1 Ug karon nahitabo nga sa dihang si Abinadi nakahuman niini nga mga pulong, nga ang hari mimando nga ang mga pari kinahanglang modakop kaniya ug mohimo og paagi nga siya kinahanglan nga patyon.

2 Apan dihay usa kanila kansang ngalan mao si Alma, nga siya usab usa ka kaliwat ni Nephi. Ug usa siya ka batan-ong lalaki, ug mituo siya sa mga pulong nga gipamulong ni Abinadi, kay nasayod siya mahitungod sa pagkadaotan nga gipamatuod ni Abinadi batok kanila; busa misugod siya sa pagpangamuyo sa hari nga unta dili siya masuko kang Abinadi, apan tugotan siya nga mobiya nga malinawon.

3 Apan ang hari misamot hinoon og kasuko, ug mimando nga si Alma isalikway gikan kanila, ug misugo sa iyang mga sulugoon sa paggukod kaniya aron nga sila mopatay kaniya.

4 Apan milayas siya gikan kanila ug mitago sa iyang kaugalingon nga wala sila makakita kaniya. Ug samtang nagtago siya sulod sa daghang adlaw misulat sa tanang pulong nga gipamulong ni Abinadi.

5 Ug nahitabo nga ang hari mimando nga ang iyang mga bantay moliyok ni Abinadi ug modakop kaniya; ug migapos sila kaniya ug mibalhog kaniya sa bilanggoan.

6 Ug human sa tulo ka adlaw, human makigtambag sa iyang mga pari, misugo siya nga dad-on na usab siya sa iyang atubangan.

7 Ug miingon siya kaniya: Abinadi, nakakita kami og sumbong batok kanimo, ug ikaw angay nga mamatay.

8 Kay ikaw miingon nga ang Dios mismo manaog taliwala sa katawhan; ug karon, tungod niini nga hinungdan ikaw pagapatyon gawas kon imong bakwion ang tanang pulong nga imong gipamulong nga daotan mahitungod kanako ug sa akong katawhan.

9 Karon si Abinadi miingon kaniya: sultihan ko kamo, dili ko bakwion ang mga pulong nga akong gipamulong kaninyo mahitungod niini nga katawhan, tungod kay tinuod kini; ug nga aron ikaw masayod sa pagkatinuod niini ako nag-antos sa akong kaugalingon nga nahulog ako sa inyong mga kamot.

10 Oo, ug mag-antos ko bisan hangtod sa kamatayon, ug dili ko bakwion ang akong mga pulong, ug kini mobarog nga usa ka pagpamatuod batok kaninyo. Ug kon ako inyong patyon mopaagas kamo og inosente nga dugo, ug kini usab mobarog nga pagpamatuod batok kaninyo sa kataposang adlaw.

11 Ug karon si hari Noah hapit na unta mobuhi kaniya, kay nahadlok siya sa iyang mga pulong; kay nahadlok siya nga ang mga paghukom sa Dios moabot kaniya.

12 Apan ang mga pari mipataas sa ilang mga tingog batok kaniya, ug misugod sa pagpasangil kaniya, nga nag-ingon: Iyang gipanamastamasan ang hari. Busa ang hari nahulhogan aron masuko kaniya, ug siya mitugyan kaniya nga siya patyon.

13 Ug nahitabo nga sila midala kaniya ug migapos kaniya, ug milatigo sa iyang lawas pinaagi sa binugkos nga mga kahoy, oo, gani ngadto sa kamatayon.

14 Ug karon sa diha nga ang mga siga sa kalayo misugod na sa pagsunog kaniya, misinggit siya ngadto kanila, nga nag-ingon:

15 Tan-awa, sama sa inyong gibuhat kanako, mahitabo usab nga ang inyong binhi mahimong hinungdan nga daghan ang mag-antos sa mga kasakit nga akong giantos, bisan sa kasakit sa kamatayon pinaagi sa kalayo; ug kini tungod kay mituo sila sa kaluwasan sa Ginoo nga ilang Dios.

16 Ug mahitabo nga takboyan kamo sa tanang matang sa mga sakit tungod sa inyong mga sayop nga binuhatan.

17 Oo, ug pagahampakon kamo sa bisan diin nga dapit, ug palayason ug tibulaagon ngadto ug nganhi, gani sama nga ang usa ka ihalas nga panon sa mga hayop abogon sa ihalas ug mabangis nga mga mananap.

18 Ug niana nga adlaw panggukoron kamo, ug dagiton sa kamot sa inyong mga kaaway, ug unya mag-antos kamo, sama sa akong giantos, sa mga kasakit sa kamatayon pinaagi sa kalayo.

19 Sa ingon niana ang Dios magpahamtang og panimalos ngadto niadtong mopatay sa iyang katawhan. O Dios, dawata ang akong kalag.

20 Ug karon, sa diha nga si Abinadi nakasulti niini nga mga pulong, nalup-og siya, nga nahiagom sa kamatayon pinaagi sa kalayo; oo, nga gipahamtangan sa kamatayon tungod kay dili niya ilimod ang mga sugo sa Dios, nga miselyo sa kamatuoran sa iyang mga pulong pinaagi sa iyang kamatayon.