Riki bwa mwaane i nanon Tamnein te Atua
Te Uea e bon angaanga man bwaai ake iai i rouna ni kakabwaiaa maiura iai ni kaineti nakon ara kakaonimaki. E tii kona n karikiira bwa ngaira mwaane i nanon Tamnein te Atua, ae Tamnei are Raoiroi, bon arana.
I tangiria ni kan kaineta au marooro n te tairiki aei ma mwaane aika kairake ake iai i rouia te Nakoanibonga ae te Aaron. Ai tamaroara aron reken te tibwanga ae onoti aei ae te nakoa ni ibonga mai roun te Atua, are e kona ni karekei mwaakara, konabwaiira, ao kataakina. Ni kabwarabwaraan te kakabwaia aio ni karekean te tibwanga aei, I kan taekina rongorongoia uoman mwaane aika ana aomata te Atua, a uaia ni uouota aran Iotebwa.
Iai kaokoron aron rabakaun au karo ngke e mena n te roro ni ibonga. Akea ngkoa reirei aika a rietaata n ana tai ni maiu, ao e rangi n tangira te reirei. E reke ana kariaia mai roun ana karo bwa e na kitana aia tabo ni man ao man kakaea ana reirei n taabo tabeua, ma e na karekea ni bon oin korakorana. Ngke e roko n te kaawa ae Taoro Reiki, ao e ongo bwa iai te nakoa teuana n te mwakuri ae e butimwaeaki ni mweengan te Beretitenti ae Iotebwa F. Timiti. Ao e tangoaki bwa e na riki bwa te tia kawakinia uoman ana kao te beretitenti. N ara tai ni taatataro ni utu n te tairiki ao ti taatangiria ni kan ongongora aron maiuakinan irekereken ana iraorao ara karo aei n ana tai ngke e kairake ni mwengan te burabeti.
Ao ti ongongo mai rouna ana ribooti n aron aio:
Te tari ae Timiti e kabwarabwara nakon au karo ni karaoan tabena, ni kaotia bwa taian kao “bon kanga tooka, ao ko riai ni kawakiniia raoi. Ko na riai ni kaitiakiia raoi ao man kataneiaiia raoi n te aro are ngkana e reke au tai ni kairiia nakon te auti ni kamataku, a na bon riai ni itiaki nakon riniia.” E taku au karo bwa e ata aron kamirikaia ma e aki ata aron tebokakiia.
I mwain te kamiriki n te moaningabon ma te tairiki, a bon kaakarauaki raoi ni kaitiakaki ao ni kamwauaki ma te ran ae bue, te toobu, ao taara ake a kakatauraoaki i bukin tebokakiia. A kamwarakeaki n te kabanea n tamaroa n uteute ao ni miriki uatai aia tai n tebongina n te aro ae e aki bwaabwaka taiia.
Ni ikotaki ma tabena n aia utu te Timiti ao aia “toka”aika kaao, ao e tuangaki au karo bwa iai katabeana riki ngkana iai boobotaki. E kona n tuangiira karaki n aron aio: “Teuana te ingabong ae rangi ni mwaitorotoro ao I kaitiaki taian tabo n nakonako atiibu ake a totouaki are te kawai are e kaeti nakon mwengan te Beretitenti n te Ekaretia aei. E a kaan roko n tokin kawain aia tabo, ao I katuka te ran i aoia i mwaain ae N na kamwauii. I mwiina ao N na anaa te ran ae bue n taria i aoia bwa I aonga ni kamwauii atiibu. I aon kawaia atiibu aikai ni bane ni itiaki, ma a mwananga naba raou n reirei n rirarikiu i mwaain ae tia au mwakuri. Bon nanorinano are e maiuakinaki n te aro aei.”
Man taekinan taian karaki aikai, I aki kan katuka i roumi te namakin ae titebo au karo ma bwebweutan Nei Tinterera. Te utu ae te Timiti aei a anaa te tia kawakinia kaao ae kananoanga aei mai Itaao nakon mwengaia nikarokoa e bane ana reirei ae rietaata ao e a manga kaea te katenrinan n kuura ae rietaata i Iutaa. A kairiiria n aia bobotaki nako n aia utu, n tekatekaia ni katobibi n aia taibora n amwarake, ao n aia tataro ni utu. E tibwaua nakoira ana kakoaua au karo bwa te aomata ae Iotebwa F. Timiti bon ana aomata ni koaua te Atua: “Ngkana I katoro bubua n tataro ma te burabeti, n tain te tataro ni utu, ao ni kakauongo nakon kainnanoakin te kakabwaia mai roun te Uea, ao boton raoi te kakabwaia are e karekea, ao ae I a kona raoi n tei i aon waeu n te aonnaba aei … Angiia mwaane aika a kakannato ake I a tia ni kinaiia a tia ni karikiia tabeman bwa a na aki kakawaki ke ni bongana man aron reitakiia nakoia aomata aikai. Ma tiaki aron te burabeti ngkai e bon kona naba n teboka baina ao ni kabwarai kabaean ana kau.”
Reirei aikai e anganiira kukureira ae korakora ao ara tangira i bukin ana burabeti te Atua.
Ana kabwarabwara au karo i bukin te Burabeti ae Iotebwa F. Timiti e kauringai ana kibuntaeka Bwarao i bukin Iotebwa i Aikubita: “Ti kona ni kunea temanna ae ai aron teuaei, ae te aomata ae mena i nanona Tamnein te Atua? (Karikan Bwaai 41:38)
Ana karaki au karo e taekina rongorongon Beretitenti Timiti, ana utu, ao ana kao, ao a kaoka aron te tai ni moan te kauabwi n tienture. I aki ataia bwa au karo e iangoa aron rikiraken boong aika ma kaombiuta aika a tekateka i aon taiboraia aika uarereke ao aron bairean butina n te kiikaeeti, ao titoan ana iango a baireaki n te kiikabwaiti. I aki kantaningaia bwa e na kona ni iangoa aron taian buakaka are e kona ni karaoi Taatan ma aron rabakau aika a tamaroa aikai. Rinanon ana kawai aikai, e a tia Taatan ni kona ni kabuti aekaki ni aoraki aika urubwai i nanon te kaombiuta aikai. Man aoraki aikai a na karekea te urubwai ae korakora nakon tamneira ngkana akea kawaira ae kakorakora ni kaaitara ma ngaiia. Aio are e a karika iangoan te tia kaitara te urubwai ae i nanon te kombiuta aei irou bwa e rangi ni korakora nakoia taan urubwai aikai—anne bon ana bwai n tituaraoi te Tamnei ae Raoiroi.
Man te bwai n tituaraoi aei ao e taku Beretitenti Iotebwa F. Timiti: “‘Ana bwai n tituaraoi te Tamnei ae Raoiroi,’ bon te kakabwaia ae okoro are e kabaeaki nakon taan raira nanoia ni karekean te bwabetito i rouia ake a kakoaua Iesu Kristo, ao bon te tia te kakoaua ae kabaeaki.’ Tamnein te Atua bon te bwai ni kakukurei nakoiara ae e aki teimaan rorokona n ai aron te ota ao te mwaaka mai karawa are e roko i roun te aomata i bukina ae onoti ao e riai. Ma ana bwai n tituaraoi te Tamnei ae Raoiroi, are e karekeaki mai irouia abotoro n tain bongin te Bentokota, bon te bwai ae kamatoaki aron rekena, bon te kakoaua ae matoatoa ao te entaumente ae rietaata riki” (I nanon ana rongorongo James R. Clark, comp., Messages of the First Presidency of The Church of Jesus Christ of Latter-day Saints, 6 vols. [1965–75], 5:4).
E rangi ni kakaawaki bwa a na buokiko am utu n reirei rongorongon ana euangkerio ara Uea ao ara Tia Kamaiu. I mwina, ngaira nikabane ti na bane n katang nakon ana bwai n tituaraoi te Tamnei ae Raoiroi bwa e na raoniira ni maiuakinan te raoiroi man te buakaka. Aio aron te katooto i roun teuare Iotebwa mai Aikubita are e ibuobuoki n anga te kairiiri nakoira n tatabemaniira nako. Bon te aomata ae e rangi ni maamaiuakina Tamnein te Uea n taai nako ma nanona ni kabane, n te aro are te mwaane are e mataki man kaakarinean te bouannanti, ae arana Bwarao, e ataa naba aron ana aki boutoka ma korakoran Iotebwa.
Ti na kataia n te tairiki aei n noria bwa tera ae ti na karekea man ongoraara n rongorongoia mataniwi aike a korakora are ti kona ni kunei ni koroboki aika a tabu. E kairiira Iotebwa F. Timiti n ana Kaeka nakon Titiraki man te Euangkerio: “Kanga e karaurau te koaua bwa ataeinimwaane a weteaki man katabuaki n taai ake a rimoa ngkoa. Ni boona ake a rangi ni mane bwaiia ngke a rangi n abwabwaki iai maiuiia aomata, tabeman a weteaki bwa a na mwakuri i nanon ririki aika a aki kona ni kabotauaki abakiia. Enoka bon temanna ma ai uabwi ma nimaua ana ririki ngke e a weteaki man kabuaki i roun Atam; … ao Nooa e karekea i rouna te nakoanibonga ma ngke tebwiina ana ririki (tara D&C 107:48, 52). Rorora Iotebwa, natiia Iteraera, e bonaki tauaki mwiin are e karekea iai te nakoa ni ibonga; ma e na bon bae ma ngke e ataei. E kaboaki nako irouia tarina ngke ai tibwa tebwi ma itiua ana ririki, ao e na bane n tia n reke i rouna te nakoa ni ibonga i mwain te tai anne, are e mwakuriia iai n te aba are Aikubita [tara Karikan Bwaai 37:2, 40:8–19; 41:14–36]” (comp. Iotebwa F. Timiti te teei., 5 vols. [1957–66], 2:9).
N rairaki nakon ana boki Karikan Bwaai n te O Tetamenti, ao ti kunea karakinan Iotebwa. Iotebwa bon kaain te utu ae tengaun ma temanna ngaia ma tarina—tengaun mai buakoia a bon ikawai nakoina. E tara n ae e rangi n mamate nanon tamana i rouna nakoia ake nikiraia. E karaoa ana kooti Iotebwa ae matamata, ao e kariaia bwa e na tutuku n te auti, ao e mwiokoia bwa ni katoa tai bwa e na naanako n tutuoiia tarina ake a taatararuaiia nanai n tiibu. Ao e tia naba ni mii Iotebwa bwa kanga e mena ngaia n ana tabo ae e rine nakoia tarina.
N te bong teuana ngke e nako n tuoiia tarina ngke a tabe n kairiiriia aia nanai, ao a iangoia bwa a rangi ni bati n tau n tarataraan tariia n aron okorona ao a tangiria ni kan kaaki taekana. E roko te nano i rouia bwa a na kabooa nako bwa te toro i rouiia tibun Itimaera ngke a mwananga i aon kawaia nako Aikubita.
N te tai ae e waekoa, ao e a kunea Iotebwa bwa e a mena n te tabo ae e bou nakoina ao aomata aika a iruwaa, te aro ae boou, ao n ae te kabanea ni buakaka nakoina, ae bon kaboakinakoana bwa te toro. E rangi ni kaotia Iotebwa bwa e rangi n raoiroi ao e kaotia naba ae e kaboaki i roun “Botibwa, ae ana mataniwi Bwarao temanna ae mataniwiin te buaka.” (Karikan Bwaai 37:36)
Ao te Uea e mena i roun Iotebwa, [ao e uouota te tamnei ma ngaia n te aro are e a buokia ao n karikia bwa] te mwaane ae e rangi n teetekeraoi; ao e a maeka n ana auti ana mataniwi.
“Ao ana mataniwi e nora te Uea bwa e mena i rouna, ao bwa te Uea e karaoi bwaai nikabane n te aro ae e mauri iai aon abana.
“Ao e kunea te kukurei Iotebwa ni matana, ao e buoka ana mataniwi: ao [Botibwa] e karaoia bwa e na tara aron te bwai ae e na riki nakon mwengana, ao bwaai nikabane ake iai i rouna e na kaaki i nanon baina.
“Ao e koro raoi nanona man te tai are e tara iai te bwai are e na riki nakon mwengana, ao i aon bwaai nikabane ake iai i rouna, bwa te Uea e kakabwaia mwengaia i Aikubita i bukin nako ana waaki Iotebwa; ao ana kakabwaia te Uea e mena i aon bwaai nikabane ake iai i rouna ni mwengana ao n ana marae ni kai n amwarake.
“Ao e katikui bwaai nikabane i nanon bain Iotebwa; bwa e aki atai bwaai ake e atai Iotebwa, e kawakinaki te kariki are e kanna. Ao Iotebwa bon te aomata ae rangi n raoiroi, ao e tamaroa naba aron tangirana” (Karikan Bwaai 39:2–6).
N te bong teuana ngke e tabe ni mwakuri Iotebwa i nanon te auti, ao e a kunea naba bwa e mena n te tai ni kangaanga. E a karaoi naba te mwakuri ae e buakaka buun Botibwa ni kaakaniia Iotebwa. E waekoa Iotebwa n ataia bwa e mena n te tabo ae bure. Ti ongo bwa e taku:
“Akea riki te bwai ae kakaawaki riki n te auti aio nakoiu; bon ake naba te bwai ae na tuukai ni katukai i buki ma bon Atuau, ao e birinako, ao e otinako mai iai (Karikan Bwaai 39:9, 12).
Ti reiakina te reirei ae moan te tamaroa mai roun Iotebwa. Ngke e kaoti nakoina te kariirii, ao e waekoa ni kitana kaotin te buakaka arei. Ngaira nikabane bon iai kangaanga are ti kaakaitibo ma ngaai i nanon maiura are ti kakaewenakoaki nako iai.
Ngkana ti a kaitibo ma bwaai ake a buakaka ao ake a na uotira rikaaki—tao te bwai ae bure n aron te katangitang ae ti aki riai n ongoraei, kanoan te terewition, ke te intaneti are e karokoira n te aonaaba ae bure—bon kakorakorakira aron rongorongon Iotebwa ngkana ti ururinga karakinana: “Ao [e] birinako, ao e otinako mai iai” (Karikan Bwaai 39:12).
E kaotinakoa rabwatana man te kariiriaki.
Ma e aki kainaomataaki man ana rinerine aika a raraoi Iotebwa man kakaewenakoana are e kaitara ma ngaai i nanon maiuna. Ngke e okira te auti Botibwa, e tang buuna ao e tua nakoina bwa e a tia ni bwainikiriinna Iotebwa. E rangi ni un Botibwa ao e “anaia, ao e kaaki nako nanon te umwa ni kaikain, te tabo are a kaakaki iai ana bure Botibwa: ao e tiku i nanon te auti ni kaikain.
“[Ao e a manga] raonaki naba Iotebwa i roun te Uea, ao e nanoangaia, ao [E] anganna te kan akoaki i matan te tia kawakina te auti ni kaikain.
“[N te tai ae aki maan], te tia kawakina te auti ni kaikain e angan bain Iotebwa nikabane buure ake i nanon te auti ni kaikain; ao bwaai nikabane ake a karaoi, e na bon kakabwaiai” (Karikan Bwaai 39:20–22).
Ma e teimatoa te Uea i roun Iotebwa, ao e manga kaoti naba te tibwanga nakoina ngke e mwakuri n te auti ni kaikain. Uoman ana tia mwakuri Bwarao ake a teweaki nako n te auti ni kaikain. Temanna n tatabemaniia a bon mii are e bon kona naba n raira nanona Iotebwa. Temanna mai buoakoia e na bane bongin maiuna n te auti ni kaikain; ao are temanna e na manga oki rikaaki i nanon tenibong nakon nakoana ae rietaata ae ana mataniwi Barao i rouia tooro aika mwaane ao e mwaninga taekan Iotebwa nikarokoa e a nako uoua te ririki.
Imwina Bwarao e mii. Akea ae kona ni kabwarabwara nanon miina. Te mataniwii i rouiia tooro arei e a uringa Iotebwa. E tuanga Bwarao aron ana konabwai Iotebwa ni kona ni kabwarai mii. “I mwina Bwarao e kanakoa bwa e na wetea Iotebwa, ao a uotia ni kaotinakoa man te karabutinaki: ao e kaitiakii buaina, ao e oneia nakon kunnikaina aika a ititaki, ao e roko i roun Bwarao” (Karikan Bwaai 41:14).
E kona Iotebwa ni kabwarabwara nanon miin Bwarao. Bwarao, e bon rangi n rootaki n te kukurei, ao e karika Iotebwa bwa temanna ana toro. Ao e aki toki ni mena te Uea i roun Iotebwa. N te tai ae e aki maan ao e karikirakeaki Iotebwa nakon nakoana ae te kauoman nakon Bwarao n aban nako Aikubita. Bon iai te bwai ae okoro are e karika tabekaaraken Iotebwa i buakoia raona nikabane ngke e taku, “Ti kona ni kunea temanna n ai aron teuaei, ae te aomata ae iai i nanona Tamnein te Atua?” (Karikan Bwaai 41:38).
Ko na bae n nora aron nako ana mwakuri Iotebwa are e kunea iai bwa te Uea e memena i rouna. E bon bebete aron kinaakin okoron te tamnei i nanona i bukin anuan maiuna ao n ongoongona ni bwanaan te Uea are e kairiiria iai.
Te aekaki ni kikina anne e na bon kakoauaaki naba bwa e kona ni mena naba i roura n tatabemaniira nako ngkai ti kairaki ao n tutuangaki mai roun Mimitongin Tamneina ae Raoiroi. Kakauongo nakon teimatoan, te bwana ae uarereke ngkana ko kaitara ma te tai ni babaire. E na bon kakoauaaki bwa bon anganakim am tai ni iango ae matoatoa nakoim n te bwana are e na tuangko bwa ko na tiringa te katangitang ae e bure, ao man kararoaakin tamnei aika bubuaka, ke kaotinakoa am iango man taraakin beeba ake a uota te buakaka nakon am iango. E na bon kairiko te Tamnei are Raoiroi ngkana ko mena n te tabo are ko aki kariaiakaki nako iai.
I berita nakoimi, bwa ngkana ko karaoa nanon ana kairiiri te Tamnei are Raoiroi ao ni iriira Kawaina, ao ko na bon kakabwaiaaki man raoraonaki n aia mwakuri anera, are e na ikotaki riki te marurung nakoim, te atatai, mwaaka, ao te mimitongi nakon maium. Uringnga, bwa te Uea e bon angaanga man bwaai ake iai i rouna ni kakabwaiaa maiura iai ni kaineti nakon ara kakaonimaki. E tii kona n karikiira bwa ngaira mwaane i nanon Tamnein te Atua, ae te Tamnei are Raoiroi, bon arana.
Bon te kakabwaia teuana are ti anganaki bwa ti na kona ni kaota mimitongin te nakoa ni ibonga mai roun te Uea ao ni karekea te mwaaka ao te korakora mai iai. Ke e kairiira tamnein te Uea ao man tuangiira aron kamatebwaian rongorongoia ara burabeti ake a korakora ake a tia ni kamaeua te aonnaba. Ti bia kaitiakaki ni maiuiia n te aro are e na tewenakoira ni kaniira nakon te Tia Kariki Bwai ao e na buokiira bwa ti na kukurei n taian kakabwaia ao uaanikai ake a roko man ana euangkerio ara Uea ao ara Tia Kamaiu. E bia kairiira n tamneina bwa ti na iriira Kawaina aei bon au tataro ma te nano rinano n aran Iesu Kristo, amen.