Monata pwe Kopwe Angei Meinisin mi Namwot Ngonuk
Ua pwarata pwe ounusochun feioch epwe eto ren ach achocho ne ponueta wisach ne kaeo me tongei ewe kapas allimen Jises Kraist mi niwinsefanito.
Ekkewe kinikinin me mwichan Ewe Mwichefenin Jises Kraist ren Aramas mi Pin non Fansoun Soponon mi anapano ren kao non imw me aninis seni ewe Mwichefen, usun met a pwana ren pworausen ekkewe ekkesiwin sia kuna non ekkewe fitu mwichenap akkomw. Presiten Russell M. Nelson a aurourakich: “Mei wor chommong epwan fisito. … Unumi unumom safeian faitamin. Kopwe angei om asoso. Epwe fokkun amesseik.”1
Ua iotek me tingor ewe aninnisin ewe Ngun mi Fel ren ach sia ekkiekifengeni usun fitu efisitan ekkei ekkesiwin a fifis pwe mi auchea non an Kot Mwichefen.
Kaeo mi Nongonong non Imw ren Aninnisin ewe Mwichefen
Elter Craig C. Christensen i a chiechi ngeni ei non ew mwichenapen chon emwenin pristut, me i a aea ekkei ru kapaseis mi mecheres pwe epwe wau auchean ewe nongonong epwe winiti anongonong non imw ren aninnisin ewe Mwichefen. A aurourakich pwe sipwe ekkesiwini ach niwiniti imwach sarin Fan non Raninifel o eisini chon imwach, “Met ka kaeo usun ewe Chon Angasano me An kapas allim ikkenai non Fan?” sipwe fen eis non ach mwichen fan, “Met ka kaeo usun ewe Chon Angasano me An kapas Allim non imwom ewe non ei wik?” Ach ennetin Pinneni ewe Rannin Sabbath, ewe minafon tetenin kaeo, me ewe ekkesiwin ngeni ewe tetenin mwich ir mi anisikich pwe sipwe kaeo ewe kapas allim non imwach pwan non fan.
Emon me emon chon ewe Mwichefenin Jises Kraist ren Aramas mi Pin non Fansoun Soponon mi wor pwisin ar sekinin won inisir pwe repwe kaeo me manaueni an ewe Samon kewe afanafan me angei ren mwumwuta mi fich ekkewe angang mi pin ren amanau me manau ese much. Sisap ekieki pwe ewe Mwichefen pwe ew mwichen aramas epwe aitikich ika erenikich mettoch meinisin mi namwot pwe sipwe sinei me fori minne sipwe winiti chon kuno mi tiniken me nikitu non pung tori nesoponon.2 Nge, wisach pwisin won inisich pwe sipwe kaeo minne mi auchea sipwe kaeo, sipwe manau non ewe napanap mi namwot sipwe manau, me winiti ewe sokkun aramas ewe Masta a mochen pwe sipwe winiti. Me imwach kewe ina neni mi napanap nenien ach sipwe kaeo, manau, me winiti.
Ne kukunun, Joseph Smith a kaeo usun Kot seni an famini. An achocho ne kuna netipan Kot fanitan a efisata an Joseph mochen an epwe kuta ewe ennet nein ekkewe sokopaten namanamen chon nuku non Kraist, ekkipwichi ekkewe pukefel, me iotek ngeni Kot non netipetekison. Nupwen Joseph Smith a niwiniti imwan seni ewe Petewen mi Pin keran mwirin an ewe Sam me ewe Nau ra pwa ngeni, a akkomw fos ngeni inanewe. Nupwen a “uta o pai ngeni ewe nenian fanang, [inanewe] a eisini pwata a osukosuk. [Joseph] a penueni, ‘Ina chok, ese wor osukosukan—ngang mi pechekun.’ [I] a penueni inan ewe, ‘Ua pwisin kaeo.’”3 Met a fis ngeni Joseph a awora ngenikich ew tetenin kaeo mi manaman mi auchea pwe sipwe appiruni. Mi namwot pwe kich sipwe pwisin kaeo.
Ewe popunapan an Samach won Nang we kokot pwe Noun kewe repwe winiti usun I. Ren ei popun, I a awora ngenikich ekkewe tufich mi namwot pwe sipwe marita me fefeita. Ach etipew pwe sipwe kaeo me manaueni mi ennet mi wesen aucheano non ei fonufan mi fitikoko4 me mi napano non osukosuk me tipis. Sise tongeni sipwe chok fiti Fan me fiti ekkewe sokopaten mwich iwe ekkieki sipwe angei meinisin ekkewe saramen ngun me tumun epwe nonom rech pwe “sipwe uu ngeni ewe ran mi ngau epwe wareto.”5
“Mi wor wisen sam me in pwe repwe Amari nour kewe semirit non tong me wenewen.”6 Chon emwenin Mwichefen, sensei, me appapwan mwich mi anisi emon me emon kich me pwan achochon ach famini ne marita non pekin ngun. Me ikamwo pwe si mochen aninnis pwe sipwe fefetan won ewe aanen annuk mi pin, ewe tekian sekinin ren sipwe pwisin anapano ach pechekun me engino non pekin ngun a nonom ren emon me emon kich
Chechemeni usun Nifai, noun ewe soufos Lihai, a mochen kuna, auseing, me sinei pisin seni ewe manamanen ewe Ngun mi Fel ekkewe mettoch saman a kaeo non ewe nemasepwin ewe iran manau. Mi auchea ngeni Nifai o i a feioch non an serafo ren ewe appirun me ekaeon seni “[seman] me [inan] mi murino.”7 Nge, usun chok Joseph Smith, a mochen an epwe pwisin kaeo me sinei.
Ika pwe unusan ach sinei usun Jises Kraist me An kapas allim mi niwinsefanitio mi chok nongonong won met pwan ekkoch aramas mi erenikich, iwe nongonongen ach kapasen pwarata usun I me An amwararan angang non ei Fansoun Soponon mi kaueta won pii.8 Sise tongeni chok ani ika aea an pwan emon saram saram me sinei usun ewe kapas allim—ika mwo ika ir ekkewe sia tongei me nuku.
Nengeni, ewe Soufos Joseph Smith a aitikich pwe mi namwot ngeni iteitan Aramas mi Pin non Fansoun soponon pwe repwe pwisin weweiti ekkewe kokotun me popun Kot ren ach etiw fonufan.9
Ika mi tufich sipwe anneani me weweiti meinisin mi mak seni ekkewe ranin Adam, usun nefinan mwan me Kot me chon nang non ewe manau epwe feito, sipwe chok weweiti ekkis usun. Ach annneani usun manauan pwan ekkoch, ika usun ewe pwarata ir, ra angei, ese tongeni awora ngeni kich ew fatafatochun weweochun usun nonnomuch pwisin me nefinach me Kot. Sia chok tufichin angei ewe sinei usun ekkei mettoch ren ach pwisin manaueni ekkewe angang mi pin an Kot mi fis ren ena popun.”10
An etufichi ewe apwonuetan ei kokkoten ngun mi napanap ngeni aramas pwisin me famini ina ew nein ekkewe popunap pwe ekkewe kinikinin me mwichen Ewe Mwichefenin Jises Kraist ren Aramas mi Pin non Fansoun Soponon mi pwan anongonong non ewe imw ren aninnisin ewe Mwichefen non ei pwisin fansoun non ewe kinikinin fansoun unus.
Efisitan Kaeo mi Anongonong non Imw ren Aninnisin ewe Mwichefen
Upwe afata usun ekkewe efisitan kaeo ewe kapas allim ren an anapano anongonongun non ewe imw ren aninnisin ewe mwichefen.
Imwachkewe ina ewe nenian asukkunna misineri mi napanap; nampa ru neni a nom Provo, Manila, Mexico City, me pwan ekkoch neni. Ach Sukkunen Raninifel mi napanap epwe fen ach pwisin stati me stati ren ach famini non imwach kewe; Sukkunen Raninifel non ach kewe imwan fan mi aninnisoch nge anampa ru.
Ach nenian uruon famini iei a nom non imwach kewe. Pwan och aninnisin uruon famini mi kawor non ach kewe imwan fan.
Sukkunen ammonatan tonong tempel mi auchea mi fis non imwach; ewe sukkunen ammonatan tempel mi auchea nge nampa ru nenian kao mi tongeni pwan fis non ach kewe imwan fan.
Ach aneniochu imwach pwe ina ewe neni sia tongeni uta non neni mi pin11 mi wesen namwot non ekkei ranin soponon. Me ikamwo a wesen auchea ach kaeo mi anongonong non ewe imw ren aninnisin ewe Mwichefel ngeni ach pechekunan me tumunun ngunuch ikenai, epwene pwan aucheanap non ewe fansoun mwach.
Kaeo mi Nongonong non ewe Imw ren Aninnisin ewe Mwichefel me Ammonatan Tonong Tempel
Ouse mochen oupwe ekkieki usun ewe kinikinen kaeo usun “nongonong non ewe imw ren Aninnisin ewe Mwichefel” mi fis non ach pwisin ammonata me nimenimoch pwe sipwe angei ekkewe angang me pwon mi pin non ewe imwan ewe Samon.
Ewer, ach ammonatan tonong non tempel epwe kon fisioch ika a poputanon imwach. Nge chommong chon ach Mwichefen mi tipemwaramwar usun met mi fich pwe sipwe tongeni apasa fan asengesin ewe tempel attun sia nom nukkun ewe tempel.
Presiten Ezra Taft Benson a afata pwata mei wor ei osukosuk.
“Ewe tempel mi ew neni mi pin, me ekkewe angang mi pin non ewe tempel mi wesen pin. Pokiten mi fokun pin fannekoch sia tipemwaremwar ika sipwe kapas usun ewe tempel ngeni nouch me noun nouch kewe.
“Iwe niwinin ena, chommong rese foneni ar tipe ngeni ar repwe tonong non ewe tepel, are nupwen ra tonong, ra tonong nge rese fen kaeo akkomw pwe repwe monata ngeni ekkewe etipew me pwon mi pin ra tonong non.
“Ua nuku pwe ew weweochu ika monata och epwe fokun wesen anisi nouch kewe serafo pwe repwe tonong tempel … [me] epwe amarita non netiper ewe mochen ngeni ar repwe kuta ar feiochun pristut usun chok Abraham.”12
Mi wor ru kapasen emwen epwe anisikich usun pungunon ach weweiti met Presiten Benson a afata ngenikich.
Kapasen Emwen Nampa 1 Pokiten sia tongei ewe Samon, fansoun meinisin sia achocho ne fos usun imwan mi pin ren ach kapasen sufon. Sisap afata are awewe usun ekewe pisekin awewe mi auchea mi fiti ekkewe pwon mi pin sia angei non ekkewe angang mi pin non tempel. Me sisap pwan pworaus usun ekkewe mettoch mi pin sia kaeo me pwisin pwon non ewe tempel pwe sisap pwari.
Kapasen Emwen Nampa 2 Ewe tempel mi imwan ewe Samon. Mettoch meinisin non ewe tempel mi itini ngeni ewe Chon Angasano, Jises Kraist. Sia tongeni pworaus won ekkewe popun me nongonong me kinikinen kaeo mi fiti ekkewe angang mi pin me pwon mi pin non ewe tempel.
“Sipwe pworaus ngeni nouch kewe usun ekkewe memmefian ngun sia mefi non ewe tempel. Me sipwe pwan tiniken me nipwakoch ne aitir usun ekkewe mettoch mi mut sipwe tongeni kapas won usun ekkewe popun ren imwan ewe Samon.”13
Seni ekkewe tapin aramas meinisin ren ewe Soufos Joseph Smith ngeni Presiten Russell M. Nelson, chommong ekkewe meinapen Mwichefen mi aitikich chommong usun ekkewe nongonongen popunapan ekkewe angang mi pin me pwon mi pin ren ewe tempel.14 Mei wor ew ito mi sokopat masowen non pekin taropwe, ausening, fitio, me pwan ekkoch pekin minne epwe anisikich ne kaeo usun ekkewe amonetan angangepin nifang mi pin, pupunu, me pwan ekkoch angang mi pinen riri.15 Mi pwan wor pekin pworaus usun ach tapweno mwirin ewe Chon Angasano ren ach angei me apwonueta ach pwon mi pin pwe sipwe apwonueta ewe annuken anneasochis, ewe annuken asor, ewe annuken ewe kapas allim, ewe annuken nimenimoch, me ewe annuken epinano.16 All Church members should become familiar with the excellent materials available at temples.ChurchofJesusChrist.org.
Presiten Russel M. Nelson a afataochu ngeni kich usun ewe auchean ewe pungoch nefinan ewe pinepinen ekkewe angangen tempel me ewe pworaus mi auchea usun ekkewe tempel minne ewe Mwichefen a makkei pwe mi pung, mi fich, me a kawor ngeni aramas meinisin. “Ua auroura chon ewe Mwichefen … pwe repwe anneani ekkewe wokisin non ewe Bible Dictionary usun ewe tempel, usun chok ‘Anoint Covenant Sacrifices and ‘Temple.’ Anean oupwe pwan mochen anneani Exodus, sopun 26–29, me Leviticus, sopun 8. Ewe Testamen Nom, kapach pwan ekkewe puken Moses me Abraham non ewe Pearl of Great Price, mi afata ngenikich pwe ekkwe angang non tempel mi chok fis seni nom me ekkwe angang mi pin repwe sopwesopweno feinfeinno chok.”17
Iwe, oupwe mwan anchangei ika pwe noumi at ika neingin a eis, “Emon chienei chon sukkun a ereniei pwe mei wor uuf mi sokkono non ewe tempel. Mi pung?” Mi wor echo kachito mi moch won temples.churchofjesuschrist.org itan “Sacred Temple Clothing.” Ei esinesin mi men aninnisoch a awewe pwe seni fansoun nom mwan me fefin ra aea kon mi pin, ekkoch sokkun iotek, uf mi pin minen awewe, me mokutukutunen fel pwe rewpe wau mefian netiper usun ar pineni Kot. Iwe, ewe Mwichefen mi anisi amonata ekkewenongonong non imw ren ekkewe efeiochun tempel mi amwarar ren ochun kapasen ekaeo me pisekin ekaeo usun ei kachito. Mi wor chommong pworausen ekaeo mi kawor ngenikemi.18
Nupwen sia achocho ne fetan non ewe netipetekisonun Ngunun ewe Samon,19 sipwe feioch ne weweiti me apwonueta non imwach ewe pungoch mi namwot nefinan met mi fich me met ese fich ach sipwe pworaus usun ekkewe angang mi pin me pwon mi pin non ewe tempel.
Pwon me Kapasen Pwarata
Ua ekkieki pwe ekkoch neimi oupwe ekkieki ika pwe ami kaeo usun ewe kapas allim epwe tongeni winiti ewe anongonong non imw ren aninnisin ewe Mwichefen. Naman ekkoch neimi pwe ami chok anaemon chon mwichefen non imwemi, are punuemi rese etiwa ami souleng, are ami anaemon non wisemi sam me in, are oua anaemon nom fengen pun ami Aramas mi Pin non Fansoun Sopononmi nipich are mufesen, me mi wo ami kapaseis ren ifa usun ekkei nongonong mi auchea ngenikemi pwisin. Mi tufich ami sam me in oua nenengeni o eisenikemi, “Sia tongeni fori ei?”
Ka tongeni fori ei! Ua pwon ngenikemi pwe feioch epwe puputo me pwato non manauemi. Asam epwe suuk. Saram epwe sarameto. Ami tufich epwe napano pwe oupwe tiniken me engino non ami nikitu.
Ua pwarata pwe ounusochun feioch epwe eto ren ach achocho ne ponueta wisach ne kaeo me tongei ewe kapas allimen Jises Kraist mi niwinsefanito. Sia tongeni wesen monata ngeni sipwe angei mettoch meinisin mi namwot ngenikich.20 Ua pwon ngeni kemi me apasata ei kapasen pwarata fan iten ewe Samon Jises Kraist, amen.