Ewe Mwich: Ew Neni kich chon
Ewe Samon a mochen kopwe fori eu mwichen pristut mi pochokun. Nupwen ewe Samon a ion fengen noun kewe, a auchea repwe nom non ew neni ikewe ir chon me marita.
Non 2010, Andre Sebako emon onuwon a kukuta ewe ennet. Inamo ika ese mo etiwa memefin iotek akom, I a ekiekin epwe sotuni. Mwirin chok ekis mwochomwochun fansoun a churi ekkewe misineri. Ra ngeni echo kart fiti echo sasingin ewe Puken Mormon. Andre a mefi och metoch me a eisini ekkewe misineri ika ir mi tongeni amomo ngeni ewe puk. Ra ureni pwe a tongeni nouni ewe puk nge esap kamo ika epwe fiti fan.1
Andre a chok anamon ne fiti ewe Mochudi Pranch e karan-chok foruta non Botswana, Africa. Nge ewe pranch ew mwich ra men sine tong pochokun chochon arapkan 40.2 Ra fokkun sukano pour ngeni Andre ren ar etiwa. A angei ekkewe nesen seni ekkewe misineri me a papatais. Mi murinno!
Nge mwirin met? Ifa ussun an Andre epwe soposopono an pochokun? Ion epwe anisi an epwe soposopono won ewe aanen pwon? Ew ponuwen ena kapas eis pwe an we mwichen pristut!3
Meinisin ekkewe mi wor rer ewe pristut, nge ren nonomun ewe, a tufich seni ew mwich mi pochokun. Pwi kewe kukun a wor remi ewe Pristut seni Aaron, ewe Samon a mochen oupwe forata ew mwich mi pochokun, ew neni ami chon ren emon me emon ami onuwon, ew neni ngunun ewe Samon a nom ie, ew neni ikewe meinisin chochon ewe mwich ra ketiw me ia me auchea. Nupwen ewe Samon a ion fengen noun kewe, a auchea repwe nom non ew neni ikewe ir chon me marita.
Emon me emon ami chon ewe mwichen presetensi oupwe emweni ewe an nupwen ouwa kukuta mokutukutun memef4 me forata tong me Pwipwi nefinen meinisin chon ewe mwich. Oupwe awora auchean etenekin ekkana ir minefon memper, ekkewe ir mi apwangapwang, ika ion kewe a auchea epwe wor aninis ngenir.5 Fiti pochokunen pristut, ouwa aueta ew mwich mi pochokun.6 Me ew pochokunen mwich mi chufengen a forata meinisin sokofesenin manau ren emon anuon.
Nupwen ewe Mwichefen a awora esinesin ren ewe minefon nenien kaeo ewe kapas allim non imw,7 ekkoch ra ekieki ussun ekkoch memper ussun Andre me eis, “Epwe ifa ussun ekkewe fopun me anuon seni ew famini ikewe rese kakao usun ewe kapas annim me ese or nenien kaeo me manaweni ewe kapas annim? Repwe poutireno?”
Apw! Ese wor epwe poutuno! Ewe Samon a tongei emon me emon fopun me anuon. Kich, ekewe mi wor rech ewe pristut, kich chon anisi ewe Samon. Kich chon aninisin Mwichefen ne apochokuna famini non imw. Nupwen epwe kauk aninis non imw, mwichen pristut me ekkoch sou emmwen me chiechiach repwe tumunu me anisi emon me emon me famini nupwen epwe tufich.
Ua fen kuna pwe mi tawe. Ua fen sinei. Nupwen uwa onu ier, semei me inei kewe ra mufesen me semei ewe a poutano inei fengen me nimmon semirit. Inei ewe a poputa ne angang an epwe anisikem. A pwan mochen orua an angang ren pwan ekkoch fansoun, me pwan kapacheta pekin sukun. A chok kukkun an fansoun ne tumun me pesepes Nge in me sam chinnap, tetenin sam, tetenin in, pisop, me sensen fefin chon amwa ra uta ren ar repwe anisi inei ewe chonang.
Me a wor ai mwich. Ua unusen kinisou ren chiechiei— pwi kewe—ra tongeei me anisiei. Ai ewe mwich ew neni sia choni. Ekkoch repwe ekieki ngeniei pwe emon chok chon sossot me emon chon okkuf nge ese wor an epinukunuk. Meni ngang mi ina sokkun. Nge mwichen pristut ra ekesiwini ekkana sokkun. Ai ewe mwich ra mwich fengen arui me efeiochu manauei.
Mi wor chon chok sosot me ese wor epinukunuk mi nom aruch. Meni kich meinisin mi nom non ew an ika pwan ew. Nge emon me emon kich mi wor ew ach mwich ikewe sia tongeni angei pochokun me awora pochokun. Ewe mwich ina “meinisin fan iten emon me emon me emon me emon fan iten meinisin.”8 Iei ew neni ikewe sia aiti fengenikich, anisi fengenikich, me forata chufengen me pwipwioch nupwen sia angang ngeni Kot.9 Iei ew neni ikewe a fis manaman.
Ua mochen upwe aporousa ngenikemi ussun ekkoch me nein ekkewe manaman a fis non an Andre ewe mwich non Mochudi. Nupwen upwe aporousa ei minen apuru, katon ekewe nongonong ra apochokuna meinisin mwichen pristut a fis ngenir.
Mwirin an Andre a papatais, a fiti ekkewe misineri nupwen ra osukuna pwan fomon anuon, ekkewe ra pwan papatais. Iei a wor nimmon [5] anuon. Ra poputa ne apochokuna fengenir me ewe pranch.
Emon a wonemonun anuon, Thuso, a papatais. Thuso a aporousa ewe kapas annim ngeni unumon pwan chiechian, iwe mwitir chok ra tiwemon
Ekkewe chon kuno noun Jisus Kraist ra kan chuchufengen non ei napanap—fan ekkoch, nupwen chiechier ra kokorir. Me nom, nupwen Andrew a kuna ewe Chon Amanau, a mwitir feinno ngeni pwin ewe Simon me “uweato I ren Jises.”10 Pwan ussun chok, mwitir chok mwirin an Philip a winiti emon chon tapweno mwirin Kraist, a kori chienan ewe Nathanael an epwe “etto an epwe kuna.”11
Non Machudi, a engon anuon a pwan mwitir choni ewe Mwichefen. Ekkewe misineri ra kuna ewe engon me emonun. Me ewe engon me ruemonun anuon a papatais mwirin an kuna ewe ekesiwin an ewe kapas annim a fori won chienan kewe.
Chon ewe Pranch Mochudi ra meseik Ekkei anuon ra “winino ngeni ewe Samon, me … choni ewe mwichefen.”12
Ewe Puken Mormon a awora ew watten nikinik non ar napanapen ekesiwin.13 Thuso a chemeni, “ua poputa ne aneani ewe Puken Mormon … iteiten fansoun ese chiwen wor met u fori, neim, non sukun, ekis meinisin.”14
Pokiten napanapen chiechien Oratile kewe ra ofato Oratile ngeni ewe kapas annim. Atewe a awewei, “Ussun ra chok siwin non fichin outun pau. … Tipei nge ren ewe … kukkun puk … ra poputa ne uweifetanei … non sukun. Ua tongeni kuna pwe ra winiti mwan mi murinno … [ngang] ua mochen upwe pwan siwin.”15
Meinisin ekkewe engon me ruemon mwan ra chufengen me papatais non ruu ier ren emon me emon neir. Emon me emon neir a I chok a choni ewe Mwichefen me non an famini. Nge a wor aninis ngenir seni ar kewe famini non ewe Mwichefen, pachenong Preseten Rakwela.,16 nour ewe pranch preseten; Elter me Sister Taylor,17 ew pean pupunu misineri chinap; me ekkoch chon ewe pranch.
Brother Junior,18 emon chon emwenin mwich, a kokorato ekkewe anuon ngeni imwan ewe non mwirin neanowasen Raninifen me a anisir me aitir. Ekkewe anuon ra kaeo fengen ekkewe pukefen me chuchufengen non fenin famini.
Brother Junior a uweir ne no churi memper, aramas ekkewe misineri ra osukuner, me ekkoch ra mochen repwe churir. Meinisin ekkewe engon me ruemon mwan ra tonong mwirin won Brother Junior ewe taraku. A uwireno ren ekkewe imw non ar chiechi fengeni ren ru ika unungat me pwan angeir mwirin.
Inamo ika ekkewe anuon ra chok karan kaeo ussun ewe kapas annim me rese mwo kon sinei, Brother Junior a urenir pwe repwe aporousa ew ika ruu mettoch ra kaeo meren ekkewe aramas ra churir. Ekkei anuon mi wor ar pristut ra afanafan, iotek, me aninis ne tumunu ewe Mwichefen.19 Ra aponueta wiser kewe wisen pristut me kuna ewe pwapwan angang.
Andre a apasa, “Sia kukunou fengen, tatakir fengen, kechiw fengen, me winiti ew mwichen Pwipwi.”20 Non ennetin, ra eita ngenir “ewe Ririn Pwipwi.”
Ir fengen ra forata ew mettoch repwe angang ngeni ar repwe fori pwe meinisin repwe angangen misineri. Pokiten ir chok chon ewe Mwichefen non ar kewe famini, a chommong osukosuk repwe angang ngeni, nge ra aninis fengen nefiner.
Emon me emon, ekkewe anuon ra angei ar kokkon misin. Ekkewe ra no, ra mak taropwe ngeni nenier ngeni ekkewe ir mi chok amonata, aporousa ussun met ra sinei me apochokuner ar repwe angang. Engon me emon ekkewe anuon ra angangen misineri.
Ekkei anuon ra afanafana ewe kapas annim ngeni ar kewe famini. Iner, fefiner, pwir, chiechier, pwan aramas ra afanafaner me won ar misin, ra siwin me papatais. Manaman a fis me chommong manau ra feioch..
Ua tongeni rongorong ekkoch me neimi ouwa ekieki pwe manaman mi tongeni fis nge epwe chok fis me non neni ussun Africa, ew neni mi murinno ikewe ewe chufengenin Israel a mwitirino. Ina minne, ua pwarata pwe ekkewe nongonong a fis me non Mochudi Pranch mei ennet ekis meinisin. Ian mwo ka nonnom ian, om ewe mwich a tongeni marita ren om apochokuna me aporousa ewe kapas annim. Nupwen mwo emon noun Jises chon kuno a anisi emon chiechian, emon a tongeni winiti ruemon. Ruemon a tongeni winiti fomon. Fomon a tongeni winiti wanumon. Me wanumon a tongeni winiti engon me ruemon. Ekkewe pranch ra tongeni winiti Wart.
Ewe Chon Amanau a afanafana, “Ikewe ruemon are unumon [ika nap seni] ra mwich fengen fan itei, upwe pwan nonnom rer.”21 Samach Kot won Nang a amonata ekiekin me netipen aramas unukuch. Sia tongeni tapwei memefin pesepes me apochokun, anapano ach chiechioch, aporousa ewe ennet, tingorei ekkoch ar repwe anneani ewe Puken Mormon, me tonger me anisir nupwen ra poputa ne sinei ach ewe Chon Amanau.
A fen arapakan ngeni 10 ier seni ewe fansoun ewe Ririn Pwipwi non Machudi ra poputani ar chufengen ne sai, me ir mi chok chiwen ririn Pwipwi.
Katlego a apasa, “Meni sipwe keimufesen non ach towaw fesen, nge kich mi chok anisi fengenikich.”22
Iei a iotek pwe sipwe etiwa an ewe Samon tingor pwe sipwe chufengen me I non ach mwichen pristut pwe ew me ew mwichen pristut epwe ew neni kich mi choni, ew nenien chufengen, ew nenien mamarita.
Jises Kraist I ach Chon Amanau, me iei An angang. Ua pwarata non itan Jises Kraist, amen.