Ennet me ewe Kokkot
Nupwen sia kutta ewe ennet ren namanam, sipwe fokun aea pekin ngun ngeni met a tufich ren ach kut.
Pwarata ren ikkenai a awewei ennet pwe ew mirit ren mettoch a fis iei, me usun met ra fis me nom, me usun met repwe fis (nengeni Doctrine and Covenants 93:24). Ena ew unusochun awewen ewe kokkotun manau ese much me “An ewe Famini: Esinesin ngeni ei Fonufan.”
Sia nom non ew fansoun nupwen porous a tikeri towau me parasfetan. Nge esap meinisin ekkena porous epwe pung. Mi auchea sipwe tumunoch nupwen sia kutta ennet me finiochu ia si kutta me ian. Sisap atononga pisekin fonufan esenamot pwe ikkei ekkei repwe ngeni kich ennet. Sipwe tumunoch usun ach anongonong won aurour an ekkewe mi itefouno, ekkewe mi angoch non pekin urumot, ika porous seni emon ese fat won internet. Angoch non ew pekin sisap mutata pwe a unusen angoch non pwan ekkoch itenap.
Sipwe pwan tumunoch usun ewe popun ewe emon a awora ewe porous. Ina pokiten ekkewe pukefel ra annuku senikich usun mokutokuten pris mi ngau (nengeni 2 Nifai 26:29). Ika ian ewe porous a feito me ian ese fat, eni ewe porous esap pwan wenechar.
Ach pwisin finata epwe anongonong won porous seni ekkewe mi angoch won ewe itenap me esap wor tatakis pokiten an emon kirikiringaw.
I.
Nupwen sia kutta ewe ennet usun namanam, sipwe aea mettochun ngun mi fich ngeni ena kut: iotek, ewe pwarata an ewe Ngun mi Fel, me kaeo ekkewe pukefel me ekkewe kapas an nouch soufos ikenai. Ua soun netipengaw nupwen ua rong usun emon a repotini pwe a tur seni an nuku non namanam pokiten an afanafanen fonufan. Ekkewe mi fen wor ar kuna me nom non pekin ngun mi tongeni riaffou seni ar pwisin ochuner ren ar kuna ei fonufan. Usun Preseten Henry B Eyring a apasa, “Ar osukosuk ese anongonong won met ra ekieki pwe ra kuna; a nom won met rese kuna.”1
Ekkewe mettochun sains ra uweikich ngeni met sia eita ngeni ennetin pung. Nge “ennetin pung” esap ina ewe unusen popun manau. Ekkewe rese sinei ren ar kaeo me ren nuku (nengeni Doctrine and Covenants 88:118) ra auku ar weweiti ennet ngeni met sains mi tongeni apungano. A awora ekkewe aukuk mi muan won ach kutta ennet.
Preseten James E. . Faust a apasa: “Ekkewe ra fen [papatais] ra efeiengawa ngunur ren ar tumunungaw ne kutta chok ekkewe pisekin fonufan ren pekin kaeo. Sia nuku pwe Ewe Mwichefenin Jises Kraist ren Aramas mi Pin non Fansoun Soponon a wor ren ewe unusochun ewe kapas allimen Jises Kraist, minne kapas allim ina ewe auchean kinikinin ennet me mirit esemuch.”2
Sia kuna pwapwa mi ennet mi nukuchar ren ach sinei me foffor won ewe ennet usun ion kich, ewe wewen manau won fonufan, me ian sipwe no ia nupwen sia mano. Sise tongeni kaeo ekkena ennet me ren mettochun sains ika fonufan.
II.
Iei upwene kapas usun ennetin ewe kapas allim mi niwinsefan ir ekkewe nongonongen ewe annukun Ewe Mwichefenin Jises Kraist ren Aramas mi Pin non Fansoun Soponon. Ouse mochen ekiekiochu ekkei ennet. Ra awewei usun ach annuk me asukun, eni mi pachenong ekkoch sise mwo weweiti.
Mi wor emon Kot, i ewe mi tong Semen ekkewe ngun meinisin io ra fen manau me nom ika io repwe angei manau.
Mwan ika fefin ir esemuch. Mwen ach uputiw won ei fonufan, kich ngun mwan me fefin sia nonnom fan mesen Kot.
Sia keran chok ausening ngeni ewe Tabernacle Choir non Temple Square ar konu “I Will Follow God’s Plan.”3 Ina ewe kokkot Kot a forata pwe Noun ngun semirit meinisin repwe fefeita esemuch. Ena kokkot mi auchea ngeni emon me emon kich.
Non ena kokkot, Kot a forata ei fonufan pwe ew neni ikewe Noun kewe semirit ngun achengicheng repwe uputiw non ei manau pwe repwe angei ew inis me angei ewe tufich ne fefeita esemuch ren ar finata met mi tupwen.
An epwe auchea, mi namot epwe fis an chon fonufan finata nefinen pochokunen och me ngaw. Mi namot epwe wor apponuwan, iwe iei ewe chon koum, ewe a katuruu pokiten an ungeni, a mumuta an epwe sotuni noun Kot semirit ne ungeni an Kot kokkot.
Popun an Kot kokkot pwe epwe ngeni Noun semirit ewe tufich ne finata manau esemuch. Ei a chok tongeni pwonueta ren ach sinenapei fonufan me, mwirin mano, ren ach marita mwirin mano me non ewe fonufanen ngun.
Fansoun manau won fonufan, epwe tori fansoun kich meinisin sipwe mano me sipwe nimengaw ren tipis nupwen sipwe tup ngeni sossot an ewe chon koum, me nesaponon sipwe chok kuna mano. Sia etiwa ekkena weires ren ach nuku ewe pwon pwe Kot Semach epwe awora emon Chon Amanau, Ena Chon Amanau, Noun we Anamon, epwe angasa kich ren ew unusen manausefan ngeni emon mwirin mano. Ewe Chon Amanau, ewe epwe pwan awora ew achasefan an epwe moni niwinin meinisin pwe repwe nimoch seni tipis anongonong won met A forata. Ekkena nongonong mi pachenong nuku non Kraist, aier, papatais, ewe niffangen ewe Ngun mi Fel, me pwan ekkoch angangepin mi fis me ren ewe mumutan pristut.
An Kot we kokkotun pwapwa a awora ew wenechar nefinen pung esemuch me ewe chen sia tongeni angei seni ewe Achasefanin Jises Kraist. A pwan atufich kich ne siwin ngeni emon aramas mi sofo non Kraist.
Emon Kot mi tong a wau poun ngeni emon me emon kich. Kich mi sinei pwe seni An tong me pokiten ewe Achasefanin Noun we Anamon, “aramas meinisin repwe kuna manau, ren ar aneasochisi ekkewe annuk me angangepin [An] Kapas Allim.” (Nongonongen Achifoua 1:3; auchean mi kapacheta).
Ewe Mwichefenin Jises Kraist ren Aramas mi Pin non Fansoun Soponon mi fateno pwe ew Mwichefenin famini. Nge met ese weweoch pwe ach ionapei famini a anonga esap seni chok nefinach me won fonufan. Nefinach esemuch ir mi pwan auchea ngeni ach sukunen nuku. “Ewe famini a kefinita seni Kot.”4 Fan ewe kokkot mi nap an ach we Chon For, ewe misin ren An we Mwichefen mi niwinsefan pwe epwe anisi ekkewe noun Kot ne angei ewe feiochun manau fefeita non ewe muun Selestial, minne a tongeni chok tufich me non ew apupunu esemuch nefeinen emon mwan me fefin (nengeni Doctrine and Covenants 131:1–3). Sia affata an ewe Samon afanafan pwe “sokofesenin mwan me fefin ew nikinikich mi auchea me non ewe manau akkom, iei, me napanap me popun esemuch pwe “apupunu nefinen emon mwan me fefin mi auchea ngeni An we kokkot esemuch.”5
Saingonon, an Kot tong mi fokkun nap pwe, tiwenon chok ekkewe fitemon ra mochen winiti noun ewe mi poutmwanino, I a fen awora ew feiochun ning fan iten Noun kewe. Ekkewe mi fen mano ir ra pwan fiti “Noun kewe meinisin.” Sia fori angang fan iter non ach kewe tempel. Popun ewe Mwichefenin Jises Kraist pwe epwe anisi Noun kewe repwe fich ngeni ew ning mi tekia, ina ewe manau fefeita ika manau esemuch. Ren ekkewe rese mochen ika fich ngeni, ren ena, Kot a awora ngenir nenier ngo ekkewe muu mi kukkun non pusin ar ning.
Ion mi weweiti ekkei ennet esemuch mi tongeni weweiti pwata kich chon ewe Mwichefenin Jises Kraist ren Aramas mi Pin non Fansoun Soponon ekiek usun kich mi ekieki me fori usun kich mi fori.
III.
Iei upwene apasa ekkoch aean ekkei ennet esemuch, ekkewe sa chok tongeni weweitir me non saramen an Kot kokkot.
Aewin, sia asufonu ach pwisin pungun finata. Napengeni aramas mi sinei usun an ewe niwinsefaniton Mwichefen an atures ne anisi ewe ngasenon finatan om namanam me non Merika me unusen fonufan. Ekkei angang rese pesei chok ach mochen nge, anongonong won An kokkot, ra kutta ne anisi noun Kot meinisin ne pwapwaiti ewe ngasenon finata.
Aruwan, kich sia aramas misineri. Fan ekkoch aramas ra eisinikich pwata sia tinano misineri ngeni chommong muu, pwan mwo nein chon mi nuku Kraist. Ra pwan eis ewe kapaseis usun pwata sia fangeo minion moni ngeni aninisin aramas ekkewe esap ir chon ach we Mwichefen me pwata sise achufengeni ei aninis ngeni ach angangen misineri. Sia fori ei pokiten sia aucheani pwe meinisin aramas ir noun Kot—ir pwich me fefinach—me sia mochen aea fengen ngenir ach feiochun pisek me feiochun ngun ngeni ir meinisin.
Aunungatin, manau mi pin ngenikich. Ach nikitu ngeni an Kot kokkot epwe pesei kich ach sipwe ungeni atai monukon me angeiano manauen emon mi riaffou.
Aruanuan, ekkoch ra osukosuk ren met ach we Mwichefen mi nuku usun pupunu me semirit. Ach miriti usun an Kot kokkotun amanau mi pwano a apochokuna kich ne ungeni chommong ekkewe echimwen aramas me annuk ne suseni erenien pupunu ika fori siwin mi aosukosuka ika siwini me tonano sokofesenin mwan me fefin. Kich mi sinei pwe nefinen aramas, nonnomuch, me wisen mwan me fefin ir mi auchea ach sipwe apwonueta an Kot kokkot.
Enimuen, a pwan sokkono ach ekiek won semirit. Sia ekieki pwe nounoun me tumunun semirit ina kinikinin an Kot kokkot ew wis mi apwapwa me pin an ekkewe a wor rer ewe pochokun ne fori. Non ach ekiek, pwe ekkewe pisek auchea mi nap won fonufan me nang ir nouch kewe semirit me mwirimwirich kewe. Ina minne, sipwe aiti me ngenir ekkewe nongonong minne ra awora etipew ren maritan me pwapwan semirit—semirit meinisin.
Saingonon, kich noun Semach won Nang semirit mi achengicheng, ewe a aitikich pwe mwan me fefin, pupunu nefinen emon mwan me emon fefin, me tumunun me amarietan semirit ir mi auchea ngeni An we kokkotun pwapwa mi nap. Ach pochokun won ekkei nongonong a soun awora ekkoch repwe ungeni ewe Mwichefen. Sia sinei pun epwe fokkun fis. Ungeni ina ew kinikinin ewe kokkot me an Setan pochokunen ungeni a wenengeni met mi kon auchea ngeni an Kot kokkot. A kutta an epwe atai an Kot angang. An aewin angang pwe epwe angawa ewe Chon Amanau me An mumuta mi pin, an epwe tonu manamanen ewe Achasefan an Jises Kaist, epwe eppeti aier, epwe amuani pwarata, me epwe amam an emon me emon pung. A pwan kutta an epwe aosukosuka sokofesenin mwan me fefin, epwe atai pupunu, me eppeti aupwutiwen semirit akkaewin ngeni sam me in repwe amari nour non ennet.
IV.
Ewe angangen ewe Samon mi chok soposopono ina mwo ika mi wor mwich a ungeni fansoun meinisin ewe a ungeni kich nupwen sia achocho ne aea asukunen Ewe Mwichefenin Jises Kraist ren Aramas mi Pin non Fansoun Soponon. Ngeni ekkewe mi tur fan ena ungeni, upwe awora ekkei aninis.
Chechemeni ewe nongonongen aier a tufich me ren manamanen ewe Achasefan an Jises Kraist. Usun Elter Neal A Maxwell a pesei, ousap nom nein ekkewe “ra mochen sotuni ne siwini ewe Mwichefen nap seni ar repwe pwisin siwinir.”6
Usun Elder Jeffrey R. Holland a pesei:
“Kamwochunuk ngeni met ka fen sinei me uta pochokun tori pwan ekkoch mirit repwe wareto. …
“… Non ei Mwichefen, met kich mi sinei epwe akkufu met sise sinei.”7
Aea nuku non ewe Samon Jises Kraist, ina ewe aewin nongonongen ewe kapas allim.
Amuchunon, kutta aninis. Nouch souemwenin Mwichefen mi tongeikemi me ra kutta emwenin ngun repwe anisikemi. Aua awora chommong pisekin aninis usun met sipwe kuna me won LDS.org. Iwe iei, mi wor nouch chon amwa mwan me fefin ra koko ar repwe awora aninis. Kutter. Ausening ngenir. Anongonong wor.
Semach won Nang a mochen Noun kewe repwe angei ewe pwapwa ina ewe popun ach foruta. Ewe manau esemuch, ina met epwe fis ngeni kich, minne sipwe angei ren ach nikitu ngeni met nouch soufos, Preseten Russell M. Nelson, a kan eita ngeni “ewe aanen pwon.” Iei met a apasa non an we porous nupwen an keran winiti Presetenin ewe Mwichefen: “Nom won ewe aanen pwon mi pin. Ami nikitu ne tapweno mwirin ewe Chon Amanau ren ami fori pwon mi pin ngeni I iwe mwirin apwonueta ekkena pwon epwe suki asam ngeni feiochun ngun meinisin me tufich ngeni mwan, fefin, me semirit ekis meinisin.”8
Ua ennetin pwarata pwe ekkewe mettoch ua apasa ir mi ennet, me ra tufich pokiten ekkewe afanafan me ewe Achasefan an Jises Kraist, ewe a atufichi mettoch meinsin non ewe kokkotun Kot mi nap, Semach Esemuch. Non iten Jises Kraist, amen.