1 Futsi kwenteka ngemnyaka wemashumi lasihlanu nakune kwabakhona emahlubuka lamanyenti ebandleni, ngetulu kwaloko kwabakhona incabano emkhatsini webantfu, kangangekutsi kwabakhona kucitseka kwengati lenyenti.

2 Incenye yalabavukelako yabulawa yaphindze yachutjwa yakhishelwa ngephandle kwelive, yaya enkhosini yemaLamani.

3 Futsi kwenteka kutsi yetama kuphehla emaLamani kutsi alwe nemaNefi; kodvwa buka, emaLamani abesaba kakhulu, kangangekutsi akawalalelanga emavi alawo mahlubuka.

4 Kodvwa kwenteka kutsi ngemnyaka wemashumi lasihlanu nesitfupha wekubusa kwebehluleli, kwabakhona emahlubuka lakhuphukela kumaLamani esuka kumaNefi; futsi aphumelela nalawo lamanye ekuwaphehleni kutsi atfukutselele emaNefi; futsi kuwo wonkhe lowo mnyaka bebalungiselela imphi.

5 Ngemnyaka wemashumi lasihlanu nesikhombisa behla kutawukulwa nemaNefi, bawucala umsebenti wekubulala; yebo, kangangekutsi ngemnyaka wemashumi lasihlanu nesiphohlongo wekubusa kwebehluleli baphumelela kutfola live laseZarahemla kutsi libe ngelabo; yebo, kanjalo nawo onkhe emave, nelive lebelisedvutane nelive iNala.

6 Futsi emaNefi nemabutfo aMoroniha achutjwa abalekela eveni leNala;

7 Lapho baticinisa tincaba ngalokumelene nemaLamani, kusuka elwandle lolusenshonalanga, kute kuyofika emphumalanga; lobekuluhambo lwelilanga kumNefi, emnceleni lapho bebacinise khona babeka emabutfo abo kutsi avikele live labo lelisenyakatfo.

8 Ngaleyo ndlela lawo mahlubuka emaNefi, ngelusito lwemabutfo lamanyenti emaLamani, besekatfole konkhe lokukwemaNefi lobekuseveni lelingaseningizimu. Futsi konkhe loko kwenteka eminyakeni yemashumi lasihlanu nesiphohlongo kanye nemfica yekubusa kwebehluleli.

9 Futsi kwenteka ngemnyaka wemashumi lasitfupha wekubusa kwebehluleli, Moroniha waphumelela nemabutfo akhe ekutfoleni tincenye letinyenti telive; yebo, bawabuyisa emadolobha lamanyenti lebesekawele etandleni temaLamani.

10 Futsi kwenteka ngemnyaka wemashumi lasitfupha nakunye wekubusa kwebehluleli baphumelela ekutfoleni nencenye yako konkhe lobekungekwabo.

11 Manje loku kulahlekelwa lokukhulu kangaka kwemaNefi, kanye nekubulawa lokukhulu lokwabasemkhatsini wabo, kwakungenawenteka kube bekungasiko ngenca yebubi babo kanye nesinengiso sabo lebesisemkhatsini wabo; yebo, futsi etikwaloko bekukhona nasemkhatsini walabo; labebatibita ngekutsi babelibandla laNkulunkulu.

12 Futsi bekungenca yekutikhukhumeta kwetinhlitiyo tabo, ngenca yemcebo wabo lomkhulu, yebo, kwakungenca yekucindzetela kwabo labamphofu, bagodla kudla kwabo kulabalambile, bagodla tingubo tabo kulabangcunu, futsi bashaya bomnakabo labatitfobile esihlatsini, benta inhlekisa ngaloko lokungcwele, baphika moya wekuphrofetha kanye newekwembulelwa, babulala, baphanga, bacala emanga, beba, baphinga, bakhula ekucabaneni lokukhulu, futsi bahlubuka baya eveni laNefi, emkhatsini wemaLamani—

13 Ngenca yalobubi babo lobukhulu, kanye nekutichayisa kwabo ngemandla abo, bashiywa emandleni abo; ngako-ke abatange baphumelele, kodvwa bahlushwa baphindze bashaywa, bachutjwa phambi kwemaLamani, bate balahlekelwa cishe ngiwo onkhe emave abo.

14 Kodvwa buka, Moroniha washumayela tintfo letinyenti kubantfu ngenca yebubi babo, kanjalo naNefi kanye naLehi, labebangemadvodzana aHelamani, bashumayela letinyenti tintfo kubantfu, yebo, futsi baphrofetha letinyenti tintfo kubo mayelana nebubi babo, kanye naloko lobekutawukwenteka kubo uma bebangaphendvuki etonweni tabo.

15 Futsi kwenteka kutsi baphendvuka, futsi njengobe bebaphendvuka bacala kuphumelela.

16 Ngoba ngesikhatsi Moroniha sekabona kutsi bese baphendvuka watinikela ekutseni abahole indzawo ngendzawo, nelidolobha ngelidolobha, bate bayitfole incenye yemphahla yabo kanye nencenye yemave abo onkhe.

17 Futsi waphela kanjalo-ke umnyaka wemashumi lasitfupha nakunye wekubusa kwebehluleli.

18 Futsi kwenteka kutsi ngemnyaka wemashumi lasitfupha nakubili wekubusa kwebehluleli, Moroniha bekangeke asakhona kutfola lobekungekwabo kumaLamani.

19 Ngako-ke baliyekela lisu labo lekutfola emave abo labesekasele, ngoba bekasemanyenti kakhulu emaLamani kangangekutsi kwaba lukhuni kumaNefi kutsi atfole lamanye emandla etikwawo; ngako-ke Moroniha wabeka onkhe emabutfo akhe kutsi agcine leto tincenye lebekatitsetse.

20 Futsi kwenteka kutsi, ngenca yebukhulu besibalo semaLamani emaNefi aba nekwesaba lokukhulu, funa ehlulwe, bese agcotjwagcotjwa phansi, abulawe futsi abhujiswe.

21 Yebo, acala atikhumbula tiphrofetho ta-Alma, kanjalo nemavi aMosiya; abona kutsi bekabantfu labanenkhani, nekutsi bekayitsatsa njengentfo lelite imiyaleto yaNkulunkulu;

22 Nekutsi besekayishintjile aphindze ayinyatsela ngaphansi kwetinyawo tawo imitsetfo yaMosiya, noma loko iNkhosi lebeyimyalete ngako kutsi akunike bantfu; futsi abone kutsi imitsetfo yawo beseyonakele, nekutsi besekabantfu lababi, kangangekutsi besebakhohlakele njengemaLamani.

23 Futsi ngenca yebubi bawo libandla beselicale kuncipha; acala kungakholelwa kumoya wekuphrofetha kanye nakumoya wekwembulelwa; futsi tehlulelo taNkulunkulu besetibabuke njo ebusweni.

24 Futsi abona kutsi besekanebutsakatsaka, njengabomnakabo, emaLamani, nekutsi Moya weNkhosi awutange usabalondvolota; yebo, besekakhweshile kubo ngoba Moya weNkhosi akahlali emathempelini langcolile—

25 Ngako-ke iNkhosi yayekela kubalondvolota ngemandla ayo lamangalisako futsi langenakulinganiswa, ngoba besekawele esimeni sekungakholwa kanye nasebubini lobukhulu; futsi abona kutsi emaLamani besekamanyenti kakhulu kunawo, futsi ngaphandle kwekutsi anamatsele eNkhosini Nkulunkulu wawo kufanele afe ngendlela lengenakuvimbeleka.

26 Ngoba buka, abona kutsi emandla emaLamani bekamakhulu njengemandla awo, ngisho indvodza ngendvodza. Futsi ngaleyo ndlela awela kuleso siphambeko lesikhulu; yebo, ngaleyo ndlela aba butsakatsaka, ngenca yesiphambeko sawo, esikhatsini nje seminyaka lemincane.