Ponuen Iotek
Ewe Sam a etenekikich, a sinei ach osupwang, me epwe ounusochu an anisikich.
Ew auchean me ekinamwein annukun ewe kapas annimen Jises Kraist pwe a wor an Samach won Nang tong mi unusoch ngeni noun kewe. Pokten ena unusochun tong, I a efeiochukich esap chok ren ach mochen me met sia osupwang won nge pwan ren an mirit ese much. Ussun ewe soufos Nifai a apasa, “Ua sinei pwe [Kot] a tongei noun kewe.”1
Ew kinikinin ena tong mi unusoch an Samach won Nang pachenong non tichikin kokotun manauach, pwan mwo nupwen ach sisap eteneki ika weweiti. Sia kukkuta an ewe Sam emwen me aninis ren unusen netip, iotek. Nupwen sia afona ach pwon me achocho ngeni ach sipwe ussun ach Chon Amanau, a tongeni pupu ngeni kich chommong2 emwen seni Kot me ren ewe emwenien me amwasangaen ewe Ngun mi Fel.
Ekkewe pukefel a aiti ngeni kich: “Sememi we a fen sinei minne mi murino ngeni kemi me mwen ami ousamo tingorei”3 me I “a sinei mettoch meinisin pun mettoch meinisin ra nom mwen mesan [I].4
Ewe soufos Mormon I emon a ussun chok ei. Ese manua ren an epwe kuna niwinin an angang. Nge a fen weweiti pwe ewe Samon a fen tumunoch non an emweni i. Nupwen a mefi mwasangen an epwe apachanong ekkewe kukkun seneichen Nifai ngeni an ekkewe rekot, Mormon a makkei: Iwe ua fori ei pokiten ew popun mi mirit; pun iei a mongunungun ngeniei, anongonong won ekkewe angangen ewe Ngunun ewe Samon minne a nom rei. Iwe iei, use sinei mettoch meinisin; nge ewe Samon a sinei mettoch meinisin minne repwe feito; ina minne, a angang non ngang ai upwe fori met mi anongonong won an mochen.”5 Ina mwo ika Mormon ese sinei pwe epwe poutuno ekkewe Ipuku Engon me Onacho peichin ewe puk, ewe Samon ese mo amonata ew an epwe atawei ena osukosuk me mwen epwe fis.
Ewe Sam a etenekikich, a sinei ach osupwang, me epwe ounusochu an anisikich. Fan ekkoch ena aninis a kawor ngenikich non chok ewe fansoun ika fen mwitirino mwirin sia tingor an aninis seni nang. Fan ekkoch ach kewe ennetin auchean mochen rese ponu non ewe napanap sia aneanei, nge sia kuna pwe Kot a wor an wachimuken feioch mi nom non nenien isois. Me fan ekkoch, ach kewe mochen mi pung rese ketiw non ei manau. Upwe awewe unungat napanap mi sokofesen ussun anen an Samach won Nang epwe ponueni ach tingor ngeni I.
Nouch ewe kukununon at a kokko ngeni an epwe angangen misineri non ewe Misin France Paris. Non an amonata an epwe angang, sia fiti ne no moni ufan kewe sech, sekit, nektai, sitakin, me ufan mi tam. Osupwangan, ewe fun mi tam a mochen ese mo wor non sitowa non ewe sais e mochen. Iwe nge ewe chon angangen ewe sitowa a afatatiw pwe ewe uf mi tam epwe wor non ekkoch wik iwe epwe titino ngeni ewe nenien an misineri kaeo non Provo me mwen an noum ewe at epwe su ngeni France. Am ouwa monatiw ewe uf iwe am ouse pwan chiwen ekieki pwan och.
Nouch ewe at a tonong non ewe nenien an misineri kaeo non June, me ewe uf a tour fitu chok ran me mwen ewe fansoun a affat epwe su non August. Ese mo sotuni ewe ut nge a chok atapwaneno ne tukumano non an ewe potoun pisek fiti pisekin kewe me pwan ekkoch mettoch.
Nupwen ewe atun patapat a kaneto non Paris, ikewe nouch ewe a angang ian, a mak ngenikich pwe a uwau ewe uf mi tam, a sotuni, nge a kuna pwe a kon kukkun. Iwe sia pwan wanong och moni non an ewe bank account pwe epwe pwan tongeni moni pwan echo uf non Paris, minne a foti. Ua aro mangaw, ua mak ngeni me ereni pwe epwe fangeni ewe uf pun ese tongeni ufuf.
Mwirin a torikich noun ewe taropwe won computer: “A fokkun patapat ikkei. ... Ussun nge ewe asapwan epwe safochonong non inisich, inamo ika ufei we minefo mi murinno me chou. … Ufei we minen nom ua ngeni [ewe emon misineri non imwem ewe] ewe a ura pwe a fen ikkioteki ew anen an epwe ufeni echo ufoufen non patapat epwe murinno. I a choni ewe Mwichefen ren fite ier me a I chok me inan ewe … me ewe misineri a papataisei I ewe a pwan anisi won an ewe angangen misineri iwe ewe ufoufen non patapat ina ew ponuen ew iotek, iwe uwa mefi pwapwa ren ena.”6
Samach Kot won Nang a sinei pwe ei misineri ewe a angang non France ukukun 6,200 mwain (10,000 kinometer) towawan seni imwan a fokkun atapwanapwanen mochen echo minefon ufoufen non patapat ren ewe atun patapat non Paris. Samach Kot won Nang a pwan sinei pwe nouch ewe epwe angei ewe uf seni non ewe sitowan pisek non Provo, Utah, echo ufoufen non patapat mi tam epwe fokkun kukkun I a sinei pwe ekkei ruemon misineri repwe angang fengen non Paris me ewe ufoufen non patapat epwe ew ponuen iotek ngeni ewe tekisosonun iotek an emon misineri ewe a wor an atapwanen mochen.
Ewe Chon Amanau a aiti:
“Pun ami mi tongeni moni ruemon nichchok ren efou kapa, nge emon me neir eap turutiw nepwun ika pwe Sememi ese mutata.
“Ina chok pwan ussum, a fen wes ne anneani meten mokuremi meinisin.
“Iwe ousap nuokus, ami mi auchea nap seni chommong nichchok.”7
Non ekkoch nikinikin, nupwen ach kewe mochen mi auchea rese ketiw non ewe napanap sia fen aneanei, meni epwe ach amuchunon tufich. Awewe ren, Joseph ewe noun Jacob pwin kewe ra nonowoiti me oputa iwe ra fori non monomon ar nieno Joseph. Nge rese nieno, pwe ra amomono ussun emon slave ngeni non Egypt.8 Ika emon arams epwe mefi pwe an kewe iotek rese ponu non ewe sokkun napanap a aneanei, meni epwe Joseph. Non ennetin, fatafatochun an fatenengaw a winiti ew wachimuken feioch ngeni me a amanaua an ewe famini seni ewe nengita. Mwirin, nupwen a winiti emon sou emwen ra fokkun nuku non I me non Egypt, fiti wachimuken nuku me mirit a ereni pwin kewe:
“Iwe ousap osukosuk are ekieki pwe tipisimi ami amomoeino. Iei netipen Kot a tinieino mwemi pwe upwe amanaua aramas.
“Iei oruwen ierin ei nengita non ei fonu. Mi chuwen nom nimu ier mwach esap wor ras.
“Kot a tinieino wemi pwe upwe anisi kemi non ei napanap, iwe a fori e sokkun pwe ami me murimurimi kewe oupwe manau.
“Iwe ennetin esap ami oua tinieito ikei, pwe Kot.”9
Me non college, nouch ewe mwanichi at a ketiw an epwe angang non ew an chon sukun angang ren esop ran chok ewe a pwarano an tufich an epwe emwen ngeni an epwe wesewesen angangeno mwirin sochungio. A fokkun achocho ne angang ren ei nenien an chon sukun angang ren ruanu ier, winiti emon mi sinenap, me chienan kewe chon angang me ekkewe meinap seni ra sufonuiti. Nesoponon an ewe oruanun ier, ussun nge mi fen kokotono me ren nang (ngeni napanapen an nouch ewe ekiek), ewe angang ren an emon epwe angangeno a suk iwe I ewe a mwenonoi ekkewe chon amasou ngeni, fiti fatafatochun me osukusukun pwe, ewer, atewe epwe aani ewe angang.
Iwe nge, ese aani ewe angang. Ese wor emon me neich a tongeni weweiti. A fen moneochuta, a interfiuoch, I ewe emon a kon tufich ngeni ewe angang, me a iotek fiti wachimuken epinukunuk me ekiek! A mairu me netipengaw, me unusen met ewe a fis a ngeikich meinisin ach sipwe epwerika mokurach. Pwata Kot a poutano I non an mochen mi wenechar?
Ina epwe fitu ier mwirin ewe ponuen iotek a wesewesen fat. Ika pwe e ani ewe angang a onotanei mwirin sochungio, a mwaren misini ew tufichin ekesiwinin awosukosuken manau iei a pwarata pwe an tufich me feioch non unusen manauan. Kot a sinei ewe nesoponon seni ewe nepoputan (ussun a fen sinei iteitan), me non ei sokkun napanap, ponuen chommong iotek mi pung pwe apw, non tipeewin me pungunon me ren ewe mi nap.
Me fan ekkoch, ponuen iotek ewe sia enetin me mochen kukuta ese wor ngenikich ponuan me non ei manau.
Sister Patricia Parkinson a uputiw nge ese osukosuk mesan, nge an a fisu ierin a poputa ne chun. An a tiu ierin, Pat a poputa ne fiti ewe sukunen mi seningepung me chun non Utah non Ogden, ukukun 90 mwain (145km) seni imwan ewe, fori ekkoch mettoch a fis an ewe fiti ewe sukun—ewe a pachenong unusen an pwos an emon a tiu ierin epwe tongeni mefi.
An ewe a 11, ierin a wesewesen chuneochuno. Pat a niwinsefan ngeni imwan an ewe a wesewesen 15 ierin an epwe fiti ewe high school non nenian ewe. A no ngeni college me a sochungio fiti undergraduate degree non communication disorders me psychology, me mwirin ew pochokunen osukosuken ekiekingaw ngeni chon angangen pekin katonong chon sukun non ewe university, a fiti graduate school me a awesano an ewe master’s degree non speech language pathology. Iei Pat a angang fiti 53 chon sukunen enementeri me a nemeni fomon chon angang ngeni speech language ren an ewe school district. A pusin wor imwan me pusin wan, ekkewe chiechian me chon an famini ra untengi nupwen Pat a mochen wawa.
An Pat a engon [10] ierin, a wor ew kokotun an epwe pwan wor ew an kokotun safei an epwe anisi ne okukunono an ewe chun. Saman me inan kewe ra kan ukureni met epwe fis ren an ewe pekin tumunun an ewe osukosuk, nge ren pwan ekkoch popun rese ereni porousen ei kokot. Nupwen saman me inan kewe ra ereni pwe ewe kokkot a foruno fansoun, Pat, non an inan ekkewe porous, “a fitikoko.” Pat a sa ngeni ewe pwan ew rum nge a pwan niwinsefan me a apasa ngeni saman me inan kewe fiti ekkoch kapasen netipengaw, “Mut ngeni ei upwe erenikemi met. Ngang mi sinei, Kot a sinei, me pwan ami meni ouwa pwan sinei. Ngang upwe chun non unusen manauei!”
Ekkoch ier ra no, Pat a sai ngeni California an epwe no churi chochon an ewe famini ra nom ikana. Nupwen a nom nukun, tetenin noun ewe at unungat ierin [noun mongean], a ereni, “Tetenin inei Pat, pwata kose tingorei Samach Kot won Nang an epwe ngonuk minefon mesom? Pun ika ke tingorei Samach Kot won Nang, I epwe ngonuk met chok ka mochen. Kopwe chok tingorei I.”
Pat a aro aunano ren ewe kapas eis nge a ponueni, “Iwe, fan ekkoch Samach Kot won Nang ese angang non ena sokkun. Fan ekkoch a mochen kopwe kaeo och mettoch, pwe esap ngonuk mettoch meinisin ka mochen. Fan ekkoch a och kopwe utiwit. Samach won Nang me ewe Chon Amanau ra sineiochu met a och ngeni kich me met sia mochen. Nge resap mut ngonuk meinisin met ka mochen non ewe fansoun ka mochen.
Ua fen sinei Pat ren chommong ier me uwa ereni pwe uwa men ingeiti ren an ekiek murinno me pwapwa fansoun meinisin. A ponueni, “Nge, kose mo nonnom rei neim fan ew, ka fen? A pusin wor ai fansoun. A fen wor ai fansoun netipengaw, a chommong ai kachiw.” Iwe nge, a pwan apachata, “Seni ewe fansoun ua poputa ne chun, a men awosukosuk, nge uwa sinei pwe Samach won Nang me ewe Chon Amanau ir mi nonnom ren am me ai we famini. Sia fori non ukukun ach tongeni, me non mefiei, am ouwa fori non pungun angangan. Uwa fen emon aramas mi fefeita, me napenon uwa emon aramas mi pwapwa. Ua chemeni Poun a nom non mettoch meinisin. Ngeni ekkewe ra kan eisiniei ika ngang mi song pokiten uwa chun, ua ponueni: ‘ion upwe song ngeni? Samach won Nang mi fitiei non ei; use mo akanamon. I a fitiei fansoun meinisin.”
Non ei sokkun, an Pat mochen an epwe kuna sefani esap tufich non ei manau. Nge an kapasen epinukunuk, a kaeo seni saman ewe, pwe, “Ei epwe pwan ponueta.”10
Preseten Henry B. Eyring a apasa, “Ewe Sam I a nom non ei fansoun a etenekikemi, ami memef, me met ami mochen ren meinisin arumi non pekin ngun me non pekin inis.”11 Ewe wachimuken me ekinamwein ennet a tongeni pwar non ekkewe unungat mettoch uwa fen aporausa.
Pwi me fefinei, fan ekkoch ach kewe iotek ra mwitir ne ponu fiti met ewe sia tingor fan itan. Fan ekkoch ach kewe iotek rese ponu non napanapen met ewe sia mochen, nge ren ewe fansoun sia sinei pwe Kot a amonata wachimuken feioch fan itan nap seni met sia mochen. Me fan ekkoch ach tingor mi ennet ngeni Kot resap ketiw me non ei manau.12 Nupwen Elter Neal A. Maxwell a apasa, “Nuku a pwan apachanong achifouwa non an Kot fansoun.”13
A wor rech ewe nukunuk pwe non pusin an omokut me non pusin an fansoun, Samach won Nang epwe efeiochukich me awesano meinisin ach osukosuk, pungungaw, me netipengaw.
“Iwe soposopono, ua mochen pwe oupwe ekieki usun ewe feioch me pwapwan nikinikin ekkewe ra aneasochisi ekkewe annukun Kot. Pun nengeni, ra feioch non mettoch meinisin, ren pekin inis me pekin ngun; iwe ika ir mi achocho ne nikitu ngeni nesoponon repwe mumuta ne tonong non nang, ren ewe popun pwe repwe tongeni nonnom ren Kot non ew nikinikin pwapwa ese tongeni much. O chechemeni, chechemeni pwe ekkei mettoch mi ennet; pun ewe Samon Kot a fen apasa.”14
Ua sinei pwe Kot a rongorongo ach kewe iotek.15 Ua sinei pwe ren emon Sam mi tong, a sinei mettoch meinisin, I a ponueni ach kewe iotek, anongonong ngeni An mirit ese much, me non ekkewe an ngeni ach tufich me feioch. Ua pwarata non itan Jises Kraist, amen.