Iei I Appanen Siipwen Kot
Ach fenin Raninfel mi siwin epwe affata ewe sakramenin an ewe Samon we Faf pwe mi pin, ina auchean ach fen iteiten wik.
Ngang mi chok kinamwe tori ai we ua kuna surun mas me ne mesen ekkewe serafo me non ei mwichen kon. Ekkena surun mas ra kon fatafatoch non pekin afanafan nap seni ai upwe afanafan.
A sacheta seni oropenin ewe konik, mwirin ewe pwin aramas mi feito ar repwe paptais ren poun, John Sou papatais, a kuna me touau tetenin pwin ewe, Jises ewe re Nazareth, a wenen feito ngeni i an epwe pwan tingor ena pwan angangepin. Non pwetete, nge neuekukun an ekkewe mi uta unukun repwe rong, John a apasata ewe kapasen mwar mi ku netipach ru ngereu ier mwiirn: “Iei i ewe Appanen Siipwen Kot.”1
Minen ach kaeo pwe ei chon esinesinne Jises ese kor ngeni I “Siowa” are “Chon Angasano” are “Chon Amanau” are fen “ewe Noun Kot”—meinisin mi fich an epwe iteni. Apw, John a fini ewe kapasen awewe mi itefouno nein sounengin aramasan kewe seni nom. A aea ewe awewe usun ewe appanen siipw mi fangeno non achasefanin ekkewe tipis me riaffoun ew fonufan mi turutiw me ekkewe aramas mi turutiw mi nom non.
Ouse mochen mut ngeniei upwe achema ekis ena uruo.
Mwirin ar tou seni ewe Ataken Eden, Adam me Eve ra sapengeni ew fansoun mwer mi kan eriafou. Ren ar ra suki ewe asamen manauen fonufan me inis fan itach, ra apungano ewe asamen manau ese much me manau fochofoch ngeniir pwisin. Fan itan ra pwisin fini repwe fori atai annuk fan itach, ir mi weiri ewe tufichin manon inis me atamawun ngun, ewe mufesin seni fan mesen Kot feinfeinno.2 Met ita repwe fori? Ita epwe wor aanen ar repwe tou seni ei osukosuk? Sise fat ifa chok ukukun an ekkei ruemon mumuta ne chemeni ewe aurour ra angei nupwen ir mi chiwen nom non ewe atake nge ir michemeni repwe awora asora emon nam mi nimenimoch ngeni Kot, ewe aemonun niemwanin nour kewe man.3
Mwirin emon chon nang a feito ne awewei pwe ei fangeno ew sokkun, ew eisisinen ewe asor epwe fis fan iter seni ewe Chon Amanauen ewe fonufan ewe epwe wareto. Ewe chon nang a erenir pwe ar asor mi nikinikin ewe asoren ewe Noun ewe Sam anaemon. Iwe, mi namwot repwe aier me koko ngeni Kot non itan ewe Nau feinfeinno.4 Ra feioch, epwene wor ew aanen ar repwe tou me feita.
Non ewe mwichen nang mwen ei manau, Kot a pwon ngeni Adam me Eve (me kich meinisin) pwe aninis epwe wareto seni Noun ewe Anamon, ewe Namen Kot mi nimenimoch “a ninino seni nepoputan ewe fonufan”5 usun ewe Aposel John a anapanapa usun I mwirin. Ren ar fangeno ar pwisin kukkunun esisinen ewe naam non fonufan, Adam me mwirimwirin ra awewei ar weweiti usun ar anongonong won ewe asoren achasefan an Jises ewe Emon mi Pin.6 Mwirin, ewe tabernacle non ewe fonu pon epwe winiti ewe nenian ei angang mi pin me, mwirin ena, ewe tempel minne Solomon epwe aueta.
Sonapan, ussun ew ennetin esisinen aier me manauen souneng, ei tetenin asor mi fel ren apanen siipw ese pungoch, usun napangnei pworausen Testamen Nom meinisin a pwari. Ewe tipepwos amwo ita epwe fiti ekkan asor ese nomotam tori ewe cha a pwaseno won ekkewe fau. Non ei nikinik, ese tam an eppeti an nieno pwin, ren Kain a nieno pwin we Abel non ewe aewin kinikinin fansoun.7
Ren ekkei weires me osukosuk mi fifis ren fitu ngeru ier, ese amairu pwe ekkewe chon nang ra kon ren pwapwa, iwe, nupwen Jises a uputiw—I ewe Messiah mi pwon seni nom. Me mwirin An mochun angangen afanafan won fonufan, ewe mi nimenimoch nap seni siipwen Passover meinisin mi amonnata Noun kewe chon kuno ngeni An epwe mano ren an poputani ewe Mongon ewe Samon, ew asor fan itan emon me emon non nikinikin ewe asor mi poputa nukun Eden. Epwe chiwen wor asor, epwe fiti fangeno, nge epwe chok pisekin awewe mi anonnon, mi amwarar me auchea ngeni emon me emon pwisin nap seni nienon ewe aemonun apanen siipw. Ngeni ekkewe chon Nifai, mwirin An Manausefan, ewe Chon Amanau a apasa usun ei:
“Iwe ousap chiwen asorata ngeniei ewe assukun cha. …
“… Iwe oupwe asorata ew asor ngeniei ew asoren netipechou me netip niemam. Iwe ion chok epwe feito rei fiti ew netipechou me ew netip niemam, i upwe papataisei ren ekkei me ren ewe Ngun mi Fel. …
“…Iwe, … aier, … me oupwe manau.”8
Pwi me fefinei achengicheng, ren ewe minafon apechekunan ach anapano ach kaeo kapas allim non ewe imw, mi auchea ngeni kich pwe sipwe chechemeni pwe mi chiwen wor annuk pwe sipwe tonong non ewe imwan iotek me fangeta ach kewe asor non an we ran mi pin.”9 Kapachenong ngeni ach akotaochu fansoun ngeni kaeon ewe kapas allim mi anongonong non ewe imw, ach kokkotun ekkesiwini tetenin mwichen Raninnifel pwe epwe emecheresi non ew napanap mi aucheaniochu ewe sakramen ren ewe Mongon ewe Samon pwe mi pin, me foun nukanpan ach fel iteitan wiik. Sipwe pwisin chechemeni non ew napanap epwe tufich pwe Kraist a mano seni ew netipengaw ren an anamon ne mwarei tipisin me riaffoun aramas meinisin.
Non ach sopwei ena chou mi afeiengaw, ena sokkun fansoun mi murino sipwe sufoniti. Iwe, aua peseikemi pwe oupwe mwitir kaito fiti ach fan non osufonoch, o ufouf ufoufen om kopwe fiti ew angang mi pin. “Ufoufen raninifen” ese chiwen weweoch non ach ei fansoun, me ren ach asamounu I nupwen sia feito nom ren, sipwe fen asofosefanni ena erenien ufoufen raninfel me nimenimoch nupwen me ika sia tufich ngeni.
Nge ren ach sipwe mwitir ngeni fan, sia chok ekketiwa iteitan ekkewe in, fiti nour semirit, Cheerios, me potowun pamper mi fetan mwririr non fitikoko, ir mi feioch pwe ra kofichin fiti fan ikamwo mi weires. Sopwenon, epwe wor ekkoch repwe chok kukuta nour kou non ewe pwokak iteitan nesesorun Sabbath. Nge, ngeni ei mwich non fansoun soponon sia apasa ew fan ekkoch mang mi weweoch nge ika ewe kou mi nom non ewe pwakak iteiten Raninifen mwirin a wor ach pochokunen porous pwe kopwene amomo ewe kou ika amasowa ewe pwakak.
Non chok pwan ena nikinik, sia fori ew tingor usun aposel ngenikemi pwe sipwe okukunatiw ewe okurang non ekkewe neni mi kinamwe non imwach kewe. Sia sani ach sipwe achurfengeni kich, me sipwe fori—Iei ew me nein ekkewe pwapwan chon fiti ewe mwichefen—nge esap tapweno non ach neumwong ngeni neni mi for pwe nenien pin ngeni. Ua niokus pwe ren ekkewe aramas rese mwo chon ach mwichefen ir mi ruko ren ewe okurang mi tongeni fis non ew neni ita epwe fen ew nenian iotek, kapasen pwarata, angei pwarata, me kinamwe. Naman nang mi pwan ekkis ruko.
Epwe anapano ewe ngunun ach mwichen sakramen ika pwe ekkewe chon nemenem repwe fen mommot non nenier me mwen nepoputan ewe mwich, ausening ngeni ekkewe konun etiwa me awora nenian apiru ngeni kich nussun sipwe appiru. Ika mi wor oporous won ewe rong, sisap mairu ren aporous non ewe mwicheich. Sia apasa ach kapasen kinisou ngeni ekkewe mwichen pisop ir mi aukatiw kapasen esinesin mi osukosuka kinamwen ach fel. Ngang, pwisin, use nuku pwe emon prist usun Zacharias—ikewe non ewe tempel an ewe Samon me nom, epwe keran fiti ewe chok tufichin angangen pris non manauan—use tongeni anchangei pwe i epwe kouno me mwen ewe antare epwe achema ngenikich usun ewe kittirin niosun taraku epwap fis non fitu wiik me register epwene wes.
Pwi me fefinei, ei awa minne ewe Samon mi epini ina ewe awa mi pin mi nap non ach wiik. Meren annuk, sia chufengen ren ewe angang mi pin kich meinisin non ewe Mwichefen mi angei. Ren achechemen I ewe a tingor ika ewe kap minne epwe unumi epwe wesino, nge a apwonueta pokiten I mi sinei pwe fan asengesin kich esap mweteri. Epwe anisikich ika sipwe chechemeni pwe ew esinesinen ena kap mi mangeto rech nein ekkewe seia non ena fansoun me ren poun emon 11- or 12- ier tiken.
Nupwen ewe awa mi pin a war pwe sipwe asoreni ach nifangen asor ngeni ewe Samon, mei wor ach tipis me apwangapwang sipwe apungano; ina pwata sia nom ikewe. Nge mi tufich sipwe apungochuono ach tipetekison ika sia afanni ekkewe pwan ekkoch mi netipechou me netip mi niamam mi nom unukuch. Menin ekkewe rese mwot towaw seni kich ir ekkewe mi kechiw—mi pwano ika non netiper—fansoun unusen ewe konupin me iotekin ekkewe pris. Amwo sipwe esina ena me awora ach kisikisin pinewan aurur me ew kukkun kapen umoumoch—amwo sipwe afeiochu ngenir? are ngeni ewe mi kechiw, memper mi weires ese nom non ewe mwich me, me tiwenon chok sia fori och iamwirin amanau, esap pwan nom non na wiik? are ren pwich me fefinach esap ir chon ewe Mwichefen nge ir pwich me fefinach? Sise osupwangen riaffou non ei fonufan, non ewe Mwichefen pwan nukun, iwe nennefetan o oupwe kuna emon minne ese kii ngeni ossan ar metek me usun ar netipechou ese much. Ew napanap sia tongeni “chechemeni i fansoun meinisin”10 ika pwe sia tongeni fiti ewe Sou Safei mi Napanap non An angang ese much an epwe apenna ekkewe mi weires me angasa metekin ekkewe mi raffou.
Chienei Achengicheng, ren ach sia chufengen won unusan fonufan iteitan wiik aua apinukunuk epwe fiti anapanon ach etiwa an Kraist asoren achasefan mi nap pwe niffangan ngeni aramas, amwo sipwe tufichin uwei ngeni ewe antaren sakramen “pwan chenun mesach ren an kewe riaffou [me] pwan och metek ren an netipechou.” Iwe mwirin, ach sia ekeki, iotek, me asofosefanni ach pwon, amwo sipwe uwei seni ena fansoun mi pin “pwan anapa engin non riaffou, … pwan och kinisou ren ngaseno.”11 Ren ena sokkun engino me ngaseno, ren ena sokkun pin me apinukunuk, ua iotek fan itemi meinisin non itan I ewe a aewin kini feseni ewe pinewan omusomus me nini ewe wainen amanau mi pin, ewe chok Jises Kraist, ewe mi nap me umoumochun Noun Kot Aparen Siipw, amen.