Христ дотор нэг болох нь: Налуу шугамын сургаалт зүйрлэл
Их Эзэний цаг хугацаанд бидний хаанаас эхлэх нь биш, хаашаа чиглэж байгаа нь хамгийн чухал байдаг.
Би жаахан хөвгүүн байхдаа хүсэл тэмүүлэл дүүрэн хүүхэд байсан. Нэг өдөр би хичээлийнхээ дараа “Ээжээ, би том болоод ямар хүн болох вэ? Мэргэжлийн сагсан бөмбөгчин болох уу эсвэл рок од болох уу?” гэж асуулаа. Харамсалтай нь, төрөлхийн авьяасгүй Кларк спортын болон хөгжмийн тал дээр ирээдүйтэй гэсэн шинж тэмдэг үзүүлсэнгүй. Би ихээхэн хүчин зүтгэл гаргасан ч сургуулийнхаа гүнзгийрүүлсэн академик хөтөлбөрт тэнцээгүй гэх хариуг олон дахин авсан. Эцэст нь багш нар маань намайг үндсэн ангидаа л төвлөрөхийг зөвлөсөн юм. Цаг хугацаа өнгөрөхийн хэрээр би сайжруулан суралцах дадлуудыг хөгжүүлсэн. Гэхдээ би Японд номлолд үйлчлэхээр очихдоо оюун ухаан, сүнслэг байдлын боломжууд надад гарч ирж эхэлснийг мэдэрч билээ. Би шаргуу хөдөлмөрлөсөөр байв. Би амьдралдаа анх удаа Их Эзэнийг өөрийн өсөлт хөгжилд төлөвлөгөөтэй, зохион байгуулалттай оролцуулсан бөгөөд ялгаа нь тэнгэр газар шиг байсан.
Ах, эгч нар аа, энэ сүмд бид Бурханы бүх хүүхдийн бурханлаг боломж бололцоонд төдийгүй Христ дотор байгаагаасаа илүү хэн нэгэн болох өөрсдийнхөө чадварт итгэдэг. Их Эзэний цаг хугацаанд бидний хаанаас эхлэх нь биш, хаашаа чиглэж байгаа нь хамгийн чухал байдаг билээ. 1
Энэ зарчмыг тайлбарлахын тулд би математикийн суурь хэллэгүүдээс заримыг нь ашиглах болно. Ерөнхий чуулган дээр математик гэдэг үг сонсоод, бүү сандраарай. Айдахо дахь БЯИС-ийн математикийн тэнхимийнхэн надад энэхүү суурь ойлголтыг анхлан суралцагчид ч ойлгож чадна гэдгийг баталсан. Энэ нь шулууныг олох томьёогоор эхэлдэг. Огтлолцол бол бидний зорилго болох шугамын эхлэл юм. Огтлолцлын эхлэх цэг нь дээр эсвэл доор байж болно. Налуу шугам нь эерэг эсвэл сөрөг байх боломжтой.
Бидний амьдрал өөр өөрийн эхлэх цэгтэй буюу огтлолцолтой. Бид өөр өөр авьяас бэлэг, өөр өөр амьдрах орчноос эхэлдэг. Зарим хүний эхлэх цэг өндөр байдаг ба тэд төрөхдөө л олон боломжтой төрдөг. Бусад нь хэцүү, шударга бус мэт санагдах нөхцөл байдалтай нүүр тулгардаг. 2 Тэгээд бид хувийн өсөлтийн налуу шугамын дагуу өсөж хөгждөг. Бидний ирээдүй эхлэх цэгээр маань бус, өсөлтийн налуу шугамаар илүү тодорхойлогдоно. Бидний хаанаас эхэлснээс үл хамааран, Есүс Христ бидний бурханлаг боломж бололцоог олж хардаг. Тэрээр үүнийг гуйлгачин, нүгэлтэн, сул дорой хүнээс олж харсан. Тэрээр үүнийг загасчин, татвар хураагч, хэнээтэн шүтэгчээс ч олж харсан юм. Есүс Христ бидний хаанаас эхэлснээс үл хамааран, бидэнд өгөгдсөн зүйлээрээ юу хийхийг маань анхаарч үздэг. 3 Дэлхий бидний эхлэх цэг дээр төвлөрч байхад, Бурхан бидний өсөлтийн налуу шугам дээр төвлөрдөг. Их Эзэн тооцооллын хувьд, Тэр бидний налуу шугамыг тэнгэр лүү чиглүүлэхэд бидэнд туслахын тулд бүхнийг хийх болно.
Энэхүү зарчим нь саад бэрхшээлтэй тулгарч буй хүмүүсийг тайвшруулаад зогсохгүй, өөрсдөд нь бүхий л давуу тал байгаа мэт санадаг хүмүүст юу билээ гэж түр саатах боломж өгөх нь дамжиггүй. Ядуурал, боловсрол эзэмших боломж хомс мөн гэр бүлийн бэрхшээлтэй нөхцөл байдал зэрэг хэцүүхэн эхлэл нөхцөл байдалтай хувь хүмүүст хандан үг хэлэхийг маань зөвшөөрнө үү. Бусад нь бие махбодын бэрхшээл, сэтгэцийн эрүүл мэндийн асуудал эсвэл удамшлын хүчтэй өгөгдөлтэй нүүр тулдаг 4 . Хүнд хэцүү эхлэлтэйгээ тэмцэж буй хүмүүс ээ, Аврагч бид бүхний бэрхшээлийг мэддэг гэдгийг анзаарч ойлгоорой. Тэрээр “түүний зүрх сэтгэл бие махбодийн дагуу нигүүлслээр дүүргэгдэж болохын тулд, тэрээр бие махбодийн дагуу [биднийг] сул байдлуудынх нь дагуу хэрхэн халамжлахыг мэдэж болохын тулд, өөр дээрээ [бидний] сул дорой чанаруудыг авсан.” 5
Хэцүүхэн нөхцөл байдалд эхэлсэн хүмүүсийг урамшуулах хоёр зүйл хуваалцъя. Нэгдүгээрт, хаанаас эхэлсэндээ биш, хаашаа явж байгаадаа төвлөр. Нөхцөл байдал тань бодитой бөгөөд анхаарвал зохих зүйл тул тоохгүй байх нь буруу. Гэвч хэцүүхэн эхлэл дээрээ хэт их төвлөрвөл, энэ нь таныг тодорхойлоод зогсохгүй бүр сонгох чадварыг тань хязгаарлахад хүргэж болзошгүй 6 .
Би хэдэн жилийн өмнө Массачусэттс мужийн Бостон хотод амьдардаг, сургаал болон Сүмийн шаардлагатай танилцаад удаагүй байгаа хэсэг өсвөр насныхантай хамт үйлчилж билээ. Тэдний нөхцөл байдлыг өрөвдөн, санаа тавих байдлаа Бурханы жишгүүдийг бууруулахтай андуурах нь уруу татагдмаар байсан. 7 Хайраа харуулах хамгийн хүчирхэг арга зам бол шаардлагаа хэзээ ч бууруулахгүй байх явдал юм гэдгийг би яваандаа ухаарсан. Би хийж мэдэх бүхнээ ашиглан тэдний боломж бололцоон дээр хамтдаа төвлөрснөөр, тэдний хүн нэг бүр өгсөх налуу шугамаар өсөж эхэлсэн. Сайн мэдээн дэх тэдний өсөлт аажуу бөгөөд тогтмол байв. Өдгөө тэд номлолд үйлчилж, их сургууль төгсөн, ариун сүмд гэрлэсэн бөгөөд хувийн амьдрал, ажил мэргэжлээ гайхалтайгаар авч яваа.
Хоёрдугаарт, өгсөх налуу шугамаар өсөх үйл явцдаа Их Эзэнийг оролцуул. Би BYU–Pathway Worldwide-ийн ерөнхийлөгчөөр үйлчилж байхдаа Перугийн Лимад болсон томоохон онцгой цугларалтад оролцож байснаа санаж байна. Тэр цугларалт дээр ахлагч Карлос А.Годой үг хэлсэн юм. Тэрээр цугларагсдын зүг харахдаа, итгэлтэй, гэр бүлээсээ анхлан их сургуульд суралцаж буй оюутнуудыг харж байгаадаа сэтгэл нь хөдөлсөн байдалтай байв. Магадгүй тийм хэцүү нөхцөл байдлыг туулсан өөрийн замналыг бодоод, ахлагч Годой, Их Эзэн “таны өөртөө тусалж чадахаас илүүгээр танд тусалж чадна. [Тиймээс] энэхүү үйл явцдаа Их Эзэнийг оролцуулаарай” 8 хэмээн сэтгэл хөдлөн хэлсэн биз ээ. Бошиглогч Нифай “Учир нь бид ач ивээлээр л бид аврагдана гэдгийг мэднэ, бидний хийж чадах бүхний дараа буюу” 9 гэж заасан байдаг. Бид наманчлалыг оролцуулан чадах бүхнээ хийх 10 ёстой бөгөөд гагцхүү Түүний ач ивээлээр бид бурханлаг бололцоогоо олж анзаарч чадна. 11
Эцэст нь би эхлэх цэг нь өндрөөс эхэлж буй хүмүүст хандан, хоёр зөвлөгөөг хуваалцъя. Нэгдүгээрт, бид өөрсдийн бий болгоогүй нөхцөл байдалдаа илүү даруу байдлыг харуулж чадах болов уу? БЯИС-ийн хуучин ерөнхийлөгч Рэкс Э.Лий оюутнууддаа “Бид бүгд өөрсдийн ухаагүй худгаас ууж, өөрсдийн асаагаагүй галаар дулаацаж явсан” 12 гэж эш татан хэлсэн байдаг. Тэрээр бусдад өгөхийг мөн эхэн үеийн анхдагчдын барьж босгосон боловсролын худгийг дүүргэхийг оюутнуудаасаа хүссэн. Бусдын тариалж ургуулсан талбайг үрслүүлэхгүй байх нь талантаа өсгөхгүйгээр эргүүлж өгөхтэй адил юм.
Хоёрдугаарт, өндөрт буй эхэлсэн цэг дээрээ төвлөрөөд байвал ихэнхдээ биднийг дэгжин дээшилж байна гэж эндүүрэхэд хүргэж болзошгүй бөгөөд үнэн хэрэгтээ дотоод өсөлтийн налуу шугам маань өгсөөгүй, нэгэн хэвийн байгаад байж магадгүй юм шүү. Харвардын профессор Клэйтон М.Кристэнсэн хамгийн амжилттай яваа хүмүүс хамгийн даруу байдаг, учир нь тэд ямар ч хүнээс залруулга хүлээн авч, суралцах хангалттай итгэлтэй байдаг гэж заасан. 13 Ахлагч Д.Тодд Кристоффэрсон бидэнд “алдаа дутагдлаа хүлээн зөвшөөрч, алдаагаа залруулахын тулд зүтгэх” 13 -ийг зөвлөсөн билээ. Хэдийгээр аливаа юмс гайгүй сайн байгаа мэт харагдавч, бид залбирлаар дамжуулан өсөж хөгжих боломжийг эрэлхийлэх ёстой.
Элбэг хангалуун байдлаас эхэлсэн үү эсвэл хүнд хэцүү нөхцөл байдлаас эхэлсэн үү гэдгээсээ үл хамааран, бид гагцхүү Бурханыг хамтрагчаа болгосон тохиолдолд өөрсдийн туйлын боломж бололцоог ухаарах болно. Би саяхан BYU–Pathway-ийн амжилтын тухай судалж буй үндэсний алдартай сурган хүмүүжүүлэгчтэй яриа өрнүүлсэн юм. Тэрээр ухаалаг нэгэн бөгөөд судалгаа нь чин сэтгэлийнх байсан хэдий ч шашны бус хариултыг илэрхий хүсэж байлаа. Би давтан суралцах хөтөлбөрүүд болон заан чиглүүлэх ажлынхаа талаар түүнд ярьж өгөв. Гэвч би “Эдгээр нь бүгд сайн арга дадал байна. Гэхдээ манай оюутнуудын өсөж хөгжиж буй жинхэнэ шалтгаан бид тэдэнд бурханлаг боломж бололцооных нь талаар заадагт оршдог. Таныг амжилтад хэзээ ч хүрэхгүй гэж амьдралын тань турш заасан гээд төсөөлөөд үз дээ. Дараа нь, та бол бурханлаг боломж бололцоо бүхий Бурханы жинхэнэ хүү эсвэл охин гэж заасны үр нөлөөг бодоод үз дээ?” гэж яриагаа дуусгаж билээ. Тэр түр бодолхийлснээ ердөө л “Хүчтэй үг байна шүү” гэж хариулсан.
Ах, эгч нар аа, Их Эзэний Сүмийн нэгэн гайхамшиг бол бидний хүн нэг бүр Христ дотор байгаагаасаа илүү хэн нэгэн болж чадах явдал юм. Гишүүддээ илүү их үйлчлэх, бусдад өгөх, наманчлах, илүү сайн хүмүүс болох гэх зэрэг боломжуудыг өгдөг өөр бүтэц зохион байгуулалтыг би мэдэхгүй. Бид элбэг хангалуун эсвэл хүнд хэцүү, ямар ч нөхцөл байдлаас эхэлсэн бай, өөрсдийн харцыг мөн өгсөх налуу шугамаа тэнгэрийн зүгт дээш хандуулцгаая. Ийн үйлдсэнээр, Христ биднийг илүү өндөрлөг газарт өргөн аваачих болно. Есүс Христийн нэрээр, амен.