Kraist: Ewe Saram Mi Tin non Rochopwak
Ika ka mefi pwe ewe esisin mi ngetenget ren om kapasen pwarata a chopuchop me rochopwak a arapeto, kopwe pwaracho. Apwonueta om pwon ngeni Kot.
Ai we ofes non ewe imwen Fin Anisi mi pwaochuno ngeni ewe Salt Lake Tempel. Iteiten nepwin, mi fis usun ewe kunok, ekkewe tengkin nukun ewe tempel ra tin nupwen a rochono. Ewe tempel ew esisin mi chok ngetenget nukun chok asamwachoi we.
Non ew pwin non ewe February, ai we ofes mi fokkun nap rochopwakun nupwen ewe akkar a tup. Nupwen ua neu me non ewe asamwacho, ewe tempel mi tinekukkun. Ekkewe tengki rese mwo tin. Ua mefi netipengau. Use tongeni kuna ewe temple minne ua nenengeni iteiten pwin ren chommong ier.
Non ai kuna kiroch ian ita upwe kuna saram a achema ngeniei usun eu mettoch mi namwot ngenikich ach sipwe mamarita pwe sipwe pachengeni ewe nenien saram—Jises Kraist. I ewe popun ach manaman, ewe Saram me Manauen ewe fonufan. Ika ese wor pochokokunen ach pachengeni I, sia poputa ne mano non ngun. Ren an sinei ena, Setan a kutta an epwe aea pesepesen fonufan kich mi weri. A sotuni ne etinekukkunu ach saram, muti ewe pachefengen, fichieno ewe fifi, nikitikicheno non ewe rochopwak. Ekkei pesepes ir mi soun fis non manauach, nge Setan a sotuni ne eimukicheno me urenikich pwe kich chok sia werir.
Ekkoch me Neich Sia Mwoch ren Netipengaw.
Nupwen osukosuk ra tori kich, nupwen manau a fokkun metek sise tongeni ngasangas, nupwen sia wichiwich usun ewe mwan won ewe aan ngeni Jericho a ra nikitano epwe mano, Jises a feito me ninatiw oil won kinasach kewe, chunakicheta, uwei kich ngeni ew imwen wasona, tumunu kich.1 Ngeni kich ekkewe mi nom non netipeta A apasa: “Upwe … ekisano ekkewe achou minne ra wata won afaremi, pwe ousap tongeni mefir me won nukunupemi, … pwe oupwe tongeni ennetin sinei pwe ngang, ewe Samon Kot, ua churi nei aramas non ar riaffou.”2
Ekkoch me Neich Sia Fokkun Pekus.
Elter Jeffrey R. Holland a apasa: “Esap wewen pwe sipwe sa mwitir nap seni ach pochokun. … Nge [me nukun] ena, ngang mi sinei chommong me neimi oua [fokkun] sa mwitir me ewe pochokun me aninisin netip fan ekkoch a pwa pwe a arap ngeni pon.”3 Nupwen mettoch kich mi esuku ra apekusu kich, sia tongeni ipwesefan me eisini Samach won Nang met sipwe nikitano. Pekin met sipwe kaeo non manau ina sipwe kaeo met sisap fori. Nge ina mwo, fan ekkoch sia pekus ren manauach. Jises a affata ngenikich, “Oupwe feito rei, ami meinisin mi pekus ren choun osemi o ngang upwe asoso kemi.”4
Kraist mi chengen ne choni kich me epwe etekini an epwe paneno ach chou. Kraist i ach asoso.
Ekkoch me Neich Sia Mefi Pwe Sise Mas Ngeni Met mi Fifis
Ren ekkoch popun, sise mefi ketiw ika fich ngeni. Ewe Testamen Sofo a pwari an Jises achocho ne anisi sokopaten aramas: ekkewe mi semwenin keinapan, chon ioni takises, semirit, chon Galili, fin nisou, fefin, chon Pharisee, chon tipis, chon Samaria, ekkewe mi mano punuwer, sounfiun Rome, chon nisou, ewe mi nimengaw. Napengeni non meinisin tutunap, I mi chok anisi emon ese ketiw me nein aramas.
Luke 19 a aporousa porousen ewe chon ioni takises mi nap non Jericho itan Zacchaeus. A tota won efoch ira an epwe kuna Jises a fetano. Zacchaeus a angang ngeni ewe muun Rome aramas ra ekieki pwe I mi ngaw me emon chon tipis. Jises a kuna I me won efoch ira me a a kokkori, a apasa, “Zacchaeus, kopwe muttir totiw, pun upwe tori imwom ikenai.”5 Iwe nupwen Jises a kuna ochun netipen Zacchaeus me ekkewe mettoch a fori fan iten ekkoch, A etiwa an asor, a apasa, “Ikenai manau a fen tori ei imw, pun ei mwan, pwan emon mwirimwirin Abraham.”6
Kraist a pwetete ne ureni ekkewe Chon Nifai, “Ua fen annuku pwe esap wor neimi epwe suno.”7 A wor an Peter pwarata mi manaman non Foffor 10 nupwen a apasa, “Kot a pwar ngeni ei pwe usap eita emon [aramas] ese auchea are mi nimengaw.”8 Mi fokkun auchea ngeni Souneng chon kuno me Aramas mi Pin non Fansoun Soponon ar repwe pwari ennetin tong fengen.9 JIses a pwan awora ei sokkun tingor ngeni kich ewe mi ngeni Zacchaeus: “Oupwe ausening! Ua ukkuta ren ewe asam o fichifich. Ika [en] mi rong neuwei o suki ewe asam, upwe tonong non [imwom] o [fituk] ne mongo o [kopwe] fiti ei ne mwongo.”10 Kraist a kuna kich non ach kewe ira.
Ekkoch me Neich Sia Tatakis ren Kapaseis.
Ese chommong ier a no, ua choutiw me mangaw ren kapaseis use kuna ponuwer. Nesosorun ew Ammon, ua tanei ew kukkun tan. Non ewe tan ua kuna ewe kukkun uut, me ua weweiti pwe upwe no uta non. Mi wor nimu uran mi chipwechipw mi pweni, nge asamwachon mi for seni fau. Ua ngunungun, use mochen tonong pokiten a men nuokusun apwosopwos. Iwe ewe ekiek a tonong non mokurei pwe pwin Jared we a tipepos ne eteni foun fau ngeni kinas mi fatafatoch. Kinas ina foun fau a fen wes seni ew kinikinin siwin. Nupwen ewe Samon a attapa noun pwin Jared kewe fau, ra tineno ren ewe saram me non ewe sipw mi roch.11 Mwitir chok ua ureno ren ewe mochenin ai upwe nom non ewe imwapek nap seni pwan ew neni. Ina ewe fokkun neni—ewe chok neni—ren ai upwe ennetin “kuna.” Ekkewe kapas eis mi aosukosukaei rese kouno, nge ewe kapaseis mi fatoch non ai ekiek ina ewe kapas eis mwirin ai ua neno: “Ifa usun kopwe anapano om nuku, usun pwin Jared we, pwe noum kewe foun fau repwe siwin ngeni saram?”12
Tupuwach kewe iei ra for ar repwe kutta mirit me wewe ren ekis me ekis. Use sinei ekkewe popun pwata ewe tit mangaku won manauach won fonufan mi kon manun. Esap iei ewe fansoun non ach mamarita esemuch ikewe sipwe angei pwonuwen kapaseis meinisin. Iei ewe fansoun ikewe sia awatteno ach apinukunuk (ika fan ekkoch anean) non ekkewe mettoch sise kuna. Apinukunuk a fis non napanap rese mecheres ach epina, nge mi wor saram non ach rochopwak. Jises a apasa, “Ngang ewe saram, me ewe manau, me ewe ennetin ewe fonufan.”13 Ren ekkewe mi kutta ennet, meni akkom epwe usun asamwacho mi puch ren nuokusun apwosupwos mi for seni foun fau. Nge, ren kapaseis mi tipepos me nikitu, Jises mi tongeni siwini asamwachochun foun fau ngeni kinas me saram. Kraist ina saram ne kuna.
Ekkoch me Neich Sia Mefi pwe Sise Tongeni Nafoch.
Ewe kapar non ewe Testamen Noom ese chok anuoch nge mi pwan mwoch kaparan, wewen pwe saramen anuon mi mwoch won ewe wunen siip me esap pwecheno inamo ika mi chommong fan fitu epwe sopw.14 Setan a nueti fetanei ei popun usun efoch nifetufet: wunen siip mi pwech a kapar ese tongeni niwin sefan an epwe pwech. Nge Jises Kraist a apasa, “Ai ekiek ra tekia seni ami kewe,”15 me manamanen An chen ina pwe nupwen sia aier seni ach tipis, chan mi anueparapar epwe eniwinikich ngeni nimenimoch. Ese weweoch, nge inamo mi ennet.
Sasing seni iStock.com/iinwibisono
“En ka anueparapar ren tipis, nge upwe ne nimetuk pwe kopwe nimenimoch ussun chok snow. Ina mo ika ka kon anueparpar, nge kopwe ne pwecheno ussun chok pwechen unen siip.”16 Ewe Samon a pwaracho ne apasa: atewe ika neminewe “a aier seni … tipis, I epwe pwan museno, me ngang, ewe Samon, usap chiwen chechemenir.”17 Wewen: Feito sipwe oporous fengen.18 Ka fori muan; kich meinisin sia ukungaw.19 Feito rei me aier.20 Usap chiwen chechemeni ewe tipis.21 En mi tongeni unusoch sefan.22 Upwe ngonuk ewe angang kopwe fori.23 Kraist i unen siip mi pwecheno.
Nge met ekkewe wesewesen tetten? Met ewe kiien ach sipwe pachesefan ngeni ewe manamanen Jises Kraist nupwen sia omorupurup? Preseten Russell M. Nelson a fatafatoch ne apasa: “Ewe kiien ach sipwe fori me apwonueta pwon mi pin. … Esap ew napanap mi fitikoko.”24 Fori Kraist epwe ionapen manauom.25
Ika ka mefi pwe ewe esisin mi ngetenget ren om kapasen pwarata a chopuchop me rochopwak a arapeto, kopwe pwaracho. Apwonueta om pwon ngeni Kot. Eis om kewe kapaseis. Oupwe engino me siwini fau ngeni kinas. Kunungeni Jises Kraist, ewe a chuwen tongek.
Jises a apasa, “Ngang ewe Saram [ewe] mi saram non rochopwak, me ewe rochopwak ese weweiti.”26 Ena wewen pwe inamo ika epwe achocho, ewe rochopwak ese tongeni kunueno ewe saram. Esap tongeni. En mi tongeni kopwe apinukunuku pwe An saram epwe nom reom.
Menin kich, ika aramas kich mi tonger, epwe mwochomwoch ach sipwe rochono. Ina usun ewe Salt Lake Tempel, ewe meinapen tumunu ewe neni, Brother Val White, ra mwitir kokkori. Aramas ir mi apareni. Met ewe osukosuken tengkin ewe tempel? Akkom, ekkee chon angang a pwisin no ngeni ew me ew ekkewe nenien fifi non ewe tempel me a pwisin ettina sefani ekkewe tengki. Mwirin ra siwini ekkewe patiri non ewe nenien awora fifi me sotunir ar repwe sinei met ewe a tur.
Mi weires ach sipwe anamon ne ettina sefani ekkewe tengki. Mi auchea epwe wor chiechiach.; Kich mi auchea fengen. Usun chok ekkewe chon angangen ewe tempel, sia tongeni aninisfengen ren ach pwisin wareto, chachini sefan ach kewe patirin ngun, forsefani met mi mwanino.
Pwisin ach saram epwe usun chok efou foun tengki won efoch ira. Nge kich mi chiwen asarama ach kukkun saram, me achufengeni, usun chok nenien Tempel Square non fansoun Kirisimas, sia eingato minion aramas ngeni ewe imwen ewe Samon. Mei murino seni meinisin, usun Preseten Nelson a pesei, sia tongeni uwei an ewe Chon Amanau saram ngeni kich pwisin me ekkewe aramas mi auchea ngenikich ren mecheresin fofforun ach apwoueta ach pwon mi pin. Non sokopaten napanap, ewe Samon epwe ngeni kich niwinin ena foffor mi tupwen ren manaman me ren pwapwa.27
Ua pwarata ami mi achengicheng. Ewe Samon mi sinei ifa usun weiresin ami achocho. Oua fefeita. Soposopono. I mi kuna ami fangeno ese pwano me mi anneanir ngeni ochumi me ochun ekkewe ami mi tonger. Ami angang ese namotmuan. Ouse anamon. Itan pwisin, Emmanuel, wewen “God mi nonnom rech.”28 I mi ennetin nom remi.
Eipweipw pwan ekkoch won ewe aanen pwon, ika mwo mi kon rochopwak om kopwe kuna towaweno. Ekkewe saram repwe tinsefan. Ua pwarata usun ewe ennet non an Jises kapas, me ir mi uren saram: Mareto ngeniei me upwe mareno remi; kuttaochuei iwe oupwe kunaei; tingor, me oupwe angei; fichifich, me epwe suk ngenikemi.29 Non iten Jises Kraist, amen.