2010–2019
Kutta Mirit seni ewe Ngun mi Fel
April 2019 Mwichenapen Mwichefen

Kutta Mirit seni ewe Ngun mi Fel

Seni Elter Mathias Held

Seni Ekkewe Fiik

Aupwe kaeo am sinei ewe ennet esap chok seni met aua ekieki pwe pwan seni noukukunun mongungu seni ewe Ngun mi Fel

Pwii me Fefinei Achengicheng, ewe Samon a eniwini ne ereni kich pwe sipwe kakaeo seni ach kaeo me seni ach nuku.1 Sia tongeni angei saram me weweoch esapw chok seni weweochun non ach ekiek, pwe pwan seni emwenien me tufichin ewe Ngun mi Fel.

Ei och aninisin sinenap esapw eu kifetin non manauei iteitan fansoun.

Am me, punuwei we achengicheng, Irene, aua choni ewe Mwichefen non 31 ier ano nupwen aua keran chok pupunu. Am me ruemon aua marita me non Colombia, nge fitu maram mwirin am we pupunu, aua no ngeni Germany fan iten ai we angang. Aua chok anuon me fopun nge a chommong am epinukunuk me met aua ekieki; a ew fansoun mi amwarar me apwapwa ngeni kem.

Sasing
Sister me Elter Held

Nupwen ua chok ekieki usun ai we angang, Irene a mefi pwe epwe wor och sokkun porous seni nang, nge ause sinei ifa usun me inet otun. Iwe a poputa ne etiwanong non imwem we sokkun tetenin aramas chon amomo, vacuum, puken kuuk, pisekin non kichen, me pwan ekkoch, a fokkun witiwiti ewe auchean porous.

Eu pwinin a ereni ei pwe ruemon anuon ra ufouf sekit mi choon ra fichifich won asamem we me a mefi eu fatochun me pochokunen memef an epwe etiwerenong. Ra apasa pwe ra mochen repwe kapas ngeni usun Kot nge repwap niwin nupwen ua nom. Enipw epwe iei ewe porous?

Ra poputa ne churi kem, me ren ar emwen, aua annea non ekkewe pukefel me aua weweiti usun auchean Jises Kraist pwe ii ach we Chon Amanau me Chon Angasano. Aua niamamasini am we aua paptais me nemonukonum, mine mi afat pwe esap eu annuk. Iwe nengeni, paptais sefan a pwan wewen pwe aupwe choni ewe minefon Mwichefen, nge akkom a auchea aupwe weweiti mettoch meinisin usun.

Nge ifa usun aupwe sinei met ekkewe misineri ra ereni kem usun ewe Puken Mormon, usun Joseph Smith, me usun ewe kokkoten manau ese much pwe ir meinisin mi ennet? Iwe, aua weweiti seni an ewe Samon Kapas pwe aua tongeni “siner ren uwar.”2 Iwe, non eu tettenochun napanap, aua poputa ne nengen fichi usun ewe Mwichefen ren am kutta uwan kewe ren am aupwe weweiti. Met aua kuna? Iwe, aua kuna:

  • Chiechiochun me pwapwan aramas me murinon famini ekkewe ra weweiti pwe mi murino sipwe mefi ewe pwapwa non ei manau nge esapw chok weires me netipengaw.

  • Eu mwichefen ese angangen niwin nge ew minne ekkewe souneng ra fokkun etiwa angang me wis.

  • Eu mwichefen minne Jises Kraist me famini ir ionapen mettoch meinisin, ikewe souneng ra echikifen fan eu non eu maram me awora aninis ngeni mi osupwang, ikewe ie a aiti kich ach sipwe pochokun, me ach sipwe ungeni mettoch mi efeiengaw.

Pwan ekkoch:

  • Aua sani ewe auchean fefeitan emon me emon, sukun,angang weires me pusin anisuk.

  • Aua kaeo usun amwararen ewe prokramen tumun me aninis.

  • Aua fokkun mwar ren ewe mwichenapen Mwichefen, ren ekkewe murinon kon me ekkewe kapas allim ra afanafana me non.

Am kuna ekkei meinisin, ause kuna och mettoch mi ngaw me non ewe Mwichefen. Nge, aua sani mettoch meinisin minne aua kuna. Nge nengeni, ause mwo awen finata am aupwe paptais pokiten aua mochen am aupwe sinei mettoch meinisin akkom.

Nge, non am ause mwo awen finata, ewe Samon a fokkun nikitu ne amonakemita, A fori kem, me A anisi kem am aupwe sinei pwe aupwe kaeo am sinei ewe ennet esap chok seni met aua ekieki pwe pwan seni noukukunun mongungu seni ewe Ngun mi Fel ewe a kapas ngeni non netipach.

Ena mongungu me pungunon memef a feito eu kunionun mwirin 10 maramen am kaeo ewe kapas allim, nupwen aua annea non Mosaia 18, “Usun oua wesen mochen …mwarei fengeni an emon me emon chou, … me aururu ekkewe ra mochen aurur, … ika pwe epwe iei mochenin netipemi, met ami popun ren ousap papatais non iten ewe Samon?”3

Ei uwekisin me non ewe Puken Mormon a kuu netipem me ngunum, me aua mwitir mefi me sinei pwe ese wor popun am ausap papatais. Aua mefi pwe ewe memef a pwa me non ekkei uwekisin ikkei ekkewe mettoch aua kan aneanei me ekkei mettoch a fokkun auchea. Ra fokkun auchea nap seni am aupwe weweiti mettoch meinisin pun a naf am sinei. Aua soun anongonong won emwenien Semach won Nang mi tong me nuku epwe chok sopweno ne emweni kem fansoun meinisin.

Iwe, non pwan chok ran, aua amonata ranin aupwe paptais, ekis chok fansoun mwirin aua keran, papatais!

Sasing
An Elter me Sister Held papatais

Met aua kaeo seni metei e fis?

Aewin, aua kaeo pwe aua tongeni ennetin nuku non ewe Sam won Nang mi tong, ewe mi anisi kich fansoun meinisin ach sipwe winiti ion ewe a sinei pwe sia tongeni winiti. Aua pwarata ennetin An kapas nupwen a apasa, “upwe ngeni ekkewe noun aramas kinikinin kapas won kinikinin kapas, annuk won annuk, iei ekis me pwan ina ekis; iwe ra feioch ir ekkewe ra rongorongo ngeni ai kewe annuk, … pun repwe kaeo mirit; pun ren I ewe a angei upe ngeni I pwan och.”4

Me oruan, aua kaeo pwe, fiti am ekiek, mi pwan wor och mettochun awora mirit a tongeni emweni kich me awewei kich. Minne ewe kukunun me pweteten mongunun ewe Ngun mi Fel a kapas ngeni netipach me ekiekich.

Ua mochen upwe anono fengeni ei nongonong me ach tufichin nenengeni. Semach won Nang a ngeni kich esap chok efou pwe ruefou mesach. Sia tongeni kuna kich ren efou mesach, nge ewe efou a fori sipwe kuna pwan och. Nupwen ir me ru kunaen mesach kewe ra chuu non ekiekich, ra awora mettochun unukuch epwe wor napanaper.

Usun chok, sia fen angei ru sokkun mettoch sia sinei seni tufichin aionach me tufichin ngunuch. Ach ekiek a awora eu napanap seni met aionach a anapanapa me seni met sia ekieki. Nge seni ewe niffangen ewe Ngun mi Fel, ewe Sam a pwan amonata ngeni kich ren ewe oruen ekiek, ewe akkon auchea me ennet pokiten a feito seni Ii. Nge pokiten ewe mongunungu seni ewe Ngun mi pwetete, chommong aramas rese mefi ena pwan eu memef.

Nupwen ekkei ruu ekiek ra chuu non ngunuch, ew unusochun sassing a pwarata ewe napanapen mettoch pwe ir mi wesen ennet. Mi ennet, seni kunaen ewe Ngun mi Fel, mi wor “pungun mettoch,” usun sassing mi pwapwano me non ach ekiek, a tongeni pwano pwe mi atupwakicheno ika mwan. Chechemeni an Moronai kapas: “Ren manamanen ewe Ngun mi Fel oupwe tongeni sinei ennetin mettoch meinisin.”5

Non 31 ierin ai choni ei mwichefen, a fokkun chommong mettoch minne mi fis ngeni ei pwe ika pwe sia anonga ach ekiek me amam ika monuki ewe tipachem an ewe ngun sia tongeni angei seni ewe mongunungun me ememefin ewe Ngun mi Fel, usun chok ika sia nonnom nge efou chok mesach. Nge non kapas wenechar, pwe sia fen uputiw ren ruefou mesach. Ren chok chufengenin me ruu ekiek a tongeni ngeni kich ewe ennet me aunusa sassingin ennet me mettoch meinisin a fis ngeni kich non manauach, usun chok ewe unusen weweiti mettoch mi wor ren nonomun me popun auchean semirit noun Semach won Nang mi manau.

Ua chechemeni met Preseten Russell M. Nelson a aiti ngeni kich non ewe ier ano nupwen a apasa pwe “non ekkei ran repwe feito, ngunuch esapw tongeni manau ika pwe ese wor emwen, pesepes, aurour, me aninis seni ewe Ngun mi Fel.”6

Ua sinei ren unusen ennet pwe:

  • Mi wor Semach won Nang mi tong, me kich meinisin sia finata ach sipwe feito won ei fonufan eu masowen an we kokkot.

  • Jises ii ewe Kraist; Mi Manau me ii ai Chon Amanau me Chon Angasano.

  • Joseph, emon anuon chon atake mi tipetekison, a koko me winiti emon pochokunen soufos ewe a poputani ei, ewe kinikinin ewe fansoun unusoch, ren kiian meinisin, manaman, me mumuta seni ewe pristut mi pin an Kot.

  • Ewe Puken Mormon eu aruen pwarata usun Jises Kraist, me famini a fokkun auchea ar repwe famini tori fefeino ese much.

  • Ach Samon, Jises Kraist, a emweni ei, An Mwichefen mi niwinsefanito, seni nouch soufos mi manau, ikenai, Preseten Russell M. Nelson, ikenai

Ekkei me chommong ekkoch auchea mi ennet a winiti nongonongen met Kot a mochen upwe winiti. Me ua chok uti ekkena pwan ekkoch asukun minne A mochen ngang—me en—sipwe angei non ei manau mi amwarar me “kaeo … seni ach kaeo me pwan seni nuku.”

Ua sinei ekkei mettoch mi ennet me ua pwarata non iten Jises Kraist, amen