1 Ug karon nahitabo nga si Ammon ug si hari Limhi misugod sa pagpakigkonsulta sa katawhan kon unsaon nila pagluwas ang ilang mga kaugalingon gikan sa pagkaulipon; ug gani ilang giawhag nga ang tanang katawhan kinahanglan nga mopundok sa ilang mga kaugalingon; ug ila kining gibuhat aron ilang madungog ang tingog sa katawhan mahitungod niining butanga.

2 Ug nahitabo nga wala sila makakita og paagi sa pagluwas sa ilang mga kaugalingon gikan sa pagkaulipon, gawas sa pagdala sa ilang kababayen-an ug mga anak, ug sa ilang mga gagmayng kahayopan, ug sa ilang mga pundok sa dagkong kahayopan, ug sa ilang mga tolda, ug mobiya ngadto sa kamingawan; kay ang mga Lamanita ingon nga hilabihan ka daghan, imposible alang sa katawhan ni Limhi nga makig-away kanila tungod sa ilang kadaghan, naghunahuna sa pagluwas sa ilang mga kaugalingon gikan sa ilang pagkaulipon pinaagi sa espada.

3 Karon nahitabo nga si Gideon miduol ug mibarog sa atubangan sa hari, ug miingon ngadto kaniya: Karon O hari, ikaw mipatalinghog sa akong mga pulong sa daghang higayon sa diha nga kita nakig-away sa atong kaigsoonan nga mga Lamanita.

4 Ug karon O hari, kon wala ka maghunahuna nga ako dili mapuslanon nga sulugoon, o kon ikaw hangtod karon naminaw sa akong mga pulong bisan sa unsa nga paagi, ug kini nakahatag og kaayohan kanimo, bisan pa ako nagtinguha nga ikaw maminaw sa akong mga pulong niining higayona, ug ako mahimo nimong sulugoon ug moluwas niini nga katawhan gikan sa pagkaulipon.

5 Ug gitugotan siya sa hari nga siya mamulong. Ug si Gideon miingon kaniya:

6 Tan-awa ang agianan sa luyo, lahos sa paril sa luyo, sa luyo nga dapit sa siyudad. Ang mga Lamanita, o ang mga bantay sa mga Lamanita, magabii mahubog; busa magpadala kita og usa ka pahibalo sa tanan niini nga katawhan nga pundokon nila ang ilang mga gagmayng kahayopan ug mga dagkong kahayopan, aron madala nila kini ngadto sa kamingawan panahon sa kagabhion.

7 Ug moadto ako sumala sa imong sugo ug mobayad sa kataposang buhis sa bino ngadto sa mga Lamanita, ug mahubog sila; ug moagi kita sa sekreto nga agianan agi sa walá nga dapit sa ilang kampo sa panahon nga sila mahubog ug makatulog.

8 Sa ingon niana mobiya kita kauban sa atong kababayen-an ug sa atong mga anak, sa atong mga gagmayng kahayopan, ug sa atong mga dagkong kahayopan ngadto sa kamingawan; ug mopanaw kita libot sa yuta sa Shilom.

9 Ug nahitabo nga ang hari mipatalinghog sa mga pulong ni Gideon.

10 Ug si hari Limhi misugo nga ang iyang katawhan kinahanglan mopundok sa ilang mga gagmayng kahayopan; ug mipadala siya sa buhis sa bino ngadto sa mga Lamanita; ug mipadala usab siya og dugang pa nga bino, isip usa ka gasa ngadto kanila; ug miinom sila sa bino nga gipadala ni hari Limhi ngadto kanila.

11 Ug nahitabo nga ang katawhan ni hari Limhi mibiya pagkagabii ngadto sa kamingawan dala ang ilang mga gagmayng kahayopan ug sa ilang mga dagkong kahayopan, ug milibot sila sa yuta sa Shilom ngadto sa kamingawan, ug miliko sa ilang agianan ngadto sa yuta sa Zarahemla, nga gipangulohan ni Ammon ug sa iyang kaigsoonan.

12 Ug ilang gidala ang tanan nila nga mga bulawan, ug mga pilak, ug ang ilang bililhon nga mga butang, nga ilang madala, ug usab ang ilang mga kasangkapan uban kanila, ngadto sa kamingawan; ug mipadayon sila sa ilang panaw.

13 Ug human sa pipila ka adlaw didto sa kamingawan miabot sila sa yuta sa Zarahemla, ug miipon sa katawhan ni Mosiah, ug nahimo nga iyang mga sakop.

14 Ug nahitabo nga si Mosiah midawat kanila uban sa kamaya; ug siya usab midawat sa ilang mga ^atalaan, ug usab sa mga ^btalaan nga nakit-an sa katawhan ni Limhi.

15 Ug karon nahitabo nga sa diha nga nakabantay ang mga Lamanita nga ang katawhan ni Limhi mibiya sa yuta pagkagabii, busa mipadala sila og kasundalohan ngadto sa kamingawan sa paggukod kanila;

16 Ug human sa duha ka adlaw nila nga paggukod kanila, wala na sila makasunod sa ilang mga agi; busa nangasaag sila sa kamingawan.