N n tuangko aei, “Ko rabwa! Man am raoiroi ao ko a tia ni kakabwaia teuana te utu ae ko bon naba ataiia. Ao antai ae e na atia bwa tao iraua ni utu riki ae ko a tia n raoniia man kauramwakan am toti.”
Karaoan ae raoiroi e na anganiko te namakin ae raoiroi ao e angania naba aomata te namakin ae raoiroi! I tangiria ni kan tuangko aio—e rangi ni bebete riki karaoan ae e eti nakon karaoan ae bure. E na rangi ni kauarerekeaki te kanganga n te maiu ngkana e raoiroi te aba.
Te kabanea korakora n raoiroi n ana itera te riki n raoiroi bwa e na kairiko nakon te tembora, te tabo ae moan te tamaroa ao man tabu ibuakon taabo nako n te aonnaba aei. Te Tembora bon te tabo ae e kakawaria Te Tia Kamaiu ibukina bwa te tabo aei ana auti ae Tabu i aon te aba.
Beretitenti ae Rorentio Tinoou bon raona tibuna i nanon te tembora n te botaki teuana ngke e a ti taetae naba nakon tibuna Tinoou, “Airi, I kan tuangko te bwai teuana. E a kaoti nakoiu ikai te Uea ae Iesu Kristo.” [Te tibu te Unimwane] “e katoka baina te angatai i aon [atun tibuna] atuna ao e taku, ‘Ngkai tibu, I tangiriko bwa ko na uringa ae aio te koaua mai roun tibum, bwa e tuangko man oin riana ae e bon nora raoi te Tia Kamaiu, ikai i nanon te tembora, ao e taetae ma ngaia ni kaitara te ubu nakon te ubu.’ ”4
Ko kona ni iangoa te mwakuri ae kakainanoaki aei ae ko namakinna bwa ko nakonako n te tabo ae nakonako naba iai te Tia Kamaiu? Ko nora tamneim ikekei, ae itiaki ao e boou, natin te Atua ae te aine, ae e tauraoi ni butimwaea Ana kakabwaia ae te Kabanea n Tamaroa?
Am kekeiaki i nanon maium e na buokiko ni katauraoiko ibukin te nako n te tembora. E kairiri mai Karawa. Ai bon tamaroara te bwai n tangira aei E na buokiko ni kairiko ni kaniko nakon te Tia Kamaiu, ao e na buokiko ni karikirakei bwaintangira ake mai karawa nakoia aine ae ti tibwa tia ni maroroakinna. E katauraoaki bon ibukim n te tai ae kakawaki ae te tai ni katauraoi aei, bwa te katoto ao am rinerine ae ko karaoi e na bon roota aron nikiran maium. Bon ara tataro bwa e na tia raoi arom ni kekeiaki i nanon maium, am taura e na ura mwaaka n te aro are e na roota aron te raoiroia am kariki are a na roko. Ibukin aikai ao a mwaiti riki, te moan Beretitentii e taku, “Ti tangiria ma nanora ae korakora bwa aine aika kairake a na kabanea aia kona ni karekea i rouia te Aine Ni Kairake ae Kinaki. Ngkai a mwakuri roro n rikirake i aon kouru aikai, a na karikirakei aia konabwai ma anuaia are e na kairia nakon te tembora ao ni katauraoia ibukin maeuakinan te mwkuri ni ibuobuoki nakoia aia utu ao te Uea.”5 Te kaniwanga are e rangi n tikiraoi ae boou ibukia Aine aika Kairake are onea mwin noran te tembora e kauringko bwa ko katauraoiko ni karekea tenan otenanti man te tembora, bwa bon rinanon te tembora ao ti na roko i roun Kristo.
Nakoia aine aika a kairake, e riai ni ota mwaaka ami taura i mataia nikabane kaain am utu ao raoraomi bwa a na kona n nora ami mwkuri korakora ae raoiroi ao ni kamimitonga iai Tamami are e maeka i karawa. Bon te tibwanga teuana uouotakin te toti. Bon ara tataro bwa otana e na kaota kawaim n taabo nibane ike ko nakonako iai ni kawaim ao bwa e na karokoko raoiroim n te bong teuana ni karekean tenan otenanti aikai man te tembora, ibukina bwa e mena i nanon te tabo ae tabu ike ko na kunea iai te taura ae otamwaka ibukiia nikabane, n aran Iesu Kristo, amen.