Forata eu Imwen Masen Ngun me Tumun
Ika sipwe manaueni ewe kapas allimen Jises Kraist, sia angei seni an ewe Chon Amanau Achasefan me nikiitu non nuku, esap niuokus, me sia tumun seni ewe sossotun ewe chon koum.
Pwii me fefinei kana, nesoponon ei mwichenap, ua apasa ai kinisou ngeni Semach won Nang ren ewe aurour, ennet, me pwarata a katou me ren ei nenien afanafan non ekkei ruu ran. Sia kaeo seni noun Kot chon angang ra wisen afanafana an kapas mi pin. Ewe Samon a achemakich pwe kapasen pwaratan ekkei ranin soponon, “Ika mo seni neuei ika … neuan nei chon angang, mi nonno chok.”1
Ren ai nengeni ei mwichen Souneng me anchangei ekkewe ra katon ei mwichenap ekis meinisin won fonufan, ua ekieki usun ewe mwichen aramas non ewe Puken Mormon nupwen Jises Kraist a churi ekkewe chon Nifai mwirin an mano won ewe Irapenges. A aitir ewe kapas allim me pesei, “Feino ngeni imwemi kewe, me ekipwichi usun ekkewe mettoch ua fen apasa, me tingorei ewe Sam, non itei, pwe oupwe tongeni wewe.”2
“Feino ngeni imwemi kewe, me ekipwichi usun” ina ewe mettoch oupwene fori pwe oupwe kapach won kapasen ewe soufos me nouwisen mwichifen ir mi apasa non ei mwich mi pin. Imw mi kau won Kraist ir imwen mas ren ewe muun Kot won fonufan non ekkei ran, usun ewe oesini a apasa, pwe ewe tefin “epwe fori osukosuk non netipen ekkewe noun aramas, me amwasangerata ar repwe song ngeni minne mi och.”3
Aramas ra kaueta imwen maas non uruon fonufan pwe repwe epeti chon oput ir. Fan ekkoch ren ekkana imwen mas mi pwan wor imwen esinesin ikewe chon mas—usun soufos—ra esinesin usun chon koum me chon fiu ra feito.
Non uruon pioneer non Utah, emon semen semei chinnap Thomas Rasband me an famili ir ekkoch me nein ekkewe akkaewin chon sai ngeni Heber Valley non ewe Nemonun chuk non ewe ningochun Wasatch Mountains non Utah.
Non 1859, Thomas a aninis ne chon forata ewe Heber Fort, a foruta fan iten tumunur. Ese kan ningoch nge minen ira, efoch me efoch, me fori ewe titin ewe nenien mas. Imwen ira ra for nukanapan ewe nenien mas ren ewe chok tit. Ewe imw a awora tumun ren ekkewe famili non ar annomu ar family me pin ngeni ewe Samon.
Pwan ina usun rech. Imwach ir imwen mas mi epeti ngauen ewe fonufan. Non imwach sia feito ren Kraist non ach kaeo anneasochis ren an kewe annuk, ren ach anneani ekkewe pukefel me iotek fengen, me ren ach aninis fengen ne nomono won ewe aanen ach pwon mi pin. Ewe nengenioch ren ach pwisin kaeo pwan kaeo fengen non family non imwach kewe ren ewe puk Feito, Tapeto Mwiri mi fis pwe sipwe “anapano ach ekkesiwin me anisi kich sipwe winiti usun Jises Kraist.”4 Non ei napanap sipwe winiti met Paul a kokkori “maan minafo”5 ren netipach me ngunuch mi tipeufengen ren Kot. Ei sokkun pochokkun mi namwot ika sipwe nengeni me epeti ekkewe minen feiengau seni ewe chon oput kich.
Ika sipwe manau ren nukuchar mi upuseni ach nuku non Jises Kraist, sipwe mefi kinamwen ewe Ngun mi Fel, ewe a emwenikich ngeni ennet, apochokuna ach sipwe manau usun minne mi fich ren feiochun ewe Samon, me a pwarata pwe Kot mi manau me a tongeikich. Ekkei meinisin mi fis non imwach imwen mas me tumun. Nge chechemeni, imwach ir mi chok pochokkun aukukun ewe manamanen ngun mi non non emon me emon chon ewe imw.
Preseten Russell M. Nelson a aiti, “Non ekkewe ran epwe feito, esap tufich sipwe manau ren ngunuch ika esap wor emwen, nemenem, echip, nonnomochun ewe Ngun mi Fel fansoun meinisin.”6 Non wisan pwe ewe soufos mi manau, chon kuna, me chon oesini non ei ran, ewe chon maas won ewe nenien mas, Ewe Mwichifenin Jises Kraist ren Aramas mi pin non Fansoun Soponon, I a kuna ekkewe chon oput non ar feito.
Pwii me fefinei, sia nom non maun ren Setan fan iten ngunun aramas. A fen wor ewe aimufesen non ewe manau mwen fonufan. Setan me eu na unungat noun Semach won Nang kewe semirit ra kunu seni an kewe annukun manau ese much me ning. Seni ena atun, noun ewe chon oput chon angang ra fiu ngeni ekkewe mi tupwon ekkewe ra finata an Semach kokkot.
Setan a sinei pwe an kewe ran rese chommong me ewe fansoun a arapeto. Ika mo I a tipachem me chofona, I epwe kuf. Nge, an fiu fan iten ngunuch meinisin a chok soposopono.
Ika sipwe tumun, sipwe kauta imwen mas me tumun fan iten ngunuch, eu imwen mas esap kuf ren ewe mi ngau.
Setan I emon serepenit mi fos pwetete, a tonong non ach ekiek me netipach ika sia chipwang, netipechou, ika nikitano ach epinukunuk. A otupu kich ren kapas kinamwe, pwon pwe epwe mecheres, kinamwe ika ach ukkuta ika mo sia mefi netipengau. A apungu namanam tekia, kirikiringau, chofona, me fofforigau, me usun chok noom sise “pwan ekkiek.”7 Ewe Ngun mi Fal a tongeni su senikich. “Iwe iei ewe tefin a otupano ngunur, me emwenireno ekis me ekisetiw ngeni hell.”8
Nge won ewe epek, fan ekkoch sia mefi ewe Ngun mi Fel mi pochokkun nupwen sia konu ach mwareiti Kot ren ekkei sokkun kapas:
Eu imwen mas ina nouch Kot,
Eu nenien mas mi pochokkun me ese tur.
Emon chon aninis mi pochokkun nouch Kot,
Me pwaracho weiresin manau.9
Ika sia kauta imwen mas ren ngunuch, sia tongeni epeti sossotun ewe chon oput, kunu mesach seni I, me mefi kinamwen ewe Ngun mi Fel. Sia tongeni tapweno fofforun ewe Samon me Chon Amanau, ewe io, nupwen a kuna sossot nein petewen, a apasa, “Kopwe nom nesukuri, Setan.”10 Emon me emon epwe kaeo non manauer ifa usun repwe fori.
Ei sokkun popun mi wenechar a nom non ewe Puken Mormon non fansoun Captin Moronai a ammonata ekkewe chon Nifai ar repwe fiu ngeni Amalickiah me non kewe ran ra chofona, oput, me mochen niiereno. Moronai a forata imwen mas pwe epwe tumunu ekkewe chon Nifai “pwe repwe manau ngeni ewe Samon nour Kot, pwe repwe sopweno minne chon oput ra aita ngeni pwe angangen chon nuku Kraist.”11 Moronai a “nomono non nukun Kraist,”12 me a achocho ne “anneasochisi ekkewe annukun Kot … me pworacho ngeni sossot.”13
Nupwen ekkewe chon Leiman ra feito ne fiu, ra mairu ren an ekkewe chon Nifai monneta, me ra kuf rer. Ekkewe chon Nifai ra kinisou “ngeni ewe Samon ar Kot, pokiten an manaman ese wor nonnon pwe ra pichino seni poun chon oput ir.”14 Ra forata imwen mas pwe repwe tumun seni met a feito, me ra forata ar nuku non ewe Samon Jises Kraist non ngunur—annononen ngunur.
Met ekkewe aanen ach sipwe apochokkuna kich non fansoun weires, pwe sipwe “pisekin angang noun poun Kot pwe sipwe efisata an angang mi manaman”?15 Sipwe nengeni non ekkewe pukfel.
Kich sipwe anneasochis. Ewe Samon a annuku Semach Liai pwe epwe tinano sefan nounk kewe ngeni Jerusalem pwe repwe “kutta ekkewe uruo, me uweiretiw ikei ngeni ewe fonu pon.”16 Liai ese anini ngeni; ese ekieki pwata ika pwan ifa usun. Nifai ese pwan, a chok ponueni, “Ngang upwe feino me fori ekkewe mettoch minne ese Samon a annuku.”17
Kich mi fori ren ewe ennetin anneasochis usun Nifai? Ika kich mi muttir anini ngeni an Kot kewe annuk usun pwiin Nifai kewe, ion ar nukunukumang a akunur seni ewe Samon? Anneasochis, mi fis ren “epinipinin netipach”18 ina met ewe Samon a mochen senikich.
Sia nuku ewe Samon, ewe a ereni Joshua non an ammonata epwe emweni ekkewe chon Isarel non ewe fonuen pwon, “Kopwe pochokkun me … pwara; kesap niuokus, ika pwan tipemwaramwar; pun ewe Samon om Kot a nom reom ia chok kopwe feino ia.”19 Joshua a nuku ekkana kapas me pesei ekkewe aramas: “Epinano ami: pun nesor ewe Samon epwe fori manaman neimi.”20 Ewe Samon a eimufeseni ekkewe konikin Jordan, me ekkewe chon Israel ra wes ren ar 40 ierin fetan fein non ewe fonu pon.
Sia uta fan iten ewe ennet, usun ewe soufos Abinadi non ewe Puken Mormon. A kanapus, me ra wato mwen King Noah me ekkewe sounkoua mi ngau, Abinadi a aitir ekkewe Engon Annuk me afanafana ren pochokkun pwe Kraist epwe “feitiw nein ekkewe noun aramas, me … amanaua noun kewe aramas.”21 Iwe, ren ennetin nuku mi nom non i, a pwarata, “O Kot, etiwa nguni,”22 me Abinatai “a riaffou me mano ren ekei.”23
Sia asofo sefanni ach pwon mi pin nupwen sia angei ewe sakramen me pin ngeni non ewe tempel Ewe sakramen a nom nukanapen ach fenin Raninifen, me sia angei ewe pwon pwe “ngunun epwe nonnom rech.”24 Ren ena efeioch mi pin sia pwon pwe sipwe mwarei itan Jises Kraist won kich, sipwe tapweno I, me sipwe mwarei fengen wisach non ei angang mi pin usun chok I a fori. Non ewe temple, sia tongeni “nikitatiw mettochun ei fonufan”25 me mefi ngunun ewe Samon me an kinamwe mi amwarar. Sia tongeni nengeniochu ach newo, ach family, me manau ese much fan mesan Semach. Iei pwata Preseten Nelson a keran apasa non Rome: “Ewe murinno epwe feito seni ei tempel sise pwan fich ne anneani.”26
Sipwe wenechar non mettoch meinisin sia fori. Sipwe anapano ach tufichin weweiti me anneasochis pwe sipwe sineiochu minnei mi pung me mwan. Sipwe ekieki ewe kapas seni Peter, ewe Aposelen noom, ewe a apasa, “Oupwe chok mamasa o tumunu kemi. Ewe chon koum ngeni kemi, ewe Setan, a fein fetan usun chok emon naion mi pupuchor o kukkutta emon epwe oromano.”27
Ika sipwe ennetin achocho ne apochokkuna ach nenien mas, sipwe winiti usun Jises Kraist, usun noun chon kuno, ngunuch epwe nom non an tumun.
Ami chon pwarata usun Jises Kraist ina ami pwisin imwen mmas, ewe tumun ren ngunumi. Nupwen semen semei chinnap me ekkewe pioneer ra forata Heber Fort, ra kauta efoch me efoch ira tori ewe imw “a ngut o pochokkun”28 iwe ra tumun. Pwan ina usun ren kapasen pwarata. Eu me eu sia angei mirit seni ewe Ngun mi Fel nupwen a kapas ngeni ngunuch, aiti “ennet seni me non netipach.”29 Ika sipwe manaueni ewe kapas allimen Jises Kraist, ika sia angei seni an ewe Chon Amanau Achasefan me nikiitu non nuku, esap niuokus, me sia tumun seni ewe sossotun ewe chon koum. .Ach kapasen pwarata a foti kich ngeni nang, me sia feioch ren ewe “ennetin mettoch meinisin.”30 Me, usun pioneer ir mi tumun me ren ewe imwen mas, sia pwennino non poun ewe Samon mi tongeikich.
Ewe soufos Ether a aitikich, “Ina minne, ion chok a nuku non Kot epwe tongeni ennetin apinukunuku ew fonufan mi murino, ewer, pwan mwo ew neni ren peniemwanin Kot, minne apinukunuk a feito seni nuku, a fis pwe ew angkö ngeni netipen aramas, minne a fori ir repwe pochokun me tipepos, ar repwe fori chommong angang mi öch fansoun meinisin, me emmweni ir ar repwe mwareiti Kot.”31
Pwii me fefinei kana, upwe watiw eu feioch womi pwe oupwe feino ren pochokkun non ewe Samon me non An kapas allim. Kamwochuno ekkewe ra turuno me, ren pochokkunen ewe Ngun mi Fel nom mi remi, oupwe emwenireto non tong ngeni ewe imwen mas me tumunu ngun. Kutta ami “fori usun Jises”32 non mettoch meinisin oupwe fori; nikiti sossot me ngau; aier, usun sia aurour nanew me ren nouch soufos achengicheng; wenechar non netipemi, oupwe nimoch me pochokun; pwarano tong me umoumoch; me tongei ewe Samon om Kot ren ewe sokkun nukunukun emon chon kaeo mi ennet.
Ach kapasen pwarata usun ewe kapas allimen Jises Kraist, imwach, ach famini, me ach chochoni non Ewe Mwichifenin Jises Kraist ren aramas mi pin non fansoun soponon epwe usun ach pwisin imwen mmas me tumun mi epet senikich ewe pochokkunen ewe emon mi wesen ngau. Ren ekkei mettoch ua ennetin pwarata ai nukunuk non iten ach Samon me Chon Amanau, ewer Jises Kraist, amen.