2010–2019
Nenengeni Jises Kraist
April 2019 Mwichenapen Mwichefen

Nenengeni Jises Kraist

Seni Elter Kim B. Clark

Seni Ekkewe Fiik

Ika sipwe nenengeni Jises Kraist, I epwe anisi kich ne manaueni ach pwon mi pin me awatteno wisach ren pekin elter non Israel.

Nupwen Jises a fetan won efoch aan arap ngeni Capernaum1 fiti ew mwichen aramas unukun, emon fefin mi riaffou ren ew watten samau ren ukukun 12 ier a annangeu me attapa nepunun ufan we. Mwitir chok a chikareta.2

Mi mak non pukefel pwe Jises, a mefi “pwe [manaman a fen] tou seni [I],”3 a “kunusefan nein ekkewe aramas”4 me “nenefetan… pwe epwe kunai io we a attapa.”5 “Iwe, ewe fefin a sinei pwe a pwa,”6 a “fotupukutiw ren pechen, iwe a pwar ngeni Jises mettoch meinisin.”7

Jises a apasa ngeni, “Nei, om nuku a echkaroketa. Kopwe feinno non kinamwe.”8

Jises Kraist a angasa ewe fefin. A chikar non pekin inis, nge nupwen Jises a kun pwe epwe kuna, neminewe a apasa an nuku non I me I a echikara netipan.9 A kapas ngeni ren tong, a affata ngeni i an tipew, me efeiochu I ren An kinamwe.10

Pwi kana, pokiten mi wor rech ewe pristut mi fel, sia choni ewe angangen amanau. Non ewe amuchunon ier, ewe Samon a wata ewe wisen emwenin ei angang won afaren ekkewe elterun Israel.11 Mi wor wisach seni ewe Samon—sipwe fiti fefinach kewe ne angang, sipwe iamwir non ew napanap mi pin, amwitiri ionfengenin Israel ren ekkewe mi manau me mano, forata imwach pwe repwe nenien eppetin nuku me kaeon kapas allim, me ammonata ewe fonufan ngeni ewe Oruwen Wareton Jises Kraist.12

Usun mettoch meinisin, ewe Chon Amanau a pwar ngeni kich ewe aan: mi auchea sipwe nenengeni me angang ngeni Jises Kraist usun An nenengeni me angang ngeni Seman we.13 Ewe Chon Amanau a apasa non ei napanap ngeni ewe Soufos Joseph:

Nenengeniei non ekiek meinisin; ousap tipemwaramwar, ousap nuokus.

Nengeni ekkewe kinas mi pwereni nepeki, me pwan rasen ekkewe chufon non pei me pechei; oupwe nikitu, aneasochisi ai annuk, me oupwe muuni ewe muun nang.14

Non ewe muu mwen ei fonufan, Jises a pwon ngeni Seman we pwe epwe fori mochenin Seman we me I epwe ach Chon Amanau me Chon Angasano. Nupwen Seman we a eis, Ion upwe tinano?15 Jises a ponuweni:

Ngang iei, tinieino.16

Semei, mochenum ewe wesino, me ewe ning epwe om feinfeino.17

Non unusen manauen Jises won fonufan, I mi fori ena pwon. Non tekison, mosonoson, me tong, I a asukuna an Seman we nongonong mi ennet me an Seman we angang ren ewe manaman me mumuta Seman we a ngeni I.18

A fangeno Netipan ngeni Seman we. A apasa:

“Ngang mi tongei ewe Sam.”19

“Pun ua chok fori minne epwe apwapwa i fansoun meinisin.”20

“Ua fen feitiw seni nang pwe upwe apwonueta netipen Semei, ewe mi tinieito.”21

Non An riaffou non Gethsemani, A iotek, “Nge esap netipei, nge netipom, epwe pwonueta.”22

Nupwen ewe Samon a kokkori ekkewe elter non Israel ar repwe nenengeni i non ekiek meinisin me kuna ekkewe kinas non inisin we mi manausefan, ina ew kokko ach sipwe kun seni tipis me ewe fonufan me kun ngeni I me tongei me anneasochisi I. Ina ew kokko ne afanafana An nongonong me fori An angang non An napanap. Iwe ina minne a ew kokko ne unusen nuku I, fangeta ach mochen me mutata netipach ngeni I, iwe seni an manamanen ngaseno sipwe winiti usun I.23

Pwii kana, ika sipwe nenengeni Jises Kraist, I epwe efeiochu kich ach sipwe Noun elter non Israel—mi tekison, mosonoson, fangafangoch, uren An tong.24 Me sipwe uwei ewe pwapwa me feiochun An kapas allim me An Mwichefen ngeni ach famini me pwich me fefinach kewe mi mano.

Preseten Russell M. Nelson a kokkori kich pwe sipwe nenengeni Jises Kraist non ei chok napanap: “Ese wor mettoch mi mecheres ika mi pwisin foffor usun ach sipwe winiti sokkun chon kuno mi pochokun. Ach anonga epwe anukuchar won ewe Chon Amanau me An kapas allim. A men apekus ngeni ach ekiek ne achocho ne nenengeni I non meinisin ekiek. Nge nupwen sipwe fori, ach tipemwaramwar me nuokus repwe suno.”25

Rivet ew kapas mi murino. Wewen pwe pwe epwe anukuchara, epwe ongona me unusen kamwochuno.26 Sipwe anukuchara ach anonga Jises Kraist me An kapas allim ren ach manaueni ach pwon mi pin.

Nupwen sia manaueni ach pwon mi pin, repwe emweni mettoch sia apasa me fori. Sia manaueni ew manauen pwon27 mi uren fofforun nuku mi mecheres mi anongonong won Jises Kraist: iotek seni netip non Itan kametip won An kapas, kun ngeni I aier seni ach tipis, aneasochisi An annuk, angei ewe sakrament me aneasochisi An Sabbath mi pin, fen non An tempel mi pin fan chommong ren ach tongeni, me aea An pristut mi pin ne angang ngeni noun Kot kewe.

Ekkei fofforun nukuchar repwe suki netipach me ach ekiek ngeni ewe manamanen angasano an ewe Chon Amanau me sufonun angangen ewe Ngun mi Fel. Won kinikinin kapas, ewe Chon Amanau a siwini nonnomuch, sia unusen winiti mi siwin ngeni I, me ach pwon mi pin repwe pochokun non netipach.28

Ekkewe pwon sia fori ren Samach won Nang repwe winiti mi pochokun, ach anonnonen mochen. An Samach won Nang kewe pwon ne aurano kich ren kinisou me pwapwa.29 Ach pwon mi pin repwe wesino pwe annuk kich mi fori me repwe winiti nongonong mi achengicheng repwe pesei me emweni kich me anukuchara ach anonga Jises Kraist.30

Ekkei fofforun nikitu ir mi tufich ngeni meinisin, kukkun me chinnap. Ami anuon mi amwochu ewe pristut seni Aaron mi pin, mettoch meinisin ua apasa nepwinei mi fich neni kemi. Ua kinisou ngeni Kot remi. Oua fori ekkoch angangepin me pwon mi pin mi tufich ngeni minion Aramas mi Pin non Fansoun Soponon iteiten wik. Nupwen oua moneta, efeiochu, ika pasini ewe sakrament; iamwir; papatais non ewe tempel; tingorei emon chienach ngeni ew urumwot; ika angasa emon chon ami we mwich, oua fori ewe angangen amanau. Ami mi pwan tongeni nenengeni Jises Kraist me manaueni ami kewe pwon mi pin iteiten ran. Ua pwon ngeni kemi pwe ika oupwe fori, oupwe chon angangen ewe Samon mi ennet iei, me non ew ran epwe feito, elter mi nap non Israel.

Pwii kana, ngang mi sinei pwe ekkei meinisin usun ita mi weires. Nge ouse mochen chemeni ekkei kapasen ewe Chon Amanau: “Usap chok anamonuno pun ewe Sam mi nonnom rei.”31 Pwan ina usun rech. Sise akanemon. Ewe Samon Jises Kraist me Samach won Nang ir mi tongei kich, me ir mi nom rech.32 Pokiten Jises a nenengeni Saman we me awesano ewe asoren achasefan, kich mi tongeni nenengeni Jises Kraist ren ewe ennet pwe I epwe anisikich.

Meinisin kich sise unusoch. Fan ekkoch sia mwoch. Sia kan rukoruk ika epinukungaw. Sia turuno. Nge ika sia nenengeni Jises Kraist ren netipen aier, I epwe chunata kich, nimeti kich seni tipis, omusakicheno, me echikara netipach. I mi tipepos me kirekiroch; An tongen angasano ese tongeni much me esap morono.33 I epwe anisi kich ne manaueni ach pwon mi pin me awatteno wisach chon elter non Israel.

Me ewe Sam epwe efeiochu kich ren mettoch meinisin mi auchea ne apwonueta An popun—“mettoch… non nang me won fonufan, ewe manau me ewe saram, ewe Ngun me we manaman, a titito me ren mochenin ewe Sam seni Jises Kraist, Noun we.”34

Nupwen saram seni nang me manaman ra tonong non manauach, unungat manaman repwe fis:

Aewin, sia tongeni kuna! Seni pwarata sia poputa ne kuna usun Jises a kuna ewe fefin: nap seni nukun ngeni ewe netip.35 Nupwen sia kuna usun Jises mi kuna, I a efeiochu kich ne tongei ekkewe sia angang ngeni ren An tong. Ren An aninis, ekkewe sia angang ngeni repwe kuna ewe Chon Amanau me mefi An tong.36

Oruwan, mi wor rech ewe manamanen pristut! Mi wor rech ewe mumta me ewe manaman ne foffor non iten Jises Kraist “ne efeiochu emweni, tumunu, apochokuna, me echikara ekkoch” me fori manaman ngeni ekkoch kich mi tonger me fori ach apupunu me famini repwe tumun.37

Aunungatin, Jises Kraist mi fitikich! Ian sa no ia, I mi no. Nupwen sia afanafan, I mi afanafan. Nupwen sia aurur, I mi aurur. Nupwen sia efeioch, I mi efeioch.38

Pwii kana, esap wor ach popun sipwe pwapwa? Mi wor! Kich mi amwochu ewe pristut mi pin an Kot. Nupwen sia nenengeni Jises Kraist, manaueni ach pwon, me anukuchara ach anonga I, sipwe choni fefinach kewe me iamwir non ew napanap mi pin, ionfengeni Israel me ruepek. Epwe fis. Ua pwarata.

Ua asopwano ren ei iotek seni netipei, pwe kich meinisin, emon me emon, sipwe nenengeni Jises Kraist non ekiek meinisin. Ousap tipemwaramwar. Ousap nuokus. Non iten Jises Kraist, amen.

Esinesin

  1. James E. Talmage a annomu Jises non “in the vicinity of Capernaum” nupwen ei echikar a fis (nengeni Jesus the Christ [1916], 313).

  2. Nengeni Luke 8:43–44; nengeni pwan Matthew 9:20–21; Mark 5:25–29.

  3. Luke 8:46.

  4. Mark 5:30.

  5. Mark 5:32.

  6. Luke 8:47.

  7. Mark 5:33.

  8. Luke 8:48.

  9. James E. Talmage a makkei usun met mi auchea ngeni ewe fefin nap seni echikaren inis ina ewe ennetin pwe ewe Chon Amanau a fen awora mochenin netipan, me an nuku a ketiw me ren (nengeni Jesus the Christ, 318). Jises a echikara inisin me ngunun me suki ngeni ewe aan ngeni Amanau.

  10. Mi murino Jairus, emon chon nemenemen ewe synagogue, mi nom ren Jises nupwen ei echikar a fis. Jises a nom won aanen imwen Jairus, ikewe I epwe amanauata noun Jairus we nengin seni mano. Eni ewe fefin Jises a echikara a fen katuru seni ewe synagogue pokiten an we semwen. Nupwen Jises a echikara neminewe, A pwan affata ngeni ir meinisin ekkewe mi nom ikewe, fiti Jairus, pwe i emon fopun achengicheng, emon fefinen nuku, me unus non inis me ngun.

  11. Nengeni D. Todd Christofferson, “The Elders Quorum” (Liahona, May 2018, 55–58) ren ew aporousen ekkewe akkasiwin ne forata ew mwichen Pristut seni Melkisetek non ew wart. Ewe popun ena siwin mi awewetiw non ei napanap non ewe kinikinin Frequently Asked Questions won ewe website ren Iamwir: “An wor ew mwichen Pristut seni Melkisetek non ew wart a achufengeni ekkewe mi amwochu ewe pristut ne awesei mettochun angangen amanau, mi pachenong tempel me angangen uruon famini mi akkom emwen me ren ekkewe pris mi nap” (“This Is Ministering: Frequently Asked Questions,” question 8, ministering.ChurchofJesusChrist.org).

    Ekkewe siwin mwirin ra annomu ewe souemwenin misin non ewe wart me ewe minafon souemwenin tempel me uruon famini non ewe wart fan emwenien ewe presetensin ew mwichen elter. Ren iamwir ngeni famini ra fen nom fan emwenien ewe presetensi, ekkei ekkesiwin ra annomu souemwenin ewe angangen amanau non ekkewe mwichen elter, mi aninis me re Fin Anisi. Ennetin, ewe pisop a amwochu kiien ewe angangen amanau me non ewe wart, nge i a ewisa ei wis me mumutan ena angang ngeni ewe presetenin mwichen elter pwe epwe wor an ewe pisop fansoun iamwir ren an pwisin famini, apochokuna serafo, me angangen wisen sou apung non Israel.

  12. Nengeni Russell M. Nelson, “Let Us All Press On,” Liahona, May 2018, 118–19; Russell M. Nelson, “Becoming Exemplary Latter-day Saints,” Liahona, Nov. 2018, 113–14; Quentin L. Cook, “Deep and Lasting Conversion to Heavenly Father and the Lord Jesus Christ,” Liahona, Nov. 2018, 8–12.

  13. Ewe Sam a tinato Jises Kraist ngeni ewe fonufan (nengeni John 17:18).

  14. Doctrine and Covenants 6:36–37.

  15. Abraham 3:27.

  16. Abraham 3:27.

  17. Moses 4:2.

  18. Mi wor chommong uwokisin non ekkewe pukefel mi makkei porous Jises a apasa usun an fori an Saman we angang me afanafan An Saman we nongonong. Nengeni, ren awewe, John 5:19 (Jises a fori met A kuna ewe Sam a fori); John 5:36 (ewe Sam a ngeni Noun ewe angang an epwe fori); John 8:26 (Jises a aiti kich met a angei seni Seman we); John 14:28 (Jises a affata, “Semei we mi nap seniei”); 3 Nifai 11:32 (An we nongonong ina ewe nongonong Saman we a ngeni I).

  19. John 14:31.

  20. John 8:29.

  21. John 6:38; nengeni pwan John 5:30.

  22. Luke 22:42.

  23. Ewe kapas nengeni non ei uwokisin (nengeni Doctrine and Covenants 6:36–37) a wor wewen mi apwonua ewe kokko seni ewe Samon: ne sapengeni (ika kun ngeni); ne awena an emon ekiek ngeni; ne anongonong won; ne kutta; ne awitiwiti apinukunuk; ne anomu non ekiek usun nesoponon; ne esuku ika awiti (nengeni merriam-webster.com, “look”).

  24. Nengeni Doctrine and Covenants 121:41–42. Ekkei niknik usun napanapen Kraist mi mak non ewe pukefel pwe ir niffang seni ewe Ngun mi feito seni ewe umoumoch me chenin Jises Kraist. Ir met ra forata ekkewe elter non Israel repwe Noun elters.

  25. Russell M. Nelson,, “Drawing the Power of Jesus Christ into Our Lives,” Liahona, May 2017, 41.

  26. Nengeni merriam-webster.com, “rivet.”

  27. Ren ew aporousen ewe nuku usun ew manauen pwon mi pin, nengeni Donald L. Hallstrom, “Living a Covenant Life,” Ensign, June 2013, 46–49. Ei toropwe a amwoch seni ew afanafan mi tam mi tou non Brigham Young University–Idaho in May 2011. Ren ewe kinikin mi tam, nengeni Donald L. Hallstrom, “A Covenant Life” (Brigham Young University–Idaho devotional, May 10, 2011), byui.edu.

  28. Nengeni Jeremiah 31:31–33, ikewe ewe Samon a apasa pwe I epwe fori ew minafon pwon mi pin ren ewe imwen Israel epwe mak non netiper. Ewe niosun pwon mi pin mi mak non netipach, ika pwon mi pin mi manau non netipach, mi pwan pwa mon makkean Paul (nengeni 2 Corinth 3:3; Hebrew 8:10). Ren ew aporousen ekkesiwin me ewe netip, nengeni David A. Bednar, “Converted unto the Lord,” Liahona, Nov. 2012, 106–9.

  29. Ewe iotekin sakrament won ewe pinewa a affataochu ususun nefinen ach pwon mi pin ngeni Samach won Nang. Non an ewe Sam kokkoten Amanau, sia fori pwon mi pin ngeni Samach won Nang, nge ekkewe popun ekkewe pwon mi pin ra fateno me sia tufich ngeni ekkewe feioch mi pwon ngeni kich seni ewe Samon Jises Kraist; I ewe Chon Affor. Non ewe angangepinen ewe sacrament, sia pwarata ngeni ewe Sam (non angangan, sia fori ew pwon mi minafo) pwa sia chengen ne wata woch iten Jises Kraist, chechemeni I fansoun meinisin, me aneasochisi an kewe annuk, pwe Ngunun (ewe Ngun mi Fel) epwe nonnom rech.

    Ekkewe niffang non an ewe Sam we pwon ra feito seni ewe manamanen ngaseno me pochokun an Jises Kraist. Ren awewe, usun Preseten Russell M. Nelson a aitikich, Jises Kraist “I ewe popun pwapwa meinisin” (nengeni “Joy and Spiritual Survival,” Liahona, Nov. 2016, 82). Iwe, anukuchara ach anonga won Jises Kraist a wato pwapwa non manauach ese nifinifin nonnomuch.

  30. Preseten Ezra Taft Benson achunapa opwuren ei siwin non nikinik me neni nupwen a apasa, “Nupwen aneasochis a kouno pwe ew mettoch mi aosukosuk me winiti mettoch sipwe kutta, non ena fansoun Kot epwe ngeni kich manaman”(in Donald L. Staheli, “Obedience—Life’s Great Challenge,” Ensign, May 1998, 82).

  31. John 16:32

  32. Ren pwan ekkoch aporous won ennetin an ewe Sam me ewe Nau aurek, pwpwaiti non, tongei, me ar angang non manauach, nengeni Jeffrey R. Holland, “The Grandeur of God,” Liahona, Nov. 2003, 70–73; Henry B. Eyring, “Walk with Me,” Liahona, May 2017, 82–85. Nengeni pwan Matthew 18:20; 28:20; Doctrine and Covenants 6:32; 29:5; 38:7; 61:36; 84:88.

  33. Nengeni Rome 8:35–39; 1 Corinth 13:1–8; Moronai 7:46–47.

  34. Nengeni Doctrine and Covenants 50:27. Esinesin pwe ewe Samon a ngeni emon me emon mi epinipinino me tinato ei pwon mi wenengeni, me mi aukuk, ewe chok wis me kawor ngeni.

    “Ena chok mi pwan kefinita an epwe nap, ina mwo ika I kisinon me ewe chon angangen meinisin.

    “Ina minne, mi pisekini mettoch meinisin; pun mettoch meinisin mi nom fan nemenian, non nang me pwan won fonufan, ewe manau me ewe saram, ewe Ngun me ewe manaman, a titito me ren mochenin ewe Sam seni Jises Kraist, Noun we.

    “Nge ese wor emon mwan mi pisekini mettoch meinisin tiwenon chok I epwe nimenim me nimochuno seni tipis meinisin.

    “Iwe ika oua nimenim me nimochuno seni tipis meinisin, oupwe eis met chok oupwe mochen non iten Jises iwe epwe fis” (Doctrine and Covenants 50:26–29).

  35. Nengeni 1 Samuel 16:7; 1 Corinth 2:14. Ren ew awewen ei feiochun kuna usun Jises mi kuna, nengeni an Preseten Henry B. Eyring uruo usun met mi fis ngeni nupwen I emon pisopun emon anuon a attai ew annuk. Ewe Samon a apasa ngeni Eyring atun an we emon Pisop, “Upwe mut ngonuk Kopwe kuna I usun ngang mi kuna I” (“Walk with Me,” 84).

  36. Iei ewe pwon me ewe wis ewe Chon Amanau a ngeni ekkewe aramas ren ewe tempel non Bountiful. A annuku ngenir ne manau pwe An saram me An nenien appiru epwe nom non ir, pwe repwe tongeni chunata I pwe saram ngeni ewe fonufan non manauer me non ar tingorei ekkoch ne feito ren. Usun ekkewe chon tapweno mwirin ir mi manau me ketiw, ekkoch repwe mefi I me kuna I me non noun ewe Samon kewe chon angang. (Nengeni 3 Nifai 18:24–25.)

  37. Nengeni Russell M. Nelson, “The Price of Priesthood Power,” Liahona, May 2016, 68.

  38. Nenengeni Doctrine and Covenants 84:88.