Ifa Ussun Ai Upwe Tongeni Weweiti?
Nupwen sia ennet, unus, pochokun, me wenechar ne kutta ach sipwe kaeo ewe kapas allimen Jises Kraist me aiti fengeni kich, ekkei asukun repwe siwini netip.
Pwi me fefinei achengicheng, a men apwapwa ach chusefan fengen ikei non ei mwichenapen mwichefen ren Ewe Mwichefenin Jises Kraist ren Aramas mi Pin non Fansoun Soponon fan emwenien nouch soufos achengicheng, Preseten Russell M. Nelson. Ua pwarata ngenikemi pwe epwe wor ach feiochun rongorong mongungun ach Chon Amanau, Jises Kraist, meren ekkewe afanafan an ekkewe ra iotek, non ekkewe kon, me porous ngeni ekkewe osupwangen ach ran non ei mwichenap.
Usun a makketiw non puken Pwarata, Philip ewe chon afanafan a afanafana ewe kapas allim ngeni emon re Ethiopia mi reirei pwe esap nounou emon mi nap a tumunu an ewe finesamonun Ethiopia pisek mi auchea.1 Nupwen a niwinsefan seni an pin ngeni Kot non Jerusalem, a aneani ewe puken Isaiah. Ewe ngunupin a pochokun ngeni Philip, a feinno arap ngeni atewe me a apasa, “En mi weweiti met ka anneani?”
“Me [ewe mi reirei] a ponuweni, “Ifa usun ai upwe tongeni weweiti ika ese wor emon epwe awewei ngeni ei? …
“Iwe Philip a poputa ne kapas. A poputa seni ei wokisin non pukepin o a awewei ngeni atewe ewe Kapas Allim usun Jises.”2
Ewe kapas eis ewe re Ethiopia a eis ew achehemen ewe annuk a wor rech meinisin, ach sipwe kukkuta ach sipwe kaeo me aiti fengenikich ewe kapas allimen Jises Kraist.3 Ennet mwo, non pekin kaeo me afanafana ewe kapas allim, fan ekkoch sia usun ewe re Ethiopia—sia mochen aninis seni emon mi sense mi nukuchar; me fan ekkoch sia usun Philip—a murinno sipwe aiti me apochokuna ekkoch non ar ekkesiwin.
Ach popun nupwen sia kukkuta ach sipwe kaeo me osukuna ewe kapas allimen Jises Kraist ach sipwe anapano nuku non Kot me non An kokkotun pwapwa me pwan non Jises Kraist me An asoren achasefan me an epwe pwonuta amuchunon ekesiwin. Ren napanon nuku me ekesiwin epwe anisikich ne fori me aponueta ekewe pwon ngeni Kot, me epwe apochokunano ach mochen ach sipwe tapweno mwirin Jises me forata ew ennetin ekkesiwin non kich non pekin ngun—non pwan ekkoch ititin kapas, ekkesiwini kich ngeni emon minefon aramas, usun ewe Aposel Paul a afanafana non an porous ngeni ekkewe chon Corinth.4 Ei ekesiwin epwe wato napanapen pwapwa, uwaoch, me pochokunen manau me anisikich ach sipwe nom non ew manau ese much. Esap iei met ewe a fis ngeni ewe re Ethiopia mi reirei an esap nounou mwirin an ewe a kaeo usun ewe Chon Amanau me a siwinino ngeni ewe An ewe kapas allim? Ewe wokisin a apasa pwe “a sopweno an ewe sai o a fokkun pwapwa.”5
Ewe annuk pwe sipwe kaeo ewe kapas allim me aiti fengenikich ese minefo; a fen aniwin seni nepoputa uruon aramas.6 Non ew fansoun, nupwen Moses me noun kewe aramas ra nom non ewe fonuen Moab me mwen repwe tonong non ewe fonuen pwon, ewe Samon a amef ngeni an epwe fonou ngeni noun kewe aramas usun wiser ar repwe kaeo ekkewe annuk me pwon ra fen angei seni ewe Samon me aitir ngeni ekkewe aramasen mwach kan,7 chommong meneir resap mo pwisin fetan non ewe Setipar are kuna ewe pwarata a fis me won ewe Chuk Sinai.
Moses a fonou noun kewe aramas:
“Oupwe anneasosichi ekkewe annuk meinisin ua afanafana ngeni kemi, pwe oupwe manau o tonong won ewe fonu ewe Samon, ewe Koten ami kewe newo, epwe ngeni kemi. …
“… Oupwe apworausa ngeni noumi, me noun noumi kewe.”8
Moses a asopono, a apasa, “Oupwe anneasosichi an kewe annuk meinisin ua fen ngeni kemi ikenai, iwe ami me murimurimi kewe oupwe feioch. Oupwe chok nonnom won ewe fonu ewe Samon ami Kot epwe ngeni kemi pwe oupwe fonueni feinfeino.”9
Noun Kot kewe soufos rafen aiti ngenikich pwe mi murinno sipwe amarata ach kewe famini non “tumun me kapasen fon an ewe Samonn”10 me non saram me ennet.11 Preseten Nelson a apasa, “Non ei ranin napenon tipisin fonufan me orni ne katon ekkewe minen katon mi ngaw, a wor wisen sam me in mi pin ar repwe aiti nour kewe semirit ewe auchean Kot [me Jises Kraist] non manauer.”12
Pwi me fefinei, ewe kapasen esinesin an nouch we soufos ina ew soposoponon achechem ren ach pusin sekining ach sipwe kukkuta ne kaeo me aiti ach kewe famini pwe mi wor emon Sam non Nang ewe a tongeikich me ewe a forata ew auchean kokkotun pwapwa fan iten noun kewe; pwe Jises Kraist, Noun we, I ewe Chon Amanauen fonufan; me ngaseno a feito seni nuku non Itan we.13 A namwot pwe manauach kewe repwe fotetiw won achawen ewe Chon Angasa kich, Jises Kraist, minne epwe anisikich me ach famini epwe wor pusin ach memmef non ngunuch mi mak won ngasangasach, minne epwe anisi kich ach sipwe nikitu non ach nuku.14
Meni kopwe chemeni sefani pwe ekkewe ruemon chon kuno noun John ewe Soun Paptais ra tapweno mwirin Jises Kraist mwirin ra rongorong an John kapasen pwarata pwe Jises I ewe Namen Kot, ewe Messiah. Ekkei mwan mi murino ra etiwa an Jises tingor ar repwe “feito me kuna”15 me nonnom ren I unusen ewe ran. Ra sinei pwe Jises I ewe Messiah, ewe Noun Kot, me ra tapweno mwirin I ren unusen manauer.
Usun chok, nupwen sia etiwa an ewe Chon Amanau koko ach sipwe “feito me kuna,” a murinno sipwe nonnom non I, amokicheno non ekkewe pukfel, pwapwa non ir, kaeo An kewe annuk, me achocho ngeni ach sipwe manaueni non ewe an I a manaueni. Iwe ina atun sipwene tongeni sinei I, Jises Kraist, me esinna neuan, sinei pwe nupwen sia feito ren I me nuku non I, sisap tongeni chiwen echik ika kaka.16 Sipwene tongeni sinei met mi pung fansoun meinisin, usun a fis ngeni ekkewe ruemon chok kuno mi nom ren Jises non ena ran.
Pwi me fefinei, ena ese chok sereseren fis. Ach awena netipach ngeni tekian ekewe aurourun nikinikin kot esap och mettoch mi mecheres; a namwot pwe sipwe kokori Kot me kaeo ifa usun ach sipwe annomu ewe kapas allimen Jises Kraist non nukanapen manauach. Ika pwe kich mei fori, ua pwon pwe ewe mwasangen ewe Ngun mi Fel epwe wato ennet ngeni netipach me ach ekiek me awora kapasen pwarata fan itan,17 osukunna mettoch meinisin.18
An ewe re Ethiopia kapas eis, “Ifa usun ai upwe tongeni [weweiti], ika ese wor emon epwe awewei ngeni ei?” a pwan wor ew auchean wewen non napanapan wisan emon me emon ach sipwe annomu ekkewe nongonongun ewe kapas allim sia fen kaeo ne anganga non manauach. Non pworausan ewe re Ethiopia, awewe chok, an ewe mokutukut won ewe ennet a kaeo seni Philip. I a tingor pwe epwe papatais. A feito an epwe sinei pwe Jises Kriast I ewe Noun Kot.19
Pwi me fefinei, napanapach epwe pwarano met sia kaeo me osukunna. Mi namwot sipwe pwarano ach nuku non ewe napanap sia manaueni. Ewe sense mi murinno I a emon chon fori napanapan mi murinno. Osukuna mettoch sia ennetin manaueni a tongeni fori ew ekesiwinin non netipen ekkewe sia osukuner. Ika sia mochen aramas, ika ach famini ika esap, ar repwe pwapwa ne aucheani ekkewe pukefen me ekkewe afanafanen ekkewe aposel me soufos mi manau non ach ei fansoun, mi murinno repwe kuna ngunuch ra pwapwa non ir. Usun chok, ika sia mochen pwe repwe sinei pwe Preseten Russell M. Nelson i ewe soufos, chon osuni, me chon pwarata non ach ei ran, mi auchea repwe kuna ach eitieta pouch ach sia etiwa i me sinei pwe sipwe opuru an kewe afanafan. Usun ewe kapasen Merika a apasa, “Fofor a osomong seni kapas.”
Meni ekkoch me neimi non ei fansoun ouwa eisini pusin inisimi, “Elter Soares, Ua fen fofori meinisin ekkei mettoch me apiru ei sokkun napanap ren pusin won winikapei me pwan ussum ren famini, nge ngawan, ekkoch me nein chienei me atongeei kewe rafen atowaweno inisir seni ewe Samon. Met upwe fori?” Ren ami kana ouwa mefi ekkei memefin netipengaw iei, riaffou, me meni nemenemeno, ouse mochen oupwe sinei pwe repwe wesewesen poutuno pun ewe Samon a sinei ian ra nom ian me a mamasa ir. Chemeni, pwe ir pwan noun!
Mi weires ach sipwe weweiti ekkei popun meinisin pwata ekkoch aramas ra feinno won ew pwan an. Ewe a auchea sipwe fori non ekkei sokkun napanap sipwe chok tonger me foropacher, iotek fan iten nonomur, me kukuta an ewe Samon aninis ach sipwe sinei met sipwe fori me apasa. Ennetin fitir ne pwapwa non met ra fefeita non, chiechi ngenir me nenengeni ewe murinno non ir. Sisap tongeni fangeta ir nge anganga ewe chiechi nefinach. Sisap tongeni etiwengawer, ika ekiekingaw ngenir. Sipwe chok tonger! Ewe kapas monomon ren ewe noun mi mwanecheno a aiti kich pwe nupwen kewe semirit ra pwan ekiek sefan, ra mochen repwe niwiniti imwer. Ika a fis ngeni emon ka tongei, amasowa netipom ren kirekiroch, sa ngenir, chapetiw nekon uwer, me kisir, usun semen ewe noun mi mwanecheno a fori.20
Mwirinon, sopweno chok ne manaueni ew manau mi nimenimoch, kopwe ew pisekin apiru mi murinno fan iter ren met sia nuku, me arapakan ngeni ach ewe Chon Amanau, Jises Kraist. I a sinei me weweiti anononun ach netipengaw me metek, me I epwe efeiochu om pochokun me fangeno ngeni atongom kewe ika esap non ei manau, iwe non ewe manau mwirin. Chechemeni, pwi me fefinei, fansoun meinisin pwe epinukunuk ina ew auchean kinikinin ewe kokotun ewe kapas allim.
Ren chommong ierin angang non ewe Mwichefen, ua fen kuna chon ewe mwichefen mi nukuchar ekkewe ra fen sopweno ne aeaochu ekkei nongonong non manauer. Iei ei pworausen emon inenap ese pupunu upwe kori ngeni “Mary.” Atongan, Mary a nom non ew ametekin imufesen me punuwan. Non ena fansoun, Mary a esinna pwe met ewe a ekiekieta a kon efeiengaw ngeni an famini epwe non pekin ngun. Iotek, kaeo ekkewe pukefen, me fiti fan me tempel epwe soposopono auchean ngeni?
Mary a chok fokkun nukuchar iteitan, me ren ena fansoun mi efeiengaw, neminewe a ekiekieta pwe epwene kamochuno ngeni met a fen sinei epwe ennet. A kuna pochokun non “Ewe Famini: Ew Kapas esinesin ngeni Fonufan,” minne nein chommong nongonong, a aitikich pwe “sam me in a wor wiser mi pin ne amari nour kewe non tong me pung,” me aitir ar repwe anneasochisi ekkewe annukun Kot fansoun meinisin.21 Neminewe a sopweno ne kukuta ponuen kapaseis seni ewe Samon me aporousar ngeni noun kewe fomon iteitan fansoun ar famini mi nomfengen. Ra kan chok poporous won ewe kapas allim me aporousafengeni met ra sinei me kapasen pwarata.
Ina mo ren ewe netipengaw ra nom non, noun kewe ra forata ew tong ngeni an Kraist ewe kapas allim me mochen angang me apworausa ngeni ekkoch. Unumon me neir ra no fori angangen misineri, me ewe setiputur iei a angang non South America. Noun ewe finichi, ewe ngang mi sisinei, ewe a pupunu me pochokun non an souleng, a parousa, “Use fen mo mefi pwe inei ewe a amarikemita non an akanamon pokiten ewe Samon a nonnom non imwem we fansoun meinisin. Nupwen a apasata an kapasen pwarata usun I ngeni kem, emon me emon neim ouwa sapengeni I ren pusin am kapas eis. Ua fokkun kinisou ren an fori ewe kapas allim epwe auchea ngeniei.”
Pwi me fefinei, ei inenap mi murinno a atufuchin imwan pwe epwe ew nenian kaeo non pekin ngun. Nonno ngeni ewe kapaseis an ewe re Ethiopia, Mary a esini pusin inisin fan chommong, “Ifa usun nei kei repwe kaeo ika emon inenap esap emwenir?”
Chienei achengicheng non ewe kapas allim, ua pwarata ngeni ami pwe nupwen sia ennet, unus, pochokun, me wenechar ne kutta ach sipwe kaeo ewe kapas allimen Jises Kraist me aiti fengeni kich ren ennetin popun me fan emwenien ewe Ngun, ekkei osukun repwe ekesiwini netip me amwasanga ew mochen an epwe manaueni ewe ennet an Kot.
Ua pwarata pwe Jises Krasit I ewe Chon Amanauen fonufan. I ewe Chon Angasano, me I mi manau. Ua sinei pwe I a emweni an Mwichefen me ren noun kewe soufos, chon osuni me chon pwarata. Ua pwan pwarata ngeni kemi pwe Kot mi manau, pwe I mi tongei kich. I a mochen sipwe niwino ren—kich meinisin. I mi ausening ngeni ach Iotek. Ua apasata ai kapasen pwarata ren ekkei ennet non iten Jises Kraist, amen