Kororaoira ni Kammwakura te Nakaoanibonga
E riai katein maiura n ana tabo te botanaomata n rangi n tiribureaki. E rangi ni kakawaki riki kateini maiura i bon iroura. E riai ni mataata raoi te kaitei ni maiu ae bati ni bwabwainaki are e baireia te Uea.
Tariu aika a tangiraki, I tangiria ni kan taetae n te aro ae oota raoi n te tairiki aei ibukin te bwai ae I namakinna ae I rangi n tabeaianga iai. Bon te kakaewenako ae moan te kakukurei ma ni kararaoma te taetae nakoimi. Ai korakoraa te aro n itaritari nakoira n ai aroia te koraki ake a reke irouia te nakoanibonga ae kakawaki ma ni kamimi aei. E roko mairoun te Atua, ae Tamara ae Akea Tokina, are e a tia n manga taetae riki mai i karawa ma Natina ae Tangira inanon boong aika mimitong aikai. A tia ni kanakoa. Aia toro are iai te kariaiakaki irouna bwa e na anga te kariaiakaki aei nakoia mwaane.
E riki kororaoira bwa te kainibaire ibukin te kona ni karekea ao n kamwakura te mwaaka ae tabu aei. Ao man te bwai aio are I kan taetae iai n te tairiki aei.
I kan moana au waaki man warekan Tua ma Berita nakoimi, te mwakoro 121: “Inaomatara n te nakoanibonga e aki kona ni kaokoroaki ma a toma ma mwaakan karawa, ao … mwaakan karawa a baireaki ke ni karaoaki ti man tuan te raoroi.
“N te aro bwa a na kona n anganira, e koaua; ma ngkana ti karabai ara bure, ke ni katoki nanora n ara kainikatonga, ke n ara iango aika akea bonganaia, ke ni karaoi babaire ke n tautaeka ma te matoa ke ni imanonoia natiia aomata, bwa a na karaoa te bwai teuana n te aro ae aki raoiroi, noria, bwain karawa a na toki; Tamnein te Uea e na nanokawaki; ao ngkana e toki, Ao ai bon anne naba tokin te nakoanibonga ke te kariaiakaki nakon te mwaane anne” (tara D&C 121:36–37).
Anne bon ana taeka te Uea ae ota raoi ni kaeti nakon Ana kariaia ae mimitong. Ai korakoraa te mwakuri are ti a kabaeaki iai are ti anganaki n tatabemanira nako. Ngaira ake ti a tia ni karekea te nakoanibonga mairoun te Atua ti riai n tei ietan kawain nako te aonaaba. Ti riai ni maiuakin katei aika riai. Ti aki kona n raoiroi, ma ti kona n riki bwa aomata aika a ataa ae riai, ma ni karinerine.
E riai katein maiura n ana tabo te botanaomata n rangi n tiribureaki. E rangi ni kakawaki riki kateini maiura i bon iroura. E riai ni mataata raoi te kaitei ni maiu ae bati ni bwabwainaki are e baireia te Uea. Ti aki riai ni katoki nanora n te bure, ti riai n ti ngaira ni kataia ni karabai ara bure. Ti riai ni katoki nanora ni kainikatonga. Ti aki riai ni karekea te iango ae ake bonganana. Ti aki riai ni karaoa te babaire, ke n tautaeka ma te matoa, ke n taetae ma te matoa nakoia buura ke natira, ke tabeman riki n aaro aika a kaairua.
Ngkana ti karaoa teuana mai buakon bwaai aikai, te mwaaka mai i karawa e na anaaki. Tamnein te Uea e na nanokawaki. Raoiroin nakoara ni ibonga e na kakeaaki. Te kariaiakaki e na bua
Kateini maiura, taeka ake ti taekin, ao katein maiura n te bong koraki a kona n anganira te kona ni kanakoraoi ara waaki ngkai ngaira mwaane ao ataeinimwaane aika iai irouia te nakoanibonga.
E taku ara kanimaua n tua man taekan te koaua: “Ti kakoauaa bwa te aomata e riai ni weteaki mai iroun te Atua, man te taetae ni buarabeti, ao man katokaan baai mairouia te koraki ake e a tia reke irouia te kariaiakaki, n tataekina te Euangkerio ao ni karaoi otenanti ake iai.”
E ngae ngke a katokai baia te koraki ake iai te kariaiakaiakaki irouia ma ni katabuira, ti kona mani katein maiura ni kaakea ao ni kabua te inaomata ni kona ni kamwakuri mwaakan te Atua.
Te Mwakoro 121 e waaki nako n taekinna: “Akea te mwaaka te te anainano ae kona ke ae riai ni kateimatoaaki man raoiroin te nakoanibonga, ma ti man kaungaan te nano, man te taotaonaki n nano, man te nimamannanei ao te nanorinano, ao te tangira ae aki mwamwanaa te aba;
“Man te aakoi, ao te wanawana ae itiaki, are e na rangi ni kabuburai rabwatara ao tamneira n akea te mwamwana te aba, ao n akea te uarao” (tara D&C 121:41–42).
Ngkai, tariu ngaira, akanne kainibaire ake e na kona iai te nakoanibonga aei ni kona ni karekea te kukurei. Tiaki te kunikai are ti na karinna iaora ma ni buutia ngkana ti kan. Ma, ngkana e kammwakuraki inanon te raoiroi, kaanga ai aron iaian rabwatara, are bon raora n taai nako n aroaro nako.
Mangaia are, nakoimi kairake n ataeinimwaane ake a reke irouia te Nakoanibonga ae te Aaron, ake kam a tia n anganaki te mwaaka anne are iai iai kiingin aia mwakuri ni ibuobuoki anera. Iangoa te bwai anne inanon tabeua te miniti.
Kam aki kona ni karaoa te bwai teuana are e na katea te roki i marenami ao aia mwakuri ni ibuobuoki anera ibukimi.
Kam aki kona ni buakaka n aron iangoana. Kam aki kona n ae kam aki ataa te karinerine. Kam aki kona ni mwamwana te aba ke ni kewe. Kam aki kona ni bakanrerea aran te Atua ke ni kamanenai taeka aika a kammaira ao ma ni karekea te inaomata nakon aia mwakuri ni ibuobuoki anera.
I aki tangiri ngkami bwa kam na raoiroi. I tangiri ngkami bwa riki bwa aomata ni koaua, marurung ma n korakora ao ni kukurei. Naake a bwabwaina te kamarurung, I tangiri ngkami bwa kam na riki bwa taani kauaaba n te kamarurung ao kakorakorai ngkami n riki bwa tiambion. Ma ni karaoan aei, kam aki riai ni katoki nanomi ni katei aika aki riai ke taetae ni manrerei ao taeka aika kammaira.
Nakoia mwaane aika kairake ake a tabe ni kaantaningai nakoia ni karaoi aia mwakuri ni mitinare, taiaoka tai kaoni maiumi ni bwaai ake a na kona ni karokoa te nanououa nakon kororaoimi n nakomi n riki bwa ana toro te Atua ae maiu.
Kam riai n aki, bwa kam aki kona ngkana kam mena iaan kakumekume nako ni karaoa mwaakan te Atua are kam uouotia inanomi ngkai minita ngkami aika kam a tia ni katabuaki ibukin te euangkerio.
Man te kauring aei, ao te kauring imwaain rokomi n te aonaaba, e a tia te Moan Beretitentii ao aia Kooram Abotoro ake Tengaun ma Uoman ni karaoi taeka ake a kaeti nakoimi aikai.:
“Ngkai mitinare ngkami, ao kam kantaningaaki bwa kam na kateimatoa ni karaoan katei aikai riai, ni ikotaki ma kawakinan tuan te itiaki ae matoatoa, …
“… Ko riai n aki tiku n ti ngkoa ma temanna riki, te mwaane ke te aine, te ikawai ke te ataei [irakin toam are ko a tia ni katoaki ma ngaia].
“E ngae ngkana iai bukinan te mitinare ae akea ana bure are e kona ni karaoaki te kakae iaona inanon namwakaina aika mwaiti ao e kona n iai mwiina ae te aki mweraoi ke te kamotirawaaki man te mwakuri ni mitinare. Kawakini ngkami man taian bukinaki man aki maenakomi ma toami, ti aki ti ngaia ma ni mweenga naba ake kam kawari.” (Ana Taeka Te Moani Beretitenti ibukin kateia mitinare, 22 Maati 2002).
Kam aki riai n raraoma ibukin bwaai aikai ngkana kam kawakin tuua aikai n taai nako. ibukin te mwakuri ni mitinare. Ngkana ko karaoia ao ko na karekea te namakina ae moan te raoiroi, ao ko na okirikaaki ibukiia te koraki ake ko tangiriia n akea kamamaeam ke bwarannanom ke nanokawakim.
Ngkana ko okira mweengam, tai mwaninga n ae bon te unimwaane naba ngkoe n Ana Ekaretia Iesu Kristo ibukia aika Itiaki ni Bong aika Kaitira.
Ko na ira buakon kakaean te rao ae akea tokina Ko na bae n tangira te mare inanon Ana auti te Uea. Ibukimi, a na akea te oneaki. Taratara raoi, bwa rimwi ao ko urua am kona ni karaoa am mare. A na nako raoi ami bong. Ma kawakina am tangira inanon te kabaeaki ni karaoan katei ni maiu aika riai. E a tia te Uea n angani ngkami te kona n anga te kaetieti ao ni berita. E taku, “Kariaia te aro ni itiaki bwa e na katamaroaa am iango n aki totoki.” Imwiina rimwiin te berita bwa “Am konabwai e [na] rikirake ni matoatoa i matan te Atua; ao … te Tamnei ae Raoiroi e na riki bwa raom ae teimatoa n taai nako” (tara D&C 121:45–46).
Buum are ko rineia e na riai ni boraoi arona ma ngkoe. E katanoata Bwauro ngke e taku, “Ma akea naba te aine ngkana akea te mwaane, ao akea naba te mwaane ngkana akea te aine, inanon te Uea” (1 I-Korinto 11:11).
N te iraorao n te mare akea ae rinano ke akea ae rietata. Te aine e na kai rimoan te mwaane, ke te mwaane e na aki rimoan te aine. A riai n nakonako temanna n iteran are temanna n ai aroia natin te Atua aika mwaane ao aine iaon te mwananga ae akea tokina.
Te aine bon tiaki am toro, tiam te kako ae uouotaki, ke tiaki te aeka ni bwai teuana.
E kakamaaku ao moan te kammaira orean te ainenumwa. Te mwaane n te Ekaretia aei are orea buuna, are kaakeaa bonganana, are e kaikoakia, are e kakaraoi kaetieti buakaka.nakon buuna e bon aki tau bwa reke nakoina te nakoanibonga E ngae ngke e a tia ni katabuaki, Though he may have been ordained, kaain karawa ana bubai mai irouna, Tamnein te Uea e na nanokawaki, ao e na e toki te kariaiakaki n te nakoanibonga mairoun te mwaane anne.
Te mwaane are e irekereke ma te mwakuri aei e aki tau n anganaki ana beeba ni kariaia nakon te tembora.
I nanokawaki n taekinna bwa I noora te bwai ae rangi ni mwaiti ma ni buakaka aei. Iai mwaane ake a oroia buia i nanon baia, n te taetae ao n te rabwatana. Ai kananokawakira ngkana e kaakea bonganan tinaia natina.
Bon te koaua bwa iai aine tabeman ake a bwainikiriniia buuia. Ma I aki taetae nakoia n te tairiki aei. I taetae nakoia mwaane n te Ekaretia aei, mwaane ake a tia n anganaki mairoun Te Atua ae Moan te Mwaaka te nakoanibonga ae tabu.
Tariu, ngkana iai mairoumi ae e irekereke ma te bwai ae I taekinna ake a namakinna bwa a kaairua n aron kateia, I wetei ngkami bwa kam na rairi nanomi. Katorobubua ao bubutia te Uea bwa e na kabwara am bure. Tataro nakoina ibukin te mwaaka ni kona ni bairea newem ao baim ae rawawata. Bubuti ibukin kabwaraan ana bure buum ao am ataei. E taku Beretitenti MaKeei bwa e aki kona n taekinna, “Akea te tokanikai ae kona ni kaboa mwiin te kaairua n te mweenga” (rineaki iroun J. E. McCulloch, Home: The Savior of Civilization [1924], 42; in Conference Report, Eberi 1935, 116). Ao e taku Beretitenti Rii, “Te mwakoro ae moan te kakawaki man ana mwakuri te Uea are ko na karaoia, bon te mwakuri are ko na karaoia inanon mweengam” (Harold B. Lee, Doing the Right Things for the Right Reasons, Brigham Young University Speeches of the Year [19 Eberi 1961], 5).
I aki nanououa bwa ngkana ti tei i matan ana tabo ni motikitaeka te Atua e karako taekinan aron mwaitin kaubwaira ae ti a tia ni kaikoikoi inanon maiura ke ibukin te karineaki are ti kona ni karekea. Ma a na iai titiraki ibukin te kakae ae kaeti ma aron te iraorao n te utu. Ao e kaungaaki nanou bwa ti naake a tia n nakonako rinanon te maiu aei ma te tangira ao te karinerine ao te kakaitau ibukin raoia ao natiia a na karekea mairoun ara tia moti ae akea tokina te taeka, “E raoiroi, te toro ae ko raoiroi ae ko kakaonimaki: … riin i nanon kimwareirein am Uea” (Mataio 25:21).
I taekina te aeka ni mwakuri n iowawa riki teuana. Bon ibukiia kaara. I taku bwa e aki reke iroura ni kabane. Au kaantaninga bwa e aki. I tataro bwa e na aki.
I kakoauaia ara aomata, angiia ni kabane, kawakina te tua ma ngkoa are e kangai, “Ko na karinea tamam ma tinam ba e aonga ni ni bati am bong i aon te aba are E anganiko te Uea ae Atuam” (Otinako 20:12).
Ma moan te kananokawaki, moan te kamaraki nano aron bwainikirinaia kaara.
A kona maiura n ananau riki ngkai, bon te kaaitau nakon kamiimin rabakau aika boou ao mwakuri ni kukua n te onaoraki. Ma kaara a roko n te roro are a kerikaaki iai korakoran rabwataia ao n tabetai korakoran aia iango. I a tia n taekinna i mwaain aei bwa I kunea bwa e mwaiti aika a na kairaki nakon te roro ae ti aranna bwa te koora. I rangi ni kaatau ibukin te tangira ao iango raoia ara ataei nakoia tinaia ao tamaia. Ai tamaroaraa tamnein te nati te mwaane ao te aine ake a nako i aon kawaia ni buokiia kaaro aika a kara n akoia ao ni mwannanoia ma n tangiria.
Ngkai I tangiria n taekina teuana riki aekan te mwakuri n ribuaka are e a tia ni katanoataaki nakon te botanaomata n te rerio ao taian terewitin. Oreaia ataei irouia ikawai, aika mwaane n aron ae e ataaki bon te katei ae kananokawaki ma n buakaka. E taekinaki bwa e okirakaaki rinanon roro aika mwaiti. Bon te bwai ae moan te aki kakukurei ma ni kananokawaki ao n rangi ni buakaka. I nanokawaki n taekinna bwa e rangi n tiatianaki taekinan te bwai ae akea riki i aon te buakaka ibuakora. Bon te bwai are e aki riai ni boutokaki ke n taon nanora nako iai. E taku te Uea, “Ma ane e kauna temanna mai buakoia aika uarereke aika onimakinai aikai, e raoiroi riki ibukina ngkana e tauraki te atibu ae bubura i roroana ma ni kainanoaki i marawa” (Mataio18:6).
Anne te taetae ae rangi ni matoatoa mairounUean te Rau, ae Natin te Atua.
I anaa te taeka aei man ara Boki ni Kaetieti te Ekaretia ae kangai: “Man ana itera te Ekaretia te oro e aki kona katauaki karaoana n aekana nako. Naake a kabongana te oro … a na reke i aan te katuaeaki n reireianki n te Ekaretia. A riai n aki anganaki weteaia n te reirei ao a na aki anganaki aia beeba ni kariaia nakon te tembora. E ngae n anne ma ngkana te aomata are e karaoa te mwakuri ae buakaka nakon te ataei ni bwaitingako nakoina ke ni kaikoaka rabwatana e kona ni karekea te katuaeaki n reireinaki te Ekaretia.ao rimwi e na manga kaokaki nakon te Ekaretia ke e na manga bwabetitoaki, mataniwi a riai n aki anganna weteana nakon te nakoa teuana ni mwakuri ma ataei ke kairake ni karokoa ae e anga te kariaia te Moan Beretitenti bwa e na kamaunaaki ana bure man ana beeba ibukin kaainakin te Ekaretia.
“N aron karaoan te mwakuri ae buakaka aei, te moan mwiokoaki n te Ekaretia bon te buokia te koraki ake a tia ni bwainikirinaki ao te kawakiniia te koraki ake a irekereke ma karaoan te mwakuri ae buakaka aei n te tai ae na roko” (Boki 1: Beretitenti n te Titeiki ao te Bitiobiriki [1998], 157–58).
Ibukin te tai ae maan ti a tia ni mwakuriia te kanganga aei. Ti a tia ni kairoroia bitiobi, titeiki beretiteti, ao tabeman riki bwa a na nako ni kawariia naake e karaoaki te mwakuri ae buakaka nakoia ni karau nanoia, ni kakorakoraia, bwa aonga n ataia bwa te bwai are e a tia n riki e bon kaairua, bwa te bwai are e a tia n riki nakoia bon tiaki aia bure, ao e tangiraki te bwai anne bwa e riai n aki manga riki.
Ti a tia ni kanakoi katanoata nakon te botan aoamta, ti a tia ni karaoi raain ibukin taian tareboon ike a kona iai taan mwakuri n te Ekaretia ni karekei reirei i bukin waakinan baika a tia n riki, ao n anga ibuobuoki rinanon Aia Taromauri n Utu Aomata aika Itiaki.
Mwakuri aikai a tara ni kakamwarua n aroia. Ma iai te reke ni kai iai i aan te tua. Taan ibuobuoki aika wanawana, ni ikotaki ma rooia ao taan mwakuri ibukin te botanaomata, a kona n reke ibukin te ibuobuoki aei ni kataetaeia bitiobi ao beretitenti n titeiki ni kaeti ma beku ake a kabaeaki iai ibukin aroaro aikai. Te koraki ake mena n aaba tabeua a riai ni kawariia aia Beretitentii n aia Aono nako.
Ngkai ana mwakuri te Ekaretia bon te mwakuri ibukin te kamaiuaki. I tangiria ni kan katuruturua bwa bon te mwakuri ibukin kamaiuaia aomata. Ti tangiria ni kani buoka te aomata are bwainikirinaki ao te tia karaoa te bure. Nanora a nako nakon te tia bwainikirinaki, ao ti riai ni buoka teuanne ke neienne. Nanora a roko iroun te tia karaoa te bure, ma tiaki kona n katoka te bure are e bukinaki iai ni bure. Ike e riki iai te bure, ao iai te tuaa ae na reke iai. E na waaki tuan te tautaeka e na bon mwakuriia kawaina. Ao ana waaki te aro e bon mwakuriia kawaina, ni mwaitin te tai mwiina bon kamaunaakin te ara man te Ekaretia. Bwaai aika uoua aikai a beebete ao kangaanga.
E ngae n anne, ma ti kinaa, ao e na kinaaki n taainako, bwa ngkana e a tia ni kabwakaaki boon te tuaa ao tangiran te momoti raoi e riai n tia n reke, a na iai, a na iai te bai ae akoi ae taakinaki nako ni kan ibuobuoki. A na iai tuua aika matoatoa ma a na iai naba te akoi.
Ngkai tariu, I taku bwa I a tia taekin baika a kaaitara te raoiroi n aron baika I a tia n taekin nakoimi n te tairiki. I aki tangiria bwa N na karaoa aei. Ma I tangiria n tabekaarake te bwanaa ni kauring nakon te nakoa ni ibonga n te Ekaretia aei rinanon te aonaaba ni katobibia.
E a tia te Atua n anga nako aora te bwaintituaraoi ae moan te kakawaki ma ni kamiimi. Iai iai te kariaiakaki ni waakina te Ekaretia, ni buoka waakinan ana bwai nako, n taetae ma te kariaiakaki inanon aran te Uea ae Iesu Kristo, ni mwakuri n ai aron ana toro, ni kakabwaiaia aoraki, ni kakabwaiaia ara utu ao tabeman riki aika mwaiti. E riki bwa te tia kairi kawaira n te aro are ti na maiuakin maiura. Ni bwaninin raoi mwaakana e rokoroko i mwiin nakon te maiu are akea tokina are i mwaaira.
Akea te bwai teuana ae na kabotauaki ma ngaia i aon te aonaaba aei. Kawakinna, kukurei iai, tangiria, maiuna te kororaoi iai.
“Kariaia ootam bwa e na oota i mataia aomata, bwa a na noora am mwakuri ae raoiroi, ma n neboa tamam are i karawa” (Mataio. 5:16), bon au tataro ma te nanorinano ngkai I katuka au kakabwaia iaomi ao n angani ngkami au tangira, n aran Iesu Kristo, amen.