Siwin mi Pochokun me Fochofoch ngeni Semach won Nang me ewe Samon Jises Kraist
Am we popun pwe aupwe anonopuku memefin ewe Mwichefen me ewe imw non ew napanap epwe anapano nuku, pekin ngun, me apochokuna siwin ngeni Semach won Nang me ewe Samon Jises Kraist.
Usun Preseten Russell M. Nelson a keran chok apasa non ning me pwetete, souemwenin Mwichefen ra fen angang non fansoun nangatam won “ew kokkot epwe anongonong non imw me ewe Mwichefen epwe aninis ne kaeo annuk, apochokuna nuku, me pesei an emon pwisin epwe fen.” Mwirin Preseten Nelson a apasa ew ekkesiwin sipwe fori “ew minafon aukukoch nefinen kaeon kapas allim non ewe imw me non ewe Mwichefen.”1
Ach sipwe apwonueta ekkei popun—mi awewetiw seni me fan emwenien Preseten Russell M. Nelson me mwirin an ewe Mwichen ewe Aewin Presetensi me Mwichen ekkewe Engon me Ruemon Aposel finaata—ewe kokkotun mwichen Raninfel epwe ekkesiwin non ekkei napapap poputa non Janurary 2019.
Tettenin Mwichen Raninfel
Ekkewe mwichen Fenin Raninfel epwe masoweni ew mwichen sakramen mi 60-minich iteiten Raninfel, epwe anonga ewe Chon Amanau, efeiochun ewe sakramen, me porousen ngun. Mwirin fansoun ach sipwe no ngeni klas, chon Mwichefen repwe fiti ew klas 50-minich epwe ekkesiwin iteiten Raninfel.
-
Sukunen Raninfel epwe fis non ewe aewin me aunungatin Raninfel.
-
Mwichen Pristut, Fin Anisi, me Ekkewe Fopun epwe fis non ewe aruwen me aruwanun Raninfel.
-
Mwich non ewe animuwen Raninfel epwe fis fan emwenien ewe pisop.
Kinter epwe fis iteiten wik atun pwan chok ewe kinikinin 50-minich me epwe pachenong fansoun kon me klas.
Ren tettenin mwichen Raninfel, ekkewe souemwenin Mwichefen mi nap ra fen sinei non chommong ier pwe ren ekkoch nouch chon Mwichefen mi auchea, ew tettenin Raninfel mi unungat awa non fan epwe tongeni weires. Ei mi ennet ngeni sam me in ren kukkun semirit, semiriten Kinter, chon Mwichefen chinnap, minafo chon Mwichefen, me ekkoch.2
Nge mi pwan nap popun ei ekkesiwin nap seni chok ach omwochano ewe etettenin mwichen Raninfel. Preseten Nelson a a etiwa fiti kinisou ren watten met mi pwonueta pokiten ami nikitu ngeni ekkewe tingor akkom. I, me meinisin ekkewe souemwenin Mwichefen, ra mochen anapano pwapwan kapas allim ngeni sam me in, semirit, serafo, ekkewe mi anamon, ekkewe mi chinnap, minafo chon Mwichefen, me ekkewe aramas ekkewe misineri ra asukuner ren ew angang mi aukukoch mi anongonong non imw me ewe Mwichefen epwe anisi. Ekkewe popun me feioch mi fiti ei ekkesiwin me pwan ekkoch siwin mi pachenong ekkei:
-
Apochokuna siwin ngeni Samach won Nang me ewe Samon Jises Kraist me apochokuna nuku non Ir.
-
Apochokuna pwisin emon me famini me ren ekkewe nesen mi anongonong non imw ewe Mwichefen mi anisi ewe mi pesei pwapwan manaueni kapas allim.
-
Epini ewe ranin Sabbath, ren ami ekiek won efeiochun ewe sakramen.
-
Anisi meinisin noun Samach won Nang semirit mi manau me mi mano ren angangen misineri me angei efeioch me pwon mi pin me feiochun ewe tempel.
Anongonong non imw, me ewe Mwichefen epwe anisi ren kaeon ewe Kapas Allim
Ei etettenin Raninfel epwe awora fansoun ren pwinin famini me ach sipwe kaeo ewe kapas allim non imw non Raninfel, ika non ekkoch fansoun kich pwisin me famini repwe finata. Ew pwinin urumotun famini epwe tongeni fis non Sarinfan ika ekkoch fansoun. Ren ei popun, souemwen repwe sopweno an esap wor mwich ika urumotun Mwichefen non pwinin Sarinfan. Nge, ewe fansoun sia nom fengen non pwinin famini, kaeo kapas allim me urumot fan iten pwisin emon me famini epwe kokkot anongonong won pwisin nonnomur.
An famini me an pwisin emon kaeo kapas allim non imw epwe unusen napeno ren nesen mi wenengeni me ew minafon pisekin kaeo Feito, Tapweto Mwiri fan iten pwisin emon me famini ewe mi penu ngeni met sia kaeo non Sukunen Raninfel me Kinter.3 Non Janurary, an ewe Mwichefen klasin serafon me an watte Sukunen Raninfel me Kinter repwe kaeo ewe Testamen Sofo. Ewe minfon kaeo non imw Feito, Tapweto Mwiri fan iten pwisin emon me famini—pwan usun ewe Testamen Sofo—a fis an epwe anisi chon ewe Mwichefen ne kaeo ewe kapas allim non imw. A awewei: “Ei pisek epwe an emon me emon me famini non ewe Mwichefen. A fis an epwe anisi [ochu kich] ne kaeo ewe kapas allim—ika epwe [pwisin] won ach ika ren [ach] famini. … Ewe kokkot non ei [minafon] pisekin kaeo mi etetten non iteiten wik.”4
Ekkewe minafon nesenin Kinter itan Feito, Tapweto Mwiri mi keit non fan repwe chok pwan fiti ewe tetten iteiten wik. Ekkewe klasin Sukunen Raninfel an menumwuk me serafo non ewe aewin me aunungatin Raninfel repwene achufengen pwe repwe anisi ewe minafon pisekin kaeo non imw Feito, Tapweto Mwiri. Non ewe aruwen me aruwanun Raninfel, menumwuk non Pristut me Fin Anisi repwe sopweno ne kaeo ekkewe asukunen nouwisen Mwichefen, fiti auchean ekkewe porous seni nouch soufos ikenai.5 Ekkewe Fopun me anuon non Pristut seni Aaron repwe kaeo itenapen kapas allim non ekkena Raninfel.
Ewe minafon pisekin kaeo non imw a awora “Kokkot fan iten An Famini Kaeon Pukefel me Pwinin Famini.”6 Ekkewe etettenin ew me ew wik mi masoweni kokkoten kaeo epwe anisikich me urumot fan iten pwisin emon me famini. Mi pwan wor chommong awewe non ewe pisekin kaeo Feito, Tapweto Mwiri fan iten pwisin emon me famini repwe anisi ne anapano an emon me famini kaeo, akkaewin ngeni semirit.7 Ei minafon pisek epwe kawor ngeni ew me ew imw me mwen December non ei ier.
Preseten Nelson, seni an we akkomwen afanafan ngeni chon ewe Mwichefen non January, a fen peseikich ne amoneta ngeni ewe Aruwen Wareto an Jises Kraist ren ach sipwe fetan won ewe aanen pwon.8
Nonnomun fonufan a anapano namoten an emon epwe pwisin apochokuna an siwin me apochokuna nuku non Samach won Nang me Jises Kraist me An Achasefan. Ewe Samon a amonnakicheta, ekis me ekis, ren ekkewe fansoun weires sia kuna iei. Non ekkei chok ier, ewe Samon a emwenikich ach sipwe pochokun ngeni osukosuk usun chok mi pachenong:
-
Epini ewe ranin Sabbath me ewe efeiochun ewe sakramen mi pin minne a fen apochokun non ekkei unungat ier.
-
Fan emwenien ewe pisop, mwichen elter mi chuffengen me pochokununo me Fin Anisi ra anonga ar ekiek won popun ewe Mwichefen9 me anisi chon ewe Mwichefen repwe fori me apwonueta ar pwon mi pin.
-
Iamwir non ew napanap mi tekia me pin a fen fis non pwapwa.
-
Poputa ren nesopun non ach ekiek, pwonen tempel mi pin me angangen uruon famini ra winiti kinikin ewe aanen pwon mi auchea.
Ewe ekkesiwin a katou non ei sosoran ina pwan ew awewen emwen fan iten osukosuken ach fansoun.
An ewe Mwichefen kewe nesen me nom a fen aucheani Sukunen Raninfel. Kich mi sinei pwe nupwen a wor asukun mi murino me chon ewe klas mi kon moneta non pekin ngun, epwe murino ach memefin Sukunen Raninfel. Sia feioch pwe fan chommong ewe Ngun a anapano me apochokuna siwin non Mwichefen.
Mi auchea ewe minafon nesen mi anongonong non imw me ewe Mwichefen mi anisi an epwe pesei an famini fenin namanam mi kon manaman me nikink me an emon pwisin fenin namanam me mwokutukut. Kich mi sinei pochokunen ewe ngun me ewe siwin mi pochokun me fochofoch epwe tongeni fis non ewe imw. Ekkoch ier a no, ew kaeo a apungano pwe ren anuon me fopun ewe pochokunen ewe Ngun mi Fel a kan soun fiti an emon kaeo pukefel me iotek non ewe imw. Am we popun pwe aupwe anonopoku memefin ewe Mwichefen me ewe imw non ew napanap epwe anapano nuku, pekin ngun, me apochokuna siwin ngeni Samach won Nang me ewe Samon Jises Kraist.
Non kinikinin ei ekkesiwin mi anongonong non imw me ewe Mwichefen epwe anisi, epwe mecheres ngeni emon me famini ne ioteki usun me inet epwe fis. Ren awewe, nupwen epwe fokkun efeiochu famini meinisin, anongonong won met mi auchea ngeni ewe neni, epwe unusen tufich ngeni ekkewe mi nipich mi chok kukkun, menumwuk nipich, sam ika in anamon, fitemon chok memper non ewe famini, minafo memper,10 me ekkoch ar repwe chufengen non mwicheich me nukun fenin Raninfel ar repwe pwapwaiti aporousen kapas allim me pochokununo ren ar kaeo fengen pisekin aninis mi anongonong non imw me ewe Mwichefen epwe anisi. Ei epwe pwisin pwonueta me ren ekkewe ra mochen.
Non chommong kinikinin fonufan, aramas ra finata ar repwe nom non ewe imwen fan mwirin fenin Raninfel ar repwe aporous fengen. Ese wor mettoch non ei ekkesiwin epwe angawano ei mwokutukut mi amwarar me menemenoch non och napanap.
Ekkoch wart ra fen tinau porous non email, text, ika nenien aporous won internet nukanapen ewe wik ar repwe anisi memper ne mwoneta ngeni ewe Sabbath. Pokiten ei ekkesiwin, aua pesei ei sokkun pekin aporous fengen. Ekkei tingor repwe achema ekkewe memper usun tettenin mwichen Raninfel non ena wik, fiti ekkewe itenapen nesen repwe fis, me anisi soposoponon aporousen kapas allim non imw. Pwan, ewe mwichen menumwuk non Raninfel epwe awora porous ne achufengeni kaeon Mwichefen me imw iteiten wik.
Mi namot ewe fansoun ewe mwichen sakramen me klas epwe awora iotek me ekiek an epwe pwonuta tettenochun pekin ngun me repwe wesen fis nap seni ekkewe angang. Ren awewe, ekkewe porous mi tongeni repwe wesino me non ewe tingor nukanapen ewe wik ika won echo toropwe. Nupwen ewe mwichen sacrament epwe wor iotekin nepoputan me nesoponon, ewe aruwen mwich epwe chok awora iotekin nesoponon.11
Usun ua apasa akkom, ewe minafon etettenin Raninfel esap poputa tori January 2019. Mi wor ekkoch popun ei. Ekkewe ru mi kon auchea, aewin, an epwe wor fansoun einetin ewe pisekin kaeo Feito, Tapweto Mwiri fan iten pwisin emon me famini me, aruwan, epwe awora fansoun ekkewe presetenin steik me pisop repwe atetteni kokkotun mwich me achocho ngeni an ekkewe wart repwe mwich nepopun ewe ran.
Nupwen souemwen ra fen kutta pwarata, ekkewe emwen ra angei non ekkewe ier a no epwe apochokuna mwichen sakramen, epini ewe ranin Sabbath, me pesei me anisi sam me in me emon me emon ar repwe fori imwer epwe nenien apochokunen ngun me anapano nuku—ew nenien mwanek me pwapwa.
Feioch mi Amwarar
Met wewen ekkei ekkesiwin ngeni chon ewe Mwichefenin Jises Kraist ren Aramas mi Pin non Fansoun Soponon? Aua nuku pwe chon ewe Mwichefen repwe feioch non napanap mi amwarar. Raninfel mi tongeni epwe ranin kaeo kapas allim me asukun non fan me non ewe imw. Nupwen emon me famini ra fori mwichen famini, uruon famini, iwamir, angang, an emon pwisin fen ngeni, apwapwan fansoun famini, ewe Sabbath epwe ennetin ew apwapwa.
Ew famini seni Brazil ir chon ewe steik ikewe ia ewe minafon pisekin kaeon non imw Feito, Tapweto Mwiri a fen fis. Ewe sam, Fernando, emon misineri akkom, i me punuwan we, Nancy, ir semen me inen fomon kukkun semirit, ra repotuni: “Nupwen ewe prokram Feito, Tapweto Mwiri a tou non am we steik, ua fokkun pwapwa, me ua ekieki ‘napanapen am kaeo ekkewe pukefel neimw epwene siwin.’ Mi ennetin fis non imwei, me ren wisei souemwenin Mwichefen ua kuna pwe mi fis non ekkoch imw. … A anisikem ne porous usun ekkewe pukefel non imwem. Ngang me punuwei we a nap am weweoch usun ewe itenap aua kaeo. … A anisikem … anapano am miritin kapas allim, me awatteno am nuku me kapasen pwarata. … Ua apasa ai kapasen pwarata… pwe ngang mi sinei pwe a feito me ren ewe Samon pwe epwe fifis me murino kaeon ekkewe nongonong me annuk mi nom non ekkewe pukefel me a wato napenon nuku, kapasen pwarata, me saram ngeni ekkewe famini … non ew fonufan mi mwitir ngaweno.”12
Non ekkewe steik ir mi sotuni ei prokram enan esopun fonufan, mi wor ewe ponuwen ewe minafo pisekin kaeo non imw Feito, Tapweto Mwiri mi efich. Chomong ra repotuni pwe ra nuseni ar aneani ekkewe pukefel ngeni ar fen kaeo ekkewe pukefel. Napengeni ir meinisin ra pwan mefi pwe a ew apochokunen nuku me ew mettoch mi amwarar ngeni ewe wart.13
Siwin mi Pochokun me Fochofoch
Ewe popun ekkei ekkesiwin pwe epwe awora ew siwin mi pochokun me fochofoch non menumwuk me ewe maritan tappin aramas. Ewe aewin peichen ewe puken an pwisin emon me famini kaeo a affata: “Ewe popun kaeon kapas allim me afanafan pwe epwe apochokuna ach siwin me anisikich ne winiti usun Jises Kraist. … Ei wewen pwe sipwe anongonong won Kraist an epwe siwini netipach.”14 Ei a fis ren ach aninis “nap seni ewe rumwen kaeo ngeni non netipen emon non imw. Mi namot ach sipwe achocho ne weweiti me manaueni ewe kapas allim iteiten ran me fansoun meinsin. Mi namot angangen ewe Ngun mi Fel ngeni ennetin siwin.”15
Ewe kokkot mi kon auchea me amuchunon feiochun aporous mi anonnon me fochofoch ina ewe nimenimochun angei ekkewe pwon mi pin me efeiochun ewe aanen pwon.16
Am mi nuku pwe oupwe aurour fengen me kutta pwarata ren aean ekkei ekkesiwin—nupwen ese nuno ami neno seni ewe esisin ika sotuni ne ota pwisin emon ika famini. Pwan ekkoch porous repwe tou non ekkoch aporous repwe fis, mi pachenong echo toropwe me osopun seni ewe Aewin Presetensi.
Ua pwarata ngonuk pwe non ekkewe aurour fengen an ewe Mwichen ewe Aewin Presetensi me we Mwichen Engon me Ruemon Aposel non ewe tempel, mwirin an nouch we soufos mi tong a tingorei ewe Samon fan iten pwarata ren am pwe poputa ren ekkei ekkesiwin, am meinisin aua angei pungun mi pochokun. Russell M. Nelson i nouch Preseten mi manau me soufos. Ekkewe porous a fis ikenai epwe apungano watten feioch ngeni ekkewe mi pwapwaiti ne etiwa ekkewe siwin me kutta emwenien ewe Ngun mi Fel. Sipwe arap ngeni Semach won Nang me ach Samon me Chon Amanau, Jises Kraist, ekkewe ua enntin pwarata usun. Non iten Jises Kraist, amen.