Fan Itan
Sineinapen ewe io me pwata non ach angang ngeni ekkoch a aniisikich ne weweiti pwe napen pwarin tong pwe ach angang ngeni Kot
Non ei auchean pwin, ua apasa ai tong me kinisou ngeni emon me emon ami, pwi achengicheng. Ese nifinifin ierich, neniach, are nonnomuch, sia chufengen non ei pwinin non tipeew, non pochokun, non popun, me non kapasen pwarata pwe sia tong me emwen me ren Semach won Nang; ach Chon Amanau, Jises Kraist; me nouch soufos mi manau, Preseten Russelln M. Nelson.
Nupwen aua keran pupunu, ngang me punuwei we aua kokko me ren noum we pisop pwe aupwe churi me iwamiri ew famini rese fafan non chommong ier. Aua chengen ne etiwa ewe koko me feino ren imwer we ekkoch ran me mwirin. Mi mwitir fat ngenikem pwe rese mochen chon ewe Mwichefen repwe churir.
Atun aua pwan churir mwirin, aua feino ngenir fiti ew peneichen kukis, aua apinukunuk pwe foun chokonet epwe apwetetei netiper. Rese. Ewe pean pupunu ra kapas ngenikem me non amin ewe asam, ra affataochu pwe ause ketiw. Nge nupwen aua sa ngeni imwem, aua nuku pwe epwe fen fetanoch ika pwe am fen ngenir Rice Krispie.
Nafangawen am ekiek non pekin ngun a pwan fori met am kewe sossot epwe fokun eningeringer. Ach sise ketiw ese kinamwe. Mwirin ekkoch fansoun aua poputa ne pwisin eisinikem, “Pwata sia fori ei? Met ach we popun?”
Elter Carl B. Cook a apasa ei: “Angang non ewe Mwichefen … mi tongeni epwe weires ika sia emwir pwe sipwe fori och mettoch mi anuokusu kich, ika sia pekus ne angang, are ika sia kokko ngeni ach sipwe fori och mettoch sise kuna pwe mi apwapwa.”1 Aua weri usun ennetin an Elter Cook kewe kapas nupwen aua finata pwe aupwe kutta emwen seni ion mi wor an mirit mi nap seni am.
Iwe, mwirin ennetin iotek me kaeo, aua angei ponuwan ewe kapaseis pwata aua fori ewe angang. A siwin am wewe, a ekkesiwin netip, ennetin ew fen fansoun a affateno ngenikem.2 Nupwen aua kutta emwen seni ekkewe pukefel, ewe Samon a aitikem ifa usun aupwe fori tettenin angang ngeni ekkoch epwe mecheres me auchea. Iei ewe wokisin aua anneani a siwini netipem me am mwokutukut: a apasa “Pwe sipwe tongei ewe Samon ach Kot ren unusen netipach, ren unusen ach tufich, ekiek, me pochokun; me non iten Jises Kraist sipwe angang ngeni I.”3Ina mwo am mi sinei ei wokisin, nge a kapas ngenikem non ew napanap mi fo me auchea.
Aua apareni pwe aua fen ennetin achocho ne angang ngeni ei famini me angang ngeni ewe pisop, nge a fori am aua eis ika aua ennetin angang pokiten am tongei ewe Samon. King Benjamin a affata ei sokofesen nupwen a apasa, “Nengeni, ua apasa ngenikemi pwe pokiten ua fen apasa ngenikemi pwe ua fen ranini rani kewe non ai angang ngenikemi, use mochen ai upwe sikasini, pun ua fen chok angang ngeni Kot.”4
Iwe ion ewe King Benjamin a ennetin angang ngeni? Samach won Nang me ewe Chon Amanau. Ach sinei ion me pwata ren ach anisi ekkoch a fori met sipwe weweiti pwe ewe pwanon tong mi nap ina ach nikitu ngeni Kot.
Nupwen am ekiek a siwin ekis me ekis, iwe am iotek a pwan siwin. Aua poputa ne esukusuku ne churi ei famini pokiten am tongei ewe Samon.5 Aua fori fan itan. I a fori am kewe osukosuk epwe paneno. Mwirin chommong maramen am porous ngenir me nukun asamer we, ewe famini a poputa ne mutata am aipwe tonong. Ekisino, aua poputa ne iotek iteiten ran me porous fengen usun ewe kapas allim. Am chiechioch fengen a fis. Aua fen ngeni me tongei I ren am tongei Noun kewe.
Ami mi tongeni ekieki sefan usun ew fansoun nupwen oua aninis ren ennetin ami achocho ne anisi emon mi nom non osupwang me mefi pwe rese apareni ami achocho are kinisou ngeni are ketiw? Non ena fansoun, en mi kapas ei ika om angang me auchea ngenir? Ika ewer, amwo ekkewe kapas an King Benjamin repwe siwini ami tipemwaramwar me ami chou: “Nupwen oua angang ngeni chiechiemi aramas oua chok angang ngeni ami Kot.”6
Me nukun ach forata koput, ren ach angang ngeni ekkoch, kich mi tongeni fen forata ew nefin ngeni Semach won Nang mi unusoch. Ach tong ngeni me nikitu ngeni epwe asueno ewe mochenin ach sipwe sinneno are mefi auchea me mut ngeni An tong epwe feito rech me nom non kich.
Fan ekkoch eni sipwe angang ngeni ekkoch pokiten ina wisach, nge ena mwo angang mi tongeni emweni kich ach sipwe aea och mettoh mi nap non kich, epwe emweni kich ne angang non “ew manau mi murinno”7—usun an Preseten Nelson we tingor ngeni “ew kokkoten tumunu ekkoch me iwamiri ekkoch mi kon fo me pin.”8
Nupwen sia anonga ach ekiek won mettoch meinisin Kot a fen fori fan itach, ach angang ngeni epwe feito seni kinisoun netip. Nupwen epwe kis ach aureki pwe ach angang epwe atufichi kich, sipwe apareni pwe nongonongen ach angang epwe nom won Kot akkom.9
Preseten M. Russell Ballard a aitikich “Nupwen chok atun sia tongei Kot me Kraist ren unusen netipach, ngunuch, me ekiek ina sipwe tongeni aea an tong ngeni chon oruch seni fofforun kirekiroch me aninis.”10
Ewe aewin me nein ekkewe Engon annuk a anniwini ei mirit: “Ngang ewe Samol ami God … Ousap pin ngeni emon god nge oupwe chok pin ngeniei.”11Nenian ei annuk a anisikich ach sipwe weweiti pwe ika sipwe ekieki pwe sipwe akkomwa I, mettoch meinisin repwe weweoch non nenier—pwan mwo ach angang ngeni ekkoch. Nupwen I epwe nom non auchean manauach ren ach popun finata, iwe I epwe afeiochu ach foffor fan itach me fan iten ekkoch.
Ewe Samon a aurour, “Nenengeniei ren ekiek meinisin.”12 Me iteiten wik sia pwon pwe sipwe fori ena—pwe sipwe chechemeni I fansoun meinisin.13 Met ei sokkun nongonongen ekiek seni Kot mi tongeni fis non mettoch meinisin sia fori? Ach fori ew angang ese weires mi tongeni winiti ew tufichin pwarano ach tong me nikitu ngeni I? Ngang mi nuku pwe mi tongeni me epwe fis.
Kich mi tongeni fori ekkewe tettenin mettoch sipwe fori ar repwe winiti ew aanen ach sipwe mwareiti I. Met kich mi tongeni kuna ekkei angang pwe ew tufich me feioch ne angang ngeni I, inamo ika sia nom nukanepwen feiengaw, wis, ika aap mi nimengaw?
Usun Ammon a apasa, “Ewer, ngang mi sinei pwe ese wor namotei; usun ai pochokun ngang mi apwangapwang; iei minne usap sikaseni inisi, nge upwe sikaseni ai Kot, pun non an pochokun ua tongeni fori mettoch meinisin.”14
Nupwen ach angang ngeni ach Kot epwe winiti ewe akkomwen mettoch non manauach, sipwe monnukano inisich, iwe nesoponon, sipwe kuna ion kich.15
Ewe Chon Amanau a aiti kich ei nongonong mi mecheres me wenechar: “Iei minne mut ngeni ami saram epwe sarameno me mwen ekkei aramas, pwe repwe tongeni kuna ami kewe foffor me mwareiti Sememi we ewe mi nom non nang.”16
Ua mochen upwe ngeni kemi ekkoch kapasen mirit ra pwa me won etippen imwen semirit non Calcutta, India: “Ika en mi kirekiroch, aramas repwe eitengawok ren mwokutukutun tipenap. Kopwe chok kirekiroch. Met ka forata non chommong ier, emon mi tongeni atano non ew pwinin. Forata chok. Ewe mettoch mi och ka fori ikenai, aramas mi kan monnuki nesor. Fori chok mi chok. Ngeni ewe fonufan emuchun om tongeni, me eni esap naf. Ngo ngeni chok ewe fonufan emuchun om tongeni. Kopwe sinei, pwe nesoponon mettoch meinsin, a nefinom ngeni pusin om ewe Kot ina met aukachean.”17
Pwii kana, iteiten fansoun meinisin epwe nefinach me ewe Samon. Usun Preseten James E. Faust a apasa: “Met ewe mi kon auchea me non ewe fonufan?’ … ‘Esap ewe mettoch mi kon auchea me non ewe fonufan ngeni aramas meinisin pwe epwe soposopono nefinach iteiten ran ngeni ewe Chon Amanau?’ An epwe wor ena sokkun nefin mi tongeni pwarano ewe manaman non kich, me esap wor och mettoch a tongeni fori ew watten sokofesen non manauch nupwen sia sinei me weweiti usun nefinach mi manaman ngeni Kot.”18
Usun chok, Alma a awewei ngeni noun we at, “Ewer, mut ngeni om foffor meinisin epwe ngeni ewe Samon, iwe ian chok kopwe no ia mut ngeni epwe non ewe Samon; ewer, mut ngeni om ekiek meinisin epwe wenengeni ewe Samon; ewer mut ngeni memefin netipom epwe nom won ewe Samon feinfeino chok.”19
Me Preseten Russell M. Nelson a pwan aitikich, “Nupwen sia weweiti An Achasefan, och memef pwe sia fori och fangeno epwe unusen kuf ren watten memefin kinisou ren tufichin ach angang ngeni I.”20
Pwii kana, Ua pwarata pwe nupwen Jises Kraist, me non manamanen An Achasefan, a angang won kich me non kich, A poputa ne aea kich ne efeiochu ekkoch. Sia angang ngenir, nge sipwe fori ren ach tongei me angang ngeni I. Sipwe winiti met ewe uwokisin a anapanapa: mwan me fefin meinsin ra kutta pwapwan monun unukur, me fori mettoch meinisin ren ew mas ngeni ewe ningen Kot.21
Meni noum we pisop mi sinei pwe ina ewe nesen ngang me punuwei we aupwe kaeo seni ekkena akkomwan me ennetin sossotun iamwir, nge rese unusoch, ngeni Noun at me nengin achengicheng. Upwe apasa ai pwisin me ennetin pwarata usun ewe kirekiroch me tong A aea ngeni kich pwan mwo nupwen sia achocho ne angang ngeni I. Non ewe it mi pin Jises Kraist, amen.