Angangen Misineri: Apworousa Met a nomw non Netipwom
ian ka nomw ian me won ei fonufan, a chomong sokun omw kopwe apworousa ewe kapas mei ningoch ren ewe kapas Alimen Jises Kraist.
Non ewe maram a no ekewe Engon me Ruemen ewe Soufos, Preseten Russell M. Nelson, a tungorer repwe fiti me sai ngeni ewe epinipinin ewe Rome Italy tempel. Nupwen ai sai, uwa ekieki usun an ewe Apasel Paul me an ewe sai. Non an kewe ran, ach sipwe no seni Jerusalem ngeni Rome, epwe ukukun faik ran. Ikanai, ren fiti efoch kewe sepenin ngang uwa sani, epwe chok unungat awa.
Chon sinei Paipel ra nuku pwe Paul a nomw Rome nupwen a makei ekoch neun kewe taropwe, kewe kien non apechekuna chon Mwichefel me nomw usun ikanai.
Paul me ekkewe ekoch chon ewe Mwichefel minen nomw, ekkewe Aramas mi pin non fansoun menomw ra fokun sineiochu pekin fangena. Chomong ra fokun uren koput , ika fen ninino.
Non kewe ruepwuku ier a no, chon ewe Mwichefel mi niwinsefanito ren Jises Kraist, ekkewe Aramas mi Pin non Fansoun Sopwonon, rapwan uren koput non sokopaten nikinik. Nge inamwo kewe koput (me fan ekoch pwokiten ena), Ewe Mwichefel Ren Aramas mi Pin non Fansoun Sopwonon ra sopwosopwono me wateno me iei a nomw non unusen fonufan.
A chomong met sipwe fori.
Nge, memwen sipwe fori en keik, aparasata kewe minen ening, me pwapwa asinikich ren met sia fori, sipwe foriechu ach sipwe pwarano ena nonomwun mamarita.
Mi or ukukun fisu esop billion aramas non fonufan ei, anene ngeni ekoch engon me wonu million chon ewe Mwichefelin Jises Kraist ren Aramas mi Pin non Fansoun Sopwonon-ew enetin kukunun mwicheich.1
Pwan non ei fansoun, chochon chon nuku non namanam non ekoch kinikinin ei fonufan a kukununo.2
Fen pwan non an ewe Samol Mwichefel-ika mwo chonchon mei sopwosopwono me wateno-a chomong ekkewe rese angei feiechun ar iteitan fiti fan .
Non pwan ew kapasan, ian ka nomw ian me won ei fonufan, a chomong sokun omw kopwe apworousa ewe kapas mei ningoch3 ren ewe kapas Alimen Jises Kraist ngeni aramas ka churi, kaeo ngeni, me nonomw are angang ren, me chiechi ngeni.
Fansoun ei ier a no, Uwa unusen pwapwa ren ai pachenong fitiapwapwan ewe angangen misineri non fonufan unus an Mwichefel. Fan chamonguwa fen ekieki me ioteki fan iten an ewe Chon Amanaw euchean pesepes ngeni neun kewe chon kaeo—kich, Noun semirit—ach sipwe: “Feino, me aiti fonu meinisin, papataiser non iten ewe Sam, me ewe Nau, me ewe Ngun mi Pin.”4
Uwa fiu ngeni ei kapas eis “Ifa usun kich, ren chon mwichefel me neun Kraist chon kaeo, sipwe fori ei euchean pesepes non manawach iteiten ran?”
Ikanai uwa tungor kopwe ekieki ena kapa seis non om ngasangas me omw ekiek.5
Ew Nifangen Angangen Misineri
Chon emweni Mwichefel ra ngenikich ewe keke mei fatech “Meinisin chon Mwichefel ii misineri!” seni chok ekkewe fansoun ier.6
Chon ewe Mwichefelin Jises Kraist-ren fansoun nomw me fansoun iei—ra pwapwaiti me wau enetin ar apworousa ewe kapas Allim ngeni chiechier me kewe ra churiir. Netipwer a uren ning ar pwarata usun Jises Kraist, me ra unusen mwochen ekoch repwe pwan ani ewe sokun pwapwa ra kuna non an ewe chon Amanaw kapas Annim.
Ekoch chon ewe Mwichefel a mecheres ngenir rer ei nifang. Ra sani ar angang fan iten ewe kapas Alim. Ra unusen apochokuna me pwapwaiti angang ngeni me chon akomwa won ewe angangen misineri.
Nge, ekoch me neich sia tipemwaramwar. Nupwen sia kapas usun angangen misineri non ach mwich non Fan, mokurach a fokun tuputiw apokun ekkewe sia mwach, mas a chok nenengeni kewe Pukfel ika fen emouruna non pekin ekiek ren ar resapw chu meser ngeni kewe ekoch.
Pwata e iei? Meni sia mefi ach saw ren ese wate ach angang fan iten ewe kapas Allim. Meni sia mefi pwe sise kon sinei ifa usun ach sipwe fori. Ika sia mefi ach nuokus ach sipwe fori met ach ekieki pwe sise tongeni.
Uwa weweiti ei.
Nge chechemeni, ewe Samol ese mwochen kewe chok mei sinenap, epwe chok unusoch ar foforun misineri. Nge, “ewe Samol a mwochen kewe netip me aneasochisin ekiek.”7
Ika ka fen pwapwa me fori angangen misineri, kose mwochen sopweno, me uta pwe ew nios ngeni ekoch. Ewe Samol epwe efeiechuk.
Ika, inamwo, ka mefi pwe en ka amanga om angang fan iten ewe kapas Allim, kose mwochen upwe apasa nimu metoch epwe anisuk omw kosapw mefi namanamono emon mei tongeni fori an epwe fiti an ewe Chon Amanaw ewe waten pesepes ach sipwe anisi me ochufengeni Israel?
Numu mecheresin pesepes
Ewin, kan ngeni Kot. Ewe ewin anuk pwe tongei Kot.8 Ina ewe pwowpun pwata sia nomw won ei fonufan. Eisinuk, “Ngang uwa wesewesen nuku non Semei non Nang?”
“Ngang mi tongei ii me nuku ii?”
Omw kan ngeni Samach non Nang, an saram me pwapwa epwe saramena me non netipwom. Ekoch repwe kuna pwe mei wor metoch mei sokono me euchea usumw. Iwe repwe kapas eis usun.
Oruwan, amasowa netipwom ren omw tongei ekoch. Iei ewe oruwen waten annuk.9 Achocho ngeni omw kopwe kuna meinisin unukumw pwe iir neun Kot. Iamwirir-ina mwo ika iter ese nomw non omw ewe iteiten chon kopwe iamwirii.
Takir fengen. Pwapwa fengen. Kechiw fengen. Asamwonur. Echikarer, uuwatar, me epechekuner.
Achocho ngeni fori usun an Kraist tong me tongei ekoch-pwan ngeni kewe rese sanuk, kewe ra fosongaw fan itomw, me anean ar repwe efeiengawok. Tonger me fori ngenir usun iir neun Samach non Nang.
Eunungatin, achocho ngeni me fetan non ewe anen chon kaeo. Om ka tongei Kot me neun kewe a wateno, iwe pwan om pwon pwe kopwe tapweno mwurin Jises Kraist.
Kopwe kaeo usun nonomwun ren om kametip won an kewe kapas me rongorong ngeni, me fori met kewe a aitikich seni kewe Soufos me kewe Aposel. Kopwe mamarita non om nukunuk me paracho ngeni om tapweno mwirin I atun ka kapas ngeni Samach non Nang, fiti mecheresin netipach.
Fefetan non ewe anen chon kaeo sipwe anganga-iteiten ran, ekis me ekis, “chen ren chen,”10 “ kaeo ikenai kaeo nesor.”11 Fan ekoch ipweno fan ruu mwomw me ipwe sefan fan ew.
Aukochean pwesisapw fangeta, kopwe achocho ngeni tori an epwe ochuna. Fan ew kopwe sine echu, pwapwa, me pwan epwe usun nge och metoch ka fen sinei. Om kapas ngeni ekoch fan iten om nuku epwe mecheresena me ningena Mei enet, pwe ewe kapas Allim epwe ew metoch mei euchea, ningoch non manawom sisapw unusech ika sisapwkapas usun ngeni ekoch. Esapw fis iei chok-iei ew fofor sipwe fori non ranin manawach. Nge epwe fis.
Eruwanun, apworousa met a nomw non netipwom. Ngang use apasa pwe kopwe uta non kewe aan fan noumw rachuo me ka pwucher me aneani kewe wokisin non ewe Pukel Mormon. Met uwa apasa pwe iteitan kopwe kutta kewe fansoun omw kopwe kapasen omw nuku non mecheresin omw churi aramas—ren non foufoun aramas me online. Ngang uwa apasa pwe en kopwe “chon pwarata”12 ren ewe manamanen ewe kapas Allim iteiten fansoun meinisin-me nupwen a namwot, aea kapas.13
Pwokiten “ewe kapas Allimen Kraist…ina ewe manamanen Kot ngeni manaw ese much,” kopwe tongeni nukunchar, paracho, me tipetekison nupwen ka apworousa.14 Nukunuk, para, me tipetekison meni repwe oppor fengen ngeni kei nikinik, nge rese. Ra fori usun an ewe Chon Amanaw we tungor ach sisapw opano kewe euchean ewe kapas Allim me nonomwun fan bushel nge kopwe mwut ngeni om kewe saram epwe tin, pwe om angang epwe eningana Samach non Nang.15
Mei chomong sokun om kopwe fori ei, seni om foforun aramasech iteiten ran me om kapasaen pwarata won YouTube, Facebook, Instagram, ika Twitter ren om kapas ngeni ekoch aramas ka churi. Non ei ier sia kaeo seni ewe Testament Minafo non imwach kewe me kewe Sukunen Raninfel. Met ren amwararen om fansoun om kopwe tungorei chiechiom kewe me ekkewe arom ar repwe fituk me fan me fituk non imwom repwe kaeo usun ach chon Amanaw.. Apworousa ngenir usun ewe Gospel Library app, ian repwe tongeni kuna Come, Follow Me. Ika en mei sinei kewe sarafo me ar kewe famini, ngenir ewe For the Strength of Youth booklet me tungorer repwe feito me kuna usun met neuch kewe sarafo ra achocho ngeni ar repwe manaweni ren kewe annuk.
Ika emon a eisinuk ren omw wiiken, kosapw nuokus omw kopwe kapas usun met ka fori non Faan. Kapas usun kewe kukun semirit kewe ra uta mwen ewe mwichen chon Faan me ra kenun ar mwochen ar repwe usun Jises. Kapas usun ewe mwichen sarafo kewe ra anisi kewe chinap non kewe imwen asoso ren ar repwe angei pworousen ar neo. Kapas usun kewe ekesiwin a fis non ach kewe mwichen Raninfel me ifa usun a efeiechuk me omw famini. Ika awewei pwata sia epechekuna pwe ei ewe Mwichefelin Kraist me kich kewe Fansoun Sopwonon Aramas mi Pin usun chok kewe chochon ewe Mwichefel minen nomw ra pwan iteni Aramas mi Pin.
Ren menni chok sokun a weweech ngonuk, apworousa ngeni aramas pwata Jises Kraist me an ewe Mwichefel ra euchea ngonuk. Tungorer ar repwe “feito me kuna.”16 Iwe epochokuna ngenir repwe feito me aninis. Mei chomong sokopaten metoch an aramas repwe aninis won non ach Mwichefel.
Ousap chok iotek pwe ekkewe misineri repwe kuna ekkewe mi moneta. Iotek iteiten ran ren unusen netipom pwe kopwe kuna ekkewe ra mochen feito me kuna, feito me aninis, me feito me nonnom. Chechemeni kopwe anomwu kewe misineri non omw kokot. Ra usun chon nang, ra moneta ar repwe aninis!
Nupwen omw ka apworousa ewe kapas mei euchea, ewe kapas allimin Jises Kraist, fori fiti tong me engino ngeni. Ika sia kapas ngeni aramas me ach ew mwochen pwe repwe mwutir me ufouf kewe uuf mei pwech me kapa seis ren ifan ewe nenien papatais mei kanoto, mei mwan met sia fori.
Ekoch ion ra feito me kuna repwe, napengeni, resapw choni ewe Mwichefel; ekoch repwe choni ngo esap ren iei. Ina pusin ar finata. Nge esapw siwini ach tong fan iter. Me esapw siwini ach fofor me sopweno me tungorei emon me emon me famini repwe feito kuna, feito me aninis, me feito me nonomw.
Enimuwan, nuku ewe Samol epwe fori an nifang mei pin. Kopwe weweiti pwe esapw omw angang kopwe siwini netipanaramas. Ina wisen ewe Ngun mi Fel Wisomw kopwe afanafala met mei nomw non netipwom me manauoch usun omw nuku.
Iwe kosapw netipengaw ika emon ese mwitiriti mwochen rongorong ngeni ewe kapas Allim. Esapw ren omw angangen nipwakingaw.
Ina a nefinen emon me ewe Sam non Nang.
Iei omw kopwe tongei Kot me chon orumw, Noun kewe semirit.
Nukuw, tong, fori.
Tapwei ei an, me Kot epwe fori an angangen feiech non en an epwe efeiechu neun kewe.
Ekkei nimu ekiek epwe anisuk me fori met neun Jises Kraist kewe chon kaeo rafen fori seni chok nomw. An ewe kapas Allim me An Mwichefel ra euchea non manawomw me ren en ion me met ka fori. Iwe, tungorei ekoch ar repwe feito me kuna me feito me aninis, me Kot epwe fori an angang, me repwe feito me nonomw.
Nge met ika mei weires?
“Nge,” meni kopwe kapa seis, “met ika uwa fori meinisin kei me aramas rese sani? Met ika ra eitengawa ewe Mwichefel? Met ika resapw chiwen chieneniei?”
Ewer, kana mei tongeni fis. Seni kewe fansoun nomw, neun Jises Kraist kewe chon kaeo ramen chok uren koput.17 Ewe Aposel Peter a apasa, “sipwe unusen pwapwa ren [om] uwei fetanei an Kraist kewe riafow.”18 Ekkewe chon mwichefel akomw ra pwapwa “pwe rapwan aneanong pwe iir chon riafoun ar ani sawin itan ewe.”19
Chechemeni, ewe Samon mi fori an angang non sokopaten nikinik. Naman netipen emon epwe tongeni pweteteno ren om apiru Kraist nupwen emon ese etiwok.
Ren wisei wisen Aposel noun ewe Samon Jises Kraist, uwa efeiechuk ren aunukunuk omw kopwe manawen pwarata usun nonomwun ewe kapas Allim, fiti ewe porachongeni ren omw kopwe sineno iteitan pwe en chon ewe Mwichefelin Jises Kraist ren Aramas Mi Pin non Fansoun Soponon, fiti ewe tipetekison me kopwe aninis non an ewe angang epwe ew foforun om tong ngeni Samach non Nang me neun kewe.
Chiechiei achengicheng, kopwe pwapwa omw sinei pwe en mei euchea non ewe angangen ochufengeni chon Israel, amonata ngeni an Kraist epwe war non “pechekun me ningech; fiti kewe chon nang mei pin.”20
Samach won Nang a sineuk. Ewe Samon a fokkun tongeuk. Kot epwe efeiechuk. Ei angang a fen seikita ren ii. Ka tongeni föri ei. Kich meinisin mi tongeni fori ei fengen.
Ua pwarata non iten Jises Kraist, amen.