Te Tei n Taabo Aika Tabu
Te tei n taabo aika tabu aika bon te raonaki raoi, n ti ngkami ke ngkami ma tabeman riki.
Bon tairikin te Kaabong, te tai anne are aia tai Tinau ma au Karo n nako ni karaoa aia mwakuri n te Katetiten Tembora. Ia bon ataeinnaine, n ai aromi aine aika kairake. Tibu teunnaine, are mamaeka ma ngaiira, akea ngkai irarikira, ao I a tiku n ti ngai ni mweengara. Ngke a nang nako, ao au Karo e rabatai n akoai ao e taku, “Tiaron, ngkai, ko na tiku ma te rau.”
Ia iango, “Tera ae e iangoia? E ataia ngkai ae n nang tiku n ti ngai?” Ao ngkanne I a ataia—bwa anne raoi aron ae e iangoia.
Te tei n taabo aika tabu bon te raonaki raoi, n ti ngkami ke ngkami ma tabeman riki. Bon anne te tai are raoniira iai te Tamnei ae Raoiroi—n ti ngaiira ke ma te botannaomata. Ngkana ti baireia i bon iroura bwa ti na kairii ara iango ao ara mwakuri ao ni karaoa ara kabanea n tamaraoa, ao te kabanea n tamaroa ni maiu e na roko iroura.
Te tabo ae tabu bon te tabo are ti namakina iai te rauraoi, mweengaraoi, tangiraki, ao ni karauaki nanora. Ao anne aron mweengara are i karawa. Te tei n taabo aika tabu ao n raonaki raoi mani kaokii rikaki ara namakin ao ara ururing ibukin te mweenga are tia tia ni katikuii imwiira, te mweenga are n tai akekei e tara n nang n raroa nako.
Uoua ao teiterana te ririki imwiin barongakin te Ekaretia, te Uea e a kauringa Iotebwa Timiti ibukin taian buaka ma rongoo ao te rootaki n te kainnano are ana roko ibukin te buakaka. Ngkanne E tuangira bwa ti na kanga n rauraoi inanon te aonnaba anne: “Tei n taabo aika tabu, ao tai kakamwakuri, ni karokoa te bong are E na roko iai te Uea” (tara D&C 87:8).
N taabo aika tabu ao ti kamanoaki raoi man rotakira man uruakakin tua n te aonnaba. A konaa n riki anera bwa raora ao ara boutoka (tara D&C 84:88). Te burabeti ae kakannato are Moronaai e otabwaniniaki n tenaa ni buakaka ao Reimwanaite a tataninga bwa a na kamateia ni kabane ake a mena imwaiin kawaiia. Bon ti ngaia ni karaba inanon ae kaan uabwi te ririki. Iangoa te aeka ni maroa anne! Ma aron tikiraoin a na koaua ma a na maroro ni ibuobuoki ake a mena n te kabanea ni mwakoro n Ana Boki Momoon are a tuangiira bwa e raonaki irouia anera ao te Tamnei ae Raoiroi. Bon tiaki ti ngaia. Te Tamnei ae Raoiroi e konaa ni kanakoa te kanganga, te namakin ni maraki ibukin te maroaa ke n raroa nako n akea raona ke n aki butimwaeaki ao ma ni kaoniira n te rau. E aranaki bwa te Tia Karaunano—ao bon Ngaia anne!
E konaa n reke are taai ni maroaa bon taai ake tia otabwaniniaki iai irouiia aomata, n airoia naba raoraora, ake a rinei rinerine aika bure, ao anne are ti konaa n tei iai n ti ngaira. Iai tabeua taabo aika aki rauraoi ibukim bwa ko na nako iai ni buoka temanna ae kainnanoa buokana. A na taeka te Uea bwa ko na tei n taabo aika tabu. Bwa iai taabo aika e aki konaa ni mena iai te Tamnei. Ao ko bon ataai taabo akanne. Kararoako mai iai. Tai kaunga te nano ae ingainga ni kaan ataa te bwai teuana ma teuana anne are e na bon riai ni katokaki. Ti katabea am iango nakon are bon am namakin n te aro are ko na konaa n ataa te tai are e aki koaua raoi am namakin ke n aki rau.
Iitaa e karakina nakoiira te tai are kaooaki iai ma aomata aika a “nang kinaaki” n te reirei. Ngke e rinnako inanon te mataroa, ao te katangitang are e nang n takarua n tang inanon te auti anne e roota tamneina. E namakina te aoraki inanona. Ao ngkanne raoraora a moanna ni buanako nakon ruu aika roo. E taku Iitaa, “N tain te bootaki anne ao I a moanna n ataia bwa N na karaoa au rinerine: bwa aomata aikai ke ake bon au karinan. I aki konaa ni booti ni kauoua. I ataia raoi bwa I aki kukurei n taeka ake I ongo ke kaoti tamnei ake a na kabuakaka au iango, n aki tabe bwa kinaakira aomata aika. I ataia raoi bwa N na riai n aki mena ikekei. Ngke I tabe n tataninga tinau are e na roko n anaai, ao ngke I tara tinaku ae rotongitong n te tairiki anne man te winto, ao iai te oota ae ootanako mai iaon te tabuki kanga te bikan ae te tembora. Ti tebo ma te Uea are e kakoauai bwa I karaoa te bwai ae eeti.” (kabonganaaki man te kariaia, ao arana e bitaki.)
Te tei n taabo aika tabu a buokiira n riki n tabu, ao anne te bwai ae riai ni karekeaki ae raoiroi. Kataneia ngkami n ongo iroun te Tamnei ao ni bwaina te ongeaba. Kataneiai ngkami aromi aika kororaoi n te itiaki. Kataneiai ngkami te karinerine ae korakora ibukin bwaai aika tabu. E a tia n tuangiira te Uea bwa ti na roko Irouna ao E na karaoiira bwa ti na tabu (D&C 60:7). Ti na kariaia bwa E na katobibira n a na tangira ao A na kakabwarabure ao a na rau. N aki ataakin te bwai ae karaoaki ni katobibi ngkami, ao kam konaa ni kataneiai ngkami karaoakin ami otabwanin, ni kaonrakea n Tamnein te Uea.
Imwaiin titirakinan riki temanna bwa kororora ke kooraa ke ami kunnikai e nang ni kaota rabwatami, bon anne tabemi ao n riai n titirakiniko, “Bwa tera ae I konaa ni kunnikainai iai, ao tera aron au mwakuri ao tarau iai n te aro are te Tamnei are e Raoiroi E na mena ma ngai ao Tamau are i Karawa E na kakabwaiai?”
Moan te kanganga te kataneiai nakon nanomi n tangiran te raoiroi ao te tikiraoi ngkana kam kaitibo ma kaitaraakimi ni itaramata mangaiia n tainako ao ni kaota karaoakin te mwakuri ni baba ke te kangare ao te nang ni kinaaki.
Ngke kam bwabetitoaki, ao kam karaoi berita aika tabu ni kawakin tua. Berita akana tabu ma kakabwaia a karekea n tainako Tamnein te Uea iroumi ni manga kabooua ni katoa te tai are kam a tau iai ni kana te toa. E na kakorakoraii ngkami ngkana kam kaririaki.
Natira te aine e uota te bwai ae tikiraoi mani kangkang nakon botakin te toa ni katoka iai uniia natina mwane teniaman aika uarereke. Ngke e a tia ni katabuaki te kariki ao e a kabutaki n ara rinan, Tieke, ao teniman riki, a wirikiriki nakon taningau, “Tuangiia bwa tiaki tangira te kariki anne. Ti bon uota kanara ae e kangkang riki.” Ibukin temanna ae tenua a na ririki, te bwai are nooria bon ti mmwammwan te kariki ao n ana iango iai riki irouna ae tamaroa. Ni kinakina bwa tera ae tabu ao reiakinan nanora nakon are kaotaki ni maiura ibukin te kakukurei. Bungin taai ae moan te tikiraoi ke karawa ae onrake ni itoi, ao te rooti ae tikiraoi n rabunaki ni mwaimwaiin aoin te bong ke te tetei ae ingainga nanona ni kan ataibwai—akanne ni kabane ake a manga kauringiira riki bwa a na bwai te Atua a bane n tabu.
Taabo aika tabu a konaa ni mena n taabo ake kam mena iai—n ti ngkami, ibuakoiia te botannaomata, ma ianena, ma raoraomi. Te kawai nako Ieriko e kanganga ao e kakamaku. Taani iraa a karabarabaia ibuakon buakoako ao aroka n tataningaiia taani mwamwananga bwa a na kamwaruaiia. E reke nanon te I-Tamaria ae akoi man nanoanga ao e a bita te tabo ae kanganga nakon te tabo ae tabu. Iai bwaai ake kam konaa ni karaoi ni karokoa ae tabu nakon taabo ake a bon aki tabu: ngkana kam kabanea ami tai ma ataei aika uarereke n te aro are e na reke a na tai ni motirawa te tina, ngkana kam irei bwain amwarake ibukin mwanem e ngae ngke bon a na tai ni irei bwain amwarake, ngkana ko kaitiaka te auti ibukin raoraom ae e a kara—ni kabane bwaai aikai ana karekea ami namakin ae kam na tabeakinii riki kainnanoiia tabeman n te anga karea ao taburorokoiia.
Iai taai are e na wirikiriki iai te Tamnei bwa ko konaa ni karaoiroi riki taabo ake ko mena iai. Te taun teuana i Rutia ae Omitika i Tiabiria e tara n ae mwaitorotoro ao akea kaai iaona ni karokoa are I a ongo iai aia anene aine aika kairake ao mwane aika kairake n anenea. “Au Uea Atuau”(Te boki n Anene, nambwana 86) ni bon oin aia taetae. Ni karina n riki ao te aonnaba ae bwaanin—ke tao ara aonnaba—e a kabuebue ma n tangira ao ni kakukurei, bwa te tabo ae tabu.
Iai te wanawana ae bati ao te kairiiri ma te rauraoi are tauraoi nakoimi n tainako, bwa iangoakin raoi te tataro ao kamatebwaian koroboki aika tabu. Aio are e kateimatoa ami iango ao ni kamatoatoako n taabo aika tabu ngkana ko nako nakon taian reirei ke taabo ni kaboo kunnikai ke n noora te bwai are e tauraoi iaon te Intanete. E taku Tiemti E. Bauti, “I kakoaua te wareware ni koroboki aika tabu bwa bon te kabanea n raoiroi ni mitiin ni kaitiaki ibukin iango aika aki itiaki ao n aki tauaki mwiia” (“Te Mwaaka n Taubeakin-Arora,” Riaona, Turai 2000, page 53).
Te tabo ae Taburoroko ae akea te karongoa iai ao e rau, ao te tabo ae tangiraki ngkana tiaki nang ni katabei arai iango iai. Te Uea ngke E a mangauti ao E nakonako nako Emwauti ma uoman mwane ake a nang n tabe ma bwai aika riki ngke E tauraki n te kaibangaki ao ngke E a mangauti ao aki ataia ae bon te Uea Ngaia are raoiia are E nakonako mangaiia.
N ririki aika nako ao I anenea te anene ae Ana Metia Aento ma te kurubu n aomata aika kakaokoro aia onimaki. E ngae ngke a kakaokoro ara koaua, ma ti bane n anenea te Metia ae ti temanna, ae oin ara Tia Kamaiu. I a tia n anenea te anene aei n tai aika mwaiti, ma n te tai teuana, ao e a tuangai te Tamnei bwa I aki ti anenei anenen te nooti, ma I bon anenei naba au koaua: “E koaua, e koaua E anai rawawatara, ao e uouoti nanokawakira” (Itaia 53:4) I ataia ma nanou ni koaua bwa E karaoa anne ibuku. Ma n te tai aio 300 riki bwaana aika roko n te wirikiriki ao I namakina ae kanga ai ti ngai ma te Uea. I namakina A na tangira ao ni kakoauaraoi bwa E a tia ni uouoti rawawatan ao nanokawakin nanou n rikirake, ao rinanon au ongeaba, ao E na bon teimatoa N nakonako ma ngai ni kabane au bong ni maiu. N namakina te kakabwaia ao te karaunano ao te tangira ae bwanin mairoun te Uea bon te kanuwanga ae tau.
Ngkana kam ataai tabo aika tabu, ao ngkanne kam na ataaia bwa kam mena ia. E na konaa ni karekea te anga karea n tangiran te aonnaba ke aron kinakiira. E na kainnanoa kakawakiu irou ao au kabwarabure ke te rairannano ae bwanin. E nang ni kainnanoi “bai aika itiaki ao te nano ae e itiaki” (Taeka n Rabakau 24:4). Karaoa are kam konaa ni karaoiia n te aro are kam na konaa n tei n taabo aika tabu ao n aki kakamwakuraki, n tei ibukin te koaua ao te kororaoi n te raoiroi, n akea kerikakin te bwai are katikitiki ma mwakuri aika bubuaka ni karekei babaire aika raba ibukiia aomata ake a uruii tua (tara D&C 89:4) ao te maroro ma aomata iaon te terewitiin, rerio ao nutibebwaa. N a na taeka Beretitenti Ingkiri, “Tei ni karietatako ao kariaia te anua ae raoiroi n oota [rinanon] maiumi” (“Te Tai n te Moan Waaki ae Boou,” Riaona, Turai 2000, 107). Raora aine n te roro n rikirake aika tangiraki, kaooa te Uea bwa E na nakonako ma ngkami. Ao kariaia bwa raomi inanon maiumi, ni katoa bong inanon maiumi, n te aro are kam na konaa n roko n te mweenga are kam kan roko iai, te kabanea n taburoroko mai i buakon taabo ni kabane.
I a kainna n te anene are kabwarabwara au tataro ibukimi ao ibuku:
Te itiaki riki e anganai,
Te korakora riki bwa I a aonga n tokanikai,
Te inaomata man buakakan te aonnaba,
Te kan okira mweengami are i karawa.
Buokai bwa N na tauraoi ibukin te abanuea,
Buokai bwa N na nang ni bongana,
N na nang ni kakabwaiaki ao n tabu—
N riki, n ai aron, te Tia Kamaiu.
(“N Riki n Nang Taburoroko E Anganai,” Anene, nambwa 131)
N aran Iesu Kristo, amen.