Otinako man te roo nako nanon Otana ae moan te Tamaroa
Te kakairi n Ana mwakuri ni Kamaiu Iesu Kristo e kauringiira bwa ti kainnanoia n aki tiitiku n te rootongitong. Ti kona ni karekea otana i rarikira n taai nako.
Itaia, te burabeti ae kakannanto n te O Tetamanti, e taetae ni burabeti, “Ao e na roko te tai n te kabanea ni bong, bwa te maunga are n Ana Auti te Uea e na kateaki i taubukin te maunga, … ao nikabane aonnaba a na bwaro nako iai.”1 N taraakin taan maeka n aaba aikai, Beretitenti Tiaon Teira e taku, “A na roko, n taekinna, ti aki ata taekan ana reirei ami aro, ma ti kakoaua bwa ngkami aomata aika a kookoaua, kam karaoa te motiki taeka ao te etieti.”2
UOTIA NI KARAROA MAN TE TABO “KAOTINAKOA MAN TE ROO”
Ngkai e a tia te kaawa ae Taoro Reiki ni karaoa te kabo n te takakara ae te 2002 Winta Orimbiki ao te Barambiki, ti a noora kakoroan nanon aia taetae burabeti. Nikabane aonnaba ao aia mataniwi aika a bati a na bane n roko. A tia n nooriira ni mwakuriia raoraoia ma kaain rarikiia aika a okoro aia onimaki. “Maungan ana auti te Uea,”3 ma otana ae kaotaa nako, e a tia ni kakoauaaki irouia 3.5 birion n aomata ni katobibiia te aonnaba. Te aonnaba nikabane a tia n ongo mimitongin bwanaaia kaain te Taebaenaeko Kuaea aio. Tebubua te ngaa ake a tia n ira te kamataku are e karaoaki bon ngkekei naba n te tabo ni kamataku ae atunaki n Otan te Aonnaba: Kakukureian te Maiu—Tamnein te Aomata, Mimitongin te Atua, ni ikotaki ma katanoataakin ana koaua Iesu Kristo. I kaotia ma te nano rinano man aikai ao n nanona tabeua aika a mwaiti riki, Ana Ekaretia Iesu Kristo Ibukiia Aika Itiaki Ni Bong Aika Kaitira e waakinako ni uouotaki “ni kararoaki man te tabo ae akea ataakina ao n kaotinakoaki man te roo.”4
Rinanon taian Orimbiki a mwaiti aron kabwarabwaran taian taura, n aron ae uran te ai n te Orimbiki; natin te taura; ao te boto ni iango, “Kaura te taura i nanon.”5 Tao te kabanea n taura ae e rangi n ururingaki e kuneaki i nanon mataia taan kabo. Ma tera ae kakaawaki nakoira bon tiaki te kabo ke matakura. Bon koaua aika a nano ake a kanikinaeaki man bwaai aikai—aekaki n taura ake i nanora.
N te ingabona aio ao N na taetae nakoia ake a titiraki: “Tera te taura are I nooria ao man namakinna? E roko mai ia? N na kanga ni karekea i buku ao i bukiia raoraou aika a rangi n tatangiraki n taai nako?
OTAN IESU KRISTO AO ANA BWAI N TITUARAOI TE TAMNEI AE RAOIROI
N tatabemaniira mai buakora e uota te ota nakon te aonnaba, Otan Kristo. “Bon ngaia te taura ni koaua are e na kabebeteia aomata nikabane ake a na roko nakon te aonnaba,6 E taekinna te Tia Kamaiu.
Te ota are a mena iai bwaai ni kabane, are e na anga te maiu nakon bwaai nikabane.”7
Te ota are e kaoa ao e kariiri nakon te raoiroi are e reitinako.”8 e “anganako nakoia aomata, bwa e aonga n ata te raoiroi ao te buakaka.”
Man kabonganaan ana taura Kristo n rineia bwa e nga ae e eti, ao ti kona ni kairaki riki nakon te taura ae ota man bubura riki: ana bwai n tituaraoi te Tamnei ae Raoiroi. I kakoaua bwa rinanon Manga kaokan te euangkerio ao mimitongin te nakoa ni ibonga mai roun te Atua, ana reirei Iesu ni bong aika kaitira aikai a karekea te mwaaka n anga ana bwai n tituaraoi te Tamnei ae Raoiroi. E karaoaki man te katoka bai mai rouia ake iai te kariaiakaki i rouia n te nakoa ni ibonga, ao e butimwaeaki i rouia ake a tia n iriira koauan taian onimaki ao raira n nano ao man n tia n karekea te otenanti ni bwabetito man te kateboaki i aan te ran ao n otirake i bukin katiakakira man ara bure.
Te Tamnei ae Raoiroi bon te kateniman n Atua i buakoia Atua ake teniman, bon te aomata ae tamnei.10 Bon te tia Karau nano, Tamnein te Atua, te Tamnei ae Raoiroi n te Berita. E bon kakoaua i bukin Iesu Kristo, Ana mwakuri, ao ana mwakuri Ana toro i aon te aonnaba. E mwakuri bwa aia tia ibuobuoki ni kaitiaki ni kaboouiira ao ni kaitiakiira man ara bure.11 E karaui nanora ao e uota te rau nakon rabwatara. Te eti nakon Raoraora ni katoa tai bon mai buakon bwai n tangira aika a korakora ake ti na karekei n te maiu n rabwata, ao i bukin otana ae korakora ni kaitiaki, ti kona ni kairaki ni kaokaki nakko matan te Atua.12
ROTONGITONG AO TE OTA
Ngkai ataei ngaira, ti reiakinaki bwa ti na kanga ni kararoa te rootongitong man kaakauraan te taura. N tabetai, ngkana a nako ara karo ni kaaki botu n te tairiki, ti kamaiui taian taura nikabane i nanon te auti! Ti ota n tuan te rabwata ao are e bon titabo naba ma tuan te Tamnei: Te ota ao te ro a aki kona ni kaaina te tabo ae mwaawa n te tai ae titabo.
Te ota e riba te rotongitong. Ngkana e kaoti te ota, e na mauna te rootongitong ao e na nako. Ma ae e rangi ni kakawaki, e aki kona n tautekana te ota te rootongitong nikarokoa e mauna nako ke e bua te ota. Ngkana e kaoti otan te tamnei are mai roun te Tamnei are Raoiroi, rootongitongin Taatan e kitaniira.
Kairake ni mwaane ao n aine aika a tangiraki n te Ekaretia, ti kabaeaki i nanon te buaka i marenan ana totoko te ota ma te rootongitong. Ma ngkana tiaki i bukin Otan Iesu Kristo ao Ana euangkerio, ti na bon karekea te korakai n uruabwain te rootongitong. Ma e kangai ara Tia Kamaiu, “I roko bwa N na kaota te aonaaba.”13 “Ane e iriirai ao e na aki nakonako i kawain te roo, ma e na karekea otan te maiu.”14
Te Uea bon otara ao, ni koauana raoi, bon kamaiuara.15 N ai aron te ai are e tabu are e katobibiia ataei aika uarereke n Nibwaai ,16 Otana e na katea te otanga i marenam ma te rootongitong ni kaitara ma ngaia n aron are ko kororaoi nako iai. Ko kainnanoa te ota anne. Ti kainnanoa te ota anne. Kamatebwaia raoi taian koroboki aika a tabu ao Ibukin kakorakoraia kairakehe ao kakauongo raoi nakon aia reirei ami karo ao ami tia reirei. Imwina, te ongeaba nakon marooro mai rouia aika a wanawana, n reirei aron karekean te ota are te otanga n te euangkerio are bon mai roum.
Ko na manga mimi, “I kanga ngkoa ni karaoa arei?” Bon ti teuana te kawai: Ko riai n reireiniko ni kamaiua te taura anne ni katoa bong man kakoauaan Iesu Kristo ao iriirakin Ana tua nikabane.
KAMAIUAN TE TAURA
N te winta ae nako ao e reke au tai ni karekea reireiakiu i aon aorakin maamau. I rikirake n ataia bwa ti aki kona ni kawakina te ikeike i bukira. Ti aki kona ni kawakina te eea are ti kainnanoia bwa ti na ikeikenna, e aki kanganne bwa korakora are ti a tia n rangi ni kekeiakinna. Teutana i mwin teutana, te ikeike i mwin te ikeike, ao ti bon anganaki maiura ao ni kakabouaki nakoira. Ngaia are bon otan te tamnei. E riai ni kaakabouaki nakoira ni kaakatoa tai. Ti riai ni kamaiua n te bong teuana ma teuana, iangoakina teutana i mwin teuatana, ma kaakaraoan ae eti ni katoa bong ngkana ti na kararoa te rootongitong are ti kakaitaraa ni kanakoa mai iroura.
Ngke ngai ngkoa te ataeinimwane, I tataneiai ni bwatika n okiran mwengau i mwin au kakataneiai n te bwatiketi booro n te tairiki. I aki toki ni kakanimwa te tianaraita ae e uarereke nakon rabwan au bwatika. I mwina ngkana I a toutou, ao te rabwa e a riki kanga ai te mooto, are e a karekea te iti, ao e a kaotinakoa te ota mai iai. Bon te bwai ae rangi ni uarereke ma e korakora aron ana mwakuri ni iti. Ma N na riai ni kakorakoraai n toutou bwa e aonga ni mwakuri! I reiakinna n te tai ae waekoa bwa ngkana I katoka au toutou n te bwatika, ao te ota arei e na mate. I reiakinna naba bwa ngkana I a manga rangi ni kateimatoa”17 au toutou, ao te ota arei e rikirake n ota mwaaka ao te rootongitong are i mwaaiu e mauna nako.
Kamaiuan otan te tamnei e roko man kariirian te tamnei ni katoa bong. E roko man te tataro, kamatebwaian koroboki aika a tabu, te aki mamatam, ao mwakuri ni ibuobuoki—man maiuakinan te euangkerio ao te ongeaba nakon tuua. “Are e kawakini tuua ao e na karekea te koaua ma te ota,”18 e taku te Uea, “ao ane e karekea te ota, ao ni kateimatoa Atuana, ao e na kateimatoa karekean te ota i rouna; ao te ota anne e na rikirake n ota mwaaka ni karokoa e kororaoi te bong.”19 Tariu ma mwaneu, te bong are e kororaoi arei bon te tai are ngkana ti a bane n tei i matan te Atua ao Iesu Kristo.
N tabetai ao a titiraki aomata, “E aera bwa N na nako n te taromauri?” ke “E aera bwa N na maiuakina Tuan te Itiaki, ao ni kakabwaka te kabwianibwai? E aera I aki karekea teuana te wae i Bwaburon?” I kona n tuangko bwa bukin tera? I bukina bwa otan te tamnei e tangira ae ko na toutou ni kauoua waem! Ko bon aki kona ni karokoa ko kabaeko ma maiuakinan te euangkerio—maiuakinna nikabane ma “nanom, iango, konabwaim ao korakoram”20—ko aki kona ni kamaeua otan tamneim ae tau ni kakeerikaaka te rootongitong.
Ao n te aonnaba aei, e aki raroa nako te rootongitong. Ni bon arona, e bon mena n taai nako n te koona, n tataninga te tai are e na roko iai. “Ngkana ko aki karaoa ae raoiroi,” e taku te Uea, “e na rin te bure n am mataroa.”21
E bon katitaboaki naba ma are tuan te rabwata: ngkana ti kariaia otan te tamnei bwa e na kitaniira ke man bwakara ni kawakin tuua ke man ara aki kang toa ke te aki tataro, ke te aki wareware ni koroboki aika a tabu, te rootongitong are kakaitarako e na bon kai roko nakoim. “Te bwai are e buakaka anne e na roko n anaa te ota ao te koaua mai roum, rinanon te aki ongeaba.”22
Ni koroboki aika a tabu ti warekia bwa tabeman “a mena n te roo n akea te taura”ao “n riki n ai aroia aomata aika a manging.” 23 Ni mwamwanangara aika bati, ti kona ni karekerekeaki ma mwaararan te roo n otabwaniniira ao ti mwaninga taekan ae e rangi ni mimitong riki te nakonako i nanon te ota.
TE KAWAI NAKON TE OTA
Bon iai te kawai n otinako man “barekan te rootongitong”24 ao nako nanon te kawai are e na kairiira nakon te kakukurei n te maiu aio ao n te maiu are akea tokina n te aonnaba are e na roko. E taku te Uea nakon Itaia, “N na kaira te mataki n te kawai ae a na aki ataia; N na kairiia n te kawai ae a tuai man ataia: N na karaoa te rootongitong nakon te ota i mwaaia.”25
Te burabeti are Nibwaai e kakina te kawai: “N taabo ake kam mena iai, tariua aika a tangiraki, I ataia bwa are e iriira te Nati, e na karekea te nano ae itiaki, e na karaoi mwakuri aika aki bubuaka, ao e na akea te bure i matan te Atua, ma te nano ae itiaki, raira n nano man buure, kakoauaan ana mwakuri nako te Tama bwa ko na kukurei ni uouota aran te Kristo i aom, man te bwabetito … noria, ane e karekea te Tamnei are Raoiroi, eng, ao e na karekea te bwabetitoaki n te ai ao te Tamnei are Raoiroi.”26
Te tua are ti karaoia i bukin te bwabetito ao are ti kaakaboua man tatauakin te toa i roura—ni katokaan i aora aran Iesu Kristo, ti na ururingnga n taai nako, ao ni kawakini ara tua nako,—ni ikotaki ma te berita bwa ti na teimatoa n nim ma Tamneina, bwa ti na teimatoa ni karekea te ota arei i roura n taai nako.27 Te kakairi n Ana mwakuri ni Kamaiu Iesu Kristo e kauringiira bwa ti kainnanoia n aki tiitiku n te rootongitong. Ti kona ni karekea otana i rarikira n taai nako.
“KAOTAMWAAKA AMI TAURA”
Te ikawai rake n te aba ae Raong Airan, i Nu Ioki, I ota raoi bwa e kanga tamaroan te ota n riki bwa kawaia naake a mwananga n te rootongitong i taari. Ai kakamakura aron bwakan te auti ni kaotaota? E na kanga aron te auti ni kaotaota ngkai e bwaka aron otana?
We who have the gift of the Holy Ghost must be true to its promptings so we can be a light to others.
“Kauramwakai ami taura i mataia aomata,” e taku te Uea, “bwa a na noori ami mwakuri aika a raaraoi, ao ni karaoiroa Tamami are e mena i karawa.”28
Ti aki kona nataia bwa antai ae e nang tabeakiniira. Ao, n aron ae taku te Tia Kamaiu, ti “aki ataia ae a na oki man raira nanoia, ao n roko i rou ma nanona ae koaua raoi, ao N na kamarurungiia, ao e na riki bwa te tia uouota te manga kamaiuaki nako aoia.”29
TE TIA KAKOAUA N ANA TAURA
Ngkai, tariu ao mwaneu, i nanon aio, te kabanea ni bo buaka i marenan te ota ma rootongitong, I rangi ni karabwarabwa i bukin te tibwanga nakon “kabeebetean te kangaana, kanga ai aroia [ana reirei ] Iesu Kristo.”30 Mai roun Bauro, I taekinna, “E babane te tairiki, te ngaina e titiku: ai ngaia are ti na katikui nako mwakuri ake a bubuaka, ao ni katokai i aora amora n te ota.”31 I kaota au kakoaua ae okoro bwa Iesu Kristo”bon te ota ao te maiu n te aonnaba; eng [te] ota are e aki totoki, are e aki manga karokoaki te roo iai.”32
Bon Naia te ota are e bwabetitoaki man kateboana i aan te ran ao ni manga otirake, i roun Ioane te tia bwabetito, ike ngaia are e roko i rouna te Tamnei are Raoiroi n a rabwatanna n te taobe.
Bon Ngaia te ota i nanon Tamana are e kaakakukureia.
Bon Ngaia te ota n atuiia taan katea te Ekaretia, are e waakinaki i rouia Abotoro ake Tengaun ma uoman, burabeti, ao te Itingaun.
Bon Ngaia te ota ni manga kautaki are e kakoroaki nanona n te o n aroka are i Ketemwane ao i aon Korokota, ae e katoka i aona buure nako n te aonnaba, bwa aomata nikabane a na bane n karekea te manga kautaki nakon te maiu are akea tokina.
Bon Ngaia te ota nakon te rua ni mate are akea kaaina, te Uea are e manga uti ma mimitongin rabwatana n iriko ao n rii, are e urua oon te mate ao ni karekea te tokanikai i aon te mate ni karekea te maiua are akea tokina.
Bon Ngaia te ota are e kaokaki rake nako karawa i mataia Ana Reirei, ma te berita bwa i nanon kakoauaana ao e na manga oki kaua.
Bon Ngaia te ota are e kaoti ma Tamana ni manga kaoka, rinanon Iotebwa Timiti, te Ekaretia are titebo ma are E kateia i nanon Ana tai ni mwakuti i aon te aba.
Bon Ngaia te ota are e kaira ao e raona te Ekaretia ni boong aikai rinanon te kaotioti nakon te burabeti, ana kauntira, ao Abotoro ake Tengaun ma Uoman.
Bon Ngaia otau, au Tia Kabooai, au Tia Kamaiu,—ao ngkoe naba.
I ataia ae e maiu te Atua. I ataia ae E a tia ni weteira n “otinako man te rootongitong nako nanon Otana ae moan te tamaroa.”33 I tataro bwa e na reitinako otan Ana euangkerio ni karababaki rinanon te aonnaba ni kabutaa bwa a aonga ni karekeaki aia tai aomata n ongo ao n rineia, ao bwa e aonga Ana Ekaretia ni “mena i aoia ake a kainaki n te rootongitong, ao n raneanea … n ai aron namwakaina, n itiaki n ai aron taai,” bwa e aonga n onrake “Mimitongina i aon te aonnaba.”34
N aran Iesu Kristo, amen.