Ixegħlu d-Dawl Tagħkom
Il-profeti qegħdin isejħu lilna n-nisa, ħuti. Lesti li tkunu twajbin? Lesti tartikulaw il-fidi tagħkom? Lesti tixegħlu d-dawl tagħkom?
Forsi ma tafux li se ngħid, iżda l-President Monson u jien tewmin. Fil-jum li jiena twelid—sewwasew fis-siegħa propja—fit-Tramuntana ta’ Kalifornja, Thomas S. Monson, li kellu 36 sena, ġie sostnut bħala l-aktar Appostlu ġdid. Jiena verament kuntenta bil-konnessjoni speċjali u personali li jien għandi mal-profeta ta’ Alla, il-President Monson.
Il-profeti jinsabu jitkellmu dwar in-nisa.1 F’ din il-laqgħa intom se tisimgħu uħud mill-kliem tagħhom. Il-kwotazzjoni li se naqra, li se teħodna lura kważi 40 sena, hija profezija meraviljuża miktuba mill-President Spencer W. Kimball. Il-laqgħa li saret f’ Settembru 1979 kienet biss it-tieni darba li n-nisa tal-Knisja dinjija ltaqgħu flimkien għal-laqgħa ġenerali tagħhom. Il-President Kimball kien ħejja d-diskors tiegħu, iżda meta wasal jum il-konferenza, huwa kien jinsab l-isptar. Għalhekk, huwa talab lil martu, Camilla Eyring Kimball, biex taqra d-diskors tiegħu f’ ismu.2
Sister Kimball qrat kliem il-profeta, li kien jenfasizza l-influwenza tan-nisa Qaddisin tal-Aħħar Jiem fuq in-nisa twajbin tad-dinja qabel it-Tieni Miġja tas-Salvatur. Fi tmiem id-diskors tagħha, fost in-nisa tal-Knisja inħass sentiment mill-aktar qawwi li għandna nitkellmu dwaru sal-lum.
Ippermettuli nikkwota ftit minn dak li qal il-President Kimball:
“Finalment, għeżież ħuti, ippermettuli nissuġġerixxi xi ħaġa li ma ntqalitx qabel jew ta’ lanqas ma ntqalitx b’ dan il-mod. Ħafna mit-tkabbir ewlieni li se jseħħ fil-Knisja fl-aħħar jiem se jseħħ għaliex ħafna min-nisa twajbin fid-dinja … se jersqu lejn il-Knisja f’ numru kbir. Dan jista’ jseħħ biss jekk in-nisa tal-Knisja jirriflettu f’ ħajjithom it-tjubija u l-artikolazzjoni u jekk in-nisa tal-Knisja jkunu jidhru bħala nisa distinti u differenti—b’ mod pożittiv—min-nisa tad-dinja.
“Fost il-vera nisa eroj fid-dinja li se jiġu fil-Knisja hemm nisa li aktar moħħhom li jkunu twajbin milli li jkunu egoisti. Dawn il-vera eroj huma nisa mill-aktar umli, li jivvalutaw ferm aktar l-integrità milli jivvalutaw id-dehra. …
“… Se jkunu … in-nisa eżemplari tal-Knisja li se jkunu forza sinifikanti fit-tkabbir kemm numeriku kif ukoll spiritwali tal-Knisja fl-aħħar jiem.”3
X’ dikjarazzjoni profetika dik. Fil-qosor:
-
Se jkunu ir-relazzjonijiet tajbin tan-nisa li se jistimulaw ħafna mit-tkabbir ewlieni li se tesperjenza l-Knisja fis-snin li ġejjin.
-
Il-ħbiberija li n-nisa tas-Soċjetà tal-Għajnuna, tat-Tfajliet u tal-Primarja se jibnu ma’ nisa u tfajliet sinċieri, fidili u twajbin ta’ twemmin ieħor se tkun il-forza sinifikattiva li se tgħin il-Knisja tikber fl-aħħar jiem.
-
Lil dawn in-nisa li ġejjin minn ambjent differenti, il-President Kimball sejħilhom “eroj” li aktar moħħhom li jkunu twajbin milli li jkunu egoisti, li juruna li l-integrità għandha valur akbar mid-dehra.
Waqt il-ħidma tiegħi madwar id-dinja jiena ltqajt ma’ ħafna minn dawn in-nisa twajbin. Jien verament ngħożż il-ħbiberija tagħhom. Uħud minnhom intom tafuhom ukoll għax huma fost l-istess ħbieb u ġirien tagħkom. Jista’ jkun li f’ dan il-mument huma membri tal-Knisja u jista’ jkun le, iżda l-konnessjoni li aħna għandna magħhom hi waħda mill-aktar importanti. Mela, kif għandna naġixxu? X’ għandna nagħmlu? Il-President Kimball irrefera għal ħames affarijiet:
L-ewwel hi li għandna nkunu twajbin. Li nkunu twajbin ma jfissirx li nkunu perfetti jew li ma nagħmlux ċerta żbalji. Ifisser li niżviluppaw fina konnessjoni ma’ Alla, nindmu mid-dnubiet u l-iżbalji tagħna u ngħinu lill-oħrajn minn jeddna.
In-nisa li jindmu jaslu biex jibdlu l-istess futur tagħhom. Jiena għandi ħabiba li meta kienet għadha żagħżugħa kienet involuta f’ inċident bil-karozza, u minn dakinhar spiċċat ivvizjata tibla’ l-pilloli tal-uġigħ. Aktar tard, il-ġenituri tagħha ddivorzjaw. Wara relazzjoni qasira li kellha hija spiċċat tqila, u l-vizzju tagħha baqgħet ma ħelsitx minnu. Iżda lejla waħda, hija bdiet taħseb dwar il-kaos u t-taħwid li kienet fih ħajjitha u qalet lilha nnifisha, “Daqshekk,” Hija talbet lis-Salvatur Ġesù Kristu biex jgħinha. Hija qalet li ndunat li Ġesù Kristu kien saħansitra aktar b’ saħħtu miċ-ċirkustanzi terribbli li kienet tinsab fihom u li hi setgħet tiddependi fuq il-qawwa Tiegħu hekk kif hija bdiet miexja fit-triq tal-indiema.
Għaliex hija marret lura lejn il-Mulej u lejn it-triqat Tiegħu, hija spiċċat biex bidlet il-futur tagħha u tat-tifel ċkejken tagħha kif ukoll tar-raġel ġdid tagħha li hi żżewġet. Hija mara twajba; hija għandha qalb lesta li tgħin lil kull min żbalja u jrid jinbidel. U bħalna lkoll, hija mhijiex perfetta, iżda hija taf kif għandha tindem u kif tkompli tipprova.
It-tieni hi li għandna nkunu artikolati. Li tkun artikolat ifisser li tesprimi b’ mod ċar kif inti tħossok dwar xi ħaġa u għalfejn tħossok hekk. Aktar kmieni din is-sena, daħal kumment fuq il-paġna tal-Facebook tiegħi li kien jiddisprezza l-Kristjanità. Jiena qrajtu u ħassejtni ftit irrabjata, iżda injorajtu. Iżda xi ħadd li kont naf li ma kenitx tal-istess twemmin tagħna rrispondiet billi għamlet kumment hi wkoll. Hija kitbet: “Dan huwa eżattament l-oppost ta’ dak li kien jirrappreżenta Ġesù—fi żmienu huwa kien … bniedem radikali għaliex huwa … kien iħares lejn kulħadd l-istess fid-dinja. … Huwa tkellem mal-prostituti … ma’ dawk li jiġbru t-taxxa … , kien ħabib ta’ nisa u tfal vulnerabbli … , u qalilna l-istorja tas-Samaritan it-Tajjeb. … Dan juri … li l-vera Kristjani għandhom jaraw li jkunu l-AKTAR nies li jafu jħobbu fid-dinja.” Meta jiena qrajt dan, jiena għidt bejni u bejn ruħi, “Għalfejn dal-kliem ma ktibtux jien?”
Ilkoll kemm aħna jeħtieġ li nartikulaw aħjar ir-raġunijiet għalfejn aħna nemmnu dak li nemmnu. Kif tħossukom dwar Ġesù Kristu? Għalfejn tibqgħu fil-Knisja? Għalfejn temmnu li l-Ktieb ta’ Mormon huwa skrittura? Intom fiex issibu l-paċi tagħkom? Għalfejn huwa importanti li fis-sena 2017 il-profeta għandu xi ħaġa x’ jgħidilna? Intom kif tafu li hu verament profeta? Użaw leħinkom u l-qawwa tagħkom kollha biex tartikulaw dak li intom tafu u tħossu—fuq il-midja soċjali, fil-konverżazzjonijiet kwieti li jista’ jkollkom ma’ sħabkom, u meta tkunu qed titkellmu man-neputijiet tagħkom. Għidulhom dak li temmmnu fih, kif tħossukom, jekk qattx kellkom xi dubji, kif irnexxielkom tegħlbu dawk il-mumenti u xi jfisser għalikom Ġesù Kristu. Kif qal l-Appostlu Pietru, “Tibżgħux … ; lill-Mulej Kristu qaddsu f’qalbkom; kunu dejjem lesti biex tagħtu tweġiba lil kull min jitlobkom il-għala tat-tama li għandkom.”4
It-tielet hi li għandna nkunu differenti. Ippermettuli ngħidilkom storja li seħħet f’ Lulju li għadda fil-Bajja ta’ Panama City ġewwa Florida.5 Tard wara nofsinhar, Roberta Ursrey rat liż-żewġ uliedha subien fil-baħar jgħajjtu għall-għajnuna xi 100 jarda (90 ‘il bogħod mix-xatt. Huma nqabdu f’ kurrent qawwi u l-baħar beda joħroġhom ‘il barra. Koppja li kienu jinsabu viċin bdew jippruvaw isalvaw lit-tfal, iżda huma wkoll spiċċaw inqabdu fil-kurrent. Għalhekk il-membri tal-familja Ursrey qabżu wkoll fil-baħar biex isalvaw lill-għawwiema li kienu qed jitqabdu mal-ilma u fi ftit ħin spiċċa kien hemm disa’ minn nies li nqabdu fil-kurrent.
Ma kien hemm l-ebda ħbula. Max-xatt ma kienx hemm nies tas-salvataġġ. Il-pulizija bagħtu l-lanċa tas-salvataġġ, iżda dawn in-nies kienu ilhom mal-20 minuti jitqabdu fl-ilma, u huma kienu għajjenin ħafna u rashom bdiet nieżla taħt l-ilma. Fost dawk li kienu qed iħarsu minn fuq ix-xtajta kien hemm Jessica Mae Simmons. Żewġha ġietu idea li huma lkoll jiffurmaw katina umana. Huma bdew isejħu lil dawk kollha li kienu max-xatt biex imorru jgħinuhom, u għexieren ta’ nies qabdu id f’ id u mmarċjaw flimkien għal ġol-baħar. Jessica kitbet, “Li tara nisa u rġel minn razez differenti jingħaqdu flimkien biex jgħinu nies li ASSOLUTAMENT ma jafuhomx minn Adam kienet dehra mill-aktar meraviljuża!!”6 Katina sħiħa ta’ 80 ruħ laħqet sa fejn kien hemm l-għawwiema. Agħtu ħarsa lejn dan ir-ritratt biex taraw dak il-mument inkredibbli.
Kull min kien hemm fil-bajja beda jaħseb fuq soluzzjonijiet konvenzjonali u ħadd ma kien jaf x’ se jaqbad jagħmel. Iżda kien hemm mara u raġel li, f’ ħakka t’għajn, ħasbu f’ soluzzjoni differenti. L-innovazzjoni u l-kreattività huma doni spiritwali. Meta aħna nżommu l-patti tagħna, dan jaf iwassalna biex aħna nkunu differenti minn oħrajn mill-istess kultura u soċjetà tagħna, iżda dan jagħtina aċċess għall-ispirazzjoni biex inkunu nistgħu naħsbu f’ soluzzjonijiet differenti, f’ modi differenti u f’ applikazzjonijiet differenti. Fid-dinja ta’ madwarna aħna mhux dejjem se nħossuna komdi, iżda li nkunu differenti b’ mod pożittiv jista’ jwassalna biex inkunu ta’ għajnuna għal ħaddieħor.
Ir-raba’ hi li għandna nkunu distinti. Li tkun distint ifisser li tkun verament rikonoxxibbli. Ippermettuli nerġa’ lura għall-istorja dwar Jessica Mae Simmons fil-bajja. La darba l-katina umana bdiet tersaq lejn l-għawwiema, hija kienet taf li issa hi setgħet tmur tgħinhom. Jessia Mae qalet, “Jien kont kapaċi nżomm in-nifs … u kont kapaċi ngħum b’ faċilità madwar il-pixxina Olimpika! Jiena kont naf kif stajt niskapula dak il-kurrent. Jiena kont naf li stajt nikkonvinċi lill-għawwiema kollha biex jiffurmaw katina umana.”7 Hi u żewġha qabdu f’ idejhom żewġ bords tas-surfing u telqu jgħumu tul il-katina sakemm huma u persuna oħra waslu sa fejn kien hemm l-għawwiema, u mbagħad għabbewhom wieħed wieħed u waħda waħda lura lejn il-katina fejn għaddewhom lil xulxin sakemm wassluhom sax-xatt, ‘il bogħod mill-periklu li kienu fih. Jessica kellha kapaċità mill-aktar distinta: kienet taf kif tgħum kontra l-kurrent.
L-evanġelju rrestawrat huwa xi ħaġa verament rikonoxxibbli. Iżda jeħtieġ li aħna nkunu distinti dwar kif għandna nimxu warajh. Bl-istess mod kif Jessica kienet titħarreġ bħala għawwiema, aħna jeħtieġ li nitħarrġu fil-mod kif ngħixu l-evanġelju qabel ma nesperjenzaw xi emerġenza ħalli, mingħajr ebda biża’, aħna nkunu b’ saħħitna biżżejjed biex ngħinu meta ħaddieħor ikun qed jinġarr mal-kurrent.
U finalment, il-ħames hi li għandna nkunu kapaċi nwettqu mill-wieħed sal-erbgħa bil-ferħ. Li tkun ferħan ma jfissirx li jkollok tbissima artifiċjali fuq ħaddejk, irrelevanti xi jkun għaddej madwarek. Iżda jfisser li nżommu l-liġijiet ta’ Alla u li nibnu lill-oħrajn u ntaffu t-tbatija tagħhom.8 Meta aħna nibnu lill-oħrajn, meta aħna ntaffu t-tagħbija tagħhom, nispiċċaw biex inbierku ħajjitna b’ barkiet li l-ebda sfida ma tista’ żżomna milli nirċievu. Jiena għandi kwotazzjoni mill-President Gordon B. Hinckley li poġġejtha f’ post fejn inkun nista’ naraha kuljum. Huwa qal: “Intom … xejn ma tistgħu tibnu mill-pessimiżmu jew miċ-ċiniżmu. Ħarsu ‘l quddiem b’ ottimiżmu, aħdmu bil-fidi u taraw l-affarijiet iseħħu quddiemkom.”9
Elsa, tifla ta’ 13-il sena, li l-familja tagħha se jmorru jgħixu 1,800 mil (2,900 km) ‘il bogħod minn sħabha ġewwa Baton Rouge, Louisiana, hija sewwasew eżempju ta’ dan l-ispirtu ferħan u ottimist. Mhux faċli xejn meta jkun għad għandek 13-il sena li tmur tgħix f’ post ġdid. Tifhmu li Elsa ħassitha inċerta dwar din il-bidla, għalhekk missierha ta barka. Sewwasew fil-ħin li kienet qed tingħata l-barka, il-mowbajl ta’ ommha għamel ħoss li kien jindika li kien daħallha messaġġ. It-tfajliet li joqogħdu ġewwa Louisiana kienu bagħtulha din l-istampa bil-kliem “Jekk jogħġbok ejja fil-qasam tagħna!”10
Dawn it-tfajliet kienu ottimisti li huma kienu se jingwalawha ma’ Elsa qabel lanqas biss kienu għadhom iltaqgħu magħha. L-entużjażmu tagħhom wassal biex Elsa timtela b’ ottimiżmu dwar iċ-ċaqliqa li kienu se jagħmlu u kien tweġiba għal talbha dwar jekk verament kollox kien se jkun sew.
Mill-ferħ u l-ottimiżmu toħroġ ċerta enerġija li mhux sempliċiment tasal biex tberikna— iżda twassal ukoll biex tibni lil dawk kollha madwarna. Kull ħaġa żgħira li intom tagħmlu biex tixgħelu l-veru ferħ f’ ħaddieħor tindika li intom diġà tinsabu ġġorru t-torċa li ġiet mixgħula mill-President Kimball.
Jiena kelli biss 15-il sena meta l-President Kimball għamel dak id-diskors. Aħna lkoll li għandna aktar minn 40 sena ilna minn dak inhar niġu ggwidati minn dak li qalilna l-President Kimball. Illum jiena nħares lejkom kollha li għandkom 8 snin, 15-il sena, 20 sena u 35 sena u minn hawn se ngħaddi din it-torċa lilkom. Intom il-mexxejja futuri f’ din il-Knisja, u jiddependi minnkom li ġġorru ‘l quddiem dan id-dawl u tgħinu biex tiġi fis-seħħ din il-profezija. Aħna li għandna aktar minn 40 sena ngħaqqdu dirgħajna ma’ tagħkom u nħossu l-qawwa u l-enerġija tagħkom. Aħna għandna bżonnkom.
Isimgħu ftit xi tgħid din l-iskrittura li nsibu fid- Duttrina u Patti 49:26–28. Għalkemm l-iskrittura taf inkitbet minħabba ċirkustanzi differenti, iżda illejla bil-qawwa tal-Ispirtu s-Santu, nittama li tkun għalikom is-sejħa personali tagħkom għal din il-ħidma sagra.
“Araw, jiena ngħidilkom, morru kif ikkmandajtkom jien; indmu minn dnubietkom kollha; itolbu u tirċievu; ħabbtu u jiftħulkom.
“Araw, jiena mmur qabilkom u nimxi warajkom; u jien se nkun f’ nofskom u intom ma titħawdux.
“Araw, jiena Ġesù Kristu u dalwaqt ġej.”11
Nappellalkom ilkoll biex tpoġġu lilkom infuskom f’ post fejn tkunu tistgħu tħossu l-imħabba ġeneruża li għandu Alla għalikom. Ma tistgħux tpoġġu lilkom infuskom lil hinn minn dik l-imħabba. Meta intom tħossu l-imħabba Tiegħu, meta intom tħobbuh, intom tindmu u żżommu l-kmandamenti Tiegħu. Meta intom żżommu l-kmandamenti Tiegħu, Huwa jkun jista’ jużakom fil-ħidma Tiegħu. Il-ħidma u l-glorja Tiegħu hija l-eżaltazzjoni u l-ħajja eterna tal-bnedmin.
Il-profeti qegħdin isejħu lilna n-nisa. Lesti li tkunu twajbin? Lesti li tartikulaw il-fidi tagħkom? Lesti li tkunu distinti u differenti? Tgħid il-ferħ tagħkom, minkejja l-isfidi li se tħabbtu wiċċkom magħhom, se jwassalkom biex oħrajn li huma twajbin u nobbli u li għandhom bżonn il-ħbiberija tagħkom jinġibdu lejkom? Lesti li tixegħlu d-dawl tagħkom? Jiena nixhed li l-Mulej Ġesù Kristu se jkun jinsab quddiemna u se jkun ukoll f’ nofsna.
Jiena se nikkonkludi bil-kliem tal-profeta maħbub tagħna, Thomas S. Monson: “Għeżież ħuti, dan huwa l-jum tagħkom, dan huwa l-mument tagħkom.”12 F’ isem Ġesù Kristu, amen.