Scriptures
3 Nefi 1


Urox Nefi

Ri Wuj Re Ri Nefi
Are Ri U Cʼojol Ri Nefi, Ri U Cʼojol Ri Helaman

Ri Helamán, are ri u cʼojol ri Helamán, cʼu are riʼ ri u cʼojol ri Alma; ri Alma, are ri u cʼojol ri Alma; ri Alma riʼ xpe ulok pa ri rijaʼlil ri Nefi, ri u cʼojol ri Lehi; ri Lehi xel bic pa Jerusalén, pa ri nabe junab ri xrajawinic ri Sedecías, ri ajawinel paquiwiʼ ri aj Judeyib.

U tas 1

Quel bic ri Nefi, ri u cʼojol ri Helamán; xyaʼ tak retal che ri ralaxibal ri Colonel; cʼo winak ri cäcaj quequicämisaj conojel ri quecojonic che tak ri retal ri xyaʼic; quepe chi jumul ri elakʼomab re ri Gadiantón.

1 Xcʼulmataj cʼu riʼ chi xocʼowic ri junab noventa y uno. Are cʼu riʼ, ocʼowinak chic seiscientos junab chuwäch ri kʼij are xel bic ri Lehi pa Jerusalén. Ri Laconeo tajin cuban ri kʼatbal tzij y ri nimal paquiwiʼ conojel ri e cʼo cho ri ulew riʼ.

2 Ri Nefi cʼut, are ri u cʼojol ri Helamán. Cʼu ri areʼ elinak chi bic pa ri ulew re Zarahemla. Y xujach jun chac pa u kʼab ri u cʼojol, ri Nefi, areʼ ri nabial. Xuyaʼ takanic pa u kʼab chuchajixic ri xax tak u xak chʼichʼ re bronce, y che qui chajixic conojel tak ri tzijobal ri cʼolotajinak, xukujeʼ conojel ri jastak ri cʼolom ulok tzpa ri relic bic ri Lehi pa Jerusalén.

3 Xel cʼu bic pa ri ulew riʼ, y man cʼo tä jun winak ri retaʼm jawi xbe wi/ Ri u cʼojol, are ri Nefi, xucʼolo ri u tzʼibaxic ri tak tzijobal che u qʼuexwäch ri u tat. Kas jeʼ xucʼolo u tzʼibaxic ri tzijobal que we winak riʼ.

4 Xoc cʼu riʼ, ri junab noventa y dos. Xcʼulmataj pa ri junab riʼ chi kas xchapletaj na u tzʼakatisaxic ri qui kʼalajisam ri kʼalajisalanelab che ri cäpe na. Je cʼu riʼ, cʼo tak retal, tak mayibal ri mas nim na qui banic ri xcʼutic chquixol ri winak.

5 Tzare e cʼo jujun ri xquibij chi xocʼow chic ri kʼijal rech cäcʼulmataj ri u tzij ri bim can rumal ri Samuel, ri aj Lamanita.

6 Xquichaplej u tzʼexic qui wäch ri cachalal, xquibij cʼut: Chiwilampeʼ, ocʼowinak chic ri kʼijal re ri u cʼulmaxic ri cubij ri u tzij ri Samuel. Rumal cʼu waʼ, man cʼo tä u patan ri i quicotemal y ri i cojobal chrij we jasäch riʼ.

7 Xcʼulmataj chi kas xquiyac wi jun nimalaj sachibal cʼux cho ronojel ri uwächulew. Y ri winak ri xecojonic xquichaplej jun nimalaj qui bis. Xoc il chi we ne man cäcʼulmataj tä na jas ri bim canok.

8 Tzare kastzij xqueyej rucʼ ronojel ri u cuinem qui cʼux che ri u petibal ri jun kʼij rucʼ ri jun chakʼab rucʼ ri jun kʼij chic, ri cäbantaj je jas man coc tä ri akʼab. Xqueyej cʼu riʼ rech cäquetamaj chi kas jeʼ cʼo u patan ri qui cojobal.

9 Xcʼulmataj cʼu riʼ chi cʼo jun kʼij ri tasatal cumal ri man e cojonelab taj. Y pa ri kʼij riʼ, xquichomaj quequicämisaj na conojel ri winak ri xecojon che ri ojer tzij ri qui cʼamom we tä man cäcʼulmataj taj ri retal ri xyaʼ can rumal ri Samuel, ri kʼalajisanel che ri cäpe na.

10 Xcʼulmataj cʼu riʼ chi aretak ri Nefi, ri u cʼojol ri Nefi, xrilo ri itzel tak qui chac ri u winak, xpe jun nimalaj bis pa ranimaʼ.

11 Xcʼulmataj chi xel apanok, xxuquiʼc cho ri ulew, xusiqʼuij cʼu ri u Dios rucʼ ri u chukʼab. Xusiqʼuij ri u Dios rumal quech ri u winak ri kas cäsachtaj na qui wäch rumal chi xecojon che ri tzij ri qui cʼamom ri qui tatayib.

12 Xcʼulmataj chi xtzʼonon che ri Ajawaxel rucʼ ronojel u chukʼab. Xuban waʼ che ronojel jun kʼij. Cʼäte riʼ, ri u chʼabal ri Ajawaxel spe ulok che, xubij:

13 Chawalajisaj ri a jolom, chbanaʼ jun utzalaj quicotemal pa awanimaʼ. Chawilampeʼ, kas ketetinak chic ri kʼij. Camic chakʼab, cäyataj na ri retal. Je cʼu riʼ, chuek quinalax na ulok cho ri ulew, rech quincʼutu chque ri winak ri e cʼo cho ri uwächulew chi kas quintzʼakatisaj na ronojel ri nu yaʼom pa qui chiʼ ri lokʼalaj kʼalajisanelab che ri cäpe na rech quetzijonic.

14 Chawilampeʼ, xinpe ulok chque ri e kas wi chutzʼakatisaxic ronojel ri nu kʼalajisam ulok chquiwäch ri calcʼual ri winak tzpa ri u tiquiritajic ri uwächulew. Xinpe ulok chubanic ri qui rayibal ri Tataxel y xukujeʼ ri Cʼojolaxel. Quinban na ri u rayibal ri Tataxel rumal wech ri in, y quinban na ri u rayibal ri Cʼojolaxel. Quinban na ri u rayibal ri Tataxel rumal wech ri in, y quinban na ri u rayibal ri Cʼojolaxel rumal rech ri nu tiojil. Chawilampeʼ, kas ketetinak chic ri kʼij, y camic chakʼab cäyataj na ri retal.

15 Xcʼulmataj cʼu riʼ chi kas xcʼulmatajic ri cubij ri tzij ri bim ulok che ri Nefi, je jas u beyal ri u bixic. Kastzij, man xoc tä kʼekum pa ri u kajibal ri kʼij. Cʼu conojel ri winak xemayinic rumal man cʼo tä kʼekum pa ri roquibal ri akʼab.

16 E qʼui ri winak ri nabe man xecojon tä che tak ri qui tzij ri kʼalajisanelab che ri cäpe na ri xetzak cho ri ulew je jas tä xecämic, rumal e areʼ riʼ ri qui sucʼumam u beyal ri sachibal qui wäch conojel ri xecojon che tak qui tzij ri kʼalajisanelab che ri cäpe na y quetaʼm chic chi man xchocon taj ri qui chomam. Xane xcʼutic chi rumal ri retal ri yatajinak, xopan chic ri kʼij.

17 Xchaplex cʼu riʼ ri quetamabal chi kas nakaj u cʼutbal rib ri u Cʼojol ri Dios. Kas jeʼ, conojel ri winak cho ri u wäch ronojel ri ulew, pa ri kajibal kʼij cʼä pa ri relbal kʼij, pa ri ulew ri cʼo cho u sucʼumal ri u wiquiakʼab ri relbal kʼij cʼä pa ri ulew ri cʼo pa ri u sucʼumal ri u wiquiakʼab ri kajibal kʼij, sibalaj xquimayij cho ri bantajinak cʼä xetzak wi cho ri ulew.

18 Rumal quetaʼm cʼut chi qʼui tak junab kʼalajisam waʼ cumal ri kʼalajisanelab che ri cäpe na. Quetaʼm chi petinak chic ri jun retal, y sibalaj xquixej quib rumal chi man e cojoninak taj y rumal ri itzel ri qui banom.

19 Xcʼulmataj cʼu riʼ chi man xuban tä kʼekum che ronojel ri chakʼab riʼ. Xuban cʼu riʼ jun sakil je jas ri u sakil pa kʼij. Cʼäte cʼu riʼ xcʼulmataj chi jumul chic xel ri kʼij pa akʼab, je jas ri u sucʼumal ri kʼij. Cʼu ri winak xquichʼobo chi are ri kʼij re ri ralaxibal ri Ajawaxel rumal ri jun retal ri xcʼutic.

20 Kastzij cʼulmatajinak ronojel we tak jastak je jas u beyal ri qui tzij ri kʼalajisanelab che ri cäpe na.

21 Cʼäte cʼu riʼ, xiltajic jun cʼacʼ chʼimil chicaj, je jas u beyal ri tzij.

22 Tzpa we jun kʼij riʼ, xcʼulmataj chi xtakic apan banow tak tzij chquixol ri winak rumal ri Satanás. Xuban waʼ rech chi cäcowir ri canimaʼ ri winak, rech man quecojon tä na chque tak ri etal, ri mayibal ri quilom wi. Pune jeriʼ, sibalaj winak man xecojon tä che we tak banow tzij y we subunic riʼ. Xane, kastzij xecojon che ri etal y ri tak mayibal, y xquicʼam ri Dios pa canimaʼ.

23 Cʼäte cʼu riʼ, ri Nefi xel bic chquixol ri winak y chquixol juleʼ winak chic. Xuban qui kasbal xeʼ jaʼ che ri qʼuexbal qui cʼux che ri qui mac, y jeriʼ xbantaj jun nimalaj esabal macaj. Y xpe ri utzil chi jumul chquixol ri winak cho we ulew.

24 Man xyac tä cʼu ri oyowal chquixol. Xak xu cʼo jujun ri xquichaplej qui tzijonic, ri xcaj ne xquicʼut rucʼ ri lokʼalaj tak tzʼibatalic chi man rajwaxic tä chic u nimaxic ri u takbal ri Moisés. Are man sucʼ tä qui chomanic chrij waʼ, kastzij man xquichʼob tä u cholaj ri lokʼalaj tak tzʼibatalic.

25 Xcʼulmataj cʼut chi chanim xqʼuex ri canimaʼ. Xquetamaj chi man sucʼum tä riʼ ri qui chomanic. Xkʼalajisax chquiwäch chi majaʼ riʼ xtzʼakatisax ri takbal, y chi rajwaxic cätzʼakatisax na u banic ronojel ri chʼutik tak jastak re ri takbal. Kas xpe wi ri tzij chque chi rajwaxic cätzʼakatisaxic, y chi man cʼo tä jun u bokʼwäch tzij, mawi quieb u bokʼwäch tzij ri quecanaj can cʼä cätzʼakatisaxic conojel ri jastak riʼ. Rumal cʼu riʼ, pa ri junab riʼ xoc pa qui jolom chi man sucʼ taj ri qui chomanic, y ri e areʼ xquikʼalajisaj cʼu ri man utz taj qui banom.

26 Xocʼow cʼut ri junab noventa y dos. Xyaʼ cʼu ri utzalaj bixical chque ri winak rumal ri retal ri xbantajic, je jas u beyal ri tzij ri xquikʼalajisaj ri lokʼalaj kʼalajisanelab che ri cäpe na.

27 Cʼäte cʼu riʼ, xocʼow ri junab noventa y tres. Xocʼow we junab riʼ pa utzil, tzare cʼo jujun ri man xquiban tä utzil. Are riʼ ri elakʼomab re ri Gadiantón ri xecʼojiʼ paquiwiʼ tak ri juyub, ri xquinojisaj cʼu waʼ ulew che elakʼomab. E areʼ cʼo sibalaj qui chukʼab pa tak ri qui cʼolbal ja ri xquicʼuʼ wi quib. Rumal cʼu waʼ, man xecuin tä ri winak che qui chʼequic. Xequicämisaj qʼui winak, xquiban sibalaj tak cämisanic chquixol ri winak.

28 Cʼäte cʼu riʼ, xocʼow ri junab noventa y cuatro. Xcʼulmataj cʼu pa ri junab riʼ chi sibalaj xeqʼuiyaric. Sibalaj winak xquiyaʼ can ri aj Nefitas y xebel cʼu chilaʼ cucʼ. Rumal riʼ, nim qui bis ri aj Nefitas ri xecanaj can cho ri ulew.

29 Cʼo xukujeʼ jas che quebisonic ri aj Lamanitas. Kastzij, cʼo qʼui ri calcʼual ri xeqʼuiyic, e nim chic. Jujun chque ri aj Zoramitas xquijechʼbej qui be rucʼ ri banow tak qui tzij y ri nimarisanel tzij. Jewaʼ cʼu riʼ, xquimulij quib cucʼ ri elakʼomab re ri Gadiantón.

30 Je cʼu riʼ, xkaj ri jun cʼäx paquiwiʼ ri aj Lamanitas xukujeʼ. Xquichaplej ri kajic rech ri qui cojobal y ri qui suqʼuilal. Xcʼulmataj riʼ rumal ri etzelal ri xebanow ri cʼacʼ ijaʼlil.