Ewe Ennet, Unusoch, me Mecheres Kapas Allimen Jises Kraist
Ach tongei Kot me tongei monun unukuch ina ewe nongonongen annukun iamwiri; kaeo mi nongonong non imw, me ewe Mwichefen epwe aninis; fen ren pekin ngun won Raninfel; me ewe angangen manau ese much.
Pwii me fefinei kewe, a weires ai upwe nuku pwe a fen 71 ier ano, non 1948, seni atun ngang emon missionari me England, me 44 ier ano seni atun am me punuwei we, Barbara, auwa uwei am famini ngeni Canada atun ngang ewe presetenin ewe Canada Toronto Mission. Non fansoun aua angang ikkewe ia non April 1976, ngang uwa kokko ngeni ewe Aewin Mwichen ekkewe Fiik, me ina mo use ekieki usun non 1985, uwa kokkor ngeni ewe Mwichen ekkewe Engon me Ruemon Aposen. Iwe ese usun ai kewe pwan ekkoch wis, minne mi pachenong ekkoch wis upwe wes seni, ai tufichin wes ren ai wisen ren ekkewe Engon me Ruemon usun ese kan och iei; nge, uwa iotek pwe ena ran epwe feitto mwirin chok uwa fen awesano meinisen met ewe Samon a kokkoriei ne fori.
Non ai ekieki usun ekkei 43 ier ai angangen emon Meinap Unusen me ewe tufich mi amwarar ngang uwa tongeni anisi noun Semach won Nang kewe semerit won unusen ewe fonufan ekis meinisin, iwe uwa esinna nap seni me mwen pwe A mochen meinisin Noun kewe, meinisin ir, repwe kuna kinamwe me ennetin pwapwa non manauer.
Ewe soufos Liai a aiti, “iwe aramas ra manau, pwe repwe tongeni mefi pwapwa.”1 A chommong popun sisap tongeni kuna kinamwe me ennetin pwapwa non ei manau, iwe usun osupwang, maun, osusukun fonufan, esor ach angang, semwen, me weires non nonnomun famini.
Ina mwo sise tongeni epeti ekkei mettoch seni ar tufichin osukosuka manauch iei won fonufan, ika sipwe achocho ne winiti chon kunon Jises Kraist mi nukuchar, sia tongeni kuna kinamwe me ennetin pwapwa ese nifinifin ewe osukosukun fonufan sia nom non.
Emon nei kewe semirit a apasa ngeniei non eu atun, “Papa, uwa noninen pwe use sinei ika upwe tongeni kuna ewe muun Celestial.” Iwe uwa penuweni, “Met chok Semach won Nang a tingorei kich pwe sipwe fori unusen ach tufich, iteitan ran.” Pwii me fefinei kewe, foriochu ukukun omw tufich iteitan ran, me mwitir, kepwe tongeni sinei pwe Semom won Nang a sinei en me A tongei en. Me nupwen ina met ka sinei—ennetin sinei—epwe wor ennetin popun me wewen ngeni manauom me kepwe uren pwapwa me kinamwe.
Iwe I ewe Saramen ewe Fonufan, ewe Chon Amanau a apasa, “Aramas meinisin mi nuku ei resap chuen nom non rochopwak.”2
“Nengeni, Jises Kraist ina ewe it minne a kawor me ren ewe Sam, me esor pwan eu it minne [sia] tongeni manau ren;
“Iwe, mwan [me fefin] meinisin a namwot repwe angei ewe it minne a kawor me ren ewe Sam.”3
Ekkewe pukefel ra aitikich pwe Satan a mochen emweni aramas ngeni rochopwak. A achocho ne kunueno ewe saramen me ennetin ewe Kapas Allimen Jises Kraist. Usun Liai a aiti noun kewe semerit, ewe tefin a “kukkuta pwe aramas meinisin repwe riaffou usun chok i.”4 Ika an Semach won Nang “angang me ... ning” pwe epwe “efisi manau fochofoch me manau ese much ngeni [mwan me fefin],”5 me an Lucifer “angang” pwe epwe efisi riaffou me osukosuk ese much ngeni noun Kot semerit. Tipis me mettoch mi mwan ra akukkunatiw ewe Saramen Kraist non manauch. Iwe ina pwata ach popun pwe sipwe nom fan ewe Saramen Christ, minne a awora kinamwe, me ennetin pwapwa.
Non ekkewe chok 18 maram, ewe Samon a ngeni Noun soufos me ekkewe Aposen pwarata pwe repwe poputani fitu ekkisiwin mi amwarar. Nge, uwa ekkis noninen ika ewe ennetin popun won pekin ngun ren ekkei siwin epwe fen monukano me non ewe meseik mi fiti ekkewe siwin chok.
Joseph F. Smith a apasa: “Ewe ennet, unusoch, me mecheres kapas allimen Jises Kraist a fen aniwinato. Iwe wisach pwe sipwe sopweno ne apechekuna me won fonufan.”6 A pwan apacha pwe ewe ennet, unusoch, me mecheres kapas allim a ewe “amanauen annukun Kraist.”7
Non ekkewe Nongonongen Achifoua, ewe Soufos Joseph Smith a aitikich pwe “seni ewe Achasefanin Kraist, aramas meinisin repwe kuna manau, ren ar aneasochisi ekkewe annuk me angangepin an ewe Kapas Allim.”8
Ekkewe aewin nongonongen ewe kapas allimen Jises Kraist, aier, papatais, niffangen ewe Ngun mi Fel, me nikitu tori nesoponon. Pwin we Hyrum a aitikich: “Afanafana ngenir ir fan chommong [me pwan ekkoch] sefan: kepwe kuna pwe iteitan ran epwe wor minafo omw ekiek usur me pwan wewei me saram usur epwe pwa ngonuk. Ka tongeni awewei usur ... pwe omw sinei usur epwe fatafatoch. Iwe mwirin kepwe tongeni aitir ngeni emon me epwe mecheres ar repwe weweiti.”9
Ngang mi nuku pwe met mi och sipwe fori pwe sipwe weweiti tufichin ewe Mwichefen ne apechekuna me tumunu ngunuch pwe sipwe manauaeni ewe ennet, unusoch, me mecheres afanafanan Kraist me apwonueta an ewe Chon Amanua ru annuk mi napanap: “Kopwe tongei ewe Samon om Kot ren unusen nenukom. ... Kopwe tongei monun unukum usun chok ka pwisin tongeok.”10
Anneasochis ngeni ekkana ruu annuk epwe awora tufichin kuna watten kinamwe me pwapwa. Nupwen sia tongei me angang ngeni ewe Samon me tongei me angang ngeni monun unukuch, epwe chok fiis pwe sipwe mefi pwapwa mi nap seni iei me esor pwan sokkun pwapwa mi taitup ren.
Ach tongei Kot me tongei monun unukuch ina ewe nongonongon annukun iamwir; kaeo mi nongonong non imw, me ewe Mwichefen epwe aninis; fen ren pekin ngun won Raninfel; me ewe angangen manau ese much won ir me ruu epekin ewe minen epet mi fiis ren aninnis seni ekkewe Fin Anisi me ekkewe mwichen pristut. Ekkei mettoch meinisin ra nongonong won ekkewe annuk seni nang ne tongei Kot me tongei monun unukuch. Mi tongeni wor eu mettoch mi tufich me mecheres nap seni ei?
Ach manaueni ewe ennet, unusoch, me mecheres kapas allim kokkot epwe atufichikich ne churi ekkewe fefin me mwan mi mano punuwer, ekkewe esor semer me iner, ekkewe esor chiener, ekkewe mi semwin, me ekkewe mi osupwang. Sipwe mefi kinamwe me ennetin pwapwa non manauch nupwen sia angang ngeni ewe Samon me monun unukuch.
Ekkewe siwinin Raninfel minne mi apechekuna ewe kaeo mi nongonong non imw, ewe Mwichefen epwe aninnis me stuti usun ewe kapas allim, iwe ir ekkewe tufich ne apechekuna sefan ngunuch me ach nukuchar ngeni Kot me non etipen imwach kewe. Met a tongeni mecheres me auchea nap seni ei? Pwii me fefinei, ami mi tongeni kuna pwe ach kaeo me aiti epwe kapas allim non ach kewe famini a eu auchean tufichin kuna ennetin pwapwa non manauch?
Usun ewe Raninfel, ewe Samon a apasa, “Iwe iei ei ran a ngenikemi pwe ami oupwe asese seni ami angang, me fori ami chechemenien me fen ngeni Ewe Emon mi Napanap.”11 A pwan apasa, “Pwe ami pwapwa epwe watteno ... [me ren] pwapwaiti me iotek ... [ururun] ami oupwe fori ekkei mettoch ren kinisou, me pwapwan netipemi me napanapemi ... [me] ren apwapwan netip me nanapapen pwapwa.”12
Ouse mochen oupwe esinna ekkoch ekkewe kapas mi auchea non ei pwarata: pwapwa, pwapwaiti, kinisou, netip mi pwapwa, apwapwan netip, me napanapen pwapwa. Iwe ngeniei usun ita sipwe fen akkemenemen pokiten ach chechemenien ewe Raninfel.
Ren ach iawmir non eu napanap mi tekia me pin, ouse kan mochen oupwe ekieki usun ifan auchean pwe sipwe etiwa meinisin ekkewe ion ra fitikich non ach kewe mwichen ewe Mwichefen, akkaewin ekkewe memper minafo me ekkewe rese memper. Ita ururun kich meinisn sipwe sani ne kon ekkewe kon mi fel me ausening och ngeni ekkewe kapas non ekkewe iotekin ewe sakrament ren netipach me ach ekieki mi suk.
Ekkewe kapasen pwarata usun nuku non ach mwichen echikifel me kapasen pwarata a poputa ren an emon me nein ewe bishopric minne a apasa an kapasen pwarata mi nongonong won ewe ennet, unusoch, me mecheres kapas allimen Kraist. Meinisin ion a pwan tapweno mwirin i ita repwe fori usun chok. Sipwe chechemeni pwe mi wor pwan ekkoch fansoun sipwe foos usun porausach me ach kukkuno. Ren ach achocho ne apasa ach kapasen pwarata mi mecheres me nongonong won ewe kapas allimen Kraist, I epwe awora pechekunen ngunuch sefan ren ach ereni pwan emon ach kapasen pwarata.
Sia tongeni napanapen iamwiri mi aninnisoch ika sipwe chechemeni ewe annuk ne tongei Kot me tongei monun unukuch. Non kapas mi mecheres sia fori ach iamwir pokiten ach tong ngeni Semach won Nang me Noun kewe semerit. Ngang mi nuku pwe sipwe feioch non ach fofforun ach iamwi ika ach iamwir mi chok mecheres fan iten meinisin. Ewe watten pwapwa a feitto seni ekkewe mettoch mi mecheres non manau, iwe sipwe tumunuoch site ekieki pwe a namwot sipwe apachenong mettoch ngeni ekkewe siwin sia fen angei ne apechekuna nuku me kapasen pwarata non netipen Noun Kot semerit.
Sisap aweiresi mettoch ren pwan chommong mwich, mochen, me annuk. Fori pwe epwe mecheres. Iwe non ei mecheres oupwe tongeni kuna ewe kinamwe me ennetin pwapwa minne ngang uwa foos usun.
Fan chommong ier popunen ekkewe emwenien ewe Mwichifen, usun mi mak non ewe Handbook 2, iwe ir mettoch mi chok fatoch me mecheres, seni ian upwe angei ei kapas:
“Chon emwen ra pesepes ngeni meinisin ekkewe memper pwe repwe angei meinisin ekkewe annuk pwisin mi namwot me apwonueta ekkewe pwon mi pin mi fitir, me fori pwe ra tongeni angei manau fefeita me manau ese much. …
“Chon watte: Pesei fengeni ekkewe chon watte pwe repwe nimenimoch ne angei ekkewe annuk pwisin non ewe tempel. Aiti meinisin ekkewe chon watte pwe repwe kutta ar kewe neuo me fori ar angang tempel fan iter.
“Sarafo: Anisi emon me emon ekkewe anuon pwe repwe angei ewe Melkesidek Pristut, pwan angei ekkewe annuk pwisin non ewe tempel, me repwe amonnata ne fori ar angangen missionari. Anisi emon me emon ekkewe fopun pwe repwe nimenimoch ne fori me apwonueta ar kewe pwon mi pin me angei ekkewe annuk pwisin non ewe tempel. Apechekuna ekkewe sarafo ren ar repwe fiti mwich ren ennetin popun.
“Meinisin chon Mwichefen: Anisi chon emwenin pristut me mwichen aninis, mwichen souemwin wart, wart me missionari fansoun meinisin, me ekkewe memper pwe angang fengen ne eniwini ekkewe ra rikkino, apechekuna ekkewe famini me kinikinin ewe Mwichefen, anapano angang non ewe pristut, me ionfengeni Israel ren esiwin, anommu, me fiti sefan. Aiti ekkewe chon Mwichefen pwe epwe wor pwisin tufichir me ar famini me repwe tongeni anisi ekkoch ekkewe mi osupwang non napanapen ewe Samon.”13
Ai angang non ewe Mwichefen a efeiochuei ren chommong mettoch mi amwarar won pekin ngun. Ngang emon chon pwarata pwe ewe Samon a wisen emweni An Mwichefen ne apwonueta An kewe popun. Uwa fen angei emwen seni nang minne a nap seni pwisin ai tufich. Ewe pwapwan manauen ewe kapas allim ngeniei a fen anukunuk won ewe ennet, unusoch, me mecheres annukun me kapas allimen Jises Kraist.
Uwa fen angang fan ekkewe kien me auruaren wonemon soufos me Presetenin ewe Mwichefen, seni Spencer W. Kimball ngeni Russell M. Nelson. Uwa pwarata pwe emon me emon ir ra emon soufos mi kefinata me ren Kot. Ir ra aitikich nongonong mi namwot usun ewe Mwichefen me muun Kot. Preseten Nelson a sopweno an ewe Samon angang non eu mwitirin napanap mi amwarar. Uwa apasa “amwarar” pwe i chok me nein ekkewe Aposel me Soufos minne a chinnap seniei, me a weires ai upwe fori usun a fori! Ngang emon chon pwarata pwe ekkewe kien ewe pristut me ewe mwumwutan soufosun Kot a nom won i. Preseten Nelson a aiti kich ewe ennet, unusoch, me mecheres kapas allimen Jises Kraist. Ua pwarata ai kapasen pwarata pwe Jises i ewe Kraist me iei An Mwichefen—minne uwa pwarata usun non iten Jises Kraist, amen.