Ewe Manamanen Apechekuna ren Nuku
Ren om eitieta poum om kopwe etiwer, ka pwon ngeni Kot, minne ekkei chon angang ir mi noun, pwe kopwe apechekuna ir.
Fan chommong uwa rongorong ekkewe chon nouwisin pristut apasa ar kinisou ren ewe nuku ne apechekuner seni ekkewe aramas ra angang ngeni. Seni memmefin mengungur, ka sinei pwe ar kinisou a men watte me ennet. Ai popun ikenai pwe upwe pwarata an ewe Samon kinisou ngenikemi ren ami apechekuna Noun chon angang non An Mwichefen. Me pwan pwe upwe pesei ngenikemi pwe oupwe aea me amemarita ami pechekun ne apechekuna ekkoch ren ami nuku.
Me mwen ka uputiw, ka fen aea ena sokkun pechekun. Ekiek sefan usun met sia sinei usun ewe nenien ngun me mwen sia uputiw. Semach won Nang a ereni kich usun eu kokkot fan iten Noun kewe semerit. Kich mi nom ikkewe ia. Lucifer, pwich ika mongeach non ngun, a ungeni ewe kokkot minne epwe ngeni kich tufichin ach pungun finata. Jehovah, ewe At mi Achengecheng noun Semach won Nang, a tipeu ngeni ewe kokkot. Lucifer a emweni eu mwichen ungeni. An Jehovah atipeu ngeni a pworacho, me A pwisin fangeta pwe epwe winiti ach Chon Amanau.
Pokiten iei ka nom non napanapen aramas won fonufan a wewen ngenikich pwe ka fen apechekuna ewe Sam me Chon Amanau. A namwot omw nuku non Jises Kraist ne etiwa ewe kokkotun pwapwa me wisen Jises Kraist me non ena kokkot ika mwo napengeni kesap sinei usun ewe weires kopwe kuna non manauomw.
Omw nuku ne apechekuna ekkewe chon angangen Kot a nom nukunapen omw pwapwa me non ei manau. Nupwen ka etiwa an emon misineri tingor ne iotek pwe kopwe sinei ewe Puken Mormon mi ewe kapasen Kot, iwe a wor omw nuku ne apechekuna emon chon angangen ewe Samon. Nupwen ka etiwa ewe tingor pwe kopwe papatais, ka pwan apechekuna emon mi tipetekison chon angangen Kot.
Nupwen ka etiwa emon epwe wata poun won mokurom me apasa, “Angei ewe Ngun mi Fen,” en mi apechekuna i pwe i emon chon Pristut seni Melkesetek.
Seni ena ran, ren omw angangoch iteitan ka fen apechekuna emon me emon ekkewe aramas minne ra epinano en ngeni ewe pristut me ra pwan seikukita ngeni eu kinikin non na pristut.
Nepoputan ach anganga ewe pristut, ach chok apinukunukun emon chon angangen Kot, ina ach apechekuna i. Iei, chommong me neimi oua mwokututa pwe iei a wor pwan ekkoch mettoch oupwe fori ne apechekuna emon.
Ami mi fini ika oupwe apechekuna meinisin ekkewe minne ewe Samon a kokkori – ese nefinifin minne angang ewe Samon a kokkorir ngeni. Ena kefin a fiis non ekkewe mwichen fan won unusen ewe fonufan. A fiis non ei mwich. Non ekkei sokkun mwich, iten ekkoch mwan me fefin— chon angangen Kot—ra anneau, me oua ketiw pwe oupwe eitieta poumi ne apechekuna ir. Ka tongeni pwan fini pwe kesap apechekuna ir, ika ka tongeni pwon ngenir omw nuku ne apechekuna. Ren omw ka eitieta poum ne apechekuna ir, ka fori eu pwon. Ka pwon ngeni Kot, minne ekkei chon angang ir noun, pwe kepwe apechekuna ir.
Ir aramas rese unusoch, usun chok en. Nukunuk mi wenewenen nukuchar pwe ewe Samon a ennetin kokkorir epwe namwot ne apwonueta omw kewe pwon. Seni omw apwonueta ekkana pwon epwe awora pwapwa ese much. Ika kese apwonueta epwe awora netipechou ngonuk me ion ekkewe ka tongei—me pwan netipengaw usun kese tongeni awewei.
Meni emon a fen eisinuk, are emon epwap eis, ika en mi apechekuna noum pishop, presetenin steik, ekkewe Meinapen Unusen, me ekkewe Chon Nouwisin unusen ewe Mwichefen. A tongeni fiis ren ewe tingor ne apechekuna ekkewe chon nouwis me emwen non eu mwich. Fan ekkoch epwe fiis non eu interfiu ren emon pishop ika presetenin steik.
Ai auraur pwe kepwe pwisin eisenuk ekkana kapas eis me mwen, ren ekiekoch fiti iotek. Ren omw foriei, meni kepwe nengeni omw kewe ekiek, kapas, me foffor. Achocho ne chechemeni me ammonata met kepwe penuweni nupwen ewe Samon epwe wisen interfiunuk, ren omw sinei pwe fan eu epwe eisenuk. Ka tongeni ammoneta ren omw kepwe eiseni pwisin en ekkei kapas eis:
-
Ngang mi ekieki ika porous usun apwangapwangen aramas non ekkewe aramas uwa fen pwon upwe apechekuna?
-
Ngang mi fen achocho ne kuna pwe ewe Samon a emwenir?
-
Ngang mi fen ennetin fini me tipeu ne ausening ngeni ar kapasen emwen?
-
Ngang mi porous usun ewe mettochun pwarata pwe ir Noun Kot chon angang?
-
Ngang mi iotek fan iter iteitan ren pwisin iter kewe me fiti memmefin tong?
Ekkana kapas eis repwe awora memmefin niokus me mochenin aier, non napengeni kich meinsin. Kot a annuku ngenikich pwe sisap apungu aramas ren met ese wenechar, nge non ach foffor, sia kuna pwe a men weires ne apwonueta. Napengeni meinisin met sia fori ren aramas a efiisi ach sipwe apungur. Me pwan non napengeni meinisin kinikinin manauach sia anenefengeni kich ngeni pwan ekkoch. A chommong popun sia foriei, me ekkoch popun ra pung, nge fan chommong a poputani ach ekiekingawen mettoch.
Preseten George Q. Cannon a apasa aurour iwe upwe pwan apasa sefan ngenikemi ren ai aurour. Ngang mi nuku pwe met a apasa mi ennet: “Kot a fini Noun kewe chon angang. I a afata pwe I epwe wisen watiw kapung wor, ika mi namwot repwe kapung. I ese ngeni emon me emon kich pwe sipwe foos usun mwanin me apungu ir. Ese wor emon, ina mwo ika mi pechekun non ewe nuku, are wisan non ewe Pristut mi nap, a tongeni foos ngaw usun noun ewe Samon chon epinipin me kuna mettoch mi mwan ren an Kot mwumwuta won fonufan me esap awora an Kot song won. Ewe Ngun mi Fel epwe atowaueno pwisin i seni ena emon, me epwe tonong non rochopwak. Iwe ina, ka tongeni kuna ifa auchean pwe sipwe tumunuoch?”1
Seni met uwa kuna ren ekkewe chon ewe Mwichefen won unusen ewe fonufan napengeni ir mi tipeu fengen me nour kewe chon emwenir. Nge, mi wor, ekkoch mettoch sia tongeni me mi namwot sipwe fori ekkis och nap seni iei. Sia tongeni feffeita non ach tufichin apechekuna fengenikich. Epwe anamwota nuku me fofforun achocho. Iwe iei ruanu auraur upwe ngenikich ne fori seni met sia kaeo non ei mwichenap.
-
Sia tongeni esinna tichikin met ekkewe chon afanafan ra pesei ngenikcih me poputa ikenai ne forir. Ren ach fori, ach tufichin apechekuna ir epwe watteno.
-
Sia tongeni iotek fan iter nupwen ra afanafan pwe ewe Ngun mi Fel epwe uweinong ar kapas non netipan aramas sia pwisin tongei. Nupwen sia kaeo mwirin pwe ach iotek a pwonu, ach tufichin apechekuna ekkana chon emwen epwe napano.
-
Sia tongeni iotek pwe emon ekkewe chon afanafan epwe feioch me pechekun atun ir ra afanafana ar poraus. Nupwen sia kuna pwe ra apechekun, ach nuku ne apechekuna ir epwe napano, me epwe sosopono.
-
Sia tongeni auseningoch ngeni met ekkewe chon afanafan ra apasa minne a penuweni am kewe pwisin iotek ren aninis. Nupwen ekkewe penu ra feitto, me repwe feitto, ach nuku epwe napano ne apechekuna meinisin noun ewe Samon kewe chon angang.
Pwan fiti ach feffeita non ach apechekuna ekkewe ra angang non ewe Mwichefen, sipwe kaeo pwe mi wor pwan eu kinikin sia tongeni feffeita non ei sokkun manaman. Iwe, a tongeni awora pwan watten feioch ngenikich. Iwe ei kinikin a fiis non ewe imw me non famini.
Uwa foos ngeni ewe chon pristut mi serafo minne a chiwen nom non eu imw ren seman. Mut ngeniei pwe upwe erenuk seni pwisin manauei ifa usun a anisi emon sam an epwe mefi omw apechekuna ren nuku. Me reom meni a nikinikinin pochokun. Nge a wor an osukosuk me weires mi nap seni met ka sinei. Fan ekkoch ese tongeni kuna met epwe for ren ekkewe osukosuk minne a tori i.
Omw kinisou me sufon ngeni epwe ekis anisi. Omw tong ngeni epwe fen anisi nap seni ewe. Nge met epwe ennetin anisi nap seni meinisin ina kapas mi ennet usun ekkei: “Papa, uwa fen iotek fan itom, me uwa mefi pwe ewe Samon epwe anisuk. Mettoch meinisin repwe fiisioch. Ngang mi sinei epwe fiis.”
Ekkana sokkun kapas mi tongeni pwan aninisoch seni emon sam ngeni noun at. Nupwen emon at a fori eu mettoch mi ennetin mwan, meni pwan won pekin ngun, eni epwe mefi pwe a wesewesen poutmwanino. Pokiten en seman, non na fansoun, meni kepwe mairu nupwen, mwirin ka iotek pwe kepwe sinei met kepwe fori, ewe Ngun mi Fel a wanong ekkei kapas non auomw: “Nei at, ngang ua nom reomw fansoun meinisin. Ewe Samon a men tongek. Ren An aninis, ka tongeni niwinsefan. Ngang mi sinei pwe ka tongeni, me kepwe niwin. Ngang ua tongek.”
Non ewe mwichen pristut me non ewe famini, watten nuku ne apechekuna fengenikich ina ewe napanapen foruta ewe Zion minne ewe Samon a mochen pwe sipwe foruta. Ren An aninis, sia tongeni me sipwe fori. Epwe namwot sipwe kaeo ne tongei ewe Samon ren unusen netipach, foffuruch, ach ekiek, me ach pechekun me tongei fengenikich usun sia pwisin tongeikich.
Ren ach watteno non ena tongen Kraist mi ennet, netipach repwe pwetete. Ena tong epwe atipetekisonakich me emwenikich ne aier. Ach pechekun non ewe Samon me non ekkoch epwe napano. Iwe ina ewe atun sipwe poputa ne winiti eu chok, usun ewe Samon a pwonei sia tongeni.2
Ngang mi pwarata pwe Semach won Nang mi sinei pwan tongei kemi. Jises i ewe Kraist mi manau. Iei An we Mwichefen. Kich sia komoch An pristut. I epwe apungu ach achocho ne feffeita non ach manaman me aea ne apechekuna fengenikich. Ua pwarata ei non ewe it mi pin iten Jises Kraist, amen.