“Feito, Tapwoto Mwuri”
Jises Kraist a tingorei kich ach sipwe fiti ewe anen pwon ach sipwe niwin ngeni imwach ren Semach me Inach won Nang me nonnom ren ekkewe sia tongei.
Atongei pwii me fefinei kana, am me pwunuwei we Wendy auwa unusen pwapwa me nomw remi non ei sosoran Raninfel. Chomong a fen fis mwurin ach ewe saingon mwichenap. Minafen temple rafen epinipin non Concepcion, Chile; Barranguilla, Colombia; me Rome, Italy. Sia fen mefi ekewe wachemukun Ngun mi Fen non ekei fansoun mei pin.
Uwa unusen kinisou ngeni ekewe chomong fefin (me mwan) ekewe ra keran chok aneani Ewe Puken Mormon me ra kuna pwapwa me feiech mei opono. Uwa unusen ingeno ren ekewe porousen feiech a wor.
Uwa ingeiti ekewe engon me ew ierir sarafo enuwen ekewe, ra sounkowa iei, ra tongeni pasini ewe sakramen iteiten Raninfel. Ra nongeni ewe tempel fiti neuch kewe engon me ew ierir foppun, ekewe ra mwochen kaeo ngeni me angangen Beehives. Sarafo anuon me sarafo foppun ra afanafana enetin kapas allim fiti fatafatech me nukuchar.
Uwa pwapwa fiti ekewe semirit me sarafo ekewe ra aninis me osukuna ewe kapas allim non imwer kewe ar ra anisi iner me semer kewe ar repwe fiti foforun ewe pekin kaeo non-imw, aninis seni mwichefel.
Auwa angei sasingin emon ruwanu ierin Blake, ewe, non ew nesosoran Amon, a angei ew pukel Fan me apasa, “upwe amongoni Nguni!”
Blake, auwafituk me ingenome ekewe ekoch ra finata ar repwe amongoni ngunur kewe ren ar kametip non ewe enet ren ewe kapas allimen Jises Kraist mei kawor sefan. Me auwa kinisou am sinei pwe chomong ra angei ewe pechekunen Kot non manawer nupwen ra pini ngeni me angang non ewe tempel.
Usun chomong neimi ouwa sinei, am famini auwa mefi ewe chun kaimufesen unungat maram a no nupwen neum ewe nengin Wendy a kaimwu seni ei tapin manaw. Non ewe saingonon ranin an fiu ngeni cancer, Uwa feiech fan iten am we fansoun kapasen kaimu fesen an sam me nau.
Uwa kamwoch peun kewe me uwa apasa ngeni ukukun watten ai tongei me ukukun ai kinisou pwe ngang saman. Uwa pasa: “Ka pwupwunu non ewe tempel me fori omw kewe pwon non nukuchar. En me pwunuomw oua fen etiwa fuemon noumi kewe non imwemi me aitir pwe repwe pechekunen chon tapweto mwirin Jises Kraist, chon ewe mwichefen mi och, me chon angang non nenir. Ina chok usun pwunuwer kewe ra finata. Semom a fokun, unusen pwapwaituk. En ka wato chomong ai pwapwa!”
A penuweni non neukukun, “Kinisow, Papa.”
Ew fansoun kinamwe, nichipung ngeni kem. Fansoun an kewe 67 ier, auwa angang fengen, kon fengen, me fan chomong auwa ski fengen. Nge ena kunionun, auwa kapas usun metoch mei unusen euchea, usun pwon, angang, tupon, nuku, famini, pung, tong, me manaw ese mwuch.
Uwa unusen pwositi neum ewe nengin. Nge inamwo, pwokiten ewe kapas allimen Jises Krait mi niwinsefanito, ause noninen fan itan. Ren am sopweno me fori am kewe pwon ngeni Kot, auwa nomw me eureki am aupwe nomw fengen sefan Non ei fansoun, auwa angang ngeni ewe Samol ikei me ii A angang ngeni ikewe-non paratis.1
Mei pwung, ngang me punuei auwa fen no ngeni Paratis nepwopwutan ei ier-Paratis, California, ina. Usun a fis, am ewe fansoun ngeni ikena a fis kukun seni 40 auwa mwurin neum we nengin a kaimu seni ei fonufan. Am me Elter Kevin W. Pearson me pwunuwan, June, auwa apechekun me ren kewe aramas mi pin non ewe Chico California Steik. Auwa kaeo usun watten ar nuku, ar iamwir, me kewe feiech a fis non fansoun ar osukosuken nonomwur ren ewe waten kar non pworousen California.
Nupwen am nomw ikena, auwa kapas ngeni emon police, John, emon nein kewe ra akomw me aninis. A chechemeni ewe watten kiroch a pwenuweno Paradise non November 8, 2018, an kewe ngeten ekei me mochoch ra kitir ngeni non kewe kukun neni, ataeno neni me pisek usun ew pisekin kawet me ese wor met a nomwotiw me nukun kewe mwochoch me feun chimney.
Ukukun 15 awa John a sa won wan we non ew kiroch ewe a onuwokus usun fisika nupwen a anisi emon aramas mwurin emon aramas, famini mwurin famini ra fokkun tumun -menisin anongonongun manawan. Nge nupwen ei fansoun mei efeiengaw, met a kon onuwokusu John an kewe kapas eis: “Ian a nomw ia ai famini?” Mwurin chomong nakatamen, awa mei onuokus, mwurinon a sinei pwe ra nukunukech me tou seni nenier.
Wisen John ren an nuokusfan iten an famini a ngeniei ai upwe kapas ikanai ngeni ami kewe oupwe eis nupwen ouwa tori nesopwonon manawemi, “Ian a nomw ia ai famini?” Non ena ran epwe waroto nupwen kopwe awesano met kopwe fori non manawom me tonong non ewe fonuwen ngun, kopwe tori me kuna ena kapas eisen manaw: “Ian a nomw ia ai famini?”
Jises Kraist a aiti kich ewe an ngeni imwach ese mwuch. A weweiti an Samach non Nang echunon mwochen ese mwuch napseni emon me emon kich. Mwurinon, ii ewe pwopwun meinisin. Ii ach Chon Angasono, ach Chon Echikar, me ach Chon Amanaw.
Seni Adam me Eve ra tou seni ewe atake Eden, Jises ewe Kraist a fangono Peun kewe mei tekia pwe epwe anisi kewe ra finata repwe tapweno mwurin. A eniwini, kewe pukefel ra makei pwe, ina mwo ren ekewe sokopaten tipis seni sokopaten aramas, peun kewe meichiwen tamou.2
Ewe ngun mi pin non emon me emonkich a mwochen pwe tong non famini epwe nomw tori feinfeino. Ekewe konun tong a nikinikin kewe anean mei mwan pwe tong ina chok met epwe wor remw ika ka mwochen nomw fengen tori feinfeino. Me ekoch ra nuku pwe ewe manasefan an JisesKraist a aworato ew pwon pwe meinisin aramas repwe nomwfengen me atonger kewe mwurin mano.
Non enetin, pwusin ewe chon Amanaw a epwungano pwe an manawsefan a fis pwe aramas meinisin ekewe ra manaw repwe manawsefan me manaw tori feinfeino,3 a chomong met sipwe fori ika sia mwochen epwe nomwrech ewe manaw fefeita. Manaw ese mwuch an emon me emon osukosuk, nge manaw fefeita ew foforun famini.
Rongorongn geni kei kapas seni ewe Samol Jises Kraist ngeni neun Soufos: “Pwon mi pin meinisin, etipeew, tipew, wisach, pwon, riri, fofor, nefin, chiechi, ika mwochen, kewe rese for me tonong me riri meren ewe Ngun pwon mi pin…esapw wor pechekun, tupon, ika pechekun non me mwurin ewe manawsefan seni mano; ren etipeew meinisin kewe rese fori ngeni ei nesopwonon a wor nupwen aramas ra mano.”4
Iwe, me epwewor ren ewfaminiepwetongenifefeitafeinfeino. Sia tufich ngeni ena tufichin ach fori kewe pwon ngeni Kot, sia amechu kewe pwon, me angei kewe angang mei namot.
Ei a fen enet seni chok nepwopwutan fansoun. Adam me Eve, Noah me pwunuwan, Abraham me Sarah, Lehi me Sariah, me meinisin kewe chon kaeoneun Jises Kraist-seni fansoun ewe fonufan a fisita-a feri ewe pwon ngeni Kot. Ra fen angei ewe pwan usun chok fofor mei euchea kewe kich, chon Mwichefenin ewe Samol mei niwinisefanito ikanai, angei nupwen papatais me non ewe tempel.
Ewe chon Amanaw a tungor ngenikich meinisin sipwe tapweno mwurin ngeni ewe konikin papatais me, non fansoun, fori pwan ekoch pwon ngeni Kot non tempel me angei me nukunuk ngeni ekewe fofor mei euchea. Sipwe fori kei meinisin ika sia mwochen sipwe fefeita fengen me ach kewe famini me nomw ren Kot feifeino.
Riafoun manawei kewe chomong aramas uwa tonger, sanir, me ofonar rese etiwa an ewe tungor. Rese rongorong ngeni an Jises Kraist tungor nupwen a tungorer, “Feito, tapwoto mwuri.”5
Uwa weweiti pwata Kot a kechiw.6 Uwa pwan kechiw ren chiechiei kewe me aramasei kewe. Iirmwan me fefin murino , nukuchar ngeni ar kewe famini me wiser kewe. Ra fangafangech ar fansoun, pechekun, me pisekir. Me fonufan a echuno pwokiten ar kewe fofor. Nge ra finata resapw fori pwon ngeni Kot. Rese mwo angei kewe fofor epwe anisir ar repwe fefeita me ar kewe famini me nomwfengen tori feifeino.7
Fokkun ai anean pwe upwe tongeni feino rer me tungorer repwe ekipwichi usun ewe anukun ewe Samol. Uwa ekieki met upwe tongeni apasa pwe repwe mefi ukukun an ewe chon Amanaw tonger, repwe sinei ukukun ai tonger, iwe repwe sinei ifa usun an kewe fefin me mwan ra kamochunuk ar pwon repwe tongeni angei ew “wachemuken pwapwa.”8
Mei och repwe weweiti pwe mei wor ew neni iei fan iter-fiti mwan me fefin kewe rapwan finata resapw fori ar pwon ngeni Kot-esapw ina ewe nenii an famini repwe chufengen me ach sipwe nomw me echuno feinfeino. Ena esapw ewe mwuu ian repwe kuna me ia ew watten pwapwa-ren fefeita me pwapwa ese mwuch.9 Ekena feiechun nomw fengen epwe feito seni chok ach nomw non fefeitan non mwun ren Kot, samach ese mwuch; neun ewe, Jises Kraist; me ach kewe murinon, nonomwun, me chon ach famini.
Ua mwochen apasa ngeni chiechiei kewe
“Non ei manaw, kese mwochen nomw non nampa ruu non ew mettoch. Nge, nupwen a wate omw pwapwaiti ewe kapas allimen Jises Kraist, ka finata kopwe nampa ruu.
“Ewe chon Amanaw a apasa, ‘Mi chommong ruum non imwen Semei.’10 Nge ina mwo, omw ka finata kosapw fori pwon ngeni Kot, ka tipeew ngeni ngawen imwomw tori unusen manawomw.”
Upwe sopweno me ngeni chiechiei kewe me apasa:
“Ngeni Kot manawom. Eisini ika kei mettoch mei enet. Awora fansoun kaeo an kewe kapas. Kopwe wewesen kaeo! Ika ka enetin tongei omw famini me ika ka mwochen kopwe fitir me fefeita non unusen manawomw, fori iei chok – ren omw kopwekaeo me iotek – pwe kopwe sinei ekei enet fochofoch me kopwe forir.
“Ika kose uwonukunuk pwe en mei nuku non Kot, pwopwuta ikena. Weweiti pwe non an ese wor omw sinei usun Kot, emon mei tongen ian esapw nuku pwe mei wor Kot. Iwe, kopwe fori met kopwe tongeni pwopwuta me sinei usun I. Etekisona inisumw. Iotek omw kopwe kuna an Kot angang non manawom me non ewe fonufan unukumw. Tingorei epwe oronuk ika pwe Mi wesen nom ikewe – ika mei sisinek. Eisini ifa usun an memef fan itom. Me, rongorong.”
Emon chienei mei chok kukun an sinei usun Kot. Nge a mwochen epwe nomw ren pwunuwan we a fen mano. A tungor upwe anisi. Uwa epechekuna ngeni epwe churi ekewe misineri pwe epwe weweiti kewe anukun Kraist me kaeo ngeni ewe kapas allimen pwon, nongongong, me feiech.
Pwe a fori. Nge ese pasini ewe pekin kaeo iwe ra sinei pwe epwe fori chomong ekesiwin non manawan. A apasa, “Ekkewe annuk me pwon ra weires ngeni. Pwan, Use tongeni meni ai ew ne engon, me ese wor ai fansoun upwe aninis non Mwichefel.” Iwe a eisiniei, “Ika uwa mano, kose mowchen kopwe fori kewe angangen non tempel fan item me punuwei we pwe aupwe tongeni nomw fengensefan.”
Kinisow chok, pwe esapw ngang neun ei mwan chon kapwung. Nge uwa kapas eis ren foforun angangen non tempel fan iten ei mwan ewe afen wor ei fansoun ren an epwe papatais non ei manaw – an epwe efeich ngeni ewe pristut me angei ekewe feiechun tempel nupwen an nomw non ei manaw – nge ewe a finata an esapw foriei.
Atongei pwi me fefinei kana, Jises Kraist a mwochen sipwe fiti ewe anen pwon sefan ngeni imwach ngeni inach me samach kewe non Nang me sipwe nomw ren ekewe sia tonger. A tungorei kich pwe sipwe “feito, tapwotomwuri.”
Iei, ren Presetenin An ei Mwichefel, uwa tungor ngeni kemi ekewe ouwa towaw seni ewe Mwichefel me ekewe ouse mwo nengeni ami oupwe sinei pwe an ewe chon amanaw ei Mwichefel a fen niwinsefanito. Fori ewe angang mei pin pwe kopwe pwusin kuna, iwe kose mwochen fori iei. Esapw chiwen wor fansoun.
Ua pwarata pwe Kot mi manau! Jises ii ewe Kraist. An Mwichefel me unusechun an kapas allim a fen niwinsefanito an epwe efeichu manawach ren pwapwa, ikei me mwurin ikei. Ua pwarata non itan Jises Kraist, amen.