Valur Imprezzabbli
Aħna nistgħu frekwentament inħossu l-vuċi siekta u ħelwa tal-Ispirtu s-Santu tixhed magħna l-verità tal-valur spiritwali tagħna.
Meta kont qed inżur il-pajjiż ta’ Sierra Leone ġewwa l-Punent tal-Afrika, jiena ħadt sehem f’ laqgħa li kienet qed titmexxa mill-mexxej tal-Primarja tal-wited. Mariama mexxiet il-laqgħa b’ tant imħabba, grazzja u kunfidenza li kien ħaġa mill-aktar ovvja li jien nassumi li hija kienet ilha membru tal-Knisja żmien twil mhux ħażin. Madankollu, Mariama ma tantx kienet ilha ħafna membru.
Oħtha ż-żgħira kienet ngħaqdet mal-Knisja u stiednet lil Mariama biex tattendi lezzjoni tal-Knisja magħha. Mariama ħassitha verament impressjonata bil-messaġġ. Il-lezzjoni kienet dwar il-liġi tal-kastità. Hija talbet biex il-missjunarji jgħallmuha aktar u ma damitx wisq ma rċeviet testimonjanza tal-Profeta Joseph Smith. Hija tgħammdet fis-sena 2014 u bintha tgħammdet xahar ilu. Immaġinaw, iż-żewġ lezzjonijiet fundamentali li wasslu għall-konverżjoni ta’ Mariama kienu l-liġi tal-kastità u l-Profeta Joseph Smith, żewġ punti li ħafna drabi d-dinja tħares lejhom bħala irrelevanti, antikwati, inkonvenjenti. Iżda Mariama tat ix-xhieda tagħha li hija kienet ħassitha bħal dak il-farfett iż-żgħir li verament inġibed lejn id-dawl. Hija qalet, “Meta jiena sibt l-evanġelju, jien sibt lili nnifsi.” Hija skopriet il-valur tagħha permezz tal-prinċipji divini. Il-valur tagħha bħala bint Alla ġie żvelat lilha permezz tal-Ispirtu s-Santu.
Issa ejja nlaqqagħkom mal-aħwa Singh mill-Indja. Renu, li hija l-ewwel waħda mil-lemin, li kienet l-ewwel waħda mill-ħamest aħwa bniet li ngħaqdet mal-Knisja, qasmet miegħi dawn il-ħsibijiet:
“Qabel bdejt ninvestiga l-Knisja, jiena qatt ma kont inħares lejja nnifsi bħala xi ħadd speċjali. Jiena kont sempliċiment waħda fost ħafna nies, u s-soċjetà u l-kultura tiegħi qatt ma għallmuni li jiena kelli xi valur bħala individwu. Meta jiena tgħallimt l-evanġelju u tgħallimt li jiena kont bint Missierna tas-Smewwiet, ħassejt bidla kbira sseħħ ġewwa fija. F’ daqqa waħda ħassejtni verament speċjali—Alla fil-fatt kien ħalaq lili kif ukoll ħalaq ruħi u ħajti b’ ċertu valur u għan.
“Qabel ma kelli l-evanġelju f’ ħajti, jien minn dejjem kont nara x’ nagħmel biex lil ħaddieħor nipprova nurih li jiena kont xi ħaġa speċjali. Iżda meta jiena tgħallimt il-verità, li jiena bint Alla, ma kelli għalfejn nipprova xejn lil ħadd. Jiena kont naf li jien kont speċjali. … Ara qatt tgħaddilkom minn raskom li intom ma tiswew xejn.”
Il-President Thomas S. Monson iddeskriva dan perfettament meta huwa kkwota dan il-kliem: “Il-valur ta’ ruħ hi l-kapaċità tagħha li ssir bħal Alla.”1
M’ilux jiena kelli l-barka li niltaqa’ ma’ tfajla oħra li bħali tifhem din l-istess verità. Jisimha Taiana. Iltqajt magħha fl-Isptar tat-Tfal tal-Primarja ġewwa l-Belt ta’ Salt Lake. Taiana kienet għadha fl-ewwel snin tagħha fl-iskola sekondarja meta hija ħarġitilha l-marda tal-kanċer. Hija ġġieldet il-battalja b’ kuraġġ kbir qabel ma ftit ġimgħat ilu hija ħalliet din id-dinja . Taiana kienet mimlija dawl u mħabba. Hija kienet magħrufa għat-tbissima kontaġġuża tagħha u l-karatteristika distintiva tagħha li tgħolli ‘l fuq iż-żewġt iswaba’ l-kbar tagħha biex tindika li kollox sew. Meta ħaddieħor kien jistaqsiha, “Għalfejn kellu jiġri lilek, Taiana?” it-tweġiba tagħha kienet tkun, “Għalfejn mhux jien?” Taiana ppruvat li tkun bħas-Salvatur tagħha, li tant kienet tħobb. Fid-drabi li jiena mort nżurha, jiena tgħallimt li Taiana kienet verament fehmet il-valur divin tagħha. L-għarfien tagħha li kienet bint Alla wassalha biex hija mtliet bil-paċi u bil-kuraġġ, li tant kellha bżonn biex ultimament iffaċċjat l-isfida enormi tagħha bil-mod pożittiv li ffaċċjatha.
Maraima, Renu u Taiana jgħallmuna li l-Ispirtu jikkonfermalna l-valur divin ta’ kull wieħed u waħda minna b’ mod individwali. Li intom tkunu tafu li intom verament ulied Alla jeffettwa kull aspett ta’ ħajjitkom u jiggwidakom fis-servizz li intom tagħtu kuljum. Il-President Spencer W. Kimball spjega dan permezz ta’ dan il-kliem glorjuż:
“Alla hu Missierkom. Huwa jħobbkom. Hu flimkien ma’ ommkom fis-smewwiet jaraw fikom valur imprezzabbli. … Intom uniċi. M’hawn ħadd bħalkom, magħmulin minn intelliġenza eterna li tagħtikom id-dritt li tirtu l-ħajja eterna.
“Ara qatt tiddubitaw il-valur tagħkom bħala individwi. L-intenzjoni sħiħa tal-pjan tal-evanġelju hi li tipprovdi opportunità lil kull waħda minnkom biex tilħqu l-potenzjal sħiħ tagħkom, li huwa l-progress etern u l-possibiltà li ssiru bħal Alla.”2
Ippermettuli nagħmel enfażi fuq il-bżonn li aħna nitgħallmu nagħmlu differenza bejn żewġ frażijiet mill-aktar importanti: valur u affidabbiltà. Mhumiex l-istess ħaġa. Il- valur spiritwali jfisser li nħarsu lejna nfusna bl-istess valur li jħares lejna Missierna tas-Smewwiet, mhux kif tħares lejna d-dinja. Il-valur tagħna ġie determinat saħansitra qabel ma aħna ġejna hawn fid-dinja. “L-imħabba ta’ Alla hija infinita u tibqa’ għal dejjem.”3
Mill-banda l-oħra, l-affidabbiltà tiddependi mill-ubbidjenza tagħna. Jekk aħna nidinbu, aħna nkunu anqas denji, iżda l-valur tagħna ma jonqosx! Aħna nkomplu nindmu u nagħmlu l-almu tagħna biex inkunu bħal Ġesù hekk kif il-valur tagħna jibqa’ intatt. Kif għallem il-President Brigham Young: “L-inqas u l-aktar spirtu inferjuri li bħalissa nsibu fid-dinja … jiswa daqs dinjiet sħaħ.”4 Jiġri x’ jiġri, aħna dejjem għandna valur f’ għajnejn Missierna tas-Smewwiet.
Minkejja din il-verità meraviljuża, kemm minna ninħakmu, minn żmien għall-ieħor, b’ ċerti ħsibijiet jew sentimenti negattivi dwarna nfusna? Jiena waħda minnhom. Huwa żball li aħna nagħmlu dan. Satana huwa missier il-gideb kollu, speċjalment fejn tidħol ċerta misrappreżentazzjoni dwar il-natura divina u l-għan divin tagħna. Li nnaqqsu l-valur tagħna nfusna ma jagħmlilna l-ebda ġid. Pjuttist jitfagħna lura. Kif ġejna mgħallmin ħafna drabi, “Ħadd ma jwasslek biex tħossok inferjuri mingħajr il-kunsens tiegħek.”5 Jeħtieġ li nieqfu nqabblu l-punti debboli tagħna mal-forte ta’ ħaddieħor. “Il-paragun iżommok milli tkun ferħan.”6
B’ kuntrast għal dan, il-Mulej jassigurana li meta aħna naħsbu ħsibijiet virtużi, Huwa jberikna bil-kunfidenza, sewwasew il-kunfidenza li turina verament min aħna. Qatt ma kien hawn żmien aktar kruċjali minn żmienna biex aħna nagħtu kas ta’ kliemu. “Ħallu ħsibijietkom jiġu ddominati kontinwament mill-virtù,” Huwa qal. “Imbagħad timtlew b’kunfidenza kbira quddiem Alla; u … l-Ispirtu s-Santu ikun is-sieħeb kostanti tagħkom.”7
Il-Mulej żvela din il-verità addizzjonali lill-Profeta Joseph Smith: “Dak li jirċievi mingħand Alla, għandu jikkonoxxi li ġej minn Alla; u għandu jifraħ li f’ għajnejn Alla huwa nstab den li jirċievi.”8 Meta aħna nħossu l-Ispirtu, kif jispjega dan il-vers, aħna nagħrfu li dak li qed inħossu ġej mingħand Missier tas-Smewwiet. Aħna nagħrfuh u nagħtuh it-tifħir kollu tagħna għall-barkiet li Huwa tana. Imbagħad aħna nifirħu li huwa sabna denji li nirċievu.
Immaġinawkom li qed taqraw l-iskrittura filgħodu kmieni u l-Ispirtu jkellimkom b’ leħen sieket u jgħidilkom li dak li qed taqraw huwa kollu minnu. Intom jirnexxielkom tagħrfu l-Ispirtu u timtlew bil-ferħ għaliex intom ħassejtu fikom l-imħabba Tiegħu u kontu denji li tirċievu?
Intom l-ommijiet, tafu tkunu qegħdin għarkupptejkom ħdejn it-tifel tagħkom ta’ erba’ snin hekk kif hu jkun qed jgħid it-talba ta’ qabel l-irqad. Kif tisimgħuh jgħid it-talba, intom tħossu fikom sentiment mill-aktar ħelu. Tħossu fikom imħabba u paċi. Is-sentiment ikun biss għal ftit ħin, iżda f’ dak il-mument, intom tagħrfu li intom meqjusin denji biżżejjed li tirċievu. Rari ħafna li aħna nirċievu, jekk qatt nirċievu, xi manifestazzjoni spiritwali kbira ħafna f’ ħajjitna; iżda spiss li aħna nħossu fina l-vuċi siekta u ħelwa tal-Ispirtu s-Santu, li tivverifika magħna l-verità tal-valur spiritwali tagħna.
Il-Mulej spjega r-relazzjoni li hemm bejn il-valur tagħna u s-sagrifiċċju kbir tal-att tal-fidwa Tiegħu meta Huwa qal:
“Ftakru li l-valur tal-erwieħ huwa wieħed kbir f’ għajnejn Alla;
“Għax, araw, il-Mulej il-Feddej tagħkom sofra l-mewt fil-ġisem; għalhekk huwa sofra l-uġigħ tal-bnedmin kollha, sabiex il-bnedmin kollha jkunu jistgħu jindmu u jersqu lejh.”9
Ħuti, grazzi għal dak li għamel għalina Hu, “aħna ninsabu marbutin miegħu b’ rabta ta’ mħabba.”10 Huwa qal, “Missieri bagħatni sabiex nittella’ fuq is-salib; u wara li nittella’ fuq is-salib, inressaq il-bnedmin kollha lejja.”11
Is-Sultan Benjamin spjega wkoll din il-konnessjoni li tgħaqqadna mas-Salvatur tagħna: “U araw, huwa għandu jsofri tentazzjoni u wġigħ fil-ġisem, ġuħ, għatx u għejja, sewwasew aktar milli bniedem qatt jista’ jsofri, ħlief li din twassal għall-mewt; għax araw, id-demm se jċarċar mill-pori kollha tiegħu u d-diqa tal-qalb tiegħu se tkun waħda tant kbira minħabba l-ħażen u l-qżiżijiet tal-poplu tiegħu.”12 Dik is-sofferenza u r-riżultat ta’ dik is-sofferenza timla qlubna b’ imħabba u gratitudni. Il-Presbiteru Paul E. Koelliker għallem, “Hekk kif aħna nneħħu kull distrazzjoni li tiġbidna lejn id-dinja u neżerċitaw l-għażla ħielsa tagħna biex infittxuh, aħna niftħu qlubna għall-forza ċelestjali li tressaqna lejh.”13 Jekk l-imħabba li aħna nħossu għas-Salvatur u għal dak li Huwa għamel għalina hija akbar mill-enerġija li aħna nużaw għad-dgħjufijiet, għad-dubji u għad-drawwiet ħżiena tagħna, mela Huwa verament ikun jista’ jgħinna negħlbu l-ħwejjeġ li jikkawżaw is-sofferenza f’ ħajjitna. Huwa jsalvana minna nfusna.
Ippermettuli nerġa’ nenfasizza dan: jekk il-ġibda tad-dinja hija aktar b’ saħħitha mill-fidi u l-fiduċja li aħna għandna fis-Salvatur, mela l-ġibda tad-dinja se tispiċċa tirbaħ kull darba. Jekk aħna nagħżlu li niffokaw fuq il-ħsibijiet negattivi tagħna u niddubitaw fil-valur tagħna, minflok ma’ niddependu fuq is-Salvatur, isir aktar diffiċli li aħna nħossu ġewwa fina l-vuċi tal-Ispirtu s-Santu.
Ħuti, ejjjew qatt ma nħossuna konfużi dwar min aħna verament! Filwaqt li ħafna drabi huwa aktar faċli li nkunu spiritwalment passivi milli li nippruvaw nagħmlu daqsxejn ta’ sforz spiritwali biex niftakru u nħaddnu l-identità divina tagħna, aħna żgur li ma naffordjawx li f’ dawn l-aħħar jiem ma nagħmluhx dan l-isforz. Jalla aħna, bħala aħwa nisa, “inkunu fidili fi Kristu; … jalla Kristu jegħrafna ‘l fuq u jalla s-sofferenza u l-mewt tiegħu, … u l-ħniena u s-sabar tiegħu u t-tama tal-glorja tiegħu u tal-ħajja eterna, jibqgħu għal dejjem f’ moħħna.”14 Hekk kif is-Salvatur jelevana ‘l fuq, aħna nkunu nistgħu naraw b’ mod aktar ċar mhux biss min verament aħna iżda wkoll li aħna ninsabu viċin Tiegħu aktar milli qatt konna nimmaġinaw. Fl-isem sagru ta’ Ġesù Kristu, amen.