1 Futsi kwenteka kutsi kwaba khona kuchekeka emkhatsini webantfu, kangangekutsi behlukana ekhatsi baya ngala nangale bahamba tindlela tabo, bashiya Nefi yedvwa, ngesikhatsi emile emkhatsini wabo.

2 Futsi kwenteka kutsi Nefi naye wahamba ngeyakhe indlela wacondza ngasendlini yakhe, azindla ngaletintfo iNkhosi lebeyimkhombise tona.

3 Futsi kwenteka ngesikhatsi asazindla—akhatsatekile kakhulu ngenca yenkhohlakalo yebantfu bemaNefi, imisebenti yabo lefihlakele yebumnyama, nekubulala kwabo, nekuphanga kwabo, kanye nangato tonkhe tinhlobo tebubi—kwenteka ngesikhatsi asazindla enhlitiyweni yakhe, buka, kweta livi kuye litsi:

4 Ubusisiwe, Nefi, ngaletintfo lotentile; ngoba ngibonile kutsi ulimemetele kanjani livi lengikunike lona, ngekungakhatsali, kulabantfu. Futsi awubesabanga, awufunanga nekulondvolota imphilo yakho, kodvwa ufune kwenta intsandvo yami, kanye nekugcina imiyaleto yami.

5 Manje, ngoba wente loku ngekungakhatsali lokungaka, buka, ngitawukubusisa ingunaphakadze; futsi ngitawukwenta ube nemandla ngemavi kanye nangekwenta, ngelukholo kanye nangekwemisebenti; yebo, nekutsi tonkhe tintfo uyawukwentelwa tona ngekwelivi lakho, ngoba angeke ucele loko lokuphambene nentsandvo yami.

6 Buka, wena unguNefi, mine nginguNkulunkulu. Buka, ngikumemetela loku kuwe phambi kwetingilosi tami, kutsi uyawuba nemandla etikwalabantfu, futsi uyawushaya umhlaba ngendlala, nangamashayabhuce wesifo kanye nangekuwubhubhisa, ngekuhambisana nenkhohlakalo yalabantfu.

7 Buka, ngikunika emandla, kutsi noma ngabe yini loyawuyibopha emhlabeni iyawuboshwa nasezulwini; futsi noma ngabe yini loyawuyikhulula emhlabeni iyawukhululwa nasezulwini; ngenca yaloku uyawuba nemandla emkhatsini walabantfu.

8 Futsi ngenca yaloku, uma uyawutsi kulelithempeli alichekeke ekhatsi, kuyawukwenteka.

9 Futsi uma uyawutsi kulentsaba, Dzilikela phansi ulingane, kuyawukwenteka.

10 Futsi bukani, uma uyawutsi Nkulunkulu akabashaye labantfu, kuyawukwenteka.

11 Manje buka, ngiyakuyaleta, kutsi uyawuhamba umemetele kulabantfu, kutsi naku lokushiwo yiNkhosi Nkulunkulu, longuSomandla: Ngaphandle kwekutsi niphendvuke niyawushaywa, ngisho nangembubhiso.

12 Futsi bukani, manje kwenteka kutsi ngesikhatsi iNkhosi seyiwakhulumile lamavi kuNefi, wema futsi akatange asaya endlini yakhe, kodvwa wabuyela kuto leto ticuku lebetisakateke yonkhe indzawo ebusweni belive, futsi wacala kumemetela kuto livi leNkhosi lebelikhulunywe kuye, mayelana nekubhujiswa kwabo uma bebangeke baphendvuke.

13 Manje buka, nangetulu kwaleso simangaliso lesikhulu Nefi lebekasentile sekubatjela mayelana nekufa kwemehluleli lomkhulu, batenta lukhuni tinhlitiyo tabo futsi bangawalaleli emavi eNkhosi.

14 Ngako-ke Nefi walimemetela kubo livi leNkhosi, watsi: Ngaphandle kwekutsi niphendvuke, naku lokushiwo yiNkhosi, niyawushaywa ngisho nangembubhiso.

15 Futsi kwenteka kutsi ngesikhatsi Nefi sekalimemetele kubo livi, buka, bachubeka nekutenta lukhuni tinhlitiyo tabo bangafuni nekuwalalela emavi akhe; ngako-ke bametfuka, bafuna kumbamba kute bamphonse ejele.

16 Kodvwa buka, emandla aNkulunkulu bekanaye, futsi abakhonanga kumtsatsa bamphonse ejele, ngoba watsatfwa nguMoya wemukiswa waya khashane waphuma emkhatsini wabo.

17 Futsi kwenteka kutsi ngaleyo ndlela wahamba akuMoya, asuka esicukwini aya kulesinye sicuku, amemetela livi laNkulunkulu, wate walimemetela kubo bonkhe, noma walitfumela kubo bonkhe bantfu.

18 Futsi kwenteka kutsi abafunanga kuwalalela emavi akhe; kwacala kwaba khona tincabano, kangangekutsi behlukana ngekuphikisana baphindze bacala nekubulalana bodvwa ngenkemba.

19 Waphela kanjalo-ke umnyaka wemashumi lasikhombisa nakunye wekubusa kwebehluleli kubantfu baNefi.