Joseph Smith—Mateo

1 Kay sultihan ko kamo, nga dili kamo makakita kanako sukad karon ug makaila nga ako mao siya ang gisulat sa mga propeta, hangtod nga kamo moingon: Bulahan siya nga moabot sa ngalan sa Ginoo, diha sa mga panganod sa langit, ug ang tanan nga balaang mga anghel uban kaniya. Dayon nakasabot ang iyang mga disipulo nga moanhi siya pag-usab dinhi sa yuta, human siya mahimaya ug makoronahan diha sa tuo nga kamot sa Dios.

2 Ug milakaw si Jesus, ug mibiya gikan sa templo; ug ang iyang mga disipulo miduol kaniya, aron maminaw kaniya, nag-ingon: Magtutudlo, ipakita kanamo ang kabahin sa mga gambalay sa templo, sama sa imong gipamulong—Pagalumpagon kini, ug ibilin diha kaninyo nga biniyaan.

3 Ug si Jesus misulti kanila: Wala ba kamo makakita niining tanan nga butang, ug wala ba kamo makasabot niini? Sa pagkatinuod sultihan ko kamo, walay mahibilin dinhi, dinhi niini nga templo, nga usa ka bato nga gipatong sa laing bato nga dili matumpag.

4 Ug si Jesus mibiya kanila, ug miadto sa Bungtod sa mga Olibo. Ug samtang naglingkod siya sa Bungtod sa mga Olibo, ang mga tinun-an miduol kaniya sa tago, nag-ingon: Sultihi kami kanus-a kini nga mga butang mahitabo nga imong gisulti kabahin sa kalaglagan sa templo, ug sa mga Judeo; ug unsa ang timailhan sa imong pag-anhi, ug sa kataposan sa kalibotan, o sa kalaglagan sa mga daotan, nga mao ang kataposan sa kalibotan?

5 Ug si Jesus mitubag, ug misulti ngadto kanila: Pagbantay nga walay tawo nga molingla kaninyo;

6 Kay daghan ang moanhi pinaagi sa akong ngalan, mag-ingon nga—ako mao si Kristo—ug molingla sa daghan;

7 Unya itugyan nila kamo aron pagasakiton, ug patyon kamo, ug pagadumtan kamo sa tanang nasod, tungod sa akong ngalan;

8 Ug unya daghan ang masakitan, ug magbudhi sa usag usa, ug magdumot sa usag usa;

9 Ug motungha ang daghang dili tinuod nga mga propeta, ug molingla og daghan;

10 Ug tungod kay modagsang ang pagkadaotan, ang gugma sa daghan magkaanam kabugnaw;

11 Apan siya nga magpabiling lig-on ug dili mabuntog, siya maluwas.

12 Busa, kon kamo, makakita sa makalilisang nga kalaglagan, nga gipamulong sa propeta nga si Daniel, mahitungod sa pagkagun-ob sa Jerusalem, dayon mobarog kamo sa balaan nga dapit; si bisan kinsa nga mobasa iya kining sabton.

13 Dayon palayasa sila nga tua sa Judea ngadto sa mga bukid;

14 Palayasa siya nga anaa sa atop sa balay, ug ayaw pabalika aron manguha og bisan unsang butang gikan sa iyang balay;

15 Ayaw usab pabalika siya nga tua sa umahan aron mokuha sa iyang mga sapot;

16 Ug alaot sila nga nagsabak, ug sila nga nagpasuso niana nga mga adlaw;

17 Busa, pag-ampo kamo sa Ginoo nga ang inyong panaw dili sa tingtugnaw, ni sa Igpapahulay nga adlaw;

18 Kay unya, niana nga mga adlaw, mahitabo ang dakong kalisdanan sa mga Judeo, ug sa mga lumulupyo sa Jerusalem, ingon nga wala pa gayod mapadangat sa Dios ngadto sa Israel, sukad sa sinugdanan sa ilang gingharian hangtod niini nga panahon; wala, dili usab kini ipadangat pag-usab bisan kanus-a ngadto sa Israel.

19 Ang tanang butang nga nahitabo kanila mao lamang ang sinugdanan sa mga kagul-anan nga modangat kanila.

20 Ug gawas kon kana nga mga adlaw mapamub-an, walay usa gayod kanila nga maluwas; apan tungod sa mga pinili, sumala sa pakigsaad, kana nga mga adlaw mapamub-an.

21 Tan-awa, kini nga mga butang akong gipamulong kaninyo kabahin sa mga Judeo; ug usab, human sa kalisdanan niana nga mga adlaw nga moabot sa Jerusalem, kon adunay tawo nga moingon nganha kaninyo, Tan-awa, ania si Kristo, o atua didto, ayaw siya tuohi;

22 Kay niana nga mga adlaw usab adunay motungha nga mga dili tinuod nga Kristo, ug mini nga mga propeta, ug magpakita og dagko nga mga timailhan ug mga kahibulongan, hangtod nga, kon mahimo, molingla sila sa labing pinili, kinsa mga pinili sumala sa pakigsaad.

23 Tan-awa, akong gipamulong kini nga mga butang nganha kaninyo tungod sa mga pinili; ug kamo usab makadungog og mga gubat, ug mga hungihong sa mga gubat; tan-awa nga kamo dili mabalaka, kay ang tanan nga akong gisulti kaninyo kinahanglan gayod nga mahitabo; apan ang kataposan wala pa.

24 Tan-awa, gisultihan ko na kamo kaniadto;

25 Mao nga, kon mosulti sila kaninyo nga: Tan-awa, atua siya sa kamingawan; ayaw pag-adto didto: Tan-awa, anaa siya sa tinago nga mga lawak; ayaw kini tuohi;

26 Kay sama nga ang kahayag sa kabuntagon nagagikan sa silangan, ug mobanwag bisan ngadto sa kasadpan, ug motabon sa tibuok yuta, mao usab ang pag-anhi sa Anak sa Tawo.

27 Ug karon pakitaon ko kamo og sambingay. Tan-awa, kon hain ang patay nga lawas, anha usab magpundok ang mga agila; mao usab ang akong mga pinili pagapundokon gikan sa upat ka suok sa yuta.

28 Ug makadungog sila og mga gubat, ug mga hungihong sa mga gubat.

29 Tan-awa mamulong ako tungod ug alang sa akong mga pinili; kay ang nasod moalsa batok sa nasod, ug gingharian batok sa gingharian; adunay mga kagutom, ug mga sakit, ug mga linog, sa nagkalain-laing mga dapit.

30 Ug usab, tungod kay ang pagkadaotan modagsang, ang gugma sa mga tawo mag-anam kabugnaw; apan siya nga dili mabuntog, siya pagaluwason.

31 Ug usab, kini nga Ebanghelyo sa Gingharian isangyaw sa tibuok nga kalibotan, aron mahimong saksi ngadto sa tanang nasod, ug dayon moabot ang kataposan, o ang kalaglagan sa mga daotan;

32 Ug usab ang mapanamastamason nga kalaglagan, nga gisulti pinaagi sa propeta nga si Daniel, matuman.

33 Ug diha-diha dayon human sa kalisdanan niana nga mga adlaw, ang adlaw mongitngit, ug ang bulan dili mohatag sa iyang kahayag, ug ang mga bituon mahulog gikan sa langit, ug ang mga gahom sa langit pakurogon.

34 Sa pagkatinuod, sultihan ko kamo, kini nga henerasyon, nga pakitaan niini nga mga butang, dili mahanaw hangtod ang tanan nga akong gisulti kaninyo matuman.

35 Bisan tuod, ang mga adlaw moabot, nga ang langit ug yuta mahanaw; apan ang akong mga pulong dili mahanaw, apan ang tanan matuman.

36 Ug, sama sa akong gisulti kaniadto, human sa kalisdanan niana nga mga adlaw, ug ang mga gahom sa kalangitan pakurogon, human niana makita ang timailhan sa Anak sa Tawo nga anaa sa langit, ug unya ang tanan nga mga tribo sa yuta magbangotan; ug sila makakita sa Anak sa Tawo nga moabot diha sa mga panganod sa langit, uban sa gahom ug dakong himaya;

37 Ug kinsa kadtong mopakabahandi sa akong pulong, dili malingla, kay ang Anak sa Tawo moabot, ug ipadala niya ang iyang mga anghel sa dili pa siya moabot uban sa lanog nga tunog sa trumpeta, ug pundokon nila ang nahibilin sa iyang mga pinili gikan sa upat ka hangin, gikan sa usa ka tumoy sa langit ngadto sa lain.

38 Karon tun-i ang sambingay sa kahoy nga igos—Kon linghod pa ang mga sanga niini, ug magsugod kini sa pagpangudlot, mahibaloan ninyo nga ang ting-init duol na;

39 Mao usab, ang akong mga pinili, kon makita na nila kining tanan nga butang, mahibaloan nila nga duol na siya, gani anaa na sa mga pultahan;

40 Apan mahitungod sa adlaw, ug takna, walay usa nga nasayod; wala, dili ang mga anghel sa Dios sa langit, apan ang akong Amahan lamang.

41 Apan sama sa nahitabo sa mga adlaw ni Noe, mao usab ang mahitabo sa pag-anhi sa Anak sa Tawo;

42 Kay mahitabo kanila, ang nahitabo sa mga adlaw sa wala pa ang baha; kay hangtod sa adlaw nga si Noe misulod sa arka nangaon sila ug nanag-inom, nanagminyo ug nanaghatag og pagtugot alang sa kaminyoon;

43 Ug wala masayod hangtod ang lunop miabot, ug mianod nilang tanan; mao usab ang pag-anhi sa Anak sa Tawo.

44 Unya matuman kana nga gisulat, nga sa kataposang mga adlaw, duha ka tawo ang anaa sa umahan, ang usa kuhaon, ug ang usa ibilin;

45 Duha ka tawo ang maggaling sa galingan, ang usa kuhaon, ug ang usa ibilin;

46 Ug unsa ang akong isulti ngadto sa usa, akong isulti sa tanang tawo; busa, pagbantay, kay wala kamo masayod kon unsa nga oras ang inyong Ginoo moabot.

47 Apan hibaloi kini, kon ang maayong tawo sa balay nasayod pa kon unsa nga oras ang kawatan moabot, magbantay unta siya, ug dili motugot nga ang iyang balay lungkabon, apan nakapangandam unta.

48 Busa pangandam usab kamo, kay sa oras nga dili ninyo damhon, moabot ang Anak sa Tawo.

49 Busa, kinsa man ang matinud-anon ug maalamon nga sulugoon, nga gihimo sa iyang agalon nga magmando sa iyang panimalay, aron hatagan sila og pagkaon sa tukmang panahon?

50 Bulahan kanang sulugoon, nga makita sa iyang agalon, kon moabot na siya, nga nagbuhat sa ingon; ug sa pagkatinuod sultihan ko kamo, siya mohimo kaniya nga magmamando sa iyang tanan nga butang.

51 Apan kon kanang daotan nga sulugoon moingon diha sa iyang kasingkasing: Ang akong ginoo naglangan sa iyang pag-abot,

52 Ug magsugod sa pagdagmal sa iyang isigka-sulugoon, ug mokaon ug moinom uban sa mga hubog,

53 Ang ginoo niana nga sulugoon moabot sa adlaw nga dili siya magbantay sa iyang pag-abot, ug sa takna nga dili siya masayod,

54 Ug mopahimulag kaniya, ug ihatag kaniya ang iyang bahin uban sa mga tigpakaaron-ingnon; adunay mga pagdanguyngoy ug pagpangagot sa ngipon.

55 Ug sa ingon niana moabot ang kataposan sa mga daotan, sumala sa panagna ni Moises, nga nag-ingon: Ipahimulag sila gikan sa katawhan; apan ang kataposan sa yuta wala pa, apan sa dili madugay.