1 Futsi kwenteka kutsi ngemnyaka wemashumi lamane nakubili wekubusa kwebehluleli, emvakwekutsi Moroniha sekacinisekise kuthula futsi emkhatsini wemaNefi nemaLamani, bukani, bekute lobekatawutsatsa sihlalo sekwehlulela; ngako-ke kwacala kwaba nencabano futsi emkhatsini webantfu mayelana nekutsi ngubani lobekumele atsatse sihlalo sekwehlulela.

2 Futsi kwenteka kutsi Helamani, lobekayindvodzana yaHelamani, wabekwa kutsi atsatse sihlalo sekwehlulela, ngelivi lebantfu.

3 Kodvwa bukani, Kishkumeni, lobekabulele Phahorani, abebhacele kubulala naHelamani; futsi bekasekelwe licembu lakhe, lebelingene esivumelwaneni sekutsi kube bete namunye lotawukwati ngebubi bakhe.

4 Ngoba bekukhona Gadiyantoni mumbe, lobekayingcweti kakhulu ekukhulumeni, kanjalo nangebucili bakhe, kutsi achubeke nekwenta umsebenti lofihlekile wekubulala kanye newekugebenga; ngako-ke waba ngumholi welicembu laKishkumeni.

5 Ngako-ke wabayenga, kanjalo naKishkumeni, kutsi uma bangambeka esihlalweni sekwehlulela bekatawukwenta labo labebabelicembu lakhe kutsi banikwe emandla kanye neligunya emkhatsini webantfu; ngako-ke Kishkumeni wafuna kumbulala Helamani.

6 Futsi kwenteka kutsi ngesikhatsi ahamba aya ngasesihlalweni sekwehlulela kuyawubulala Helamani, bukani yinye yetinceku taHelamani, lebeyiphumile ebusuku, itfolile, ngekutifihla, lwati ngalawo macebo labekabekiwe ngulelicembu kubulala Helamani—

7 Futsi kwenteka kutsi yahlangana naKishkumeni, yamnika luphawu; ngako-ke Kishkumeni wayitjela inhloso yesifiso sakhe, afuna kutsi imhole imyise esihlalweni sekwehlulela kute abulale Helamani.

8 Ngesikhatsi inceku yaHelamani seyikwati konkhe lobekusenhlitiyweni yaKishkumeni, nekutsi bekuyinhloso yakhe kubulala, kanjalo nekutsi bekuyinhloso yabo bonkhe labo labebabelicembu lakhe kutsi babulale, baphange, nekuzuza emandla, (futsi loku bekulisu labo lelifihlekile, nelicebo labo) inceku yaHelamani yatsi kuKishkumeni: Asihambe siye esihlalweni sekwehlulela.

9 Manje loku kwamjabulisa Kishkumeni, ngoba bekacabanga kutsi bekatawulifeza lisu lakhe; kodvwa bukani, inceku yaHelamani, basahamba baya esihlalweni sekwehlulela, yagwaza Kishkumeni enhlitiyweni, kangangekutsi wawa wafa ngaphandle kwekububula. Yagijima yayotjela Helamani tonkhe tintfo leyayitibonile, naleyayitivile kanye naleyayitentile.

10 Futsi kwenteka kutsi Helamani watfumela kutsi kuyawubanjwa lelicembu letigebengu kanye nebabulali labafihlakele, kute bajeziswe ngekwemtsetfo.

11 Kodvwa bukani, ngesikhatsi Gadiyantoni sekatfolile kutsi Kishkumeni akabuyanga wesaba kutsi funa naye abulawe; ngako-ke wenta kutsi licembu lakhe limlandzele. Babaleka baphuma eveni, ngendlela lefihlakele, baya ehlane; ngalesi sizatfu ngesikhatsi Helamani sekatfumele kutsi bayobanjwa abatange basatfolakala ndzawo.

12 Futsi lokunye ngaloGadiyantoni kutobuye kukhulunywe ngako emvakwaloku. Waphela kanjalo-ke umnyaka wemashumi lamane nakubili wekubusa kwebehluleli kubantfu baNefi

13 Futsi bukani, ekugcineni kwalencwadzi nitawubona kutsi loGadiyantoni waba yimbangela yekubhujiswa, yebo, cishe konkhe kubhujiswa kwebantfu baNefi.

14 Bukani angisho ekugcineni kwencwadzi yaHelamani, kodvwa ngisho ekugcineni kwencwadzi yaNefi, lengitsatse kuyo yonkhe lendzaba lengiyibhalile.