1 Ug nahitabo nga ang Ginoo nakigsulti kang Moises, nga nag-ingon: Tan-awa, ako nagpadayag kanimo mahitungod niining langit, ug niining yuta; isulat ang mga pulong nga akong isulti. Ako mao ang Sinugdanan ug ang Kataposan, ang Labawng Makagagahom nga Dios; pinaagi sa akong Bugtong Anak milalang ako niini nga mga butang; oo, sa sinugdanan milalang ako sa langit, ug sa yuta nga imong gibarogan.

2 Ug ang yuta walay porma ug walay sulod; ug akong gipangitngit ang kahiladman sa lawod; ug ang akong Espiritu milihok diha sa ibabaw sa tubig; kay ako mao ang Dios.

3 Ug ako, ang Dios, miingon: Himoa nga adunay kahayag; ug dihay kahayag.

4 Ug ako, ang Dios, nakakita sa kahayag; ug kana nga kahayag maayo. Ug ako, ang Dios, mibahin sa kahayag gikan sa kangitngit.

5 Ug ako, ang Dios, mitawag sa kahayag og Adlaw; ug ang kangitngit, akong gitawag og Gabii; ug kini akong gihimo pinaagi sa pulong sa akong gahom, ug kini nahimo sama sa akong gipamulong; ug ang kagabhion ug ang kabuntagon mao ang unang adlaw.

6 Ug usab, ako, ang Dios, miingon: Himoa nga adunay kawanangan taliwala sa tubig, ug kini nahimo, gani sama sa akong gipamulong; ug miingon ko: Himoa kini nga mobahin sa katubigan gikan sa katubigan; ug kini nahimo;

7 Ug ako, ang Dios, mibuhat sa kawanangan ug mibahin sa mga tubig, oo, ang dagkong mga tubig nga anaa sa ubos sa kawanangan gikan sa mga tubig nga anaa sa ibabaw sa kawanangan, ug kini nahimo, gani sama sa akong gipamulong.

8 Ug ako, ang Dios, mitawag sa kawanangan og Langit; ug ang kagabhion ug ang kabuntagon mao ang ikaduhang adlaw.

9 Ug ako, ang Dios, miingon: Papundoka ang mga tubig nga anaa sa ubos sa langit ngadto sa usa ka dapit, ug kini nahimo; ug ako, ang Dios, miingon: Himoa nga adunay uga nga yuta; ug kini nahimo.

10 Ug ako, ang Dios, mitawag sa uga nga yuta og Yuta; ug ang nagpundok nga mga tubig, akong gitawag og Dagat; ug ako, ang Dios, nakakita nga ang tanang butang nga akong gibuhat mga maayo.

11 Ug ako, ang Dios, miingon: Himoa nga moturok sa yuta ang mga sagbot, ang tanom nga mohatag og binhi, ang mga kahoy nga mamunga, sumala sa matang niini, ug ang kahoy nga mamunga, kansang binhi sama mismo niini maanaa sa yuta, ug kini nahimo gani sumala sa akong gipamulong.

12 Ug ang yuta mipatubo og mga sagbot, matag tanom nga naghatag og binhi sumala sa matang niini, ug ang kahoy nga namunga, kansang binhi kinahanglang sama mismo niini, sumala sa matang niini; ug ako, ang Dios, nakakita nga ang tanang butang nga akong gibuhat mga maayo;

13 Ug ang kagabhion ug ang kabuntagon mao ang ikatulo nga adlaw.

14 Ug ako, ang Dios, miingon: Himoa nga adunay mga kahayag diha sa kawanangan sa langit, aron mobahin sa adlaw gikan sa gabii, ug himoa kini nga mga timailhan, ug alang sa mga panahon, ug alang sa mga adlaw, ug alang sa katuigan;

15 Ug himoa kini nga mga kahayag diha sa kawanangan sa langit aron mohatag og kahayag diha sa yuta; ug kini nahimo.

16 Ug ako, ang Dios, mibuhat og duha ka dagko nga mga kahayag; ang mas dako nga kahayag mopatigbabaw sa adlaw, ug ang mas gamay nga kahayag mopatigbabaw sa gabii, ug ang mas dako nga kahayag mao ang adlaw, ug ang mas gamay nga kahayag mao ang buwan; ug ang mga bituon gibuhat usab sumala sa akong pulong.

17 Ug ako, ang Dios, mipahimutang niini diha sa kawanangan sa langit aron maghatag og kahayag diha sa yuta,

18 Ug ang adlaw mopatigbabaw maadlaw, ug ang buwan mopatigbabaw magabii, ug mobahin sa kahayag gikan sa kangitngit; ug ako, ang Dios, nakakita nga ang tanang butang nga akong gibuhat mga maayo;

19 Ug ang kagabhion ug ang kabuntagon mao ang ikaupat nga adlaw.

20 Ug ako, ang Dios, miingon: Himoa nga ang mga tubig mopagula og daghang maglihok nga binuhat nga adunay kinabuhi, ug mga langgam nga molupad sa ibabaw sa yuta diha sa lapad nga kawanangan sa langit.

21 Ug ako, ang Dios, milalang og dagkong mga balyena, ug matag buhi nga binuhat nga naglihok, nga ang mga tubig mipagula og daghan, sumala sa ilang matang, ug matag may pako nga langgam, sumala sa matang niini; ug ako, ang Dios, nakakita nga ang tanang butang nga akong gilalang mga maayo.

22 Ug ako, ang Dios, mipanalangin kanila, nga nag-ingon: Pagmabungahon, ug pagsanay, ug pun-a ang mga tubig sa dagat; ug himoa nga ang mga langgam mosanay diha sa yuta;

23 Ug ang kagabhion ug ang kabuntagon mao ang ikalima nga adlaw.

24 Ug ako, ang Dios, miingon: Himoa nga ang yuta mopagula og mga buhi nga binuhat sumala sa matang niini, mga baka, ug nagkamang nga mga butang, ug mga mananap sa yuta sama sa ilang matang, ug kini nahimo;

25 Ug ako, ang Dios, mibuhat sa mga mananap sa yuta sumala sa ilang matang, ug mga baka sumala sa ilang matang, ug tanang nagkamang sa yuta sumala sa matang niini; ug ako, ang Dios, nakakita nga kining tanang butang mga maayo.

26 Ug ako, ang Dios, miingon sa akong Bugtong Anak, nga kuyog kanako sukad pa sa sinugdanan: Magbuhat kita og tawo sama sa atong hitsura, sumala sa atong panagway; ug kini nahimo. Ug ako, ang Dios, miingon: Tugoti sila nga adunay kamandoan ibabaw sa mga isda sa dagat, ug ibabaw sa mga langgam sa kahanginan, ug ibabaw sa mga baka, ug ibabaw sa tibuok yuta, ug ibabaw sa matag nagkamang nga butang nga nagkamang sa yuta.

27 Ug ako, ang Dios, milalang og tawo sama sa akong kaugalingong hitsura, sama sa hitsura sa akong Bugtong Anak ako milalang kaniya; lalaki ug babaye ako milalang kanila.

28 Ug ako, ang Dios, mipanalangin kanila, ug miingon kanila: Pagmabungahon, ug pagsanay, ug pun-a ang yuta, ug mangulo niini, ug pagbaton og kamandoan ibabaw sa mga isda sa dagat, ug ibabaw sa mga langgam sa kahanginan, ug ibabaw sa matag buhi nga butang nga naglihok diha sa yuta.

29 Ug ako, ang Dios, misulti sa tawo: Tan-awa, gihatagan ko ikaw sa matag tanom nga mohatag og binhi, nga anaa sa ibabaw sa tibuok yuta, ug matag kahoy diin ang bunga sa kahoy mohatag og binhi; nganha kanimo aron himoon kining pagkaon.

30 Ug ngadto sa matag mananap sa yuta, ug ngadto sa matag langgam sa kahanginan, ug ngadto sa tanang nagkamang sa yuta, nga akong gihatagan og kinabuhi, adunay ihatag nga limpyo nga tanom aron himoon kining pagkaon; ug kini nahimo, gani sumala sa akong gipamulong.

31 Ug ako, ang Dios, nakakita sa tanang butang nga akong gibuhat, ug, tan-awa, ang tanang butang nga akong gibuhat mga maayo kaayo; ug ang kagabhion ug ang kabuntagon mao ang ikaunom nga adlaw.