Il-Kuljum Etern
L-umiltà dwar min verament aħna u dwar l-għan ta’ Alla għalina hija ħaġa mill-aktar essenzjali.
Jien, ilu jogħġobni l-umoriżmu Ingliż miż-żogħżija tiegħi meta kont qdejt missjoni fir-Renju Unit. Kultant jaf ikun ikkaratterizzat minn mod modest u umli u minn kemm bniedem kapaċi jidħaq bih innifsu. Eżempju ta’ dan huwa l-mod kif l-ingliżi jpinġu s-sajf. Is-sjuf Ingliżi huma relattivament qosra u imprevedibbli. Kif qal wieħed awtur b’ mod pjuttost sottili, “Verament jogħġobni s-sajf Ingliż, huwa l-aktar jum favorit tiegħi tas-sena.”1 Episojdu minn sensiela ta’ kartuns Ingliża favorita tiegħi kienet turi lil waħda mill-karattri ewlenin ġos-sodda tagħha, għadha kif tqum tard filgħodu, u tgħid lill-klieb tagħha, “Il-ħanina! Naħseb li rqadna ftit iżżejjed u tlifna s-sajf.”2
F’ dan l-umoriżmu nistgħu nsibu analoġija għall-ħajja tagħna li qed ngħixu f’ din id-dinja sabiħa. L-iskrittura tgħid b’ mod ċar li l-eżistenza mortali prezzjuża tagħna hija żmien mill-aktar qasir. Nistgħu ngħidu li minn perspettiva eterna, iż-żmien tagħna fid-dinja jgħaddi malajr daqs is-sajf Ingliż.3
Xi kultant l-għan u l-istess eżistenza tal-bniedem nistgħu niddeskrivuhom ukoll b’ termini mill-aktar sempliċi. Il-profeta Mosè trabba f’ambjent li xi nies illum jafu jiddiskrivuh bħala wieħed privileġġjat. Kif hemm miktub fil-Ġawhra ta’ Valur Kbir, il-Mulej, waqt li kien qed iħejji lil Mosè għall-ħidma profetika tiegħu, tah l-opportunità biex fi ftit ħin huwa jara quddiemu l-istorja tad-dinja kif ukoll lil ulied il-bnedmin kollha li qatt inħolqu u li kienu għadhom qed jinħolqu.4 Ir-reazzjoni pjuttost sorprendenti ta’ Mosè kienet, “Issa … jiena verament naf li l-bniedem mhu xejn, xi ħaġa li qatt ma bsartha.”5
Sussegwentement, Alla, biex bħal donnu jirrebatti s-sentimenti ta’ nuqqas ta’ importanza li seta’ ħass Mosè, iddikjara l-vera għan Tiegħu: “Għax araw, din hija l-ħidma u l-glorja tiegħi—li nġib fis-seħħ l-immortalità u l-ħajja eterna tal-bniedem.”6
Aħna lkoll ugwali għal Alla. Id-duttrina Tiegħu hija waħda ċara. Fil-Ktieb ta’ Mormon, naqraw, “Kulħadd l-istess għal Alla,” inkluż “l-iswed u l-abjad, l-ilsir u l-ħieles, ir-raġel u l-mara.”7 Minħabba f’ hekk, kulħadd huwa mistieden biex jersaq lejn il-Mulej.8
Kull min jaħseb li hu superjuri fil-pjan tal-Missier minħabba xi karatteristiċi partikolari bħar-razza, is-sess, in-nazzjonalità, il-lingwa jew iċ-ċirkustanzi ekonomiċi tiegħu, dan il-bniedem hu moralment żbaljat u ma jifhimx il-veru għan tal-Mulej għall-ulied kollha ta’ Missierna.9
Sfortunatament, fi żmienna, kważi f’kull settur tas-soċjetà, aħna naraw id-dinja tiddandan b’ nies arroganti li jaħsbu li huma xi ħaġa filwaqt li ċċekken lil dawk li huma umli u li jħossuhom responsabbli lejn Alla. Il-parti l-kbira tas-soċjetà tilfet l-irmiġġi tagħha u lanqas biss tifhem għalfejn aħna ninsabu hawn fid-dinja. L-umiltà vera, li hi mill-aktar essenzjali biex aħna niksbu l-għan li għandu l-Mulej għalina, rari hija ħaġa evidenti.10
Huwa importanti li nifhmu l-kobor tal-umiltà, tat-tjubija, tal-karattru u tal-intelliġenza ta’ Kristu kif jidhru fl-iskrittura. Hija bluha li ma napprezzawx verament il-bżonn li kontinwament, jum wara jum, aħna nagħmlu l-almu tagħna biex niksbu dawk il-kwalitajiet u l-attributi li jixbhu lil Kristu, partikolarment l-umiltà.11
L-iskrittura titkellem b’ mod ċar li filwaqt li din il-ħajja hija relattivament waħda qasira, hija wkoll inkredibbilment sinifikanti. Amuleki, li fil-Ktieb ta’ Mormon kien is-sieħeb missjunarju ta’ Alma, qal, “Din il-ħajja hija ż-żmien li fih il-bnedmin jitħejjew biex jiltaqgħu ma’ Alla; iva, araw iż-żmien ta’ din il-ħajja huwa ż-żmien li fih il-bnedmin iwettqu ħidmiethom.”12 Aħna ma rridux nagħmlu bħall-karattru tal-kartuns tiegħi, li ngħaddu din il-ħajja reqdin.
L-eżempju tas-Salvatur ta’ umiltà u sagrifiċċju lejn l-umanità kollha hija l-aktar ġrajja profonda fl-istorja. Is-Salvatur, avolja kien membru tad-Divinità, kien lest li jiġi fid-dinja bħala tarbija sempliċi u jibda eżistenza fid-dinja li fiha Huwa għallem u fejjaq lil ħutu u ultimament sofra uġigħ inspejgabbli ġewwa l-Ġetsemani u fuq is-salib biex ikun jista’ jġib fis-seħħ l-Att tal-Fidwa Tiegħu. Dan l-att ta’ mħabba u umiltà min-naħa ta’ Kristu jissejjaħ il-kondixxendenza Tiegħu.13 Huwa dan għamlu għal kull bniedem li Alla ħoloq jew li għad irid joħloq.
Missierna tas-Smewwiet ma jridx li wliedu jiskoraġġixxu ruħhom jew jaqtgħu qalbhom fit-tfittxija tagħhom għall-glorja ċelestjali. Meta aħna verament nikkontemplaw dwar Alla l-Missier u Kristu l-Iben, min Huma verament, u x’ wettqu għalina, aħna nimtlew bil-qima, bil-meravilja, bil-gratitudni u bl-umiltà.
L-umiltà Hija Essenzjali biex Tgħin lill-Mulej Jistabbilixxi l-Knisja Tiegħu
Fi żmienu Alma staqsa mistoqsija li tgħodd ħafna għal żmienna: “Jekk intom esperjenzajtu bidla f’ qalbkom, u jekk ħassejtu li tgħannu l-għanja tal-imħabba feddejja, jiena nistaqsikom, tħossukom hekk bħalissa?”14 Alma kompla, “Tistgħu tgħidu, jekk kellkom tmutu bħalissa, … li intom kontu umli biżżejjed?”15
Kull darba li jiena naqra dwar Alma ż-Żgħir jirrinunzja l-irwol tiegħu bħala l-kap tal-istat biex jippriedka l-kelma ta’ Alla,16 verament inħossni impressjonat. Alma, bla dubju, kellu testimonjanza mill-aktar profonda ta’ Alla l-Missier u Ġesù Kristu u ħassu kompletament responsabbli lejhom mingħajr ebda riserva. Huwa kien jaf x’inhuma l-prioritajiet tiegħu u kien umil biżżejjed li jabbanduna l-istatus u l-pożizzjoni tiegħu minħabba li rrealizza li kien aktar importanti li jservi lill-Mulej.
Kemm hi ħaġa prezzjuża li jkollna biżżejjed umiltà f’ ħajjitna biex nistabbilixxu l-Knisja . Eżempju partikolari mill-istorja tal-Knisja jurina dan b’ mod ċar. F’ Ġunju tal-1837, hekk il-Profeta Joseph kien fit-Tempju ta’ Kirtland, huwa ħassu ispirat li jsejjaħ lill-Appostlu Heber C. Kimball biex imur jippriedka l-evanġelju ta’ Ġesù Kristu fl-“Ingilterra … u jiftaħ il-bieb tas-salvazzjoni għal dak il-ġens.”17 L-Appostlu Orson Hyde u xi oħrajn ġew mitlubin biex jakkumpanjawh. Ir-rispons tal-Presbiteru Kimball kien wieħed mill-aktar sinifikanti. “L-idea li ġejt maħtur għal missjoni daqstant importanti kienet xi ħaġa akbar milli qatt stajt niflaħ. … Ħassejtni kważi se negħreq taħt il-piż li kien tpoġġa fuq spallejja.”18 Madankollu, huwa daħal għal din il-missjoni b’ fidi, b’ impenn u b’ umiltà assoluta.
Xi kultant l-umiltà taf tfisser li aħna naċċettaw xi sejħa meta ma nħossuniex kapaċi biżżejjed għaliha. Xi kultant l-umiltà taf tfisser li nservu b’ fedeltà meta nħossu li aħna kapaċi nservu f’ xi ħidma aktar importanti. Il-mexxejja umli ddikjaraw bi kliemhom u bl-eżempju tagħhom li l-importanti mhuwiex fejn inservu iżda kif inservu b’ fedeltà.19 Xi kultant l-umiltà tfisser li negħlbu ċerti sentimenti ta’ wġigħ li jaf ikollna meta nħossu li ġejna ttrattati ħażin minn xi mexxejja jew membri.
Fit-23 ta’ Lulju , 1837, il-Profeta Joseph iltaqa’ mal-Presbiteru Elder Thomas B. Marsh, il-President tal-Kworum tat-Tnax. Il-Presbiteru Marsh deher apparentament frustrat li l-Profeta kien sejjaħ żewġ membri tal-kworum biex imorru l-Ingilterra mingħajr ma kkonsulta miegħu. Hekk kif Joseph iltaqa’ mal-Presbiteru Marsh, huwa poġġa fil-ġenb kull sentiment li seta’ weġġgħu u l-Profeta rċieva rivelazzjoni mill-aktar meraviljuża. Illum nafuha bħala l- 112-il sezzjoni tad-Duttrina u Patti.20 Tagħtina direzzjoni divina inkredibbli rigward l-umiltà u l-ħidma missjunarja. Vers 10 jgħid, “Kunu umli; u l-Mulej Alla tagħkom jaqbadkom minn idkom u jmexxikom, u jwieġeb it-talb tagħkom.”21
Din ir-rivelazzjoni ngħatat sewwasew fl-istess jum li fih il-Presbiteru Kimball, Hyde u John Goodson, b’umiltà sħiħa, kienu qed jiddikjaraw ir-Restawrazzjoni tal-evanġelju ta’ Ġesù Kristu fil-Kappella ta’ Vauxhall ġewwa Preston, fl-Ingilterra.22 Din kienet l-ewwel darba f’ din id-dispensazzjoni li xi missjunarji qatt iddikjaraw l-evanġelju rrestawrat lil hinn mill-Amerka ta’ Fuq. L-isforz missjunarju tagħhom irriżulta biex immedjatament numru ta’ nies ikkonvertew u tgħammdu u b’ hekk għadd ta’ membri fidili ngħaqdu mal-Knisja.23
Fi żmienna, partijiet sussegwenti minn dik ir-rivelazzjoni għadha tiggwida lill-missjunarji fl-isforzi tagħhom. F’ parti minnha hemm miktub, “Dawk kollha li intom tibagħtu f’ ismi … se jkollhom il-qawwa li jiftħu l-bieb tas-saltna tiegħi lil kull ġens … dejjem jekk huma jiċċekknu quddiemi, u jibqgħu jimxu wara l-kelma tiegħi, u jisimgħu l-vuċi tal-Ispirtu tiegħi.”24
L-umiltà li kienet parti essenzjali minn din il-ħidma missjunarja inkredibbli għenet biex il-Mulej seta’ jistabbilixxi l-Knisja Tiegħu b’ mod daqstant meraviljuż.
Nirringrazzjaw lil Alla, dan aħna għadna narawh kontinwament iseħħ fil-Knisja Illum. Għadd ta’ membri, fosthom mill-ġenerazzjoni li għadha tiela’, jiddedikaw ħinhom u jiddifferixxu l-edukazzjoni u l-impjieg tagħhom biex jaqdu missjoni. Huma bosta l-membri anzjani li jitilqu l-impjieg tagħhom u jagħmlu għadd ta’ sagrifiċċji oħra biex ikunu jistgħu jaqdu lil Alla f’ kwalunkwe sejħa li jiġu msejħin fiha. Aħna ma nippermettu l-ebda ħaġa personali li żżommna jew tiddevjana milli nwettqu l-għanijiet Tiegħu.25 Biex inservu fil-Knisja jeħtieġ li nkunu umli. Aħna nservu b’ umiltà skont kif niġu msejħin, bil-qawwa u bis-saħħa tagħna kollha u b’ moħħna kollu. Kemm hu importanti li f’ kull livell tal-Knisja aħna nifhmu l-kwalità li tixbah lil Kristu tal-umiltà.
L-Umiltà li Nuru Kuljum Hija Essenzjali biex Tgħinna Nħejju Individwi biex Jiltaqgħu ma’ Alla
Fi żmienna, l-għan li aħna nonoraw lill-Mulej u nissottomettu ruħna għar-rieda Tiegħu26 mhuwiex ivvalutat daqs kemm kien fil-passat. Xi mexxejja Kristjani ta’ reliġjonijiet oħra jemmnu li aħna ninsabu ngħixu f’ dinja fejn il-Kristjanità għadda żmienha.27
Għal ġenerazzjonijiet sħaħ, il-virtù reliġjuża tal-umiltà u l-virtujiet ċiviċi li wieħed ikun modest u ma jintefaħx iżżejjed bih innifsu kienu l-istandard predominanti tas-soċjetà.
Fid-dinja tal-lum, issir enfażi akbar fuq il-kburija, li wieħed jintefaħ kemm jista’ bih innifsu, u dik li tissejjaħ “awtentiċità,” li xi kultant taf ukoll twassal għan-nuqqas ta’ umiltà vera. Xi wħud jissuġġerixxu li llum il-valuri morali tal-kuntentizza jinkludu “li tkun reali, li tkun setgħan, li tkun produttiv—u l-aktar importanti, li qatt ma tiddependi fuq ħaddieħor … għaliex id-destin tiegħek jinsab … f’ idejk.”28
L-iskrittura tiffavorixxi mod daqsxejn differenti. Tissuġġerixxi li aħna għandna nkunu dixxipli vera ta’ Ġesù Kristu. Dan jeħtieġ li aħna nistabbilixxu sentiment qawwi ta’ responsabbiltà lejn Alla u li ngħixu ħajjjitna b’ umlità. Is-Sultan Benjamin għallem li l-bniedem naturali huwa għadu ta’ Alla u rrakkomanda li jeħtieġ li aħna noqogħdu attenti “għall-istigazzjoni tal-Ispirtu s-Santu.” Huwa spjega, fost affarijiet oħra, li dan jeħtieġ minna li aħna nkunu “sottomessi, mansi, umli, paċenzjużi u kollna mħabba.”29
Xi wħud jifhmu, b’ mod żbaljat, li l-kelma awtentiku tfisser ċelebrazzjoni tal-bniedem naturali u tal-kwalitajiet li huma l-oppost tal-umiltà, tat-tjubija, tal-ħniena, tal-maħfra u taċ-ċivilità. Bħala wlied Alla aħna nistgħu niċċelebraw l-karatteristiċi uniċi tagħna mingħajr ma nużaw l-awtentiċità bħala skuża għal ċerta mġieba li ma tixbahx lil dik ta’ Kristu.
Fit-tfittxija tagħna għall-umiltà, l-internet modern joħolqilna ċerti sfidi fl-isforzi tagħna biex nevitaw il-kburija. Eżempju ta’ dan hu l-mod li bih aħna bħallikieku nkunu qed ngħidu “ħares lejja” jew billi nattakkaw lil ħaddieħor bla waqfien fuq il-midja soċjali. Eżempju ieħor huwa li niftaħru li aħna umli. Dan ifisser li “għal għajn in-nies aħna nippruvaw nuru li aħna modesti jew umli iżda li fil-fatt l-għan veru tagħna ikun li nitfgħu l-attenzjoni ta’ dak li jkun fuq xi ħaġa li aħna nħossuna minfuħin biha.”30 Il-profeti minn dejjem widdbuna kontra l-kburija u li ma nagħmlux enfażi żżejjed fuq il-frugħa tad-dinja.31
Id-deterjorament universali tad-diskors ċivili huwa wkoll xi ħaġa inkwetanti. Il-prinċipju etern tal-għażla ħielsa ieħtiġilna li nirrispettaw l-għażla ta’ ħafna nies li ma nkunux naqblu mal-għażla tagħhom. Il-kunflitt u t-tilwim ħafna drabi jispiċċaw jiksru “l-limitu tad-diċenza komuni.”32 Jeħtieġ li nkunu aktar modesti u umli.
Alma widdeb kontra li aħna “nintefħu bil-kburija ta’ qalbna,” “nippretendu li aħna aħjar minn ħaddieħor,” u nippersegwitaw lill-umli li “jimxu wara l-ordni mqaddsa ta’ Alla.”33
Jiena rajt tjubija mill-aktar ġenwina fost nies ta’ kull twemmin li huma verament umli u jħossuhom responsabbli lejn Alla. Ħafna minnhom jimxu wara t-tagħlim tal-profeta tat-Testment il-Qadim, Mika, li ddikjara, “X’jistenna minnek il-Mulej: mhux li tagħmel dak li hu ġust, li tħobb u tkun ħanin, u li tkun umli fl-imġiba tiegħek ma’ Alla tiegħek?”34
Meta aħna nkunu verament umli, aħna nitolbu għall-maħfra u naħfru lil ħaddieħor. Kif naqraw fil-ktieb ta’ Mosija, Alma għallem li daqs kemm-il darba aħna nindmu, daqstant ieħor il-Mulej jaħfer il-ħtijiet tagħna.35 Mill-banda l-oħra, kif huwa indikat fit-Talba tal-Mulej,36 meta aħna ma naħfrux il-ħtijiet tal-oħrajn, aħna nkunu qed inwaqqgħu l-kundanna fuqna nfusna.37 Grazzi għall-Att tal-Fidwa ta’ Ġesù Kristu, permezz tal-indiema dnubietna jinħafru. Meta aħna ma naħfrux lil dawk li huma ħatja għalina, aħna nkunu fil-fatt qegħdin niċħdu l-Att tal-Fidwa tas-Salvatur. Li nżommu ġo fina l-mibegħda lejn xi ħadd jew li nirrifjutaw li b’ umiltà nittrattaw ir-relazzjonijiet tagħna bil-mod li jrid Kristu jwassal biex aħna verament inwaqqgħu l-kundanna fuqna nfusna. Li nżommu ġo fina l-mibegħda hija xi ħaġa mill-aktar velenuża għal ruħna.38
Ippermettuli wkoll inwissikom kontra kull forma ta’ arroganza. Il-Mulej, permezz tal-profeta Moroni, għamel differenza ċara bejn dak li hu arroganti u dak li hu umli: “Il-boloh jiddieħku b’ ħaddieħor, iżda huma għad jibku; u l-grazzja tiegħi tkun biżżejjed għall-ġwejdin.” Il-Mulej iddikjara wkoll, “Jiena nagħti d-dgħjufija lill-bnedmin sabiex huma jkunu umli; u l-grazzja tiegħi hi suffiċjenti għal dawk il-bnedmin kollha li jkunu umli quddiemi; għaliex jekk huma jkunu umli quddiemi, u jkollhom il-fidi fija, imbagħad jiena nqawwihom fejn huma jinsabu dgħajfin.”39
L-umiltà tinkludi wkoll li aħna nkunu grati għall-ħafna barkiet li rċevejna u għall-għajnuna divina. L-umiltà mhijiex xi kisba identifikabbli u kbira jew inkella li aħna negħlbu xi sfida ewlenija partikolari. Hija pjuttost indikazzjoni ta’ qawwa spiritwali. Hija li aħna jkollna l-fiduċja li kull jum u kull siegħa aħna nistgħu nafdaw fil-Mulej, naqduh u niksbu l-għanijiet Tiegħu. Hija t-talba tiegħi li f’ din id-dinja kollha nkwiet aħna nkomplu nagħmlu kontinwament dak kollu li nistgħu biex ta’ kuljum aħna ngħixu b’ mod verament umli. Waħda mill-poeżiji favoriti tiegħi tiddeskriviha b’ dan il-mod:
Il-prova tan-nobbiltà hija l-mod li bih
Wieħed jiffaċċja l-Kuljum etern.40
Jiena nagħti x-xhieda ċerta tiegħi dwar is-Salvatur u l-Att tal-Fidwa Tiegħu u dwar kemm hu importanti li b’ umiltà aħna naqduh f’ kull jum ta’ ħajjitna. F’ isem Ġesù Kristu, amen.