Taisoni fouichoch non Pekin Ngun
Usun chok ach anneani me kaeo usun fouicho ese nafoch pwe sipwe apechekuna fouicho, ach anneani me kaeo usun nuku ese fiti fofor esap nafoch ne apechekuna ach nuku.
Ua kan kinisou ren ewe feiochun mei wor ai inisin fotuk, ina ew nifang mi kan amwarar me ren Samach won Nang. Mei wor nuseni 600 fouicho non inisich.1 Ngeni chommong fouicho mi namwot pwe repwe taiso pwe sipwe kofichin fori ach angang. Sia tongeni pekus non tupuach ren ach anneani me kao usun fouichoch, nge ika sia ekkieki pwe epwe apechekunair, sipwe menemengau. Fouichoch kewe ra marino nupwen sia aea.
Ua weweiti pwe non sokkopaten napanap pwe niffangen ngun mi pwan ina usun. Mi auchea sipwe taisoniir pwe repwe marita. Ren awewe, nuku esap chok eu memmef are ekiek; mi anongonong won foffor mi pwano fan chommong non pukfel mi fiti kapasen “taiso.”2 Usun chok ach anneani me kaeo usun fouicho ese nafoch pwe sipwe apechekuna fouicho, ach anneani me kaeo usun nuku ese fiti fofor esap nafoch ne apechekuna ach nuku.
Nupwen ua 16 ieri, pwii we watte, itan Ivan, ewe a 22 ierin, a feito neimw non eu ran me a poraus ngeni ewe famini. A finata pwe epwe papatais non Ewe Mwichefenin Jises Kraist ren Aramas mi Pin non Fansoun Soponon. Semem me inem we ra nenengeni i ren tipemwaremwar, me ua chechemeni pwe use fakkun weweiti met a fis. Ukukun eu ier mwirin, a pwan aporausa och mettoch mi pwan amairu: a finata pwe epwene fori angangen misineri fan iten ewe Mwichefen, minne a wewen pwe epwe su seni imwem we me ausap kuna i ren ukukun ru ier. Ua chechemeni pwe semei me inei kewe rese pwapwa ren ei poraus; iwe nge, ua kuna non I ew fatafatochun popun a anapano ai tong ngeni i me met a finata.
Mwirin fitu maram, nupwen Ivan a fori an angangen misineri, a wor ai tufichin fori kokot fengen me fitemon chienei kewe chon sukun ren am oupwe no asoso. Aua mochen apwapwai nesoponon ewe ierin high school me feino won ewe pii ren fitu ran.
Ua makke echo taropwe ngeni pwii we misineri ua ureni ussun ai we kokkoten asoson soponon sukun. A makkesefanito aaporausa pwe ewe neni a angang ia a nom won ewe an ngeni ai we nenien asoso. Ua ekieki pwe epwe och ika ua feino churi. Iwe nge me mwirin ua sinei pwe ese och an famini repwe churi misineri.
Ua fori meinisin ekkewe kokkot. Ua chechemeni ai ua motiw won ewe pas me ua ekieki usun meinisin ekkewe pwapwa ita am me Ivan aupwene a ani non ena ran. Ita am oupwe mongon nesosor, akaporous, urumot non ewe pii, me kukkuno neset—ita epwene ian me am fakkun pwapwa!
Nupwen ewe pas a wareno, ua kuna Ivan a uta unukun pwan emon anuon, ir me ruemon ra ufouf soch mi pwech me nektai. Ua totiw seni ewe pas, am oua turufengen, me a aiti ngeniei porouse chienan we. Ua muttir ereni pwii we usun ai we kokkoten ewe ran, nge use mo sinei met an Ivan kokkot. A nengeniei, emenimen, me a apasa, “Ewer! Nge, sipwe fori ekkoch mettoch akkomw. Kopwe feito rem?” Ua tipeu ngeni, me ua ekiekin epwe naf am fansoun pwe aupwe kukkuno nepii mwirin.
Ena ran, nap seni 10 awa, am me pwii me chienan we aua fetan won ekkewe anen ena neni. Uwa chok akamenemen ngeni aramas unusen ewe ran. Uwa kapwong ngeni use me mwen kuna fan eu non manauei. Aua fos ngeni meinisin aramas, fichifich won asamen chon ekkis, me churi aramas minne pwii we me chienan ra aitir.
Non eu sokkun mwich, pwii we me chienan ra afanafan usun Jises Kraist me ewe kokkoten manau ese much. Muttir chok, Ivan a kouno me a nenengeniei. Ua mairu, a tingorei ai upwe aporausa ai ekiek usun met a afanafana won. A mosonosonono, me ra chok nenengeniei. Fiti ekkoch weires, ua poputa ne fos me aporausa ai memmef usun ewe Chon Amanau. Use sinei ika met ua aporausa mi pung are mi mwan. Pwii we ese apasa met u mwan won; iwe nge, a kinisou ngeniei ren ai aporausa ai ekiek me memmef.
Non ekkena awa, pwii we me chienan ewe rese awora mo ew minich ar repwe pwisin afanafan ngeniei, nge ua fakkun kaeo nap seni meinisin ai kewe poraus ngeni me mwan. Ua kuna ifa usun nikinikin aramas ra siwin nupwen ra weri ewe saramen ewe Ngun mi Fel non manauer. Ua kuna ifa usun ekkoch neir ra weri epinukunuk ren ekkewe poraus, me ua kaeo ifa usun upwe angang ngeni ekkoch me monukieino me pwisin ai mochen. Ua fori met ewe Chon Amanau a afanafana: “Ika emon a mochen fitiei, epwe ponuku manauan.”3
Ua nenne sefan , ua weiweiti pwe ai nuku a napano non ena ran pokiten pwii we a atufichi ngeniei ne anganga. Ua anganga nupwen aua anneani seni ekkewe pukfel, kutta ekkoch aramas aupwe aiti, kapasen pwarata, angang ngeni ekkoch, me pwan ina usun. Ause feino kukuno nepii won non ran, nge netipei a weri saram seni nang. Use mo kuna mworomworun pii, nge ua mefi pwe ai nuku a napano usun mworomworun foun ira.4 Use aea ena ran mi tin akkar ussun emon chon koton fetan ewe fonu, nge ua kaeo mettoch mi amwarar, me ina mo ika use weweiti, ua emon misineri—nge use mo choni ewe Mwicehefen!
Tufichin Apochokuna Fouicho non Pekin Ngun
Kinisou ngeni Niwinsefaniton ewe kapas allim, sia tongeni weweiti ifa usun Semach won Nang a anisikich ne anapano niffangen ngun. Ika pwe epwe ngenikich tufichin kaeo ekkena niffang nap seni epwe chok ngenikich me esap fiti ahocho non pekin inis me ngun. Ika sia chufengen me Ngunun we mi Fel, sipwe kaeo ne esinna ekkena tufich me angang wor.
Ika sia kutta ren tipetekison, amo sipwe kuna pwe sipwe achocho ngeni nupwen sia awiti pwonuan. Ika sia mochen tongei chon oruch, sia tongeni achocho me ren ach motiw arap ngeni emon minefo non fan. Ren nuku mi nonno ngeni: nupwen sia tipemwaremwar, mi namwot pwe sipwe apinukunuku non an ewe Samon kewe pwon ika sipwe sopweno. Non ei napanap sia taisoni fouicho non pekin ngun me a winiti kinikinin manauach mi pochokununo.
Eni esap mecheres nepoputan, me eni epwe winiti ew wachemuken sossot. Ekkewe kapasen ewe Samon, me ren ewe soufos Moronai, ra fich ngenikich ikenai: “Iwe ika aramas repwe feito rei upwe pwari ngeni ir ar apwangapwang. Ua ngeni aramas apwangapwang pwe repwe tongeni tipetekison; iwe ai chen a naf ngeni aramas meinisin ekkewe ra etipetekisona inisir me mwei; pun ika ra etipetekisona inisir me mwei, me a wor ar nuku non ngang, iwe upwe fori mettoch mi apwangapwang repwe pochokun ngeni ir.”5
Ua kinisou ren pwii we Ivan, ewe ese chok afanafana ewe kapas allim ngeniei nge a pwan tingorei ai upwe amanaua me esinna ai apwangapwang. A anisiei ne eitwa an ewe Masta we tingor: “Feito, tapweno mwiri”6—ne fetan usun ewe Chon Amanau a fetan, ne kutta usun ewe Chon Amanau a kutta, me tongei usun ewe Chon Amanau a tongeikich. Fitu maram mwirin, ai we uwa ussun emonmisineri, ua finata pwe upwe papatais me pwisin fori angangen misineri.
Sipwe etiwa an Preseten Rusell M. Nelson we tingor me ennetin feito ngeni ewe Chon Amanau7 ren ach sipwe esinna ekkewe fouicho mi anamwota pwan och angang non pekin ngun me sipwe poputa ne taisoni. Iei eu kitiritam nap seni muttir chok, iwe ousap monuki ekkewe fofforun ngun kukkun nge mi nomofoch minne repwe apochokuna ekkewe pekin ngun mi auchea. Ika sia mochen anapano ach nuku, iwe sipwe fori mettoch mi anamwota nuku.
Ua pwarata pwe kich noun Semach won Nang mi tong. Noun we At, Jises Kraist, a tongeikich. A feito fonufan ne pwarata ngenikich ewe an me a fangeno pwisin manauan pwe epwe awora apinukunuk. Ewe Chon Amanau a tingoreikich ach sipwe tapweno mwirin an awewe mi unusoch, ne anganga ach nuku non I me non an we Achasefan, me anapano meinisin ekkewe niffangen ngun minne a efeiochukich. I ewe aan. Iei ai kapasen pwarata fan itan Jises Kraist, amen.