Sólarljósið í stormunum mínum
Eftir að amma dó, hugsaði ég um að enda eigið líf. En að treysta á sæluáætlun himnesks föður hjálpaði mér að halda áfram.
Ljósmyndir: Niel Kabiling
Hæ! Ég heiti Honey Grace. Ég er 17 ára. Ég bý í Iloilo, á Filippseyjum!
Lát ömmu minnar
Nýlega gekk ég í gegnum nokkuð mjög erfitt. Faðir minn og móðir eru aðskilin og móðir mín vinnur erlendis. Ég ólst upp með ömmu minni – hún var sú sem kynnti mér fagnaðarerindið og kirkjuna. En þetta árið lést hún óvænt.
Hún var síðasta manneskjan sem ég hélt að myndi deyja. Stundum hélt ég að ég myndi deyja á undan henni, því hún var svo hraust! Hún sýndi aldrei veikleika og var alltaf sterk frammi fyrir mér. Ég ímyndaði mér lífið aldrei án hennar.
Skilja áætlunina
Eftir að hún lést, óskaði ég þess stundum að ég gæti líka dáið. Ég hugsaði um að enda eigið líf. Fljótlega fór ég á unglingaviðburð í stikunni, þar sem við hlýddum á lexíu um sáluhjálparáætlunina.
Ég vissi um sáluhjálparáætlunina, en kannski var skilningur minn á henni örlítið óljós vegna þess sem kom fyrir ömmu mína. Þegar ég hlustaði, hugsaði ég: „Ég hef gleymt blessunum fórnar Jesú Krists fyrir mig.“
Ég áttaði mig á því að Jesús Kristur dó til að frelsa mig. Ég ætti ekki að enda líf mitt vegna áþjánar minnar. Sæluáætlunin veitir mér von um að ég geti einhvern tíma séð ömmu mína aftur, því lífinu lýkur ekki við dauða okkar. Ég þarf að halda áfram að fylgja frelsaranum, svo ég geti séð hana aftur.
Finna styrk í musterinu
Eftir að amma dó, flutti frænka mín inn til mín og varð forsjáraðilinn minn. Frændsystkini mín eru bestu vinir mínir, en breytingin var samt mjög erfið. Ég varð að læra að gera öll húsverkin sem amma mín var vön að gera. Ég þurfti að vakna sjálf til að fara í skólann og hugsa um húsið.
Biskupinn minn hafði alltaf rætt um að vera sjálfbjarga, svo ég leitaði að því efni í Gospel Library. Það hjálpaði mér að læra að standa á eigin fótum.
Ég er líka enn í sambandi við föður minn. Dag einn rifumst við. Ég átti í miklum erfiðleikum með það, en skyndilega gafst mér tækifæri til að fara í musterisferð unglinganna. Ég fann frið þegar ég var í musterinu. Ég hugsaði ekki um vandamálin heima fyrir. Ég hugsaði ekki um reiðina sem ég bar til föður míns. Ég hugsaði um það sem ég gæti gert til að hjálpa honum. Ég ákvað að sýna gott fordæmi. Ég hugsaði um hið eilífa, um að innsiglast foreldrum mínum í musterinu einhvern daginn. Ég ákvað að biðjast afsökunar á rifrildinu við föður minn.
Frelsarinn með börnum, eftir Michael Malm
Reiða mig á frelsarann
Ég hef lært að einblína alltaf á Jesú Krist og himneskan föður. Ég fæ styrk minn frá þeim og ég minnist þess að þeir styðja mig.
Skilningur á sáluhjálparáætluninni, einkum friðþægingu frelsarans, hjálpaði mér að sigrast á sjálfsvígshugsunum mínum. Hann hjálpar mér að finna frið í lífinu. Hann veitir mér von um að geta einhvern tíma hitt ömmu mína hinum megin hulunnar.
Jesús Kristur er vonin til að halda lífinu áfram, jafnvel þótt ég standi frammi fyrir miklum áskorunum. Elska hans til mín er óendanleg. Hann er sólarljósið í lífi mínu. Þegar stormur er eða rigning, þá er hann til staðar. Hann er lausnari minn. Hann er heimilið mitt. Hann er lífið mitt. Hann heldur mér gangandi. Hann er ein af ástæðum þess að ég elska að lifa.
Höfundur býr í Iloilo á Filippseyjum.