1 Ket napasamak nga idi nabangonda ti simbaan iti dayta a daga, a tinarigagayan ni ari Lamoni a kumuyog kenkuana ni Ammon iti daga ti Nephi, tapno maipakitana iti amana.

2 Ket immay ti timek ti Apo ken ni Ammon, a kinunana: Saanka mapan iti daga ti Nephi, agsipud ta kitaen, gandaten ti ari a gudasen ti biagmo; ngem mapanka ketdi iti daga ti Middoni; agsipud ta kitaen, sibabalud sadiay ti kabsatmo a ni Aaron, kasta met da Muloki ken Ammah.

3 Ita napasamak nga idi nangngeg ni Ammon daytoy, kinunana ken ni Lamoni: Kitaen, sibabalud idiay Middoni ti lalaki a kabsatko ken dagiti kaduana, ket mapanak tapno mawayawayaak ida.

4 Ita kinuna ni Lamoni ken ni Ammon: Ammok, maaramidmo ti amin a banag babaen ti pigsa ti Apo. Ngem kitaen, sumurotak kenka iti daga ti Middoni; agsipud ta gayyemko ti ari iti daga ti Middoni, nga Antiomno ti naganna; ngarud mapanak iti daga ti Middoni, tapno pasablogak ti ari ti daga, ket paruarenna dagiti kabsatmo iti pagbaludan. Ita kinuna ni Lamoni kenkuana: Asino ti nangibaga kenka a sibabalud dagiti kabsatmo?

5 Ket kinuna ni Ammon kenkuana: Awan ti nangibaga kaniak, malaksid ti Dios; ket kinunana kaniak—Mapanka ken wayawayaam dagiti kabsatmo, agsipud ta sibabaludda iti daga ti Middoni.

6 Ita idi mangngeg ni Lamoni daytoy binilinna dagiti katulonganna a mangisagana kadagiti kabalio ken karuahena.

7 Ket kinunana ken ni Ammon: Umayka, kumuyogak kenka iti daga ti Middoni, ket sadiay ipakaasik iti ari a paruarenna dagiti kabsatmo iti pagbaludan.

8 Ket napasamak nga idi agbibiahen da Ammon ken Lamoni, nasabatda ti ama ni Lamoni, nga isu ti ari iti amin a daga.

9 Ket kitaen, kinuna ti ama ni Lamoni kenkuana: Apay a saanka immay iti padaya iti dayta naindaklan nga aldaw idi pinadayaak dagiti lallaki nga annakko, ken dagiti tattaok?

10 Ket kinunana pay: Sadino ti papananyo iti daytoy a Nephita, a maysa kadagiti annak ti ulbod?

11 Ket napasamak nga insalaysay kenkuana ni Lamoni no sadino ti papananna, agsipud ta nagamak a mapagurana.

12 Ket imbagana pay kenkuana ti amin a gapu ti panagtalinaedna iti bukodna a pagarian, a saan a napan iti padaya nga insagana ti amana.

13 Ket ita idi insalaysay amin ni Lamoni kenkuana dagitoy a banag, kitaen, iti siddaawna, kinapungtot ti amana, ket kinunana: Lamoni, mapanmo wayawayaan dagitoy a Nephita, a lallaki nga annak ti ulbod. Kitaen, inagawanna dagiti ammatayo; ket ita umay met dagiti annakna kadatayo tapno, babaen ti sikapda ken ti kinaulbodda, allilawendatayo, tapno agawenda manen dagiti sanikuatayo.

14 Ita binilin ti ama ni Lamoni a patayenna ni Ammon iti espada. Ken binilinna pay a nasken a saan a mapan iti daga ti Middoni, ngem ketdi agsubli a kumuyog kenkuana iti daga ti Ismael.

15 Ngem kinuna ni Lamoni kenkuana: Saanko papatayen ni Ammon, wenno agsubliak iti daga ti Ismael, ngem mapanak iti daga ti Middoni tapno wayawayaak dagiti kabsat ni Ammon, agsipud ta ammok a nalintegda a tao ken nasantuan a propeta ti pudno a Dios.

16 Ita idi mangngegan ti amana dagitoy a balikas, nakaunget kenkuana, ket inasutna ti espadana tapno kabilen isuna iti daga.

17 Ngem timmakder ni Ammon ket kinunana kenkuana: Kitaen, saanmo patayen ti anakmo; nupay kasta, nasaysayaat nga isu ti matnag ngem ti sika, agsipud ta kitaen, nagbabawin kadagiti basolna; ngem no sika ti matnag iti daytoy a kanito, iti pungtotmo, saan a maisalakan ti kararuam.

18 Ket manen, rumbeng nga agparbengka; agsipud ta no patayem ti anakmo, isu nga awan ti basol a tao, umawag ti darana iti Apo a Diosna manipud iti daga, tapno maipatay kenka ti panagibales; ket nalabit a mapukawmo ti kararuam.

19 Ita idi naibaga ni Ammon kenkuana dagitoy a balikas, sinungbatanna, a kinunana: Ammok a no patayek ti anakko, makaisayasayak iti awanan iti basol a dara; agsipud ta inkagumaanmo a dadaelen isuna.

20 Ket intag-ayna ti imana tapno papatayenna ni Ammon. Ngem nasarkedan ni Ammon dagiti layatna, ken kasta met a tinagbatna ti takiagna tapno saanna a maaramat.

21 Ita idi makita ti ari a kabaelan a papatayen ni Ammon, rinugianna ti nagpakaasi ken ni Ammon tapno saanna gudasen ti biagna.

22 Ngem intag-ay ni Ammon ti espadana, ket kinunana kenkuana: Kitaen, tagbatenka malaksid no itdem kaniak a mawayawayaan dagiti kabsatko iti pagbaludan.

23 Ita kinuna ti ari, iti butengna a mapukaw ti biagna, kinunana: No ispalennak itedko ti ania man a dawatem, uray pay ti kagudua ti pagarian.

24 Ita idi nakita ni Ammon a nagutugotna ti lakay nga ari a mayannurot iti tarigagayna, kinunana kenkuana: No itdem kaniak a mawayawayaan dagiti kabsatko iti pagbaludan, kasta met a mapagtalinaed ni Lamoni ti pagarianna, ken saanmo paguraen isuna, ngem itdem nga maaramidna ti ania man a mayannurot iti tarigagayna iti ania man a banag a mapanunotna, ispalenka; no saan gudasenka iti daga.

25 Ita idi maibaga ni Ammon dagitoy a balikas, rinugian ti ari ti nagrag-o gapu iti biagna.

26 Ket idi nakitana nga awan ti tarigagay ni Ammon a mangdadael kenkuana, ken idi nakitana met ti naindaklan nga ayatna iti anakna a ni Lamoni, napalalo ti siddaawna, ket kinunana: Gapu ta daytoy laeng ti tarigagayam, a wayawayaak dagiti kakabsatmo, ken ipalubosko ti pannakapagtalinaed ni Lamoni iti pagarianna, kitaen, ipaayko nga agtalinaed ti anakko iti pagarianna manipud ita a kanito ken agnanayon; ken saankon nga iturayan isuna—

27 Ken kasta met nga ipaayko kenka mawayawayaan dagiti kakabsatmo iti pagbaludan, ket makaumayka ken dagiti kakabsatmo kaniak, iti pagariak; agsipud ta napalaus met ti tarigagayko a makitaka. Agsipud ta napalalo ti siddaaw ti ari kadagiti balikas nga insaona, ken kasta met kadagiti balikas nga insao ti anakna a ni Lamoni, ngarud tinarigagayanna a maadal ida.

28 Ket napasamak nga intuloy da Ammon ken Lamoni ti panagbiaheda nga agturong iti daga ti Middoni. Ket nakagun-od ni Lamoni ti parabur iti ari iti daga; ngarud nawayawayaan dagiti kakabsat ni Ammon iti pagbaludan.

29 Ket napalalo ti leddaang ni Ammon idi makitana ida, agsipud ta kitaen lamulamoda, ken nakaro unay ti pannakaladlad ti kudkudilda gapu iti pannakapungoda kadagiti nalagda a tali. Ken nagsagabada met iti bisin, waw, ken amin a kita ti pannakaparparigat; nupay kasta inibturanda amin a panagsagabada.

30 Ken, kas iti pannakapasamakna, gasatda ti matnag kadagiti ima dagiti natangtangken ken nasuksukir a tao; ngarud saanda dimngeg kadagiti balikasda, ket pinagtalawda ida, ken dinangranda ida, ken pinapanawda kadagiti balbalay, ken kadagiti luglugar, nga agingga a nakadanonda iti daga ti Middoni; ket sadiay natiliw ken naibaludda, ken napungoda kadagiti nalagda a tali, ken nabaludda iti adu nga aldaw, ken insalakan ida da Lamoni ken Ammon.