1 Futsi kwenteka kutsi ngesikhatsi umnyaka wemashumi lasitfupha nakubili wekubusa kwebehluleli sewuphelile, tonkhe letintfo bese tentekile futsi nemaLamani, incenye lenkhulu yawo, babantfu labalungile, kangangekutsi kulunga kwawo bekwendlula loko kwemaNefi, ngenca yekucina kanye nekusima kwawo elukholweni.

2 Ngoba buka, bekukhona labanyenti bemaNefi labesebalukhuni futsi bangakaphendvuki baphindze bababi kakhulu, kangangekutsi balilahla livi laNkulunkulu kanye nato tonkhe tinshumayelo kanye netiphrofetho leteta emkhatsini wabo.

3 Noko, bantfu belibandla baba nenjabulo lenkhulu ngenca yekuphendvuka kwemaLamani, yebo, ngenca yelibandla laNkulunkulu, lebeselisunguliwe emkhatsini wawo. Futsi bahlanganyela lomunye nalomunye, baba nekutfokota lokukhulu lomunye nalomunye, baphindze baba nenjabulo lenkhulu.

4 Futsi kwenteka kutsi labanyenti bemaLamani beta behlela eveni laseZarahemla, bamemetela kubantfu bemaNefi indlela labaphendvuka ngayo, futsi bawakhutsata kutsi akholwe aphindze aphendvuke.

5 Yebo, futsi lamanyenti ashumayela ngemandla lamakhulu kakhulu kanye nangeligunya, kangangoba babehlisela ekujuleni kwekutfobeka, kutsi babe balandzeli labatfobekile baNkulunkulu kanye neliWundlu.

6 Futsi kwenteka kutsi labanyenti bemaLamani bahamba baya eveni lelingasenyakatfo; kanjalo naNefi kanye naLehi bahamba baya eveni lelingasenyakatfo, kuyawushumayela kubantfu. Waphela kanjalo-ke umnyaka wemashumi lasitfupha nakutsatfu.

7 Bukani, kwabakhona kuthula kulo lonkhe live, kangangekutsi emaNefi ahamba kunoma nguyiphi incenye yelive labebafuna kuhamba kuyo, noma emkhatsini wemaNefi noma kumaLamani.

8 Futsi kwenteka kutsi emaLamani nawo ngalokunjalo ahamba noma ngukuphi lapho bekafuna kuhamba khona, noma bekusemkhatsini wemaLamani noma emkhatsini wemaNefi; futsi ngaleyo ndlela aba nekuhlangana lokukhululekile lomunye nalomunye, kutsenga kanye nekutsengisa, kanye nekutfola inzuzo, njengekufisa kwabo.

9 Futsi kwenteka kutsi baceba kakhulu, emaLamani kanye nemaNefi; babaneligolide lelinyenti kakhulu, kanye nesiliva, kanye nayo yonkhe inhlobo yetinsimbi letiligugu, eveni leliseningizimu naseveni lelisenyakatfo.

10 Manje live leliseningizimu belibitwa ngaLehi, bese kutsi live lelisenyakatfo belibitwa ngaMuleki, lebelicanjwe ngendvodzana yaSedekiya; ngoba iNkhosi yamletsa Muleki eveni lelisenyakatfo, Lehi eveni leliseningizimu.

11 Futsi buka, bekukhona yonkhe inhlobo yeligolide kuwo omabili lamave, kanye nesiliva, nayo yonkhe inhlobo yensimbi leligugu; ngetulu kwaloko bekukhona tingcweti tebabumbi, letatisebenta tonkhe tinhlobo tensimbi futsi tiyicwengisisa; ngaleyo ndlela taceba.

12 Bahlanyela lokuyinhlavu ngebunyenti bato, enyakatfo kanye naseningizimu; baphumelela kakhulu, enyakatfo naseningizimu. Batalana bandza futsi bakhula bacina kakhulu eveni. Bakhulisa imihlambi yetimvu kanye nemihlambi yetinkhomo letinyenti, yebo, letinyenti letikhuluphalisiwe.

13 Bukani besifazane babo basebenta beluka, benta yonkhe inhlobo yendvwangu, yelineni leyephotselwe ngalokucolisakele kanye nendvwangu yalo lonkhe luhlobo, kwembatsisa bungcunu babo. Wendlula kanjalo-ke umnyaka wemashumi lasitfupha nakune kunekuthula.

14 Futsi emnyakeni wemashumi lasitfupha nesihlanu baphindze baba nenjabulo lokukhulu kanye nekuthula, yebo, kushumayela lokukhulu kanye netiphrofetho letinyenti mayelana naloko lobekutawukuta. Wendlula kanjalo-ke umnyaka wemashumi lasitfupha nesihlanu.

15 Futsi kwenteka kutsi ngemnyaka wemashumi lasitfupha nesitfupha wekubusa kwebehluleli, bukani, Sezoramu wabulawa ngesandla lebesingatiwa ngesikhatsi ahleti esihlalweni sekwehlulela. Futsi kwenteka kutsi ngawo lowo mnyaka, indvodzana yakhe, lebeyibekwe bantfu esikhundleni sakhe, nayo ngalokunjalo yabulawa. Waphela kanjalo-ke umnyaka wemashumi lasitfupha nesitfupha.

16 Ekucaleni kwemnyaka wemashumi lasitfupha nesikhombisa bantfu baphindze bacala kukhula kakhulu ebubini.

17 Ngoba bukani, iNkhosi beyibabusisile kuso sonkhe lesi sikhatsi ngemcebo welive kangangoba abatange baphehlelwe entfukutselweni, etimphini, noma ekucitseni ingati; ngako-ke bacala kubeka litsemba labo emcebeni wabo; yebo, bacala bafuna kutfola inzuzo kute batiphakamise lomunye etikwalomunye; ngako-ke bacala kubulala ngasense, nekweba kanye nekuphanga, kute batfole inzuzo.

18 Manje bukani, labo babulali kanye nebaphangi bebalicembu lebelicanjwe nguKishkumeni kanye naGadiyantoni. Manje bese babanyenti, nasemkhatsini wemaNefi, belicembu laGadiyantoni. Kodvwa bukani, bebabanyenti kakhulu emkhatsini waleyo ncenye yemaLamani lebeyinebubi kakhulu. Futsi bebabitwa ngekutsi tigebengu nebabulali baGadiyantoni.

19 Futsi bekungibo lababulala umehluleli lomkhulu Sezoramu, kanye nendvodzana yakhe, ngesikhatsi basesihlalweni sekwehlulela; futsi bukani, abatange batfolwe.

20 Manje kwenteka kutsi ngesikhatsi emaLamani atfola kutsi bekukhona tigebengu emkhatsini wawo adzabuka kakhulu; enta konkhe lokusemandleni awo kutsi atibulale tiphele emhlabeni wonkhe.

21 Kodvwa bukani, Sathane watiphehla tinhlitiyo encenyeni lenkhulu yemaNefi, kangangekutsi ahlangana nalawo macembu latigebengu, angena esivumelwaneni nasetifungweni tabo, kutsi batawuvikelana futsi balondvolotane nguloyo naloyo kunoma ngutiphi timo letimatima labebayawuba kuto, kute bangeva buhlungu ngenca yekubulala kwabo, nekuphanga kanye nekweba kwabo.

22 Futsi kwenteka kutsi baba netimphawu tabo, yebo, timphawu tabo letiyimfihlo, kanye nemagama abo layimfihlo; kute ngaloku bakwati kwehlukanisa umnakabo longene esivumelwaneni, kute kutsi noma ngabe ngubuphi bubi umnakabo labentako angalinyatwa ngumnakabo, noma ngulabo labebabelicembu lakhe, labebangene kulesivumelwano.

23 Ngaleyo ndlela bebangabulala, baphange, bebe, futsi bente bugwadla kanye nayo yonkhe inhlobo yebubi, ngalokuphambene nemtsetfo welive labo kanjalo nemitsetfo yaNkulunkulu wabo.

24 Futsi loyo lobekawelicembu labo lobekangavetela umhlaba ngebubi babo kanye nangetinengiso tabo, bekabekwa licala, hhayi ngekwemitsetfo yelive labo, kodvwa ngekwemitsetfo yebubi babo, lebeyiniketwe nguGadiyantoni kanye naKishkumeni.

25 Manje buka, nguleti tifungo letiyimfihlo kanye netivumelwano Alma layaleta ngato indvodzana yakhe kutsi tingaphumeli eveni, funa tibe yindlela yekwehlisela bantfu phansi ekubhujisweni.

26 Manje bukani, leto tifungo letiyimfihlo kanye netivumelwano atiletfwanga kuGadiyantoni tiphuma emibhalweni lebeyiniketwe Helamani; kodvwa bukani, betifakwe enhlitiyweni yaGadiyantoni nguye kanye loyo muntfu lowaheha batali betfu bekucala kutsi badle sitselo lesingakavunyelwa—

27 Yebo, yena kanye loyo muntfu lowenta lisu naKhayini kutsi uma angabulala umnakabo Abela angeke atiwe emhlabeni. Futsi wenta lisu naKhayini kanye nebalandzeli bakhe kusukela ngaleso sikhatsi kuya phambili.

28 Futsi ngetulu kwaloko nguye kanye loyo muntfu lowakufaka etinhlitiyweni tebantfu kutsi bakhe umbhoshongo lophakeme ngalokwenele kute bafinyelele ezulwini. Futsi bekunguye kanye loyo muntfu lowahola bantfu labebavela kulombhoshongo beta kulelive; lowandzisa imisebenti yebumnyama kanye netinengiso kulo lonkhe live, wate wabahudvulela phansi bantfu ekubhujisweni nya, kanye nasesihogweni lesingapheli.

29 Yebo, nguye kanye loyo muntfu lowakufaka enhlitiyweni yaGadiyantoni kutsi achubeke njalo ngemsebenti webumnyama, kanye newekubulala ngasense; futsi ukusekelile loko kusukela ekucaleni kwemuntfu kwehle kute kube ngulesi sikhatsi samanje.

30 Futsi bukani, nguye loyo longumcambi waso sonkhe sono. Bukani, usachubeka nemsebenti wakhe webumnyama kanye newekubulala ngasense, futsi undlulisa emachinga abo, tifungo, tivumelwano, kanye nemasu abo ebubi lobukhulu, titukulwane ngetitukulwane kangangoba angatfola kubambelela etinhlitiyweni tebantfwana bebantfu.

31 Manje bukani, besekatfole kubambelela lokukhulu etinhlitiyweni temaNefi; yebo, kangangekutsi besekamabi kakhulu; yebo, incenye lenkhulu yawo beseyisukile endleleni yekulunga, futsi yanyatsela imiyaleto yaNkulunkulu ngaphansi kwetinyawo tawo, aphendvukela etindleleni tawo, atakhela tithico teligolide kanye nesiliva lawo.

32 Futsi kwenteka kutsi bonkhe lobubi beta kubo ngesikhashana lesingasiminyaka mingaki, kangangekutsi incenye lenkhulu yabo yeta kubo ngemnyaka wemashumi lasitfupha nesikhombisa wekubusa kwebehluleli kubantfu baNefi.

33 Futsi akhula ebubini bawo ngemnyaka wemashumi lasitfupha nesiphohlongo, lokwabangela lusizi nesililo lesikhulu kulabalungile.

34 Ngaleyo ndlela siyabona kutsi emaNefi acala ancishelwa lukholo, akhula ebubini nasetinengisweni, kwatsi emaLamani wona acala kukhula kakhulu ekumatini Nkulunkulu wawo; yebo, acala kuyigcina imitsetfo nemiyaleto yakhe, kanye nekuhamba ecinisweni nangebucotfo ngaphambi kwakhe.

35 Ngaleyo ndlela siyabona kutsi Moya weNkhosi wacala kutsi ukhweshe kumaNefi, ngenca yebubi kanye nebulukhuni betinhlitiyo tawo.

36 Ngaleyo ndlela siyabona kutsi iNkhosi yacala kutfulula Moya wayo kumaLamani, ngenca yekutsandza kwawo kanye nekufuna kutsi akholwe emavini ayo.

37 Futsi kwenteka kutsi emaLamani alitingela licembu letigebengu taGadiyantoni; futsi alishumayela livi laNkulunkulu emkhatsini wencenye yato lebeyinebubi kakhulu, kangangekutsi lelicembu letigebengu lesuswa laphela nya emkhatsini wemaLamani.

38 Futsi kwenteka kutsi ngakulolunye luhlangotsi, emaNefi abakhulisa aphindze abasekela, acala kuleyo ncenye lebeyinebubi kakhulu, late lasabalala lonkhe live lemaNefi, futsi layenga incenye lenkhulu yalabalungile bate babuyela phansi ekukholweni imisebenti yabo futsi bahlanganyela nabo emiphangweni yabo, bahlanganyela nabo ekubulaleni kwabo ngasense kanye nasemacenjini abo angasense.

39 Ngaleyo ndlela batfola kuwuphatsa ngalokuphelele umbuso, kangangekutsi banyatsela ngaphansi kwetinyawo tabo bashaya baphindze bahlupha futsi bafulatsela labamphofu nalabamnene, kanye nebalandzeli labatfobekile baNkulunkulu.

40 Ngaleyo ndlela siyabona kutsi bese basesimeni lesibi kakhulu, futsi sebakulungele kubhujiswa kwaphakadze.

41 Futsi kwenteka kutsi umnyaka wemashumi lasitfupha nesiphohlongo waphela ngaleyo ndlela wekubusa kwebehluleli kubantfu baNefi.