Eu non Kraist
Chienei kana non an ewe Samon angang, ua nuku sia tongeni me tufichin etiwanong chienach minefo non ewe Mwichefen.
Neanowas annim, ami pwii me fefinei kana! Non fosun fonuei Brasil, “Boa tarde!” Ua feioch ua fiti ei chufengen non ei mwichenapen Mwichefenin Jises Kraist ren Aramas mi Pin non Fansoun Soponon fan nemenien nouch soufos, Preseten Russell M. Nelson. Ua men mwar ren ach tufichin ausening ngeni anon ewe Samon me ren noun chon angang won fonufan ikenai.
Non fonuei Brasil mi chommong mettoch mi feito seni ewe fonu. Eu mettoch ina ewe chonupupu Amazon, eu chonupupu mi itefouno me mi fakkum tam me chowatte. A fis seni ru chonupupu, iter Solimões me Negro. Oupwe sinei, pwe ra sa fengen non fitu mwain ekkewe konik repwe chufengen pokiten ekkewe chonupupu ra sokono muttirin, nepoputan, pwichikaran, me masouan. Mwirin ekkoch mwain, ekkewe konik ra nofit fengen, me winiti eu chonupupu mi sokono seni ir pwisin. Nupwen chok ekei pupu ra nofit, ewe Chonupupu Amazon a fakkun pochokkun me a tori ewe Setin Atlantic , me ewe konik a kusuno non ewe sat.
Usun chok ekkewe chonupupu Solimões me Negro ra sa fengen ne winiti ewe watten Chonupupu Amazon, ekkewe noun Kot ra chufengen non ewe Mwichefenin Jises Kraist mi niwinsefan seni sokkofesenin nonnomur, orenier, me nenier, me ra forata ei mwichen Souneng non Kraist. Soposopono, ika sipwe achocho me aninis me tong fengen , sipwe winiti eu pochokkun fofforoch non fonufan. Pun kich noun Jises Kraist chon angang, chufengen non eu me non ewe chonupupun mi murinno, sipwe awora “konik nimoch” ren ewe kapas allim, ngeni fonufan mi kaakaa.
Ewe Samon a emweni noun Soufos repwe aitikich ifausun sipwe apochokkuna me tongefengen, pwe sipwe eu chok non nuku me popun ne tapweno mwirin Jises Kraist. Paul, ewe Aposel seni ewe Testamen Sofo, a aiti ekkewe ra “papatais non Kraist ra wata Kraist wor … : pun meinisin eu chok non Kraist Jises.”1
Sia pwon ren ach papatais pwe sipwe tapweno mwirin ewe Chon Amanau, me pwarata mwen mesan ewe Sam pwe sipwe mwarei woch ewe iten Kraist.2 Ika sipwe achocho ne manau usun chok napanapan, sia sokkono seni noom, ren ewe Achasefan an Kraist ewe Samon, me ach tong ngeni aramas a mecheres ne wateno.3 Sia ennetin mefi noninen ren an aramas kinamwe me pwapwa. Sia sine fengeni kich pwe kich pwipwi me momongeang, pwe noun Kot kewe mi feito seni nang, napanapoch, me watte pochokkun. Sia mochen aninis fengen me angasa fengeni ach chourek.4
Iei anon Paul an awewei tong ennet.5 Mormon, emon soufosun ewe Puken Mormon, a awewei pwe ewe ennetin tongen Kraist,”6 ina ewe mi ennet, me pochokkun sokkun tong. Nouch soufos, Preseten Russell M. Nelson, a awewei ei sokkun tong ren angangen aninis, eu sokkun angang mi nengeniochu me epinano ach achocho ne tongei me tumunu fengenikich usun ewe Chon Amanau.7
Sipwe ekiekochu eu nongonongen tong me tumun, usun ewe Chon Amanau a fori, fan iten ach apochokkuna, anisi, me pesei ekkewe ra minafo ngeni mwichefen me ekkewe ra mochen fiti ach kewe mwichen Fan.
Nupwen chienach kei minefo ra nikitano mokutukutun fonufan me etiwa ewe kapas allimen Jises Kraist, me choni An Mwichefen, ra winiti noun chon kuno, upusefan ren I.8 Ra nikiti ei fonufan ra sinei me finata ar tapweno mwirin Jises Kraist, ren unusen netiper, fitano eu chonupupu mi fo usun ewe Amazon—eu konik mi fakkun pochokkun non murinno me fofforoch me kunu ngeni ewe muun Kot. Ewe Aposel Peter a awewei pwe “eu muu mi pin, pwisin noun Kot aramas, pwe oupwe aronga fetanei porausen an kewe manaman, ewe a kokkori kemi seni rochopwak ngeni an saram.”9 Ren chienach kei minafo ra tonong non ei konik rese sinei, ra ekis mwanecheno. Chienach kei ra kuna ar nofit non eu konik mi sokkono nepoputan, pwichikaran me masouan—eu konik mi wor orenian, fansoun apwapwa, mwokutukutun, me kapasan. Ei manau mi fo non Kraist meni a weires ngenir. Ekieki akaewin ar rongorong ekkoch poraus usun “Fenin Famini ”, “Mwichen Serafo me Pisop,” “Ranin Echikifen,” “papatais fan iten mi mano,” “unungat pukefel non eu,” me pwan ekkoch.
A mecheres sipwe weweiti ika ra mefi pwe ir chon nukun. Non ekei atun, repwe eisini pwisin ir, “Mi wor neniei ikei? Ngang mi fich ngeni ewe Mwichefenin Jises Kraist ren Aramas mi Pin non Fansoun Soponon? Ngang mi namwot ngenir? Epwe wor chienei minafo repwe anisi me apochokkunaei?”
Chienei achengicheng, non ekkei atun, meinisin kich sia achocho ne fetan won ewe aanen ach souneng sipwe aninisfengen ngeni chienach minafo, etiwer ia chok ra nom ia, me anisir, tongeir me etiwarenong non manauach. Chienach kei meinisin ir mi auchea pwe ir noun Kot.10 Sise chok tongeni nikitano emon neir pun, usun chok ewe pupu Amazon mi anongonong won ekkewe kukkun pupu mi kus ngeni, ir mi namwot ngenikich usun chok kich mi namwot ngenir ach sipwe winiti eu manaman mi murinno non fonufan.
Chienach minafo ir mi pwan feioch ren Kot non ar nepwakoch, pwapwa me murinno non pwisin ir. Ar meseik ren ewe kapas allim a tongeni kuu kich, a apwapwai ach nuku. Ra pwan ekieki mettoch mi ekis sokkono senikich non manauer me ewe kapas allim.
Sia chok kakaeo ifa usun sipwe anisi chienach minafo repwe mefi ach etiwer -me tongeir non ewe Mwichefenin Jises Kraist mi niwinsefan. Mi wor unungat mettoch mi namwot ika repwe nikiitu non manauer:
Aewin, mi namwot ngenir pwiir ika fefiner o mongeer non ewe Mwichefen ir mi ennetin tongeir me chiechi ngenir me repwe tongeni kunu ngeni, ion epwe fetan ren, me ponueni ar kapas eis. Kich memper, sipwe kutta aramas minafo non ach Fan ika urumwot ika mwich, ese nifinifin non met wisach, osukosuk are noninen. Sipwe fori kukkun mettoch pwe repwe mefi tongen ewe Samon non ewe Mwichefen, awewe ren ach kapong ngenir me emenimen, mwot rer non kon o fan fengen, me anisir ne kapong ngeni pwan ekkoch memper. Ika sipwe suki netipach ngeni chienach kana non ekkei napanap sia angang non ngunun aninisoch. Ika sia aninisoch ngenir usun ewe Samon, resap mefi pwe ir chon nukun. Repwe mefi ir mi nonnom rech me epwe wor chiener me auchean, repwe mefi tongen ewe Chon Amanau ren ach ennetin tumunur.
Oruen, mi namwot epwe wor wisan chienach minafo—eu tufichin anisi ekkoch. Aninisoch ika eu tipachemen ewe Mwichefenin Jises Kraist ren Aramas mi Pin non Fansoun Soponon. Iei ewe napanap epwe apochokkuna ach nuku. Mi pwan namwot ei tufich ngeni memper minafo. Ika mo ewe pisop me mwichen nouwisen ewe wart ir repwe awora wiser mwirin chok ar papatais, esap wewen pwe kich memper sisap tingorei ekkei minafo ar repwe anisikich non wisach kewe ika anisi ekkoch.
Aunungatin, chienach minefo repwe “tumun me ren ewe kapas mi och an Kot.”11 Sia tongeni anisir repwe tongei me weweiti ekkewe pukefen nupwen sia aneani me awewe masouan ngenir, me affata ewe poraus me ekkewe kapas mi weires. Sia pwan tongeni aitir usun ar pwisin pwarata mi fis ren ar anneani pukefel. Sia pwan tongeni korir non imwer pwe repwe fitikich non imwach nukun chok ach kewe mwich mi fifis, me anisi ar repwe nofit non ewe pupu mi pochokkun ren ekkewe Souneng.
Ach essina ifa usun mi siwin me weiresin an chienach kewe minafo repwe winit chon an Kot famini, pwe ir pwiich me fefinach kewe, sia tongeni awewe ifa usun kich sia pwan pwaracho ngeni weiresin manauach. Epwe anisir pwe esap ir anaemon nge Kot a pwan efeichur ren ar angang non nuku.12
Nupwen ekkewe konik Solimoes me Negro ra nofit fengen, ewe Chonupupu Amazon a wesen pochokkun. Pwan ina usun ika sipwe etiwa me angang ren chienach kewe minefo, ewe Mwichefenin Jises Kraist mi niwinsefan a anapano me apochokkunano. Punuei itan Rosana, me ngang am mi kinisou ren ekkewe ra anisikem ne nofit non ei konik mi fo fitu ier ano, nupwen aua etiwa ewe Kapas Allimen Jises Kraist non fonuem we Brazil. Ren ekkewe ier a no, ekkei aramas mi murinno ra fakkun anisikem me emweni kem pwe aupwe sopweno am kunu ngeni fofforoch. Aua fokkun kinisou ngenir.
Ekkewe Soufos non Merika ra sinei ifa usun chienach minafo repwe nofit fengen non ei pupu mi murinno mi sa ngeni manau ese much. Awewe, non an kuna ach ran me a sinei sipwe kuna weires usun an kewe weires,13 Moronai a pwan awewei ekkoch mettoch non an makkei non ewe Puken Mormon:
“Iwe mwirin ar ra fen mumuta ngeni papatais, me ra ememef me nimochuno me ren manamanen ewe Ngun mi Fel, ra anneanong nein ekkewe armasen ewe mwichifenin Kraist; iwe iter ra makketiw, pwe repwe tongeni chechemeni ir me tumun me ren ewe kapas mi och an Kot, pwe epwe annomur non ewe aan mi pung, pwe epwe annomur ar repwe tumunuoch ne iotek, repwe apinukunuk chok won ekkewe fofforun Kraist, I ewe popun me ewe chon ounusa ar nuku.
“Iwe ewe mwichefen a mwich fengen fan chommong, pwe repwe echikipin me iotek, me pwe repwe kapas fengen nefiner usun tufichin ngunur.”14
Chienei kana non an ewe Samon angang, ua nuku pwe sipwe aochueno ach foffor me sipwe achocho pwe sipwe etiwaochu minafon chienach non ewe Mwichefen. Ua pesei oupwe ekieki met sipwe fori pwe sipwe etiwer me aninisoch ngenir non ei chok Raninfen. Ousap mwut ngeni wisemi non Mwichifen epwe epeti ach achocho ne etiwa chienach mi fo non mwich me urumwot. Ennet, ekkei ngun ir mi auchea fan mesan Kot me ir mi auchea nap seni wis me urumwot. Ika sipwe iamwir ngeni chienach mi fo ren unusan netipach me ennetin tongen ewe Chon Amanau, ua pwon, non itan pwe I epwe anisi ach achocho. Ika kich ennetin chon aninis, usun ewe Samon, chienach repwe kuna ewe aninis mi namwot pwe repwe pochokun, achocho, me nikiitu. Repwe fitikich pwe noun Kot mi pochokkun me repwe uweito konik ngeni eu fonufan mi ennetin kaka ren feiochun ewe kapas allimen Jises Kraist. Ekkei noun Kot resap mefi “ouse chuwen chon nukun are chon ekis, pun iei oua fiti noun Kot kewe aramas, iwe oua chon an Kot we famini.”15 ua pwon pwe repwe esinna nonnomun ach we Chon Amanau, Jises Kraist, non An Mwichefen . Repwe sopweno ne sa rech usun chonupupu ngeni konik murinno tori ewe Samon Jises Kraist epwe etiwer; me repwe rong anon ewe Sam, “Oupwe kuna manau ese much.”16
Ua peseikemi oupwe kutta aninisin ewe Samon ne tongei aramas usun a tongeikemi. Sipwe tapweno mwirin ewe aurour a kawor me ren Mormon: “Ina minne, ami pwi achengicheng, iotek ngeni ewe Sam ren unusen pochokkunen netip, pwe oupwe ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist.”17 Ren ekkei mettoch ua pwarata non iten Jises Kraist, amen.