1 Manje, kwenteka kutsi baba banyenti labaweva emavi aSamuweli, umLamani, lawakhuluma etikwetindvonga telidolobha. Bonkhe labo labakholelwa evini lakhe bahamba bayawufuna Nefi; futsi ngesikhatsi sebamtfolile bativuma kuye tono tabo bangatiphiki, banesifiso sekutsi babhajatiselwe eNkhosini.

2 Kodvwa bonkhe labo labangatange bakholelwe emavini aSamuweli bamtfukutselela; bamjikijela ngematje asetikweludvonga, ngetulu kwaloko labanyenti bamdubula ngemicibisholo ngesikhatsi eme etikweludvonga; kodvwa Moya weNkhosi bewunaye, kangangekutsi abakhonanga kumshaya ngematje abo kanjalo nangemicibisholo yabo.

3 Manje ngesikhatsi babona kutsi bebangakhoni kumshaya, kwaba khona labanyenti kakhulu labakholelwa emavini akhe, kangangekutsi bahamba baya kuNefi kute babhajatiswe.

4 Ngoba bukani, Nefi bekabhabhatisa, aphrofetha, ashumayela, amemetela kuphendvuka ebantfwini, abakhombisa timphawu kanye netibonakaliso, futsi enta timangaliso emkhatsini webantfu, kute bati kutsi Khristu bese kufanele ete madvute—

5 Abatjela ngetintfo lebekufanele tenteke masinyane, kute bati futsi bakhumbule ngesikhatsi sekuta kwato kutsi tatembuliwe kubo ngaphambili, ngenhloso yekutsi bakholwe; ngako-ke bonkhe labo labakholelwa emavini aSamuweli baya kuye kute babhajatiswe; ngoba beta baphendvuka futsi bativuma tono tabo.

6 Kodvwa linyenti labo aliwakholwanga emavi aSamuweli; ngako-ke ngesikhatsi babona kutsi bebangakhoni kumshaya ngematje kanye nangemicibisholo yabo, bakhala etindvuneni tabo, batsi: Tsatsani lomuntfu nimbophe, ngoba bukani unadeveli; futsi ngenca yemandla adeveli lakuye asikhoni kumshaya ngematje etfu kanye nangemicibisholo yetfu; ngako-ke mtsatseni nimbophe, bese niyamsusa lapha.

7 Ngesikhatsi sebahamba kute bayombamba, bukani, wagcumela phansi asuka etulu eludvongeni, wabaleka waphuma eveni labo, yebo, wate wefika eveni lakubo, futsi wacala kushumayela kanye nekuphrofetha emkhatsini webantfu bakubo.

8 Bukani, emaNefi akaphindzanga eva ngaye; futsi taba kanjalo-ke tindzaba tebantfu.

9 Waphela kanjalo-ke umnyaka wemashumi lasiphohlongo nesitfupha wekubusa kwebehluleli kubantfu baNefi.

10 Waphela kanjalo-ke nemnyaka wemashumi lasiphohlongo nesikhombisa wekubusa kwebehluleli, incenye lenyenti yebantfu ihleti nekutatisa kanye nekwenta bubi, futsi incenye lencane ihamba ngekucaphela ngaphambi kwaNkulunkulu.

11 Futsi kwaphindze kwaba ngulesi simo, nangemnyaka wemashumi lasiphohlongo nesiphohlongo wekubusa kwebehluleli.

12 Kwabakhona lokuncane kugucuka etimeni tebantfu, ngaphandle kwekutsi bantfu bacala kucina kakhulu ekwenteni bubi, futsi benta lokunyenti kakhulu kwaloko lokwakuphambene nemiyaleto yaNkulunkulu, ngemnyaka wemashumi lasiphohlongo nemfica wekubusa kwebehluleli.

13 Kodvwa kwenteka kutsi ngemnyaka wemashumi layimfica wekubusa kwebehluleli, kwaba khona tibonakaliso letinkhulu letanikwa bantfu, kanye netimangaliso; nemavi ebaphrofethi acala kugcwaliseka.

14 Futsi tingilosi tavela kubantfu, tati, futsi tamemetela kubo tindzaba letimnandzi tekutfokota lokukhulu; ngako-ke ngalomnyaka imibhalo lengcwele yacala kugcwaliseka.

15 Noko, bantfu bacala benta tinhlitiyo tabo taba lukhuni, bonkhe ngaphandle kwaleyo ncenye yabo lebeyikholwa kakhulu, yemaNefi kanjalo neyemaLamani, bacala kutsembela emandleni abo kanye nasekuhlakanipheni kwabo, batsi:

16 Letinye tetintfo baticagele kahle, emkhatsini waletinyenti kangaka; kodvwa buka, siyati kutsi yonkhe lemisebenti lemikhulu kanye nalemangalisako ngeke igcwaliseke, lokwakhulunywa ngayo.

17 Futsi bacala kucocisana kanye nekuphikisana, batsi:

18 Akunamcondvo kutsi umuntfu lonjengaKhristu uyawuta; uma kunjalo, futsi ayiNdvodzana yaNkulunkulu, Babe welizulu nemhlaba, njengobe bekukhulunyiwe, kuyangani angeke atibonakalise kitsi kanjalo nakulabo labayawube baseJerusalema na?

19 Yebo, kuyangani angeke atibonakalise kulelive kanjalo naseveni laseJerusalema na?

20 Kodvwa bukani, siyati kutsi leli lisiko lelibi, lelandluliselwa kitsi bobabe betfu, kusenta kutsi sikholwe entfweni letsite lenkhulu futsi nalemangalisako leyawukwenteka, kodvwa hhayi emkhatsini wetfu, kodvwa eveni lelikhashane kakhulu, live lesingalati; ngaloko-ke bangasigcina singenalwati, ngoba ngeke sikwati kutibonela ngemehlo etfu kutsi tiliciniso.

21 Futsi, ngebucili kanye nangebuciko lobungacondzakali balomubi, bente timfihlakalo letitsite letinkhulu lesingeke siticondze, letiyosigcina sisesimeni lesibi singaphansi kwemavi abo, futsi ngetulu kwaloko sibe ngaphansi kwabo, ngoba setsembele kubo kutsi basifundzise livi; futsi ngaleyo ndlela bayawusigcina site lwati uma sitinikela kubo, emalanga onkhe ekuphila kwetfu.

22 Futsi tinyenti letinye tintfo bantfu labaticabanga etinhlitiyweni tabo, lebetibulima futsi tilite; bebaphatamisekile kakhulu, ngoba Sathane wabaphehla kutsi bente bubi njalo; yebo, bekahamba azulazula andzisa emahemuhemu kanye netincabano eveni lonkhe, kute atente lukhuni tinhlitiyo tebantfu ngalokumelene naloko lobekukuhle kanye naloko lobekutawukwenteka.

23 Futsi nanoma kungenca yetimphawu kanye netibonakaliso lebetentiwa emkhatsini webantfu beNkhosi, kanye netimangaliso letinyenti labebatenta, Sathane watfola kubambelela lokukhulu etinhlitiyweni tebantfu eveni lonkhe.

24 Futsi waphela kanjalo-ke umnyaka wemashumi layimfica wekubusa kwebehluleli kubantfu baNefi.

25 Futsi iphela kanjalo-ke incwadzi yaHelamani, ngekwembhalo waHelamani kanye nemadvodzana akhe.