Emwenin Ngun
Sia anisi ekkoch ren tong pokiten ina met ewe Samon a annuku ngeni kich.
Ekkiseno we chok am me emon chienei aua foos fengen, me a ereniei pwe nupwen i emon anuon, a keran papatais non ewe Mwichefen, mwirin chok a poputa ne mefi pwe ese chiwen ketiw me non an wart. Ekkewe misineri minne ra aitii ra feinno ekkis, me a mefi pwe ese chiwen wor emon a ekieki. Pokiten ese wor chienan non ewe wart, a kutta sefani chienan kewe seni nom me a fitir ne fori mettoch minne a aweiresi an epwe fiti fan- tori a poputa ne rikino seni ewe mwichefen. Fiti chenun mesan, a foosun an ennetin kinisou pokiten emon seni ewe wart a achocho ne chiechi ngenii me iamwiri me, ren kirekiroch me unusen tong fengen, a tingor ngeni pwe epwe niwin sefan Ren fitu chok maram a pwan nom sefan me nein ekkewe chon ewe Mwichefen, me a appchokuna ekkoch tori pwan pwisin i. Me kich sia men kinisou ngeni ewe chon maas non ewe wart non Brazil minne a kutta ewe anuon, itan Elter Carlos A. Godoy, minne iei a mwomwot nesekuri ren wisan chon ewe Presetensin ekkewe Fiik.
Met ese amwarar ifa usun mettoch mi kukkun a tongeni awora watte siwin ren fenfeinno? Ei napanapen ennet a nom nukanapen an ewe Mwichefen angangen aninnis ngeni ekkoch. Semach won Nang a tongeni siwini ach kukkun achocho iteitan ran ngeni mettoch mi manaman. A keran wonu maram seni ewe atun Preseten Russell M. Nelson a esinesin pwe “ewe Samon a fori och siwin mi auchea ngeni napanapen ach sipwe eteneki ekkoch,”1 awewen, “Sipwe forata eu minafon sokkun napanap mi pin sipwe eteneki me iamwiri ekkoch. Sipwe chok eita ngeni ekkei angang ‘iamwir.’”2
Preseten Nelson a pwan awewei: “Eu auchean sokofesenin an ewe Samon ennetin Mwichefen mi aniwinato pwe fansoun meinisin epwe wor atettenin me ach achocho ne iamwiri emon me emon noun Kot kewe me ar kewe famini epwe atettenoch me epwe wor popun. Pokiten ei An Mwichefen, kich Noun chon angang sipwe iamwiri ewe emon, usun chok A fori. Sipwe iamwir non Itan, ren An pochokun me mwumwuta, me pwan ren An tong mi kirokiroch.”3
Met ami oua fori pokiten ewe esinesin a men amwarar! Aua fen rongorong porous seni napengeni meinisin ekkewe steik won fonufan pwe a men fisioch ami poputani ekkei siwin pokiten met nouch soufos mi manau a erenikich. Awewe, pwiich me fefinach kewe chon iamwir ra fen angei iten ekkewe famini repwe churi, iochiener– fitipwan ekkewe anuon me fopun- a fen fat, me ekkewe interfiuen iamwir ra fen poputa.
Use nuku pwe ew chok seroch pwe wonu maram me mwen ewe esiesinen nanew—“ew minafon nonnopok me ririfengen nefinen aurouren kapas allim non ewe imw me non ewe Mwichefen”4—ewe esinesin mi pwato usun iamwir a kawor. Poputa non January, nupwen epwene kisitiw ew awa non ach fenin mwichefen, mettoch meinisin sia kaeo non iamwir epwe anisikich ne anonnopoku sefan ena fansoun mi ponnuno non ew ranin Sabbath mi anongonong non imw mi nap me pin ren famini me atongeom kewe.
Ren ekkei napanap mi tettenochsia fen fori, men isipwe eis, “Ifa usun sipwe sinei ika kich mi iamwir non napanapen ewe Samon? Kich mi anisi ewe Chon Maas mi Allim non ewe napanap A mochen?”
Non am chok keran porous President Henry B. Eyringa mwareiti ekkewe Souneng ren ar poputani ekkei siwin nge a pwan foosun an ennetin apinukunuk pwe ekkewe memper repwe esinna pwe iamwir a nap seni “ach sipwe chok kirekiroch .”Nge esap pwe kirekiroch ese auchea, nge ekkewe ra weweiti ewe ennetin wewen iamwir ra esinna pwe a men watte seni kirekiroch chok. Ika sia fori non napanapen ewe Samon, iamwir a tongeni awora siwin mi murinno ngeni fenfeinno, usun chok a fis ren Elter Godoy.
“Ewe Samon a isetta ewe nenien appiru ren wewen iamwir ren An anisi ekkoch seni tong. … A … aiti, iotek fan iten, me ekinamwe, me efeiochu ekkewe A nom ren, me A etiwa meinisin repwe tapweno mwirin I. Ika chon ewe Mwichefen repwe iamwir [non eunapanap mi nap me pin], ra iotek me achocho ne angang usun I epwe—ne … ‘mamaasa ewe mwichefen fansoun meinisin, me fitir me apochokuner,’ ‘churi imwen meinisin ekkewe memper,’ me anisi emon me emon ir ar rewpe winiti emon ennetin chon kuno noun Jises Kraist.”5
Sia weweiti pwe ennetin chon maasa a tongei noun kewe siip, a sinei iter, me “a mochen sinei usun” nonnomur.6
Emon chienei seni nom a fori angangen foon maan non unusen manauan, a fori ewe angang mi weires usun foon kou me siip non ewe fonu mi weires non ekkewe chuk Rocky Mountains. Fan eu a aporausa ngeni ei ewe weires me osukosuk a tongeni fis nupwen sia foon siip. A awewei pwe non ewe fansoun a poputa pwichikar sefan me chipu esap chiwen wor ewe watte snow won ekkewe chuk, a minata nour me an famini kewe siip usun 2000 siip won ewe chuk ren ekkewe maram mi pwichikar. Iwe a mamaasa ekkewe siip tori a poputa patapat sefan, minne fansoun repwe mwokut seni nenier won ewe chuk ngeni pwan eu neni fan iten fansoun patapat non ewe nenien pwichikar. A awewen usun an tumunu eu watten mwichen siip mi weires, a chok anamwota pwe epwe fangeta fansoun annut–a neneno me mwen totan akar me sopweno tori a fen tupuno. Ese tufich an epwe fori pwisin ichok.
Pwan ekkoch ra anisii ne tumunu ekkewe siip, ekkoch ra fen fofori me ra sineioch me ir ra angei aninis me ren ekkoch kukkun senir minne ra feioch seni ewe mirit ra angei seni chiener. A pwan angei aninis seni ruemon oris mi sineioch, ruemon oris ra keran poputa ne kaeo wiser, ruemon konakensiip mi sineioch, me ruemon ika unumon konakensiip mi kukkun. Fan ekkewe maram mi pwichikar, a tori chienei me noun kewe siip asepwan me watten pungun ran, semwen, feingaw, fansoun ese pung ran fan chommong, me chipu ngeni meinisin met mi weires emon a tongeni anchang usun. Ekkoch ier a namwot repwe uwei ngeni ekkewe siip unusen unumer konik pwe resap mano. Pwan, iteitan iern upwen a tori fansoun patapat, me ekkewe siip ra suseni ewe chuk rete osukosuk ren ewe snow me patapat ina atun repwe anneanir, me napengeni epwe nu seni 200 ra monucheno.
Ewe mwichen 2000 siip a feinno won ewe chuk non ekkewe maram a keran pwichikar a kukkun enongeni ese chiwen 1800. Napengeni meinisin ekkewe siip ra monucheno esap seni semwen ika ra chok ma, nge seni maan mi efeingaw usun kattun won chuk, me konak mwacho. Ekkei maan mi efeingaw repwe kutta ekkewe kukkun siip minne ra rikinoseni ewe mwicheich mi tumun, iwe ra towaw seni fan tumunuen ewe chon maas. Iwe ouse mochen oupwe ekieki usun met uwa keran awewe ren pekin ngun? Ion ewe chon maas? Ion ewe mwicheichen siip? Ion ekkewe chon anisi ewe chon maas?
Ewe Samon Jises Kraist A pwisin apasa, “Ngang ewe chon mmasen siip mi murino, … iwe ngang mi tongeni mano fan iter.”7
Ewe soufos Nifai a pwan aiti kich pwe Jises epwe “amwongoni noun siip, iwe non i repwe kuna aninisin aion.”8 Uwa angei watte kinamwe non ai sinei pwe “ewe Samon i ai chon mas”9 me I a sinei kich meinisin me sia nom fan An tumun. Nupwen a tori kich ekkewe asepwan me monumon non manauach, semwen, efeingaw, fansoun ese pung ran, ewe Samon—ach Chon Mas—epwe iamwiri kich. Epwe apochokuna sefani ngunuch.
Usun chok chienei a tumunu noun siip ren aninis seni ekkewe chon angang me kukkun ierir me ekkewe ra watte, ekkewe oris, me ekkewe konakensiip, aninis a pwan namwot ngeni ewe Samon ren tumunun noun kewe siip An mwicheich.
Pokiten kich noun Semach won Nang minne a tongei kich me kich emon siip non An mwichen siip, sia pwapwa ren ewe feioch pwe Jises Kraist a iamwiri emon me emon kich pwisin. Fiti chok, a pwan wor wisach ne iamwiri ekkewe chon unukuch usun kich chon mas pwan. Sia ausening me fori usun kapasen ewe Samon ne “kopwe angang ngeniei me feinno non itei, me … ion fengeni nei kewe siip.”10
Ion ewe chon mas? Mwan, fefin, me semirit non ewe muun Kot meinisin ir chon mas. Ese namwot epwe wor wisach. Seni chok ewe atun sia tou seni ewe konikin papatais, a wor wisach ne fori ei angang. Sia anisi ekkoch ren tong pokiten ina met ewe Samon a annuku ngeni kich. Alma a awewe: “Pun menni nei chon masen siip … mi wor chommong noun siip nge ese maser, pwe ekkewe wonif rese tonong me oromi noun kewe penen man? … Met esap asueu?”11 Inet ichok chon unukuch ra osukosuk won pekin aion ika pekin ngun, sipwe mwitir ne anisir. Sia eki an pwan emon chou pwe epwe paan. Sia netipengaw ren ekkewe ra netipengaw. Sia ekinamwe ekkewe a wor ar mochenin kinamwe.12 Ewe Samon non an tong a anamwota ei seni kich. Me ewe ran epwe war pwe sipwe angei niwinin ach ach achocho ne iamwiri An mwich.13
Chienei chon masen siip a pwan awewei pwan eu auchean kinikin ren tumunun siip non nenier. A aporausa pwe ekkewe siip mi monucheno ra men mecheres ne feingaw me ren ekkewe maan mi efeingaw. Me ennet, usun 15 persenir me noun chon angang fansoun ra kukutta ekkewe siip mi monucheno. Ika ra mwitir ne kutta ekkewe siip mi monucheno, me mwen ra fen towaweno seni ewe mwichensiip, a kukkuneno ewe tufich pwe ekkewe siip repwe feiengaw. Tipepos me engino a namwot ne kutta sefan iekkewe siip mi monucheno.
Fitu ier me nom, ua kuna ewe poraus non ewe taropwen poraus non neniei a men auchea uwa isoni. Ewe itenapa era, “Emon Konak mi Tipepos Esap SuSeni ekkeweSiip mi Monucheno.”14 Ei poraus a foos usun fite mon siip seni ewe mwichensiip ese towawseni nenien chienei me ekkeisiip ra chiwen nom won ewe nenienchuk mwirin ekkewe ra fen feinno. Ru ika unugat maram mwirin, rese monucheno me rese tongeni feitiwseni ewe chuk pokiten ewe snow. Nupwen ekkewe siip ra rikino seni ewe mwich ewe konakensiip a nom rer, pun ina wisan epwe tumunu ekkewe siip. Ese tongeni epwe kouno seni wisan. Ina a chok nom ngenir – pwennieno ekkewe siip mi monucheno non fitumaram non ewe patapat me snow, ne tumunur seni ekkewe konak mi mwacho, kattu won chuk, ika minne chok maan epwe mochen efeingawer. A nom rer tori a tongeni emwenir ngeni ewe chon mas me mwichensiip sefan. Ewe sasing mi fiti ei poraus a mut ngeni emon an epwe kuna mesan me napanapen emon konak a wisen tumunu siip.
Non ewe Testamen Sofo, sia kuna ewe poraus me aurour seni ewe Chon Amanau minne a awora mettochun wisach chon mas, chon iamwiri fefinach me pwich, ekkewe siip mi monucheno:
“Ika emon me neimi a wor ipuku noun siip nge emon me neir a monucheno, met epwe for? Epwe chok nikitano ekkewe tiwe-me-tiwemon siip non ewe maneman, iwe epwe feinno kutta ewe emon a monucheno tori an epwe kuna.”
“Nupwen a kuna, epwe fakkun pwapwa, iwe epwe ekieta won afaran.
“O uweiano non imwan. Iwe, epwe kokkori chienan me monunun ukun kewe o epwe apasa ngenir, ‘Ua fokkun pwapwa pun ua fen kuna nei we siip mi monucheno.”15
Ika sia ekieki usun unusen wewen ei poraus, sia kuna ei auchean auraur.
-
Sipwe esinna io ekkewe siip mi monucheno.
-
Sipwe kutta ir tori sia kuner.
-
Nupwen sia kuner, meniepwe namwot sipwe uweiir won afarach ne eniwinirsefan.
-
Sipwe fori pwe epwe chommong chiener nupwen ra niwin.
Pwii me fefinei, ach watten weires me ach watten feioch epwe tori kich non ach iamwir ngeni ekkewe siip mi monucheno. Ekkewe chon ewe Mwichefen non ewe Puken Mormon “ra nenengeniochu nour kewe aramas, me tumunur non mettoch ren pekin wenechar.”16 Sia tongeni ani ar nenien appiru ren ach sipwe chechemeni pwe iamwir a wewen pwe sipwe “emwen me ren ewe Ngun… tufichinsiwin, me … fan iten namwoten emon me emon ekkewe memper pwisin.” Mi pwan auchea pwe sipwe “achocho ne anisi emon me emon me ekkewe famini amonata fan iten minne ar annuk pwisin repwe fori, me apwonueta ar kewe pwon mi pin … , pwe repwe pochokun pwisin ir.”17
Ngun meinisin ra auchea ngeni Semach won Nang. An pwisin tingor ne iamwir a nap auchean me niwinin ngeni I, pun ina An angang me ning. Ennetin ei ewe angangen fenfeinno. Ese tufich ne sinei tufichin emon me emon Noun kewe me non An ekiek. A tongeok ren eunapen tong sise tongeni weweiti. Usun ewe konakensiip mi tipepos, ewe Samon epwe nom won chuk ne tumunu en non eweasepwan, pung ran me snow me met chok.
Preseten Russel M. Nelson a aiti kich non ewe chok mwichenap: “Ach porausn ngeni ewe fonufan [me upwe pwan apachenong, ‘ach mwichen iamwir’] mi chok mecheres me ennet: sia etiwa meinisin noun Kot kewe won ir me ru pekin ewe minen epet ne feittongeni ewe Samon, me angei ekkewe feiochun ewe tempel mi pin, angei pwapwa ese muuch, me atufichikich ne angei manau ese muuch.”18
Sipwe men achocho ne tinikeni, pwe sipwe emweni ngun ngeni ewe tempel me akaewin ngeni ach Chon Amanau, Jises Kraist. Ese anamwota pwe sipwe fori manaman. A chok tingor pwe sipwe uwei pwiich me fefinach ngeni I, pun mi wor An pochokun ne amanaua ngun. Ren ach sipwe fori ei sipwe angei an pwon: “Iwe nupwen ewe Chon Masen Siip Mi Nap epwe pwato, oupwe angei epa mwaramwar mi ningoch fenfeinno.”19 Usun ei uwa pwarata usun ekkei mettoch—me usun Jises Kraist pwe I ach Chon Amanau me ach Chon Angasano—non iten Jises Kraist, amen.