Ka Mochen pwe Kopwe Pochokuneta?
Pokiten ewe Achasefan an Jises Kraist, ika sia finata ach sipwe aier me kunu unusen manawach ngeni ewe Chon Amanau, epwe angasakich non ngunuch.
A keran fitu maram non an angangen misineri, neum ewe enuwen aat me chienan ewe ra awesi ar kaeo nge neum ewe aat a mefi ekis metek non mekuran. A unusen sokono met a mefi; aewin ese chiwen mefi peun peniefefin, mwurin chenakanan a unun. Peniefefinan won mesan a pwopwuta me menisetiw. A weires an epwe pworous. A sinei pwe mei ngaw met a fisingeni. Met ese sinei pwe a nomw non ew watten stroke non unungat kinikinin non mekuran. A pwopwuta an nuokus nupwen an a pwopwuta me peseni pekin inisin. Mwutirin aninis ngeni chon stroke a ina nongonongun ekesiwinin an chikar. Chienan ewe misineri a unusen angangech. Mwurin an kekeri 911, apwan iotekii. Ew feiech pwe, ewe ambulance achok nimu minich totawan.
Mwurin neum ewe aat a mwutir ngeni ewe pioing, kewe chon angangen safei ra cheki ewe osukosuk me ra finata pwe repwe ngeni och safei ngeni neum ewe aat ewe epwe tongeni eniwinisafan pechekunan mwurin angeien ewe stroke.1 Nge, ika neum ewe aat ese tori ewe stroke, ewe safei mei tongeni watte ngawan, usun ren pwuun chaan non tupwuan. Neum ewe aat epwe finata. A finata an epwe angei ewe safei. Ina mwo ika mei chomong pekin safei me chomong maram ren an epwe chikar sefan, neum ewe aat a niwin sefan me awesi an ewe angangen misineri, mwurin feiengawen ewe stroke ra chikar seni.
Samach non Nang mei unusen pechekun me sinenap. A sinei ach osukosuken inis. Apwan sinei metekin inisich ren faniten samaw, paiking, metek, akseten, ika osukosuken upwutiw. Apwan sinei osukosuken ach fofor fan iten nuokus, akanamon, noninen, samwaun ekiek. A sinei emon me emon aramas a torir feiengawen angangangaw. A sinei ach apwangapwang me met kich mei fofori me kewe mwochen sia ani weiresin.
Seni ei manau sia sossot ika sipwe tongeni fini eech seni ngaw. Ren ekewe ra fori an kewe annuk, repwe nonomw ren “non ew fansoun ese mwumwuch pwapwa.”2An epwe anisikich non ach mamarita ach sipwe usun ii, Samach non Nang afen ngeni pechekun me sine meinisin ngeni Noun ewe aat, Jises Kraist. Ese wor samwauninis, fofor, ika ngun Kraist esapw tongeni angasano.3
Fansoun an ewe Samon ewe angang non an manaw, ewe Pukefel a aitikich chomong fofor mei amwarar ren an Jises Kraist aa an pechekun me angasano ekewe ra mefi weiresein inis.
Ewe kapas animen John a aiti ngenikich pworousen emon mwan ewe nomw non samaw non38 ier.
“Nupwen Jises a kuna atewe mi kokon, iwe a sinei pwe ewe mwan a semwen non fansoun nakatam, iwe a eisini, met ka mochen kopwe pochokuneta?”
Ewe apwangapwangen mwan a penuweni pwe ese wor enomw an epwe anisi nupwen a watte an wonungaw.
“Jises a apasa ngeni, uta, angei kiomw me fetan.
“Mwitir chok ewe mwan a pochokuneta, iwe a angei kian we o a poputa ne fetan.”4
Kose mwochen ekieki me katon fite tamen an ewe mwan weires nge ese wor chon anisi (38 ier) me a ifa mwutir an ngasono nupwen ewe Samon pwopwuta me anisi. Ewe ngasono a “mwutir.”
Pwan ew awewe, emon fefin non an osukosuken cha 12 ier, ewe a “neuni meinisin neun moni an churi sou safei, … a fetan nukun sekurun, me a atapa nepwunun ufan ewe: me an ewe osukosuken cha a mwutir me kukununo. …
“Jises a apasa, awor a atapaei: iwe uwa mefi pwe ai pechekun a tou seniei.
“Iwe nupwen ewe fefin a kuna pwe ese opono, ewe fefin … a apasa ngeni fan mesen kewe aramas meinisin … ren an a mwutir ngasono.5
Non an angangen namanam, Kraist a aitikich pwe mei wor an pechekun seni inis. Sise tongeni emwechu fansoun an Kraist epwe angasono semwenin inisich. Angasano a fis non an mwochen me sine. Non ewe Pukfel, ekoch aramas ra weires non fitu ngerou ier, ekoch aramasnon unusen manawer. Ach manaw mei apwangapwang epwe tongeni echueno kich me awateno ach nukunuk non Kot. Nge nupwen sia mwut ngeni Kraist epwe fitikich, Epwe epechekuna kich fansoun meinisin non ngun pwe epwe wor ach watten tongeni ach sipwe achocho non ach uwochow.
Akaewin, sipwe sinei apwangapwangen inis meinisin, samwaw, ika nipwakingaw ewe wesino fansounewe ranin manaw sefan. Ina ew nifang ngeni aramas meinisin ren manon Jises Kraist.6
Jises Kraist a tongeni angasa kich nap seni chok inisich. A pwan tongeni angasano ngunuch. Non kewe Pukfel sia kaeo usun an Kraist anisi kewe ngunur me apwangapwang me angasereno.7 Nupwen sia ekieki usun kei sia sinei, ach anean me nuku non an ewe Samon pechekunen efeiechu manawach a wateno. Jises Kraista tongeni ekesiwini manawach, a angasakich seni kewe foforun kapwungungaw me efeiengaw sia tonong non, me a awateno ach tongeni ach sipwe engino ngeni mano me netipeta, epwe wato ach kinamwe an epwe anisikich me engino ngeni osukosuk non manawach, echikara mefiach.
Kraist a pwan tongeni angasakich nupwen sia fori tipis. Sia tipis nupwen sia sinei pwe sia atai an Kot kewe annuk.8 Nupwen sia fori tipis, ngunuch ese chiwen nimech. Ese wor och mettoch ese nimech epwe nomw non nenien Kot.9 “Ach sipwe nimech seni tipis [sipwe] ngasono non ngunuch.”10
Kot ewe Sam mei sinei pwe sipwe fori tipis, nge a fen fori ew an ach sipwe tongeni ngasono. Elter Lynn G. Robbins a aitikich: “Aier esapw an [Kot] sokun ekiek ren fansoun sipwe tur. Aier ina an ekiek, pwe a sinei pwe sipwe fori met meimwan.”11 Nupwen sia fori tipis, sia tongeni pwusin finata eech me ngaw. Sia finata eech nupwen sia aier mwurin sia fori tipis. Non Jises Kraist me an mano, sia tongeni ngasono seni ach tipis me niwin sefan me nomw ren Kot ewe Sam, ika sia aier. Ngasonon ngunuch esapw chok ew sokkun—apwan anongonong non an ewe Samon pechekun me unusechun aierin tipis seni ewe chon tipis. Ren ekewe ra finata pwe resapw aier, rese mwochen ewe anen angasono an Kraist. Fan iter a weires ese wor manaw ngenir.12
Nupwen uwa mwich ngeni ekoch aramas kewe ra mwochen aier, uwa ingeno pwe kewe aramas ra nomw non tipis a weires ar repwe fori met meiech. Ewe Ngun mi Fel esapw nomw rer, me ra nipwakingaw non ar repwe fori met epwe anisir ar repwe kan ngeni Kot. Ar nipwakingaw non fitu maram ika fen ier, ra sau ika nuokus ren niwin ar kewe tipis. Fan chomong ra mefi pwe rese tongeni ekesiwini ika resapw menukuno. Uwa rongorong iteitan ar kapas fan iten ar nuokus ika aramaser kewe ra sinei met ra fori, resapw chiwen tonger me repwe peutireno. Nupwen ra ekieki kei sokkun ekiek, ra fori ren ar rachok fonofonono iwe ra amanga ar repwe aier. Ra ekieki pwe mei fen ech ar resapw aier iei pwe ochou netipen kewe ra tonger. Ra ekieki mei fen eech repwe weires mwurin ei manaw nap seni ar repwe fori ar foforun aier iei. Pwii me fefinei kana, esapw ew ekiek mei ech ach sipwe witiwitino non ach pekin aier. Ewe chon kopwut a fen aa nuokus fansoun meinisin an epwe epetikich seni ach sipwe mwutir me angang won ach nuku non Jises Kraist.
Nupwen atongeach kewe ra sinei usun ach kewe foforun tipis, nupwen repwe mefi netipechow, fan chomong ra mwochen anisi kewe iir mei mwochen repwe aier seni ar tipis me siwin me omwusomwus ngeni Kot. Ewer, ngasonon ngun a echuno nupwen kewe chon tipis ra pwarano me ra nomw ren ekewe mei tonger kewe chon tipis me anisir kewe chon tipis repwe peutano ark ewe tipis. Kose mwochen chechemeni pwe Jises Kraist mei tekia pwokiten mei pwan angasa kei rese tipis ra feito ren.13
Elter Boyd K. Packer a afata: “Ngunuch a ngawono nupwen sia fori met mei mwan me fori tipis. Nge esapw usun nonomwun manawen inisich, nupwen ewe foforun aier a wesino, ese wor kinas mei nomw pwokiten Jises Kraist a mano fanitach. Ewe Pwon: ‘nengeni, io ewe a aier seni an tipis, pwan nenechok a mwusono, me ngang, ewe Samon, usapw chiwen chechemenir’ [Doctrine and Covenants 58:42].”14
Nupwen sia aier “non unusen netipach, ewe Chon,” 15 “mwutir chok ewe euchean pwonen amanaw epwe tonong” non manawach. 16 Ewe Chon Amanau epwe echikara kich.
Chienan ewe misineri me kewe chon angangen safei kewe ra anisi neum ewe aat a stroke non an angangen misineri ra angang mwutir. Neum ewe aat a finata epwe angei ewe safen stroke. Ekewe mwirimwirin an ewe stroke ita repwe fiti ii tori mwuchun manawan ra siwin. Usunchok, mwitirin ach sipwe aier me wato feiechun an Jises Kraist Achasefen non manawach, pwan ina kaian ach sipwe chikar seni foforun tipis.
Preseten Russell M. Nelson a tungor ngenikich: “Ika kose chiwen nomw non ewe kapas allim, … Uwa tungor ngeni kemi … kose mwochen niwinito. Met omw ekichow, met omw osukosuk, mei wor neni fan itom ikei, an ewe Samon ei Mwichefen. En me kewe rese mwo upwutiw oupwe feiech ren ami fofor iei ami niwinito non ewe anen pwon.”17
Ngasonon ngunuch fiti ach sipwe fangono manawach met kewe ach Samon a fen awewei. Sisapw mang! Sipwe fori ikanai! Fori iei pwe apwangapwangen ngunumw esapw epeti fefeitan manawom. Nupwen uwa fen kakapas, ika ka mefi pwe kopwe tungor omwusomwus omw tipis meren akoch, uwa tungorek kopwe fori. Urenir met kafen fori. Tungor ar repwe omwusakono. Ika ka fori och tipis a angawa omw kopwe tongeni tonong non temple, uwa tungorek kopwe churi noumw pisop ikanai. Kosapw amangano.
Pwii me fefinei kana, Kot inai Samach mi tong enet non lang. Afen ngeni kewe pechekun me tipachem meinisin ngeni neun aat mei tong, Jises Kraist. Fan itan, aramas meinisin epwe non ew ran repwe ngasono seni apwangapwangen inis meinisin feinfeino. Pwokiten ewe Achasefan an Jises Kraist, ika sia finata ach sipwe aier me kunu unusen manawach ngeni ewe Chon Amanau, epwe angasakich non ngunuch. Ewe ngasono epwe mwutir me pwopwuta. Ewe finata pwusin ach. Sipwe unusech sefan?
Uwa pwarata pwe Jises Kraist a meni niwin pwe sipwe unusech sefan. Nge sipwe finata ach sipwe angei ewe safen ngasono a ngenikich. Angei ikanai. Kosapw witiwitino. Non iten Jises Kraist, amen.