INcwadzi yaHelamani
Indzaba yemaNefi. Timphi kanye netincabano tawo, kanye nekuphikisana kwawo. Ngetulu kwaloko netiphrofetho tebaphrofethi labanyenti labangcwele, ngaphambi kwekuta kwaKhristu, ngekwemibhalo yaHelamani, lobekayindvodzana yaHelamani, kanjalo nangekwemibhalo yemadvodzana akhe, kwehla njalo kute kube sekufikeni kwaKhristu. Ngetulu kwaloko lamanyenti emaLamani ayaphendvuka. Indzaba ngekuphendvuka kwawo. Indzaba yekulunga kwemaLamani, bubi kanye netinengiso temaNefi, ngekwembhalo waHelamani kanye nemadvodzana akhe, kwehla njalo kute kube sekufikeni kwaKhristu, lebitwa ngekutsi yincwadzi yaHelamani, njalonjalo.
Sehluko 1
Phahorani wesibili uba ngumehluleli lomkhulu futsi ubulawa nguKishkumeni—Phakhumeni ungena esihlalweni sekwehlulela—Khoriyantumra uhola emabutfo emaLamani, utsatsa iZarahemla, futsi ubulala Phakhumeni—Moroniha uncoba emaLamani futsi uphindze uyayitsatsa iZarahemla, naKhoriyantumra uyabulawa. Cishe ngemnyaka wema-52–50 ngaphambi kwekutalwa kwaKhristu.
1 Manje bukani, kwenteka ekucaleni kwemnyaka wemashumi lamane wekubusa kwebehluleli ebantfwini baNefi, kwacala kwaba khona inkinga lenkhulu emkhatsini webantfu baNefi.
2 Ngoba bukani, Phahorani besekafile, sekahambe indlela yemhlaba wonkhe; ngako-ke kwacala kwabakhona tincabano letinkhulu mayelana nekutsi ngubani lobekufanele atsatse sihlalo sekwehlulela emkhatsini wabomnakabo, labebangemadvodzana aPhahorani.
3 Manje lawa ngemabito alabo labebabanga sihlalo sekwehlulela, labenta nekutsi bantfu babange: Phahorani, Phayankhi, kanye naPhakhumeni.
4 Manje lawa akusiwo onkhe emadvodzana aPhahorani (ngoba bekanalamanyenti), kodvwa lawa ngiwo labekabanga sihlalo sekwehlulela; ngako-ke, enta kutsi kube khona kwehlukana katsatfu emkhatsini webantfu.
5 Noko, kwenteka kutsi Phahorani wakhetfwa ngelivi lebantfu kutsi abe ngumehluleli lomkhulu kanye nembusi kubantfu baNefi.
6 Futsi kwenteka kutsi Phakhumeni, ngesikhatsi abona kutsi bekangeke akhone kusitfola sihlalo sekwehlulela, wavumelana nelivi lebantfu.
7 Kodvwa bukani, Phayankhi, kanye naleyo ncenye yebantfu lebeyinesifiso sekutsi abe ngumbusi wabo, batfukutsela kakhulu; ngako-ke, besekatawubalutsa labo bantfu kutsi basukume bavukele bomnakabo.
8 Futsi kwenteka ngesikhatsi sekatokwenta loku, bukani, watsatfwa, wayogwetjwa licala ngekwelivi lebantfu, wajeziswa ngekufa; ngoba bekavukele futsi wafuna kucedza inkhululeko yebantfu.
9 Manje ngesikhatsi labo bantfu labebanesifiso sekutsi abe ngumbusi wabo babona kutsi besekajeziswe ngekufa, ngako-ke batfukutsela, bukani, batfumela Kishkumeni, kutsi aye esihlalweni sekwehlulela saPhahorani, wabulala Phahorani ngesikhatsi ahleti esihlalweni sekwehlulela.
10 Wacoshwa tinceku taPhahorani; kodvwa bukani, belisetulu litubane laKishkumeni kangangekutsi bekute namunye umuntfu lobekangamkhandza.
11 Waya kulabo labebamtfumile, futsi bonkhe bangena esivumelwaneni, yebo, bafunga ngeMenti wabo waphakadze, kutsi bebangeke batjele namunye umuntfu kutsi Kishkumeni bekabulele Phahorani.
12 Ngako-ke, Kishkumeni akatange atiwe emkhatsini webantfu baNefi, ngoba bekatifihlile ngesikhatsi abulala Phahorani. Futsi Kishkumeni kanye nelicembu lakhe, lebelente sivumelwano naye, lahlangana nebantfu, ngendlela yekutsi abatange batfolwe bonkhe; kodvwa bonkhe labo labatfolakala bajeziswa ngekufa.
13 Manje bukani, Phakhumeni wabekwa, ngekwelivi lebantfu, kutsi abe ngumehluleli lomkhulu kanye nembusi kubantfu, kute abuse esikhundleni semnakabo Phahorani; futsi bekunjengekwelilungelo lakhe. Konkhe loku kwenteka emnyakeni wemashumi lamane wekubusa kwebehluleli; kwabese kuba kuphela kwawo.
14 Futsi kwenteka ngemnyaka wemashumi lamane nakunye wekubusa kwebehluleli, kutsi emaLamani besekagcogcele ndzawonye emabutfo emadvodza lamanyenti langabaleki, awahlomisa ngetinkemba, ngabocelemba nebutjoki, kanye nangemicibisholo, nangetivikelo tenhloko, kanye nangetivikelo tesifuba, nangato tonkhe tinhlobo temahawu.
15 Aphindze ehlela entansi kute acale imphi nemaNefi. Futsi bekaholwa yindvodza libito layo lobekunguKhoriyantumra; lebeyiyentalelwane yaZarahemla; iphindze ibe lihlubuka lelivela kumaNefi; bekuyindvodza lenkhulu futsi lenemandla.
16 Ngako-ke, inkhosi yemaLamani, libito layo lebekunguThubalothi, lobekayindvodzana ya-Amoroni, ngekucabanga kutsi Khoriyantumra, ngoba bekayindvodza lenemandla, bekangakhona kumelana nemaNefi, ngemandla akhe kanjalo nangekuhlakanipha kwakhe lokukhulu, kangangekutsi ngekumtfumela kwakhe phambili bekatotfola emandla ngetulu kwemaNefi—
17 Ngako-ke wawaphehla kutsi atfukutsele, futsi wawagcogcela ndzawonye emabutfo akhe, wabeka Khoriyantumra kutsi abe ngumholi wabo, waphindze wenta kutsi bahambe behlele eveni laseZarahemla kutsi bayawukulwa nemaNefi.
18 Futsi kwenteka kutsi ngenca yencabano lenkhulu kakhulu kanye nebumatima lobukhulu embusweni, abatange babeke bogadzi labenele eveni laseZarahemla; ngoba bebacabanga kutsi emaLamani bekangeke alinge ete enkhabeni yemave abo kutsi atawuhlasela lelo dolobha lelikhulu iZarahemla.
19 Kodvwa kwenteka kutsi Khoriyantumra wahamba phambili ahola emabutfo akhe lamanyenti, wate wefika kulabebahlala kulelidolobha, nekuhamba kwabo bekungelitubane lelisetulu kakhulu kangangekutsi asitange sibekhona sikhatsi semaNefi kutsi agcogcele ndzawonye emabutfo awo.
20 Ngako-ke Khoriyantumra wababulala bogadzi labebasekungeneni kwelidolobha, wahamba waya phambili nelibutfo lakhe lonkhe wayawungena edolobheni, futsi bababulala bonkhe labebaphikisana nabo, kangangekutsi balitsatsa lidolobha lonkhe.
21 Futsi kwenteka kutsi Phakhumeni, lobekangumehluleli lomkhulu, wabaleka phambi kwaKhoriyantumra, wate wefika ngasetindvongeni telidolobha. Futsi kwenteka kutsi Khoriyantumra wamshaya wamhlanganisa neludvonga, kangangekutsi wafa. Aphela kanjalo-ke emalanga aPhakhumeni.
22 Manje ngesikhatsi Khoriyantumra abona kutsi besekalitfolile lidolobha laseZarahemla, sekabona kutsi emaNefi besekababalekele, abulawa, aphindze atsatfwa, aphonswa ejele, nekutsi besekatitfolile tincaba leticine kakhulu eveni lonkhe kutsi tibe ngetakhe, inhlitiyo yakhe yema sibindzi kangangekutsi besekatohamba ayawukulwa kulo lonkhe live.
23 Manje akahlalanga eveni laseZarahemla, kodvwa wachubeka nelibutfo lelikhulu, wacondza ngasedolobheni iNala; ngoba bekuyinhloso yakhe kutsi ahambe futsi avule indlela yakhe ngenkemba, kute atfole tincenye letisenyakatfo yelive.
24 Futsi, acabanga kutsi emandla abo lamakhulu kakhulu bekasekhatsi nekhatsi nelive, ngako-ke wachubeka, angabaniki litfuba lekutsi babutsane ndzawonye ngaphandle nje kwetincumbi letincane; futsi ngaleyo ndlela bawahlasela bawabulala.
25 Kodvwa bukani, loku kuhamba kwaKhoriyantumra aye ekhatsi nekhatsi nelive kwanika Moroniha litfuba lelikhulu etikwawo, nanoma besisikhulu sibalo semaNefi labekabulewe.
26 Ngoba bukani, Moroniha bekacabanga kutsi emaLamani bekangeke alinge ete ekhatsi nekhatsi nelive, kodvwa kutsi bekatohlasela emadolobha labekatungeletwe eminceleni njengobe bekentile nakucala; ngako-ke Moroniha bekente kutsi emabutfo abo lacinile agcine leto tincenye lebetingaseminceleni.
27 Kodvwa bukani, emaLamani bekangesabi njengekwesifiso sakhe, kodvwa besekangene ekhatsi nelive, besekayitsatsile inhloko dolobha lebekulidolobha laseZarahemla, futsi bekahamba adzabula acondze etincenyeni letibalulekile telive, abulala bantfu labanyenti kakhulu, besilisa, nebesifazane, kanye nebantfwana, atsatsa emadolobha lamanyenti kanye netincaba letinyenti kube ngekwabo.
28 Kodvwa ngesikhatsi Moroniha sekakubonile loku, watfumela Lehi ngekushesha kanye nelibutfo kutsi ahambe etindzaweni tonkhe awancandze ngaphambi kwekutsi afike eveni iNala.
29 Futsi wenta kanjalo; wawancandza ngaphambi kwekutsi afike eveni iNala, wawahlasela, kangangekutsi acala ahlehlela emuva aya ngaseveni laseZarahemla.
30 Futsi kwenteka kutsi Moroniha wawancandza ekuhlehleni kwawo ngemuva, wawahlasela, kangangekutsi kwaba yimphi yengati lenyenti kakhulu; yebo, labanyenti babulawa, futsi emkhatsini wesibalo salabo labebabulewe Khoriyantumra naye ngalokunjalo watfolakala lapho.
31 Manje, buka emaLamani bekangasakhoni kuhlehla noma ngukuphi, noma kuya enyakatfo, noma kuya eningizimu, noma emphumalanga, noma enshonalanga, ngoba besekatungeletwe ndzawo tonkhe ngemaNefi.
32 Khoriyantumra wawafaka ngaleyo ndlela emaLamani ekhatsi nekhatsi nemaNefi, kangangekutsi besebasemandleni emaNefi, futsi naye lucobo lwakhe besekabulewe, ngako emaLamani atinikela etandleni temaNefi.
33 Futsi Moroniha waphindze walitsatsa lidolobha laseZarahemla kutsi libe ngelabo, waphindze wenta kutsi emaLamani labekaboshiwe ahambe aphume eveni ngekuthula.
34 Waphela kanjalo-ke umnyaka wemashumi lamane nakunye wekubusa kwebehluleli.