Sehluko 3
EmaNefi lamanyenti atfutsela eveni lelingasenyakatfo—Akha tindlu tasemende aphindze agcina imibhalo leminyenti—Emashumi etinkhulungwane ayaphendvuka aphindze ayabhajatiswa—Livi laNkulunkulu liholela bantfu ensindzisweni—Nefi indvodzana yaHelamani utsatsa sihlalo sekwehlulela. Cishe ngemnyaka wema-49–39 ngaphambi kwekutalwa kwaKhristu.
1 Manje kwenteka kutsi ngemnyaka wemashumi lamane nakutsatfu wekubusa kwebehluleli, akutange kube khona incabano emkhatsini webantfu baNefi ngaphandle nje kwekutikhukhumeta lokuncane lobekusebandleni, lokwabanga kuphikisana lokuncane emkhatsini webantfu, futsi loku kuphikisana kwasombululeka ekupheleni kwemnyaka wemashumi lamane nakutsatfu.
2 Futsi akutange kube khona incabano emkhatsini webantfu ngemnyaka wemashumi lamane nakune; kanjalo akutange kube khona incabano lenganani ngemnyaka wemashumi lamane nesihlanu.
3 Futsi kwenteka kutsi ngemnyaka wemashumi lamane nesitfupha, yebo, kwaba khona incabano lenkhulu kanye nekuhlubuka lokunyenti; lokwaba yimbangela yekutsi labanyenti kakhulu besuke baphume eveni laseZarahemla, bahambe baye eveni lelingasenyakatfo kute balitsatse lelive libe lifa.
4 Bahamba indlela lendze kakhulu, kangangekutsi bate befika emachibini lamakhulu emanti kanye nasemifuleni leminyenti.
5 Yebo, basabalala kuto tonkhe tincenye telive, kuto tonkhe tincenye telive letatingakentiwa tabatindzala naletatingenamahlatsi, ngenca yebahlali labanyenti labebahlala kulo.
6 Manje kwakute incenye yelive leyayingenalutfo, ngaphandle nje kwemahlatsi; kodvwa ngenca yekubhujiswa lokukhulu kwebantfu labebahlala kulo ngaphambilini labitwa ngekutsi yincitsakalo.
7 Futsi ngenca yekutsi kwakunemahlatsi lamancane kulo lonkhe live, noko bantfu labaya lapho baba tingcweti ekusebentiseni semende; ngako-ke bakha tindlu tasemende, labahlala kuto.
8 Futsi kwenteka kutsi bandza baphindze basabalala, besuka eveni lebelingaseningizimu baya eveni lebelingasenyakatfo, basabalala kangangekutsi bacala kumbonya umhlaba wonkhe, kusukela elwandle loluseningizimu kuya elwandle lolusenyakatfo, kusukela elwandle lolusenshonalanga kuya elwandle lolusemphumalanga.
9 Bantfu labebaseveni lelingasenyakatfo bebahlala emathendeni, kanye nasetindlini tasemende, bavumela noma ngusiphi sihlahla lesasimila kulo lonkhe live kutsi sikhule, kute nasekufike sikhatsi babe netingodvo tekwakha tindlu tabo, yebo, nemadolobha abo, nemathempeli abo, nemasinagoge abo, netindzawo tabo letingcwele, kanye nato tonkhe tinhlobo tetakhiwo tabo.
10 Futsi kwenteka kutsi njengobe tingodvo tatiyindlala kakhulu eveni lelingasenyakatfo, batfumela letinyenti ngemkhumbi.
11 Ngaleyo ndlela basita bantfu labebaseveni lelingasenyakatfo kutsi bakhe emadolobha lamanyenti, ngetingodvo kanye nangasemende.
12 Futsi kwenteka kutsi bekukhona labanyenti bantfu ba-Amoni, labebangemaLamani ngekutalwa, nabo ngalokunjalo bahamba baya kulelive.
13 Manje kukhona imibhalo leminyenti legciniwe mayelana netento talabantfu, ngebunyenti balabantfu, lenemininingwane futsi leminyenti kakhulu, mayelana nabo.
14 Kodvwa bukani, incenye yinye ekhulwini yetento talabantfu, yebo, indzaba yemaLamani kanye nemaNefi, netimphi tabo, netincabano, nekuphikisana, nekushumayela kwabo, netiphrofetho tabo, nekutfumela kwabo tintfo ngemkhumbi nekwakha kwabo imikhumbi, emathempeli, nemasinagoge, netindzawo tabo letingcwele, nekulunga kwabo, nebubi babo, nekubulala kwabo, nekuphanga kwabo, nebugebengu babo, nato tonkhe tinhlobo tetinengiso tabo, bugwadla babo, angeke kufakwe kulomsebenti.
15 Kodvwa bukani, kukhona letinyenti tincwadzi kanye naleminyenti imibhalo yalo lonkhe luhlobo, futsi seloku yagcinwa ikakhulu ngemaNefi.
16 Futsi yendluliswa ngemaNefi kusukela esitukulwaneni kuya kulesinye, ate awela esiphambekweni aphindze abulawa, aphangwa, atingelwa, abuyiselwa emuva, abulawa, futsi asakatwa emhlabeni wonkhe, ahlangana nemaLamani ate angasabitwa ngekutsi ngemaNefi, asakhohlakele, angakhuteki, anebudlova, yebo, asangemaLamani.
17 Manje sengibuyela endzabeni yami, ngako-ke loko lengikukhulumile kwenteka emvakwekutsi sekube netincabano letinkhulu, nekuphatamiseka, netimphi kanye nekuphikisana, emkhatsini webantfu baNefi.
18 Umnyaka wemashumi lamane nesitfupha wekubusa kwebehluleli waphela;
19 Futsi kwenteka kutsi yayisekhona incabano lenkhulu eveni, yebo, nangemnyaka wemashumi lamane nesikhombisa, kanjalo nangemnyaka wemashumi lamane nesiphohlongo.
20 Noko Helamani wasitsatsa sihlalo sekwehlulela ngekulunga kanye nangebucotfo; yebo, wetama kugcina imitsetfo, netehlulelo, kanye nemiyaleto yaNkulunkulu; wenta loko lokwakulungile emehlweni aNkulunkulu njalo; wahamba etindleleni teyise, kangangekutsi waphumelela eveni.
21 Futsi kwenteka kutsi bekanemadvodzana lamabili. Lomdzala wamnika libito laNefi, kwatsi lomncane, libito laLehi. Futsi acala akhulela eNkhosini.
22 Futsi kwenteka kutsi timphi kanye netincabano kwacala kwaya ngekuphela, kancane kancane emkhatsini webantfu bemaNefi, ngasekupheleni kwemnyaka wemashumi lamane nesiphohlongo wekubusa kwebehluleli kubantfu baNefi.
23 Futsi kwenteka kutsi ngemnyaka wemashumi lamane nemfica wekubusa kwebehluleli, kwachubeka kwabanekuthula lokwacinisekiswa eveni, ngaphandle nje kwemacembu layimfihlo Gadiyantoni sigebengu labewasungulile etincenyeni letinyenti telive lokwakuhlalwa kuto, ngaleso sikhatsi labekangatiwa ngulabo labebaphetse embusweni; ngako-ke awatange acedvwe eveni.
24 Futsi kwenteka kutsi ngawo lowo mnyaka kwaba khona imphumelelo lenkhulu kakhulu ebandleni, kangangekutsi kwaba khona tinkhulungwane letaba malunga ebandleni, tabhajatiselwa ekuphendvukeni.
25 Yaba yinkhulu kakhulu imphumelelo ebandleni, netibusiso taba tinyenti kakhulu letatfululwa kubantfu, kangangekutsi nebaphristi labakhulu kanye nebafundzisi bamangala kakhulu.
26 Futsi kwenteka kutsi umsebenti weNkhosi waphumelela kangangoba bantfu labanyenti babhajatiswa futsi bahlanganiswa ebandleni laNkulunkulu, yebo, emashumi etinkhulungwane.
27 Ngaleyo ndlela singabona kutsi iNkhosi inemusa kulabo, ngebucotfo betinhlitiyo tabo, lababita libito layo lelingcwele.
28 Yebo, ngaleyo ndlela siyabona kutsi lisango lasezulwini livulelwe bonkhe, ngisho nalabo labatawukholwa egameni laJesu Khristu, loyiNdvodzana yaNkulunkulu.
29 Yebo, siyabona kutsi noma ngubani lofunako angabambelela evini laNkulunkulu, leliphilako futsi lelinemandla, leliyawuhlukanisa ekhatsi inkhohliso nabosochaka kanye nebucili badeveli, liholele umlandzeli waKhristu endleleni lencane nalengumntjuntju awele kulowo mhosha waphakadze welusizi lolungiselwe kutsi ugwinye lababi—
30 Libeke imiphefumulo yabo, yebo, imiphefumulo yabo lengabhubhi, esandleni sangesekudla saNkulunkulu embusweni wasezulwini, kutsi ihlale phansi na-Abrahama, na-Isaka, naJakobe, nabo bonkhe bokhokho betfu labangcwele, ingaphindzi nanini iphumele ngaphandle.
31 Futsi ngalowo mnyaka kwachubeka kwaba nekujabula eveni laseZarahemla, kanye nakuto tonkhe tifundza letitungeletile, nakulo lonkhe live lelalingelemaNefi.
32 Futsi kwenteka kutsi kwaba nekuthula kanye nekujabula lokukhulu esikhatsini lesasisele semnyaka wemashumi lamane nemfica; yebo, kanjalo kwachubeka kwaba nekuthula kanye nenjabulo lenkhulu ngemnyaka wemashumi lasihlanu wekubusa kwebehluleli.
33 Ngemnyaka wemashumi lasihlanu nakunye wekubusa kwebehluleli kwaba nekuthula futsi, ngaphandle nje kwekutikhukhumeta lokwacala kwangena ebandleni—hhayi ebandleni laNkulunkulu, kodvwa etinhlitiyweni tebantfu labebatibita ngekutsi belibandla laNkulunkulu.
34 Bebatikhukhumeta, bahlupha labanyenti bebazalwane babo. Manje loku kwakububi lobukhulu, lobenta incenye yebantfu labatfobeke kakhulu kutsi beve kuhlushwa lokukhulu, futsi bendlule enhluphekweni lenkhulu.
35 Noko bazila baphindze bathandaza njalo, bakhula baba nemandla ekutfobekeni kwabo, baya ngekucina elukholweni lwaKhristu, yate imiphefumulo yabo yagcwala injabulo kanye nendvudvuto, yebo, tinhlitiyo tabo tahlantwa futsi tangcweliswa, kungcweliswa lokuta ngenca yekunikelwa kwetinhlitiyo tabo kuNkulunkulu.
36 Futsi kwenteka kutsi umnyaka wemashumi lasihlanu nakubili nawo waphela ngekuthula, ngaphandle nje kwekutikhukhumeta lokukhulu kakhulu lokwasekungene etinhlitiyweni tebantfu; lokwakungenca yemcebo wabo lomkhulu kakhulu kanye nekuphumelela kwabo eveni; futsi kwakhula kubo lilanga ngelilanga.
37 Futsi kwenteka kutsi ngemnyaka wemashumi lasihlanu nakutsatfu wekubusa kwebehluleli, Helamani wafa, kwase kutsi indvodzana yakhe lendzala Nefi yacala kubusa esikhundleni sakhe, Futsi kwenteka kutsi yasitsatsa sihlalo sekwehlulela ngekulunga nangebucotfo; yebo, yayigcina imiyaleto yaNkulunkulu, yaphindze yahamba etindleleni teyise.