1 Xcʼulmataj cʼu riʼ chi ri Jesús xutak chque ri u tijoxelab chquicʼamaʼ ulok jubikʼ cäxlan wa, xukujeʼ u waʼl uvas, che ri areʼ.

2 Aretak e benak chic chucʼamic ri cäxlan wa y ri u waʼl uvas, xutak cʼut chque ri qʼuialaj winak chetʼuyulok cho ri ulew.

3 Petinak chic ri tijoxelab rucʼ ri cäxlan wa y ri u waʼl uvas, xuchap ri cäxlan wa, y xupiro, xutewichij cʼut. Xuyaʼ chque ri tijoxelab, xtakan chque chquitijaʼ.

4 Aretak qui tijom cʼu chic, y xnoj qui pam, xutak chque chquiyaʼo chque conojel ri winak.

5 Aretak qui tijom cʼu chic, y xnoj qui pam, xubij chque ri u tijoxelab: Cäcʼojiʼ na jun ri cätastaj canok, quinyaʼ cʼu na cuinem pa u kʼab rech cupir na cäxlan wa, cutewichij, cuyaʼ chque ri e aj ri nu winakil, chque conojel ri quecojon na, ri quekasax xeʼ jaʼ pa ri nu biʼ.

6 Are waʼ cʼut, amakʼel chinatajisaj chubanic je jas ri nu banom in, jeʼ, in nu pirom ri cäxlan wa, xukujeʼ nu tewichim, nu yaʼom chiwe.

7 Chibanaʼ cʼu waʼ che natabal re ri nu tiojil, ri nu cʼutum chiwe. Cʼu waʼ ri quibano cuyaʼ kʼalajisabal che ri Tataxel, chi junalic quininatajisaj. We tä amakʼel quininatajisaj, cäcʼojiʼ na ri wuxlabal iwucʼ.

8 Xcʼulmataj cʼut chi aretak u bim chic we tzij, xutak chque ri u tijoxelab chquichapaʼ ri u waʼl uvas ri cʼo pa ri kumbal, chquikumuj, xukujeʼ chquiyaʼo chque ri qʼuialaj winak rech cäquikumuj.

9 Xcʼulmataj cʼu riʼ chi je xquibano, xquikumuj cʼut, xenojic. Xquiyaʼo chque ri qʼuialaj winak, xquikumuj cʼut, xenojic.

10 Cʼu aretak qui banom waʼ ri tijoxelab, ri Jesús xubij chque: Ix tewichim rumal i banom waʼ. Cʼu are waʼ cutzʼakatisaj ri nu takbal, y kas cukʼalajisaj chuwäch ri Tataxel chi quiwaj quiban jas ri nu takom chiwe.

11 Amakʼel cʼut, chibanaʼ waʼ chque ri queqʼuexow qui cʼux y ri quekasataj xeʼ jaʼ pa ri nu biʼ. Chibanaʼ cʼu waʼ che natabal re ri nu quiqʼuel, ri xturuwic rumal iwech, rumal rech chi jewaʼ quikʼalajisaj chuwäch ri Tataxel chi amakʼel quininatajisaj. Cʼu we tä amakʼel quininatajisaj, cäcʼojiʼ na ri Wuxlabal iwucʼ.

12 Quinyaʼ cʼut jun nu takbal chiwe chibanaʼ we jastak riʼ. Cʼu we tä amakʼel quiban we jastak riʼ, ix tewichim, rumal rech chi ix yacatal puwiʼ ri nimalaj abäj wech.

13 Tzare conojel jachin chiwe ri quebanow u yaal u wiʼ o resabal u wiʼ waʼ, are man yacatal tä puwiʼ ri nimalaj abäj wech, xane yacatalic puwiʼ jun tacʼalibal re sanyeb. Cäkaj cʼu ri jäb, cänimar ri nimaʼ, cäpe ri nimalaj cakʼikʼ chquij, y cäkaj na paquiwiʼ ri e areʼ, quetzak cʼu na, jakalic ri u chiʼ ri xibalba che qui cʼamic.

14 Je cʼu waʼ, ix tewichim we quinimaj ri nu takbal, ri xtak ulok chwe rumal ri Tataxel rech quinyaʼ chiwe.

15 Kastzij, kastzij quinbij chiwe: Rajwaxic chi amakʼel chixcʼascʼatok y chibanaʼ chʼawem rucʼ ri Dios. We tä man quiban tä jewaʼ riʼ, quixtakchitaj na che mac rumal ri itzel, y quixkaj pa u kʼab.

16 Je jas ri in nu banom chʼawem rucʼ ri Dios chixol, jewaʼ cʼu riʼ chibanaʼ chʼawem rucʼ Dios chquixol ri nu winakil, chquixol ri nu winak ri kas queqʼuexow qui cʼux, ri quekasax xeʼ jaʼ pa ri nu biʼ. Chiwilampeʼ, in ri sakil. Nu banom jun cʼutbal chiwe.

17 Xcʼulmataj cʼut chi aretak ri Jesús u bim chi tak we tzij chque ri u tijoxelab, xutzolkʼomij rib chi jumul chque ri qʼuialaj winak, xubij chque:

18 Chiwilampeʼ, kastzij, kastzij quinbij chiwe, rajwaxic chi amakʼel chixcʼascʼatok, chibanaʼ chʼaem rucʼ ri Dios. We tä man quiban tä jewaʼ, quixtakchitaj na che mac. Are cʼu ri Satanás cäraj chi quixkaj pa ri u kʼab, rech quixuyicopisaj y quixujopij je jas cäban che ri trico.

19 Je cʼu riʼ, rajwaxic chi amakʼel chibanaʼ chʼawem rucʼ ri Tataxel pa ri nu biʼ.

20 Apasäch cʼut ri quitaʼ che ri Tataxel pa ri nu biʼ, kas jeʼ, cäyataj na chiwe we kas sucʼ jas ri quitaʼ, y we quixcojon chi kas quicʼam na.

21 Chibanaʼ chʼawem rucʼ ri Dios cucʼ ri iwixokil, cʼu ri iwalcʼual, amakʼel pa ri nu biʼ, rech cʼu jewaʼ quetewichix ri iwixokil, cʼu ri iwalcʼual.

22 Chiwilampeʼ cʼut, chimulij iwib amakʼel. Mibij cʼu che apachique achi chi man cäcuin tä cäpe iwucʼ aretak quimulij iwib. Tzare chiyaʼ chque chi quepe iwucʼ, mibij chque chi man quepe taj.

23 Tzare chibanaʼ chʼawem rucʼ ri Dios paquiwiʼ, mebiqʼuiak apanok. We tä quepe cʼu amakʼel iwucʼ, chibanaʼ chʼawem rucʼ ri Tataxel paquiwiʼ, pa ri nu biʼ ri in.

24 Rumal riʼ, chiyacaʼ i chäj rech cäjuluwic chquiwäch ri e aj ri uwächulew. Chiwilampeʼ, in riʼ ri jun chäj ri rajwaxic chi quiyaco. Ri chäj riʼ are ri nu banom, ri iwilom ix. Kastzij quiwilo chi nu banom chʼawem rucʼ ri Tataxel. Iwonojel ix cʼut iwilom chi xinbano.

25 Quiwilo xukujeʼ chi nu takom chi mawi jun chiwe quel bic. Xane nu takom chi quixpe cʼu wucʼ, rech quinaʼo, rech quiwilo. Je cʼu waʼ, chibanaʼ chque ri winak ri e cʼo cho ri uwächulew. Apachin cʼu ri cuxalkʼatij na we jun takbal, ri areʼ cuyaʼ rib chi cäcʼam u be che ri takchixic che mac.

26 Xcʼulmataj cʼut chi aretak ri Jesús u bim chic we tzij, xuyaʼ u bokʼwäch chque ri tijoxelab ri e u chaʼom, xubij chque:

27 Chiwilampeʼ, kastzij, kastzij quinbij chiwe: Quinyaʼ na jun chic takbal chiwe, cʼäte cʼu riʼ, cʼo chi quinbe chilaʼ rucʼ ri in Tat rech quincuinic quintzʼakatisaj ri juleʼ chic takbal ri u yaʼom chwe.

28 Wachinim cʼut, chiwilampeʼ, are waʼ ri takbal ri quinyaʼ chiwe: Miyaʼ chi mawi jun winak cucʼam nu tiojil, nu quiqʼuel we iwetaʼm chi man chʼajchʼoj taj, aretak quixpatanin pa we lokʼalaj waʼim.

29 Apachin ri cätijow nu tiojil, cäkumun ri nu quiqʼuel, y man chʼajchʼoj taj, areʼ cʼut cätijow, y cäkumun jun cʼokenic che u cʼux. Rumal cʼu riʼ, we iwetaʼm chi man chʼajchʼoj taj jun winak, rech cutij ri nu tiojil, rech cukumuj nu quiqʼuel, chibij che chi man yatal tä che chi cutijo.

30 Pune man rumal tä jeriʼ miqʼuiak apan chixol. Xane chipatanij rumal rech, y chibanaʼ chʼawem rucʼ ri Tataxel puwiʼ, pa ri nu biʼ ri in. Y we tä kas cuqʼuex u cʼux, y cäkasax xeʼ jaʼ pa nu biʼ ri in, je cʼu riʼ, quicʼulaj na. Cʼäte riʼ, quiyaʼ ri nu tiojil y ri nu quiqʼuel che.

31 Tzare we tä man cuqʼuex tä u cʼux, man cajilataj tä na chquixol ri nu winak, rech chi cʼu jewaʼ man cäcuin tä na cäretzelajic qui wäch ri nu winak. Chiwilampeʼ cʼut, quinchʼob qui wäch ri nu chij, areʼ e ajilam.

32 Are waʼ man cubij taj chi quiqʼuiako apanok pa tak ri ja jawi quitijoj iwib che ri pixab, y jawi quinimarisaj u kʼij ri Dios. Xane rajwaxic quitakej na u banic lokʼalaj patanixic umal quech ri e areʼ. Man iwetaʼm tä cʼut chi man quetzelej tä na ulok y cäquiqʼuex qui cʼux, y quebopan wucʼ, y tzʼakat u sucʼumal ri canimaʼ. In cʼut quebincunaj na. Cʼu ri ix quicʼam na ulok chque ri colotajic.

33 Rumal riʼ, chinimaj baʼ tak we tzij ri nu takom chiwe, rech man quixoc tä chuxeʼ ri cʼokenic. Tokʼob cʼut ri u wäch apachin ri cäkaj chuxeʼ ri u cʼokenic ri Tataxel.

34 Quinyaʼo we takbal chiwe rumal rech chi e cʼojinak oyowalalaj tak chomanic chixol. Tzare cʼut, ix tewichim we tä man cäcʼojiʼ tä oyowalalaj tak chomanic chixol.

35 Wachanim cʼut, quinbe cʼä chilaʼ rucʼ ri Tataxel, rumal rech chi rajwaxic quinbe na rucʼ ri Tataxel rumal iwech.

36 Xcʼulmataj chi aretak ri Jesús xuqʼuis u bixic tak we tzij riʼ xuyaʼ ri u kʼab paquiwiʼ ri tijoxelab ri e u chaʼom. Xuban waʼ chque chquijujunal cʼä u yaʼom ri u kʼab paquiwiʼ conojel ri e areʼ. Jeʼ, xuyaʼ u kʼab paquiwiʼ y xtzijon chque chquijujunal.

37 Ri qʼuialaj winak man xquita tä ri tzij ri xubij. Rumal cʼu riʼ, man xquiban tä kʼalajisabal re. Tzare ri tijoxelab kas jeʼ xukʼalajisaj chi xuyaʼ cuinem pa qui kʼab chukʼaxaxic ri Uxlabixel chque ri winak. Cʼu ri in quincʼut na chi kastzij we tzijobal.

38 Xcʼulmataj cʼut chi aretak ri Jesús u yaʼom chic ri u kʼab paquiwiʼ conojel ri e areʼ, xkaj jun sutzʼ chquixol ri Jesús cucʼ ri qʼuialaj winak, rech man xecuin tä che rilic.

39 Are kajinak chic ri sutzʼ chquiwäch, xel cʼu bic chquixol, xpakiʼ chicaj. Are cʼu ri tijoxelab xquilo, xquikʼalisaj ri xcʼulmatajic, chi kas xpakiʼ chi jumul chicaj.